ဖဲ ၁၉၅၀ နံၣ်န့ၣ် ကၠီ(န်) အပါ ဒိးဘျၢထံဒ် ယဟိဝၤပှၤအုၣ်အသးတဂၤအသိး လၢသဝီ ကူၤကၠၢၤရး လၢကီၢ်အ့ဒံယါ အပူၤန့ၣ်လီၤ. ကၠီ(န်) အဒီပုၢ်ဝဲၢ်ယဲၢ်ဂၤ ဒီးအမိၢ်န့ၣ်မ့ၢ်ဝဲ ခဲးသလ့း ဒီးအသူၣ်ဆူၣ်သးဆူၣ်လၢ အတၢ်ဘူၣ်တၢ်ဘါ တကပၤလီၤ. လၢတၢ်န့ၣ်အဃိ အဝဲသ့ၣ်ထီဒါဝဲ အပၢ်အတၢ်စူၢ်တၢ်နာ်လီၤ.

ဘၣ်တနံၤ ကၠီ(န်)န့ၣ် အပါမၢအလဲၤဆှၢန့ၢ်အီၤလံာ်ပရၢလၢ ဒီပုၢ်ဝဲၢ်တဂၤအဟံၣ်လီၤ. တၢ်တဂီၤန့ၣ်ဖဲ ကၠီ(န်) အိးထီၣ်ဝဲထးဝါဒၢဖးဒိၣ်တဖျၢၣ်အခိၣ်အခါ အစုဘၣ်ကူးဖးဒိၣ်ညါ. ဘၣ်ဆၣ် မ့ၢ်လၢအဝဲ ဒိကနၣ်အပၢ်အကလုၢ်အဃိ ဘိၣ်ထီၣ်အစုလၢ တၢ်ကံးညာ် ဒီးလဲၤဆှၢဝဲလံာ်န့ၣ်လီၤ.

ဖဲကၠီ(န်) လဲၤတုၤဝဲအခါ အဝဲဟ့ၣ်လီၤလံာ်လၢ ဒီပုၢ်ဝဲၢ်တဂၤန့ၣ်အမါအအိၣ်လီၤ. ဒီးအမါန့ၣ် မ့ၢ်ဝဲယဟိဝၤပှၤအုၣ်အသးစ့ၢ်ကီးလီၤ. ဒီးဒီပုၢ်ဝဲၢ်မုၣ်အံၤ ထံၣ်ဝဲကၠီ(န်) အစုပူၤလီၢ်ဒီး ဃ့ပၢနုာ်လီၤန့ၢ်ဝဲကသံၣ်လီၤ. အဝဲလဲၤဟံးန့ၢ်ကသံၣ်ဒၢဒီး မၤကဆှဲကဆှီန့ၢ် အတၢ်ပူၤလီၢ်ဝံၤ ပၢနုာ်လီၤန့ၢ်ဝဲကသံၣ် ဒီးဘိၣ်ထီၣ်န့ၢ်အီၤလီၤ. ဝံၤဒီးဒုးအီအီၤထံချီစ့ၢ်ကီးလီၤ. ဒီးဖဲအဝဲတဲတၢ်ဒီး ကၠီ(န်) ဒီတကတီၢ်န့ၣ် အဝဲတဲဝဲလံာ်စီဆှံအဂ့ၢ်လၢ တၢ်မဲာ်မုာ်နါဆၢအပူၤလီၤ.

မ့ၢ်လၢဒီပုၢ်ဝဲၢ်မုၣ်အံၤအသးဂ့ၤလၢ ကၠီ(န်) အဖီခိၣ်အဃိ ကၠီ(န်) အတၢ်ပာ်သူၣ်ပာ်သးလၢ ယဟိဝၤပှၤအုၣ်အသးတဖၣ်အဖီခိၣ်န့ၣ် ဆီတလဲဝဲလီၤ. လၢတၢ်န့ၣ်အဃိ အဝဲသံကွၢ်ဝဲ ဒီပုၢ်ဝဲၢ်မုၣ်အံၤ တၢ်သံကွၢ်ခံဖျၢၣ်လၢအဘၣ်ဃးဒီး ယဟိဝၤပှၤအုၣ်အသးတဖၣ် အတၢ်စူၢ်တၢ်နာ် လၢအလီၤဆီလိာ်အသးဒီး ခဲးသလ့းအတၢ်ဘူၣ်တၢ်ဘါန့ၣ်လီၤ. အဝဲသံကွၢ်ဝဲလၢ ယ့ၣ်ၡူးန့ၣ် မ့ၢ်ကစၢ်ယွၤဧါ ဒီးခရံာ်ဖိတဖၣ် ကြၢးဃ့ဘါထုကဖၣ်တၢ်လၢ နီၢ်မၤရံအအိၣ်ဧါ. မ့ၢ်လၢဒီပုၢ်ဝဲၢ်မုၣ်အံၤ မၤလိဘၣ်ဝဲ ကူၤကၠၢၤရးထံၤ ကျိာ်အဃိ အဝဲစံးဆၢက့ၤ ကၠီ(န်) လၢကူၤကၠၢၤရးထံၤ ကျိာ်သ့ဝဲလီၤ. ဒီးအဝဲစံးဆၢက့ၤ ကၠီ(န်) လၢလံာ်စီဆှံအပူၤ ဒီးဟ့ၣ်လီၤဝဲ လံာ်ဖိလၢအမ့ၢ် “This Good News of the Kingdom” န့ၣ်လီၤ.

