MU cidhorobha cidoko mu Gujarati, ku India, babake John vakabhabhatijwa inga Capupu ca Jehovha mukupera ko makore o 1950. Asi John, hama no hambzaji jake shanu, pomwe na mai wake vainga maKatorika o Ciroma zve vaibatisisa maningi zvokunamata. Ngo iyo ndava, vakatanga kunyenya zvaitenda babevo.

Njiku imweni, John wakakumbihwa ndi babake kuti aende koosiya nviropi ku hama yo ku ungano. Asi co mangwanani wondhoo, John wakazviceka maningi pa cikunwe paainga ecifunungura cirata. Pikija zvakadaro, iyena waida kuzwira baba wake, ngokudaro, wakacisunga ngo cipendera zve wopinda koosiya nviropi iya.

John paakaguma pa muzi po hama iya, wakapekeja nviropi mukaji wayo. Iyena wainga umwe wo Zvapupu zva Jehovha. Iyena wakavona kuti John ano civonje pa cikunwe zve wakada kubesera. Wakaenda kootora pasta yake inogara mutombo, wakasuka civonjeco zve wakasunga cikunwe ciya ngo ragadhura. Perapo wakamuitira ica. Paainga eciita zvese izvi, waieja kubhuya naye mu njira yo ushamwari ngo pamusoro po Bhaibheri.

Ngo ndava yo kunaka kwake mwoyo, mazwiro a John ngo pamusoro po Zvapupu zva Jehovha akatanga kucinja. Ngokudaro, iyena wakaita mubvunjo muviri ngo pamusoro po zvitendhwa zvo Zvapupu zva Jehovha zvinosiana no zvo Gerejha Katorika. Iyena wakabvunjisa kudari: ‘Jesu ndi Mwari here?’ Wondibvunjisazve kuti: ‘MaKristu anodikana kuita mukumbiro kuna Maria here?’ Zvecivoneka kuti hambzaji iyi yainga yakajijira Cigujarati, yakakwanisa kudavira John ngo ndumi yake kamare. Yakamudavira yecishandisa Bhaibheri, perepo yomupa cibhuku cinoti: “Aya Mashoko Akanaka oUmambo.”

No papera mukuvo wakati kuti, John paakapera kuverenga cibhuku ciya, iyena waiziva kuti zvaaingaro eciverenga cainga cokwadi. Wakaenda ka padri zve wakamuitira mubvunjo muviri jiya. Padri wakanyangajwa maningi zve wakamufura ngo Bhaibheri, womukhuwira eciti: “Iwewe waa Sathana! Nditatijei zvecibvira mu Bhaibheri kuti Jesu asipi Mwari. Nditatijei panonanga kuti atidikani kunamata Maria. Nditatijei!” John wakakahamara ndizvona ngo kuvona padri ecidavira kudeya. Iyena wakabvunja padri kuti narini aacaizoendazve ku Gerejha Katorika. Zve aazivi kuzoendazve!

John wakatanga kujija no Zvapupu, wakanghwina mu cokwadi zve wakatanga kushandira Jehovha. Mu kufamba ko nguva, vandhu vazinji vo pa ukama hwake vakaitavo zvondhozvo. No papera 60 o makore, John akasota mbanga pa cikunwe cake anoceukija ciito co kunaka mwoyo ko maKristu, cakamutora kuti ashandire Jehovha mu upenyu hwake hwese.—2 VaKorinto 6:4, 6.