JOHN sutiyuq mozom ayllunwan yacharqa India nacionpa huk taksa llaqtachanpi. Taytanmi 1950 watakunapi Jehova Diospa testigon kananpaq bautizakururqa. Ichaqa John, maman hinaspa suqta wawqi-paninkunaqa catolico kasqankuraykum mana munarqakuchu taytanku testigo kanantaqa.

Huk kutipim, Johnta taytan kamachirqa papelkunata huk kaqnin iñiqmasinman apananpaq. Chay punchawmi Johnqa latawan makinta kuchukurqa. Ichaqa taytanta kasuspanmi latapakunawan makinta wankuykuspan rirqa.

John chayaruspanqa taytanpa iñiqmasinpa warmillanmanmi apasqan papelkunata quykurqa. Paymi Johnpa makinta qawaykuspan hampiykunanpaq nirqa. Sumaqta hampiykuspanmi makinta wankuykurqa. Chaymantañataqmi yaku timpuchata quykuspan bibliamanta kuyakuywan rimapayarqa.

Johnqa mana allinpaqmi testigokunataqa hapiq, ichaqa pisi-pisimantam mana chaynatañachu piensarqa. Chaymi Johnqa iñiqmasinchikta bibliamanta tapukuyta qallaykurqa. Johnqa piensarqam Jesusqa Dios kasqanta hinaspa Mariata mañakunamantapas, taytanmi ichaqa mana chaynatachu piensarqa. Kay iñiqmasinchikqa gujarati rimayta yachasqanraykum bibliata kichaykuspan Johnpa rimayninpi chay tapukuyninkunamanta yachachirqa. Quykurqataqmi “Estas buenas nuevas del reino” niq qillqanchiktapas.

Chay qillqata ñawincharuspanmi Johnqa musyakurqa chiqap yachachikuy kasqanta. Iglesianman rispanmi curamanpas hina kaqllata tapurqa. Ichaqa curaqa llumpayta piñakuruspanmi bibliata wischuykuspan nirqa: “¿¡Kunanqa satanasñachu rikurirunki!? ¿Maypitaq bibliapiqa yachachin Jesusqa mana Dios kasqantaqa? ¿Maypitaq nin Mariata mana mañakunamantaqa? ¡Niway!”, nispa. Johnqa curapa chayna ruwasqanta qawaspanmi nirqa: “Manañam haykapipas catolicokunapa iglesianmanqa yaykusaqñachu”, nispa. Chaymantam Johnqa pasakurqa.

Johnqa testigokunawanmi bibliamanta yachayta qallaykurqa, bibliamanta imam kaqta yacharuspanmi Jehova Diosta yupaychayta qallaykurqa. Wakin ayllunkunapas kunanqa testigoñam kanku. Johnqa makinta qawarispanmi yuyarin iñiqmasinchik kuyakuywan hampiykusqanta. Chayqa 60 wata ñawpaqtam yanaparqa Diosta yupaychananpaq (2 Cor. 6:4, 6).