КИ ЈЕКХ тикни диз ко Гуџарат (Индија), ко крајо таро 1950-та берша о дад е Џонескоро уло е Јеховаскоро сведоко. Ама, о Џон, лескере дуј пхраља, о трин пхења хем и дај сине ревна католикија. Адалеске, противинена пе сине пле дадеске.

Јекх диве, е Џонескоро дад пучља ле дали шај те ингарел јекх писмо јекхе пхралеске таро собрание. Ама, адава сабај о Џон чхинѓа пло нај џикоте пхравела сине јекх лимено бура. Адалеске со мангља те шунел пле даде, о Џон паќарѓа пло нај јекхе крпаја хем гело те ингарел о писмо.

Кеда о Џон ресља ко адава тхан, ов денѓа о писмо е пхралескере ромњаке. Ој сине е Јеховаскоро сведоко. Ој дикхља кај лескоро нај тано паќардо крпаја хем адалеске мангља те поможинел ле. Леља пли кутија баши прва помош, чистинѓа и рана хем паќарѓа лескоро нај. Пало адава керѓа леске чај хем цело време ко јекх шукар начин керѓа леа лафи баши Библија.

Адалеске со сине шукар леа, ов почминѓа појавер чхане те дикхел ко Сведокија. Ов пучља ла дуј пучиба башо буќа коленде со верујнена е Јеховаскере сведокија кола со разликујнена пе тари Католичко црква. Пучља ла дали о Исус тано Девел хем дали о христијања ваљани те молинен пе е Маријаке. И пхен џанела сине и чхиб гуџарати хем адалеске шај сине те одговоринел леске ки лескири чхиб. Ој сикавѓа леске о одговорија тари Библија хем денѓа ле и брошура Акава шукар хабери башо Царство. * (Дикх и фуснота.)

Пало адава, кеда читинѓа и брошура, халило кај адава тано о чачипе. Ов гело ко пло свештенико хем пучља ле о иста дуј пучиба. О свештенико бут хољанѓа хем фрдинѓа и Библија упри лесте, хем викинѓа: „Уљан Бенг! Сикав манге ки Библија коте пишинела кај о Исус нане Девел. Сикав манге коте пишинела кај на ваљани те молина амен е Маријаке. Сикав манге!“ О Џон сине бут изненадимо тари реакција е свештеникоскири. Ов вакерѓа леске кај никогаш повише нане те џал ки Католичко црква. Чаче да керѓа аѓаар!

О Џон почминѓа те проучинел е Сведоконцар, прифатинѓа о чачипе хем почминѓа те служинел е Јеховаске. Сар накхела сине о време, јавера да тари лескири фамилија керѓе о исто. Иако оттегани накхле 60 берша, о белего ко лескоро нај панда сетинкерела ле ки јекх шукар постапка која со поттикнинѓа ле цело живото те служинел е Јеховаске (2. Кор. 6:4, 6).