VIMBO limue litito ko Gujarate kofeka yo India, isia ya John umue pokati Kolombangi Via Yehova wa papatisiwa kunyamo wo 1950. Pole, John la vamanjaye vatãlo kuenda ina yavo wa tiamẽlele ketavo lio Katolika kuenda va kakatelele calua ketavo liaco. Omo liaco, va enda oku lambalala isiavo.

Eteke limue isia ya John wo pinga oco a ka tuale ukanda kumanji umue vekongelo. Pole, komẽle John wa li lemẽha komuine poku tela etamboli limue. Omo okuti wa yonguile oku pokola ku isiaye, wa kuta ocinyaña cimue komuine waye kuenje wa ka tuale ukanda.

Eci John a pitĩla, wa eca ukanda kukãi wamanji yaco. Eye Ombangi ya Yehova. Ukãi waco wa limbuka okuti John wa lilemeha komuine kuenje wo kuatisa. Eye wa sukula omuine waco loku kapako ihemba. Noke wo lingilako o chá. Osimbu ukãi waco a kala oku linga ovina viaco, wa sanda oku sapela laye catiamẽla Kembimbiliya.

Omo liohenda yukãi waco, ovisimĩlo via John viatiamẽla Kolombangi Via Yehova, via pongoloka. Omo liaco, eye wa linga apulilo avali kukãi waco atiamẽla kalongiso Olombangi Via Yehova okuti, a litepa lalongiso Etavo lio Katolika. Eye wo pula nda Yesu eye Suku kuenda nda Akristão va pondola oku likutilila ku Maria. Omo okuti manji wa tẽlele oku vangula elimili lio Gujarati, wa tẽla oku tambulula John kelimi liaye muẽle. Eye wa lekisa ku John atambululo a tunda Vembimbiliya kuenda wo wiha okokanda losapi hati, “Estas Boas Novas do Reino,”

John noke yoku tanga okokanda kaco, wa limbuka okuti ovina a tanga viocili. Kuenje wa enda kusongui wavo wetavo kuenda wo lingavo apulilo aco avali. Usongui wetavo wa tema calua wo wimba Embimbiliya loku kaluka hati: “Ove wa linga Satana! Ndi lekise Vembimbiliya apa pa sangiwa okuti Yesu ha Sukuko. Ndekisevo apa pa sangiwa okuti Maria ka fendeliwa. Ndekise!” John wa sumua calua omo liocituwa usongui wetavo a lekisa. Eye wa sapuila usongui waco okuti lalimue eteke a enda vali Konembele yo Katolika. Kuenje wa liwekapo oku enda konembele yaco!

John wa fetika oku lilongisa Embimbiliya Lolombangi Via Yehova kuenda wa fetika oku fendela Yehova. Noke valua pokati kepata liaye va fetikavo oku lilongisa. Pa pita ale 60 kanyamo, emome komuine waye li u ivaluisa okuti, ohenda okuti ocituwa Cakristão, co vetiya oku vumba Yehova vokuenda kuomuenyo waye wosi.—2 Va Korindo 6:4, 6.