TATE ya John wambatisalua konthyulilo yomanima 1950 mepunda-umbo etutu lio ko Gujarat, mo India. Mahi John, novakulu vae vetano nonomphange mbae, na me yae ankho ovo Katolika iya vehole unene ongeleya yavo. Mokonda yotyo, ankho veyele tate yavo Ombangi ya Jeova.

Nthiki imwe, tate ya John wemuita opo atuale omukanda komukuatate womewaneno. Mahi onthiki oyo komuhuka, John elitete komunwe putyina ankho aikula okalata. No ngotyo John etavela ku tate yae, akutu omunwe oo una otyipute notyinyanga iya atuala omukanda.

Etyi John ehika peumbo, avasipo vala omukai womukuatate oo. Nae ankho Ombangi ya Jeova. Etyi atambula omukanda, etyimono okuti John weliteta komunwe iya emukuatesako. Iya akoho potyipute tyae apakepo ovihemba. Konyima emulingila-po okafe katokota nawa. Tyina ekahi nokumulingila ovipuka ovio, nouwa-tima otyo atomphola na John konthele yo Mbimbiliya.

Mokonda yomphange oo watomphola nae nouwa-tima, John ehimbika okupilulula olusoke lwae konthele yo Nombangi mba Jeova. Tupu John alingi omapulo evali akolela omphange oo. Ankho uhanda okunoñgonoka inkha Jesus na Huku omunthu wike iya inkha Ovakristau vapondola okulikuambela ku me Maliya. Iya omphange oo, ankho utyivila okupopia elaka lio guzerate, elaka liokonthuko lia John iya akumbulula omapulo ae no Mbimbiliya melaka liae. Tupu emuavela otratadu yati, “Onondaka Onongwa Mbouhamba wa Huku.”

Konyima etyi John atanga otratadu, aimbuka otyili tyo Mbimbiliya. Moluotyo aende kelombe liae elilingi omapulo ana evali. Elombe alinumana unene alimuvete no Mbimbiliya alihimbika okumukandukila okuti: “Ove watyituka Satanasi! Ndekese mo Mbimbiliya apa pati Jesus ha Huku ko. Tupu ndekese apa pati kupondola okulikuambela ku Maliya. Ndekese liwa!” John elitehelela unene omapita etyi elombe liemupopia iya ati: “Nalumwe vali mandyiende kokapela.” Iya tyili afuisapo umwe etyi apopia

John ehimbika okulilongesa Ombimbiliya no Nombangi mba Jeova etavela otyili iya aumbila Jeova. Mokueenda kuomuvo, ovanyingi mo mbunga yae avahimbika okulilongesa Ombimbiliya. John wakala nelapia komunwe mokueenda kuomanima ehungi 60. Mahi apeho tyina elitala uhinangela onkhalelo ongwa omphange atompholele nae yemukuatesako okunoñgonoka Jeova.​—2 Coríntios 6:4, 6.