A PAPAI wa John, a nga hanya ka xidoropana xo kari le Gujarate, India, i bapatizilwe kota Mboni ya Jehova ka malembe ya va 1950. Kanilezi John ni vamakabye vakwe va ntlhanu, ni mamani wabye va wa hi vaKatolika vo hiseka nguvu. Hi xigelo lexo, va wa zi kaneta nguvu lezi a papai wabye a nga zi kholwa.

Ka siku go kari, a papai wa John i mu rumile ku ya nyikela papilo ka makabye wo kari. Kanilezi ka mixo leyo John i wa ti tsemile litiho na a zama ku vulula mutambori. Hambulezo, i wa lava ku ingisa papai wakwe. Hikwalaho, i bohelele litiho lakwe hi xitarapo a heleketa papilo.

John i chikele a kuma sati wa makabye loye, a mu nyika papilo. I wa hi Mboni ya Jehova. A xikhati a nga amukela i polile ku John i ti bayisile litiho, a si xuva ku mu vuna. I no suka a ya teka xikhwama xakwe xa mimuri, a ta bhandicha a litiho la John. Anzhako ka lezo i kungetile caya a mu nyika. Zontlhe lezo i zi mahile na a kari a bhula naye hi Biblia hi ndlela ya xinghana.

Hi kota ya wunene lego, John i sangulile ku cica mawonela yakwe xungetano hi Timboni ta Jehova. Hikwalaho i mahile ziwutiso zimbiri xungetano hi lezi a Timboni ti zi kholwako zo hambana ni za Chechi ya Katolika. I wutisile ku Jesu hi Nungungulu ke, niku a maKristu ma fanele ku khongela ka Maria ke. A makabye loye i wa gonzile xiGujarati. Hikwalaho, i zi kotile ku hlamula John hi lirimi lakwe la mabeleko. I mu kombile mihlamulo ya kona lomu ka Biblia a tlhela a mu nyika a xibhukwana “Estas Boas Novas do Reino.”

A xikhati lexi John a nga lera xibhukwana lexo, i zi wonile ku lezi a lerako lisine. Hikwalaho, i yile ka paderi wakwe a ya mu maha ziwutiso zalezo za zimbiri. A paderi loye a si mu zangarela a tlhela a mu hoxela Biblia na a bhonga aku: “U nghenelwe hi Satani! Nzi kombe laha a Biblia gi nge Jesu a hi Nungungulu. Nzi kombe laha gi nge a wu faneli ku khozela Maria. Nzi kombe!” A mahlamulela ya paderi loye ma mu tlhavile nguvu John, a se tekela ku mu byela ku a nga ta haya kambe chechini ya Katolika. A nga ha yangi futsi!

John i sangulile ku gonza Biblia ni Timboni, a vumela lisine, a tlhela a sangula ku tirela Jehova. Hi kufamba ka xikhati, a votala ngangweni wakwe vonawu va sangulile ku tirela Jehova. Zalezi ka hunza a 60 wa malembe, kanilezi a xibawa lexi xi nga laha ka litiho la John xa ha mu alakanyisa a wunene ga wuKristu legi gi nga mu maha a sangula ku tirela Jehova. — 2 Va Le Korinte 6:4, 6.