JOHN tata bi tei dopu ko dë wan Jehovah Kotoigi baka di jaa 1955, a wan piki foto de kai Gujarat, di dë a di köndë India. Ma John ku dee feifi baaa ku sisa fëën, ku de mama bi dë a Lomusu keiki, nöö de bi dë seei fajafaja a di biibi dë. Di soni aki bi mbei de an bi lobi di keiki u de tata.

Wan daka, hën John tata hakisi ën faa tja wan biifi go da wan baaa u di kemeente. Ma di mamate dë, hën John koti hën finga a wan gaan felu bali. Ma tökuseei a bi kë du di soni di hën tata bi mandëën. Fëën mbei a tai di finga fëën ku wan koosu pisi, hën a tja di biifi go.

Di John dou a di kamian ka a musu tja di biifi go, hën a da di mujëë u di baaa di biifi. Di mujëë dë seei bi dë wan Jehovah Kotoigi. Di mujëë aki bi si taa John finga ta kule buuu. Wantewante dë a go tei wantu deesi, hën a buta deesi a di finga, hën a tai ën. Baka di dë, hën a mbei wan te da John faa bebe. Hii di pisiten dë, di mujëë bi ta konda soni u Bëibel da John, a wan suti fasi.

U di a bi fan a wan suti fasi ku John, mbei John bi bigi ko ta si dee Kotoigi woto fasi. Fëën mbei a hakisi di sisa tu soni di tooka a Jehovah Kotoigi ku di Lomusu keiki. A bi hakisi ën ee Jesosi da Gadu, söseei ee Keesitu sëmbë musu ta begi Malia. Wë u di di sisa bi lei di Gujarati töngö, mbei a bi sa piki John nëën mamabëë töngö. A bi lei ën dee piki a di Bëibel, hën a dëën wan buku de kai „This Good News of the Kingdom.”

Bakaten, di John lesi di buku, hën a ko si taa dee soni dee a lesi dë da tuutuu soni. A bi go a di paiti go hakisi ën dee tu soni di a bi hakisi di sisa. Hën di paiti hati boonu tee taa a vinde di Bëibel naki ën, hën a bai taa: „I ko toon Saatan! Lei mi naasë a sikifi a Bëibel taa Jesosi na Gadu. Lei mi ka a sikifi taa wa musu begi Malia. Lei mi!” Di soni aki bi bigi da John te na soni. Hën a piki di paiti taa nöiti möön a bi o buta futu a wan Lomusu keiki. Nöö nöiti möön a go tu!

John bi bigi ta lei soni u Bëibel ku dee Jehovah Kotoigi, hën a ko ta dini Jehovah. Te u kaba fëën, sömëni woto sëmbë u di famii fëën bi ko ta dini Jehovah tu. Nöunöu söwan 60 jaa pasa kaa, nöö te John ta luku di aligbosu a di finga fëën, nöö a ta mbei a toona mëni di suti fasi fa de bi libi ku ën. Di soni dë hën bi mbei a ko ta dini Jehovah.​—2 Kolenti 6:4, 6.