KU INDIA, mu mbonge ya indende ya Gujarat, mua kele umo mukuendze ua lizina John. Vaise va va mbatizile ku pua Mukaleho ua Yehova ku ntsongo ya miaka 1950. Vunoni John, na vanaye na vantsongo veni va puile Vakua Katolika va ntsintsa. Ngeci va kele na ku luisa ise mu ku pua Mukaleho.

Tangua limo, John va mu tumine kuli ise ku tuala mukanda kuli umo muanetu mu cikungulukilo. Vunoni ku cimene caco, John ua livulumuine mbandu ya kama ku munie tele a teta cimo citasu ca kama. Vutuhu ngoco ua tondele ku ononoka ise, ngeci ua kutile kantanga ku munie uaco na ku tuala mukanda.

Mua hetele John, ua hanene uze mukanda kuli mpuevo ya muanetu uaco, muomu ikeye lika ya uaneneko. Mpuevo uaco neni ua puile Mukaleho ua Yehova. Mua tambuile mukanda ua yalieni kuli John, ua muene mbandu ya kele nayo ku munie. Ngeci ua kovelele mu ndzivo na ku nona cikasa cavo ca vihemba, ua kusile ha mbandu na ku hakaho citopeko. Kaha ua mu lingilile sha. Mua kele na ku linga viose evi tele a li na ku handeka na John via Mbimbiliya.

Omo lia ngozi i va mu muesele, John ua putukile ku mona Vakaleho mu cifua ca cili. Kaha ua lingile uze ndokazi yetu vihula vivali ku tuala ha viuma vi va tsiliela Vakaleho va Yehova via litepa na via vakua Katolika. Ua mu hulile nga Yesu ikeye mpundu Njambi ni kuahi kaha nga Vakua Kilistu va pande ku vundila kuli Maliya. Uze ndokazi tele ua lilongesa ciGujarati, ngeci ua kumbuluile mu lilimi lieni ivene. Ua mu lekesele vikumbululo via mu Mbimbiliya na ku mu hana livulu “Ou Muzimbu ua Cili ua Vuangana.”

Kaha omo John ua ka tandele livulu liaco, ua muene ngecize via kele na ku tanda via puile vusunga. Ua ile kuli patele yavo na ku mu hula vene vihula viaco vivali. Patele ua nienguele cikuma na ku mu asa Mbimbiliya, kaha ua tenduoka ngueni: “U na pu u Satana! Nji lekese haka mu Mbimbiliya ha va soneka ngecize Yesu kati Njambi. Nji lekese haka ha va vindika ku lemesa Maliya. Nji lekese nguange!” John ua lisimuokele mua muene patele a linga vize. Ngeci ua mu lekele ngueni na limo litangua liahi a ka liata naua mu Katolika. Cili vene ka ileko naua!

John ua putukile ku lilongesa Mbimbiliya na Vakaleho, ua tavele vusunga, kaha ua putukile ku pangela Yehova. Ku lutue lua ntsimbu, cingi ca vavusoko veni navo va lingilemo. Mu nima ya imo miaka 60, citamba ca kala ku munie ua John ce ku mu vuluisa cize cilinga ca ngozi ca mu lingisile a putuke ku pangela Yehova mu muono ueni uose.​—2 Kolintu 6:4, 6.