INDIA, Gujarat na mare kaji langai hta, Jon na kawa gaw 1950 ning hta Yehowa Sakse langai hku nna hkalup hkam la wa ai. Raitim, Jon, shi a kahpu kanau manga hte shi a kanu gaw makam masham kaba ai Roman Catholic ni rai ma ai. Dai majaw, shanhte gaw kawa a makam masham hpe ninghkap ma ai.

Lani mi hta, Jon a kawa gaw nawku hpung kaw na hpunau langai hpe laika sa jaw ya na matu Jon hpe tsun ai. Raitim, dai jahpawt hta, Jon gaw hpri bu kaba langai hpe hpaw nga ai shaloi, shi a lata hpe rat la hkrup ai. Shi kawa a ga hpe matut nna madat mayu ai majaw, sai pru nga ai lata hpe tsup ni hte kayawp nna laika sa jaw na matu pru mat wa ai.

Dai shara de du ai shaloi, hpunau a madu jan hpe laika jaw dat ai. Shi gaw Yehowa Sakse langai re. Shi gaw, Jon a lata hpe sadi hkrup nna karum ya na ngu tsun ai. Tsi sutdek hpe sa la nna hpye ai shara hpe kashin ya ai, lata hpe sumpan hte kayawp ya ai. Dai hpang, shi gaw Jon hpe hpalap kayau ya ai. Shi gaw Jon hpe grai hku hkau ai hku nna Chyum Laika lam tsun dan ai.

Shi madun ai tsawra myit a majaw, Yehowa Sakse ni hte seng ai Jon a hkamsha lam gaw galai shai hpang wa ai. Dai majaw, Jon gaw Catholic Church hte shai nga ai Yehowa Sakse ni a kamsham lam lahkawng hpe san wa ai. Yesu gaw Karai Kasang kun? Hkristan ni gaw Mari kaw akyu hpyi ra ai kun? ngu san wa ai. Nauna gaw, Gujarati ga hpe hkaja da ai majaw, san ai ga san hpe Jon chye na ai ga hte atsawm lu htai wa ai. Nauna gaw mahtai hpe Chyum Laika kaw nna madun dan nna, “Mungdan A Kabu Gara Shiga” ngu ai laika buk hpe jaw ai.

Dai hpang, Jon gaw dai laika buk hpe hti ai shaloi, shi hti ai lam ni gaw teng man ai lam re ai hpe chye mat ai. Shi gaw wa jau hpang de sa nna dai ga san lahkawng hpe san ai. Wa jau gaw grai pawt wa nna shi hpe Chyum Laika hte kabai nna ndai hku marawn ai: “Nang gaw Satan byin mat sai! Chyum Laika hta Yesu gaw Karai Kasang n re ai hpe tsun da ai lam ngai hpe madun rit. Mari hpe n mai nawku ai nga nna tsun da ai lam ngai hpe madun rit. Madun rit!” Wa jau dai zawn galaw ai majaw, Jon gaw grai mau mat ai. Catholic church de galoi mung bai n sa sai ngu wa jau hpe shi tsun dat ai. Shi galoi mung n sa sai.

Jon gaw Sakse Hkam ni hte Chyum Laika hkaja nna teng man ai lam hpe hkap la wa ai. Yehowa hpe nawku dawjau wa ai. Dai hpang, nta masha ni mung dai zawn galaw wa ma ai. Shaning 60 daram na ai hpang pyi, Jon a lata na ningma gaw, shi a prat hpe Yehowa a amu gun na matu galai shai shangun ai Hkristan tsawra myit madun wa ai lam hpe myit dum shangun ai.​—⁠2 Korinhtu 6:4, 6, 10.