I TETAI oire meangiti i Gujarat, Initia, kua papetitoia te papa o John ei Kite no Iehova i te au mataiti 1950. Inara ko John, tona au tungane e rima e te tuaine, e to ratou mama e au Katorika Roma tumu. No reira, kua patoi ratou i te akarongo o papa.

Tetai rā, kua pati to John papa iaia kia apai i tetai tikiro ki tetai taeake i roto i te putuputuanga. I tera popongi, kua motu to John rima te vaʼi anga aia i tetai tini paero maatamaata. Noatu ra, kua akarongo aia ki tona papa, no reira kua tākai aia i tona rima motu ki te kakau e kua apai i te tikiro.

Te tae anga a John ki te kainga o te taeake, kua oronga aia i te tikiro ki te vaine a te taeake. Koia tetai Au Kite o Iehova. Kua kite aia i te motu o John e kua oronga i te tauturu. Kua rave mai aia i tana apinga tapiripiri, tamā i te motu, e kua tapeka i te reira. E oti kua maani aia i tetai kapu ti na John. I taua taime rai te tuatua ra aia ma te tu oaoa no runga i te Pipiria.

No tona tu takinga meitaki, kua taui to John manako no te Au Kite. No reira, kua ui aia e rua uianga no runga i te au irinakianga o te Au Kite o Iehova tei tuke ki ta te Akonoanga Katorika. Ui aia e me ko Iesu te Atua e me ka pure te au Kerititiano kia Maria. Kua apii te tuaine i te reo Gujarati e kua pau i ta John uianga i roto i tona reo. Pau aia mei roto i te Pipiria e kua oronga i te puka “This Good News of the Kingdom.”

I muri mai, te tatau anga a John i te puka, kua kite mai aia e ko te tuatua mou tana e tatau ra. Kua aere aia ki te orometua e kua ui i taua uianga rai. Kua riri te orometua e kua pei mai i te Pipiria ki runga iaia, ma te kapiki e: “Kua riro mai koe ko Satani! Akaari mai kiaku e, eaa ta te Pipiria i tuatua e kare ko Iesu te Atua. Akaari mai i te ngai e karanga ra kare tatou e akamori ia Maria. Akaari mai!” Poitirere tikai a John i te tu o teia orometua. Akakite aia ki te orometua e kare rava aia e oki akaou ki te pure Katorika. E kare rava aia i oki ana!

Akamata a John i te apii ki te Au Kite, āriki i te tuatua mou, e kua tavini ia Iehova. I muri mai, kua aru tetai au mema o te ngutuare iaia. E 60 mataiti i muri mai, te maara nei rai ia John te motu i runga i tona rima i te tu takinga meitaki Kerititiano tei akakeu iaia kia akapou i tona oraanga kia tavini ia Iehova.​—2 Korinetia 6:4, 6.