လၢခံဖဲ ကၠီ(န်) ဖးဝဲလံာ်ဖိအံၤဝံၤအခါ အဝဲသ့ၣ်ညါဝဲလၢ တၢ်လၢအဖးဘၣ်ဝဲတဖၣ်န့ၣ် မ့ၢ်ဝဲတၢ်မ့ၢ်တၢ်တီလီၤ. အဝဲလဲၤလၢ အတၢ်အိၣ်ဖှိၣ်သရၣ်အအိၣ် ဒီးသံကွၢ်ဝဲတၢ်သံကွၢ်ဒ် အသံကွၢ်ဝဲဒီပုၢ်ဝဲၢ်မုၣ်န့ၣ်လီၤ. အတၢ်အိၣ်ဖှိၣ်သရၣ်န့ၣ် အသးဒိၣ်ထီၣ်အီၤ ဒီးကွံာ်အီၤလၢလံာ်စီဆှံ ဒီးကိးဃါအီၤလၢ– “နၤအံၤ နကဲထီၣ်မုၣ်ကီၤလံၢ်လံ. လံာ်စီဆှံအဆၢလၢ အတဲဝဲလၢ ယ့ၣ်ၡူးတမ့ၢ်ယွၤဘၣ်န့ၣ် အိၣ်ဖဲလဲၣ်. ဒုးနဲၣ်ယၤတထံၣ်. လံာ်စီဆှံအဆၢလၢ နတဘၣ်ဃ့ဘါထုကဖၣ်တၢ်လၢ နီၢ်မၤရံအအိၣ်ဘၣ်န့ၣ် အိၣ်ဖဲလဲၣ် ဒုးနဲၣ်ယၤတထံၣ်.” မ့ၢ်လၢတၢ်အိၣ်ဖှိၣ်သရၣ်အံၤ မၤဝဲဒ်အံၤအဃိ ကၠီ(န်) ဖုးဘၣ်အသးဒိၣ်မးလီၤ. အဝဲတဲတၢ်အိၣ်ဖှိၣ်သရၣ်လၢ အဝဲတဟဲက့ၤထီၣ် ခဲးသလ့း အသရိာ်အပူၤနီတဘျီလၢၤဘၣ်. ဒ်အဝဲတဲဝဲအသိး အဝဲတက့ၤထီၣ်ဝဲ နီတဘျီလၢၤဘၣ်.

ကၠီ(န်) စးထီၣ်မၤလိလံာ်စီဆှံဒီး ယဟိဝၤပှၤအုၣ်အသး ဒီးတူၢ်လိာ်ဝဲတၢ်မ့ၢ်တၢ်တီ ဒီးစးထီၣ်မၤယဟိဝၤယွၤ အတၢ်မၤလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး အဟံၣ်ဖိဃီဖိအဂၤတနီၤစ့ၢ်ကီး ကဲထီၣ်ယဟိဝၤပှၤအုၣ်အသးလီၤ. ပူၤကွံာ်အနံၣ် ၆၀ ဝံၤအလီၢ်ခံ ကၠီ(န်) အစုဘၣ်ဒိအလီၢ်န့ၣ် ဒုးသ့ၣ်နီၣ်ထီၣ်အီၤလၢ ခရံာ်ဖိအတၢ်မၤဂ့ၤတခါအဃိ ထိၣ်ဟူးထိၣ်ဂဲၤထီၣ်အီၤလၢ အကဟ့ၣ်လီၤအသးလၢ ကမၤယဟိဝၤယွၤ အတၢ်မၤတစိၤအသးန့ၣ်လီၤ.—၂ ကရံၣ်သူး ၆:၄, ၆.