O CHIEE pɔmbɔɔ Kuchulat, o Iŋdiaa niŋ, finyaa Chɔŋ sɔla yiŋɔɔ ni o wɔsi 1950 mɛɛlulaŋ le simnɔŋndo Chɛhowɛinɔɔ. Chuauwa a ŋɔmpum finyaa Chɔŋ ndoo nɔ ni. Puaa a yaa a waŋ laanduaa a yaa, nduyɛ Chɔŋ wa chua diiŋ ndɔɔ ni. Luomaŋ Katolikiiya nda wa nda kala nda waa ni. Nduyɛ ndaa kaala bɔɔ kaaŋndeŋ. Le saboo hoo, ma simul finya nda le mɛɛ o simnuŋ Chɛhowɛinɔɔ yɛ.

Paale pilɛ, mi Chɔŋ finya ndɔ viam ndu a yauwo le mbo kɔ ke puaapilɛnɔ nda wa o kundaa niŋndo. Kɛ mɛɛ Chɔŋ wa dɔɔmiiyo kumbioo idii koŋ, mbo boliŋ o suei tau. Le mɛɛ ndoo yeema finya ndɔ diikɔŋndo yɛ, mbo yii yuuloo o suei koowaŋ ma wa keŋ fulaa ve, okoŋ, mbo kua a yau nda vem ndu wo.

Mɛɛ Chɔŋ fuuluu naa nda vem ndu wa, mbo yɔŋgu puaapilɛnɔ koŋ laa ndɔ yauwo. Chɛhowɛinɔɔ o wa ni. Mbo cha naa Chɔŋ boliŋ o suei ya nduyɛ mbo yeema le ndu malaa. Mbo soli kɔfu ndɔ makoŋgoo, mbo dindi ndu pauwo nyɛkɛndɛi, okoŋ mbo chua kola ipɛŋgɔɔ, mbo yii ndu suei. Nduyɛ mbo bɛɛndial Chɔŋ kafioo mbo ke ndu. Teleŋ nda wa balta ichaŋyalaŋ dɔuwɔɔ wo, a Baabuiyo okɔɔ kinɛi nda wa suukaŋndo ni.

Le kɛndɛi o tosa hei ve, mi yiyaŋ Chɔŋ ndoo nɔ a Chɛhowɛiya okɔɔ wo kandu siŋgaŋndo. Le hei, mbo nyuna ndu nyunalaŋ la tiɔɔŋ le sabu laalaŋnda Seiyaa Chɛhowaa cho teŋgeŋ a Katolikiiya wo. Mbo nyuna te Chiisu cho Mɛlɛka ni nduyɛ te Kilisiɔŋnda nɔ pɛ ma piɛi Meele. Ndepilɛnɔɔ ndoo pɛɛku niŋ Kuchulatiiye nduyɛ mbo tiuba le Chɔŋ mulullo o suɛi nduɛi maŋgalɛi niŋ. Mbo chɔm ndu mulilaŋ o Baabuiyo niŋ nduyɛ mbo ke ndu bukui pɔmbɔɔ hoo, “This Good News of the Kingdom.”

Okoŋ kɔɔli, mɛɛ Chɔŋ veelu diomndaŋ o bukuiyo hoo niŋ, mbo sina maa tonyaa diomnda o wa veeloo laŋ la wa ni. Mbo kɔ nyuna simlachinɔ ndɔɔ o kaaŋndeŋ nyunala pilɛlaŋ ndaŋ kpe. Mi simlachinɔ ndɔɔ duaunuŋ tumbe tau nduyɛ mbo wu ndu Baabuiyo choo. Mbo wa deŋioo aa, “A simnuŋ Setana! Chɔm ya naa Baabuiyo dimi maa Chiisu cho Mɛlɛka le wo. Chɔm ya naa Baabuiyo dimi maa num piɛi Meele le wo. Chɔm ya!” Mi kɔndɔfillo bii Chɔŋ le chɔɔ simlachinɔ ndɔɔ suɛi waa naa tosaa. Mbo dimul simlachinɔ ndɔɔ maa fɛɛŋ bɛɛ o kue lɛ o kaaŋnde Katolikiiya le. Nduyɛ lepilɛ bɛɛ o kue lɛ le.

Mi Chɔŋ kandu Baabuiyo pɛɛkoo a Chɛhowɛiya, mbo chɛl tonyaa, nduyɛ mbo kandu Chɛhowa piɛiyo. Mɛɛ teleŋ tiŋ hiou, mi waŋnda apum o yuŋgu ndɔɔ niŋ bɛɛ chua tonyaa. Wɔsilaŋ 60 okoŋ kɔɔli, mi tindi wa Chɔŋ o ba wo loonuŋ ndu maa kɛndɛi Kilisiɔŋnɔɔ tosal ndu ve nyindu ndu ni le yoomu ndɔɔ soliŋndo kpeku le Chɛhowa piɛiyo.—Luomaŋnda 12:​9.