CHAPUʼUSHI kepiain John suluʼu tü pueulokot Gujarat (India). Woutiisashi chi nüshikai süpülapünaa 1960. Eekajasaʼa John sümaa tü niikat jee na jaʼraishiikana nuwalayuu, katoolika naya otta nayoutashaatain Nüküjalin Pütchi chi nashikai.

Soʼu wanee kaʼi, aluwataanüshi John nutuma chi nüshikai sünain eʼikajawaa wanee karaloʼuta nümüin wanee nuwala sünain anoujaa. Wanaa sümaa tia, oʼyonoojiraashi süpachera najapü John süka wanee laata. Shiasaʼa süpülapünaa nuʼunuin, nukoʼoyoluin najapü süka wanee kuluulu jee nuʼunaka.

Nüntapa chamüin, naapüin tü karaloʼutakat sümüin nuʼwayuuse chi wawalakai, aküjat shia pütchi nüchiki Jeʼwaa. Shiʼraka eʼikaain süpachera najapü, «teiyajeerü pümüin» sümaka nümüin. Süsaajaka tü shiiyajüinjachikalü aka nia jee suʼlojoka tü nülioʼukat sümaa süüttaain wanee kuluulu sünain. Süchikijee tia, saainjaka té niyaaluʼu sümaa saashajaain nümaa süchiki tü Wiwüliakat.

Saaʼu kamaneein maʼin shia nümüin John, aʼwanajaasü tü jülüjapuʼukat naaʼin nachiki na Aküjaliikana Pütchi. Nüsakitka tia wawalakat sünain piamasü kasa. Nüsakirüin shia müleka shiimainre niain neʼe Jesuu chi Maleiwakai jee woʼuraajüinjanale sümüin María. Shiasaʼa süka shikirajaain sünain tü anüikiikat gujarati, süküjain nümüin tü nütüjaweekalü aaʼu suluʼu tü nünüikikat. Süchikijee tia, saapaka nümüin tü poyeetokot «Estas buenas nuevas del reino».

Naashajeʼerapa John tü poyeetokot, niyaawataka aaʼu shiain tü shiimainkat. Nuʼunaka nümaʼanamüin chi kapüchiinakai süpüla nüsakirüin nia sünain tü piamasükat kasa nüsakiraka anain tü wawalakat. Niasaʼa chi kapüchiinakai, aʼwoolojooshi nümüin sümaa nujunaain wanee Wiwülia nümüin sünain maa: «¿Satanaaichipa joo pia? ¿Jalasü süküjain tü Wiwüliakat nnojoluin niain Maleiwain Jesuu? ¿Jalasü süküjain nnojoliinjanain woʼuraajüin sümüin María? ¡Piiʼiyata tamüin jalain süküjain tia!». Nnojorüleejaʼa antapünaain suluʼu naaʼin John müinjatiain nünüiki chi kapüchiinakai nümüin. Nümaka John nümüin: «Müichimaʼaya mekerotuin taya piantua suluʼu wanee iküleesia katoolika». Maleʼejüinreeka nia.

Ekirajaashi John sünain tü Wiwüliakat namaa na Aküjaliikana Pütchi, naapa amaalü tü shiimainkat otta aʼyataashi nia nümüin Jeʼwaa. Anoujashii mapa nünain Jeʼwaa wanee nüpüshiirua. Mayaapejeʼe sülatüirüin 60 juya süchikijee tia, ayatüsia jaʼyain süsipala najapü John otta sotusü naaʼin sutuma tia tü kasa anasü saaʼinrakat wanee wawala nüpüleerua. Sütanalüin naaʼin tia süpüla niʼyataainjachin nümüin Jeʼwaa (2 Cor. 6:4, 6).