PAI wace John abatizwa ninga m’bodzi wa Mboni ya Yahova mu pyaka 1950 mu nzinda ung’ono wa Gujarat, ku Indiya. Mbwenye John, abale ace axanu, pabodzi na mai wawo akhali a uphemberi Wacikatolika. Na thangwi ineyi, iwo akhapokanya kakamwe pikhakhulupira babawo.

Ntsiku inango, John aphembwa na pai wace toera kapereka envelopi kuna m’bale wace ku mpingo. Mbwenye ntsiku ineyi namacibese, John acekeka cala pikhafungula iye cithini. Nakuti akhafuna kubvera pai wace, amanga cala cace na cinguwo mbaenda kapereka envelopi.

Pidafika John, iye apereka envelopi kuna nkazi wa m’bale unoyu. Iye akhalimbo m’bodzi wa Mboni za Yahova. Pikhatambira iye envelopi, aona kuti John acekeka cala mbaperekeka toera kumphedza. Iye atoma kuntsalakana mukutsuka cala cace, mbapyangirira ligadura. Buluka penepo acita xaya mbampasa. Mu ndzidzi unoyu onsene iye akhacedza naye pya Bhibhlya mwacitsalakano.

Thangwi yakukoma ntima kwace, John atoma kucinja maonero ace thangwi ya Mboni za Yahova. Natenepa acita mibvundzo miwiri kuna mulongo unoyu thangwi yakusiyana kwa Mboni za Yahova na Gereja ya Katolika. Iye abvundza khala Yezu ndi Mulungu, pontho khala Akristu asafunika kuphembera kuna Mariya. Mulongo akhadapfundza cilongero ca Guzerate, natenepa akhakwanisa kutawira John mu cilongero cace. Iye antawira mukuphatisira Bhibhlya mbampasa kabukhu “Estas Boas Novas do Reino.”

Mukupita kwa ndzidzi, John aleri kabukhu kadapaswa iye, mbadzindikira kuti pikhaleri iye ndi undimomwene. Iye aenda kuna padhri wace mbancita mibvundzo mibodzi ene idacita iye mulongo. Padhri amponyera Bhibhlya mwakuipirwa kakamwe mbalonga: “Iwe ndiwe Sathani! Ndipangize m’Bhibhlya vesi inalonga kuti Yezu nee ndi Mulungu. Ndipangize panalonga iyo kuti iwe nee usafunika kuphembera Mariya. Ndipangize!” John atsukwala thangwi yakutsalakanwa na padhri munjira ineyi. Iye apanga padhri kuti cipo anenda pontho ku gereja ya Katolika. Natenepa, iye nee aendabve!

John atoma kupfundza Bhibhlya na Mboni za Yahova, mbatoma kutumikira Yahova. Mukupita kwa ndzidzi, onsene a pa banja ya John acitambo pibodzi pyene. Pakupita pyaka 60, dazi ya cala ca John isapitiriza kunkumbusa kukoma ntima kudapangiza mulongo kwakuti kwancitisa kutumikira Yahova.—2 Akorinto 6:4, 6.