یہ 1950ء کے دہے کے آخر کی بات ہے۔‏ بھارت کی ریاست گجرات کے ایک چھوٹے سے قصبے میں جان نامی لڑکے کے ابو نے یہوواہ کے گواہ کے طور پر بپتسمہ لیا تھا۔‏ لیکن جان،‏ اُن کے پانچ بہن بھائی اور اُن کی امی کٹر کیتھولک تھے۔‏ اِس وجہ سے جان کے ابو کو اپنے گھر والوں کی طرف سے سخت مخالفت کا سامنا تھا۔‏

ایک دن جان کے ابو نے اُن سے کہا کہ وہ کلیسیا کے ایک بھائی کو ایک لفافہ دے کر آئیں۔‏ لیکن اُس صبح ٹین کا ڈبہ کھولتے ہوئے جان کی اُنگلی بُری طرح سے کٹ گئی۔‏ پھر بھی وہ اپنے ابو کی بات ماننا چاہتے تھے۔‏ لہٰذا اُنہوں نے اپنی اُنگلی پر پُرانے کپڑے کا ٹکڑا باندھا اور لفافہ لے کر چل پڑے۔‏

جب جان اُس بھائی کے گھر پہنچے تو اُنہوں نے وہ لفافہ اُس بھائی کی بیوی کو دیا۔‏ وہ بھی یہوواہ کی گواہ تھی۔‏ اُس نے دیکھا کہ جان کی اُنگلی پر چوٹ لگی ہوئی ہے۔‏ اُس نے جان سے کہا کہ وہ اُن کی اُنگلی پر پٹی کر دیتی ہے۔‏ پھر اُس نے جان کا زخم صاف کِیا اور اِس پر پٹی باندھ دی۔‏ اِس کے بعد اُس نے جان کے لیے گرما گرم چائے بنائی۔‏ اِس پورے وقت کے دوران وہ جان کے ساتھ بڑی خوش‌مزاجی سے بائبل کے بارے میں بات کرتی رہی۔‏

اُس بہن کی اِس مہربانی کی وجہ سے یہوواہ کے گواہوں کے بارے میں جان کی سوچ تبدیل ہونے لگی۔‏ اُنہوں نے اُس بہن سے دو ایسے موضوعات کے متعلق سوال پوچھے جن کے بارے میں یہوواہ کے گواہوں کی تعلیم کیتھولک چرچ کی تعلیم سے فرق ہے۔‏ اُنہوں نے پوچھا کہ کیا یسوع خدا ہیں اور کیا مسیحیوں کو مریم سے دُعا کرنی چاہیے۔‏ اُس بہن نے گجراتی زبان سیکھی ہوئی تھی اِس لیے اُس نے جان کو اُن کی زبان میں اِن سوالوں کے جواب دیے۔‏ اُس نے یہ جواب بائبل سے دیے اور پھر جان کو بادشاہت کی خوش‌خبری کے موضوع پر ایک کتاب دی۔‏

بعد میں جب جان نے اِس کتاب کو پڑھا تو وہ سمجھ گئے کہ جو کچھ وہ پڑھ رہے ہیں،‏ وہ سچ ہے۔‏ پھر وہ اپنے پادری کے پاس گئے اور اُس سے بھی وہی دو سوال کیے۔‏ اِس پر پادری شدید غصے میں آ گیا۔‏ اُس نے جان کی طرف بائبل پھینکی اور چیخ چیخ کر کہنے لگا:‏ ”‏تمہارے اندر شیطان سما گیا ہے!‏ بتاؤ مجھے کہ بائبل میں کہاں لکھا ہے کہ یسوع خدا نہیں ہے۔‏ اور یہ کہاں لکھا ہے کہ ہمیں مریم کی پرستش نہیں کرنی چاہیے۔‏“‏ پادری کے اِس رویے پر جان کو بڑا دھچکا لگا۔‏ اُنہوں نے پادری سے کہا کہ وہ دوبارہ کبھی کیتھولک چرچ نہیں جائیں گے۔‏ اور وہ کبھی گئے بھی نہیں۔‏

اِس کے بعد جان نے یہوواہ کے گواہوں سے بائبل کورس کرنا شروع کر دیا،‏ سچائی کو قبول کر لیا اور یہوواہ کی خدمت کرنے لگے۔‏ کچھ وقت کے بعد اُن کے خاندان کے کئی اَور لوگ بھی یہوواہ کے گواہ بن گئے۔‏ آج تقریباً 60 سال گزر جانے کے بعد بھی جان کی اُنگلی پر اُس زخم کا نشان ہے۔‏ یہ نشان اُنہیں اُس مہربانی کی یاد دِلاتا ہے جس کی وجہ سے اُنہیں اپنی ساری زندگی یہوواہ کی خدمت میں صرف کرنے کی ترغیب ملی۔‏—‏2-‏کُرنتھیوں 6:‏4،‏ 6‏۔‏