THATHA wa John mwabatizibwa eribya Mwema wa Yehova okw’ighunzerera ly’emyaka ya 1950, omwa tawuni ye Gujarat, India. Aliwe John, baghalha babu bathanu n’abali babu, kuthya na mama wabu babya Bakatuliki kandi ibanzire edini ya kutsibu. Neryo, mubahakanisya erikirirya lya thatha wabu.

Kiro kighuma, thatha wa John mwamuthuma eyiri mughalha wethu ow’omwa kithunga athi amuthwalire ebaruha. Aliwe omwa ngyakya omo, John mwahuthalha kutsibu okwa munwe akakunulha ekidobo. Aliwe, kundi aby’anzire eriowa thatha wiwe, mwaboha ekironda amathwalha ebaruha.

John abere akahikayo, mwaha ebaruha ya muka mughalha wethu. Nayu abya Mwema wa Yehova. Mwalhangira omunwe wa John owali kw’ekironda neryo amanza erimuwathikya. Mwayenda akabbokisi kiwe akakabya mw’emibatsi, amoya ekironda n’erikiboha. Enyuma waho mwaha John y’ekyayi. Obuthuku bwosi obw’aghunza nayu abya iniane mumukanirya okwa Biblia.

Busana n’olhukeri olhwa omukali oyo amukanganaya, John mwatsuka erihindulha amalengekania awabya awithe okwa Bema ba Yehova. Neryo John mwabulya bibulyo bibiri ebihambire okw’ikirirya ly’Abema ba Yehova eriri mbaghane okwa ly’Abakatuliki. Mwamubulya Yesu nga nina Nyamuhanga kandi n’Abakristayo nga banatholere ibasaba Maria. Mwali wethu oyu abya iniabir’igha omubughe we Gujarati neryo mwasubirya John omwa mubughe wiwe. Mwamukangania eby’erisubirya omwa Biblia neryo amamuha n’akatabu “This Good News of the Kingdom.”

John mwayasoma akatabu ako neryo amalhangira ebyo akasoma ku y’ekwenene. Mwaghenda eyiri omufaza wabu (kutse omupadiri) amamubulya ebibulyo bibiri ibyan’ebyo. Omufaza oyo mwahithana n’erimughusako e Biblia n’eribugha inianatsurumire athi: “Wabiribya Sitani! Nyikanganaye aho e Biblia yikabugha yithi Yesu si Nyamuhanga. Nyikanganaye aho e Biblia yikabugha yithi isithwaramaya Maria. Nyikanganayeho!” John mwasweka akalhangira omufaza akayithwa athya. John mwabwira omufaza athi sihakiri kiro akendisy’ingirya omuthwe wiwe w’omwa Kikatuliki. Kandi ekyo ky’anabya akolire!

John mwatsuka erigha n’Abema ba Yehova, amaligha ekwenene, neryo amatsuka erikolera Yehova. Obuthuku mubwahika, n’abangyi ab’omw’eka yabu bamathwamu bathya. Enyuma w’emyaka 60, engolhu eyiri okwa munwe wa John yikinamw’ibukaya ekindu ekikakanganaya olhukeri lhw’Ekikristayo ekya muhira mw’omuhwa w’erihwerya engebe yiwe omwa mubiiri wa Yehova.—2 Abanya Korinto 6:4, 6.