KUM 1950 chho bâwr vêl khân, India ram Gujarat biala khaw tê pakhatah, John-a pa chu Jehova Thuhretu pakhat niin baptisma a chang a. Mahse, John-a, a nu leh a unau pangate chu Roman Katholic niin, sakhaw mi tak an ni a. Chuvângin, pa ber rinna chu an dodâl hle a ni.

Ni khat chu, a pa chuan John-a chu kohhrana unaupa pakhat hnênah lehkha thawn va pe tûrin a tîr a. Mahse, chumi zîng chuan John-a chu tui zêm lian tak a hawnnaah a kutzung ṭang a tiât palh a. Chuti chung pawhin, a pa thuâwih a duh avângin a kutzung ṭang hliam chu puana tuamin lehkha thawn pe tûr chuan a kal chhuak ta a.

Chuta a va thlen chuan unaupa nupui hnênah lehkha ip chu a pe a. Ani pawh Jehova Thuhretu a ni. John-a kut hliam a hmuh chuan damdawi hnawhsak a tum a. Tichuan a damdawi bâwm (first-aid) chu a va la a, a kutzung ṭang hliam laite chu tihfaisakin, pân tuamnain a tuamsak ta a ni. A tuam zawhah, John-a tân thingpui a siamsak a. Thingpui in chhûng zawng chuan nêlawm takin Bible thute a hrilh a ni.

Unaunu ngilneihna avângin Thuhretute chungchânga John-a rilru put hmang chu a danglam ṭan ta a. Tichuan, Katholic mite thurin nêna inkalh tak Jehova Thuhretute rin dân pahnih a zâwt a. Chu chu Isua hi Pathian a ni em? tih leh Kristiante chu Mari hnêna ṭawngṭai tûr an ni em? tih hi a ni. Unaunu chuan Gujarati ṭawng a thiam avângin John-a ṭawng hman Gujarati ṭawngin a chhâng a. A chhânna chu Bible aṭangin a hmuhtîr a, “He Ram Chanchin Ṭha Hi,” tih lehkhabutê pawh a pe bawk.

A hnuah, John-a’n chu lehkhabutê a chhiar chuan thutak a ni tih a hre ta a. Tichuan an puithiam hnênah a va kal a, chu zawhna pahnih vêk chu a va zâwt a. Puithiam chu a thinrim êm avângin, John-a chu Bible in a vawm a, ring tak hian: “Setana i nih hi! Isua chu Pathian a ni lo tih khawi Bible chângah nge a awm min hmuh rawh. Mari biak tûr a ni lo tih khawiah nge a sawi min han hmuh teh. Min hmuh ta che!” tiin a lo vîn ta chiam mai a. Puithiamin chutianga a ti chu John-a chuan mak a ti hle a. Katholic kohhranah a kal leh ngai tawh lo vang tiin puithiam chu a hrilh a. A sawi ang chuan a kal tawh lo!

John-a chuan Thuhretute nên Bible a zir a, thutak a pawm a, tichuan Jehova rawng a bâwl ta a ni. A hnuah, a chhûngte zînga mi engemaw zâtin thutak an hriat phah bawk. Kum 60 a liam hnuah pawh, John-a kutzung ṭanga ser chuan Jehova rawngbâwl tûra chêttîrtu Kristian ngilneihna thiltih pakhat chu a hriatchhuahtîr a ni.—2 Korinth 6:4, 6.