Ko He Aga Fakakilisitiano Ia Te Agaʼofa
ʼI INITIA, ʼi te kiʼi kolo veliveli ʼi Gujarat, ko te tamai ʼa John, neʼe papitema ʼi te kau Fakamoʼoni ʼa Sehova kua hili nei ki ai taʼu ʼe 60. Kaʼe ko John mo ʼona tehina mo tokolua pea mo tanatou faʼe, neʼe natou Katolika pea neʼe natou tauhi lotu lelei. Koia ʼae neʼe natou fakafeagai ai ki te lotu ʼa tanatou tamai.
ʼI te tahi ʼaho, neʼe fekauʼi ia John e tana tamai ke alu ʼo ʼave te sila ki te tehina ʼo te kokelekasio. Kaʼe ʼi te uhu ʼaia, neʼe lavea kovi tona kauʼi tuhi he neʼe ina avahi ia te foʼi poe. Logo la neʼe lavea, kaʼe neʼe fia fakalogo pe ki tana tamai. Neʼe ina haʼi tona kauʼi tuhi ʼaki te moʼi kie pea alu ai leva ʼo ʼave ia te sila.
ʼI te tau atu ʼa John ki te ʼapi, neʼe ina fakatoʼo te sila ki te ʼohoana ʼo te tehina. Neʼe ko te Fakamoʼoni ʼa Sehova. Neʼe ina tokagaʼi te lavea ʼo te kauʼi tuhi ʼo John pea neʼe ina fia vakaʼi. Neʼe alu ai ʼo ʼaumai ʼana meʼa faitoʼo. Neʼe ina fufulu ia te lavea pea neʼe ina haʼi fakalelei tona kauʼi tuhi. Hili ia, pea neʼe ina fai age tona ti. Lolotoga te temi ʼaia, neʼe agalelei ia te tuagaʼane pea neʼe palalau age ʼo ʼuhiga mo te Tohi-Tapu.
ʼUhi ko te agaʼofa ʼaia ʼa te tuagaʼane, neʼe kamata fetogi ai leva ia te faʼahiga manatu ʼa John ʼo ʼuhiga mo te kau Fakamoʼoni ʼa Sehova. Pea neʼe fai e John ʼana fehuʼi ʼe lua ʼo ʼuhiga mo te ʼu akonaki ʼa te kau Fakamoʼoni ʼa Sehova ʼae ʼe kehekehe mo te Lotu Katolika. Ohage la, pe ʼe ko Sesu ko te ʼAtua, pe ʼe tonu koa ke faikole ia te kau Kilisitiano kia Malia. Neʼe ako e te tuagaʼane ia te lea Gujarati ʼae ʼe mahino ki ai ia John. Koia ʼae neʼe ina tali ai ki ʼana fehuʼi ʼaki te Tohi-Tapu ʼi te lea Gujarati pea mo ina foaki age ia te kaupepa “Cette bonne nouvelle du royaume” ʼi te lea pe ʼaia.
ʼI tana lau te kaupepa ki muli age, neʼe mahino ai ia John neʼe ko te moʼoni ʼaia. Pea neʼe alu ai ki tana patele ʼo toe fai age pe ki ai te ʼu fehuʼi ʼe lua ʼae neʼe ina fai ki te tuagaʼane. Neʼe ita lahi ai te patele pea neʼe ina li ki ai ia te Tohi-Tapu ʼo muna leʼo lahi fenei: “Kua ke liliu ko Satana. Fakaha mai ʼi te Tohi-Tapu te ui ʼae ko Sesu ʼe mole ko te ʼAtua. Fakaha mai pe ʼe tuʼu ʼifea te ui ʼae ʼe mole tonu ke tou atolasio kia Malia. Fakaha mai.” Neʼe punamaʼuli ʼosi ia John ki te feia ʼa te patele. Neʼe ina ui ai ki te patele ʼe mole toe alu anai ʼi he ʼaho ki he ʼekelesia Katolika. Pea neʼe mulimuli pe ki ai ia John.
Neʼe ako leva e John ia te Tohi-Tapu mo te kau Fakamoʼoni ʼa Sehova, ʼo ina tali ai te moʼoni pea mo tauhi kia Sehova. ʼAki te temi, neʼe ʼi ai ʼihi ʼo tona famili neʼe natou faʼifaʼitakiʼi ia ia. Kua hili nei ki ai ia teitei taʼu ʼe 60, kaʼe ʼe kei ina manatuʼi pe ʼaki tona mataʼi lavea, te agaʼofa ʼae neʼe tupu ai leva ia tana tauhi kia Sehova ʼi tona maʼuli katoa.—2 Kolonito 6:4, 6.