SASOSER Moses idwarek snonkaku sya fa sifores ḇa, imnis raris sikofen, ”Yankar ḇaḇeri ra Manseren” ḇaido ”Yafores kuker Yahwe snori.” Ḇape, ro Yesus fafisu ḇyedi, snonkaku Yahudi simarisen sifores faro rosai sikofen nakam. Sifrur roi ine insama snonkaku sya sikyar wos sena. Ḇape, kali risuru Yesus idwarek fararur ḇemnis radine snaro nun fainda ḇa. Yesus doḇe, ”Rofyor mḇoi Iḇye mkokofen: mḇoi, rofyor roḇa, iḇye mkokofen: roḇa.”​—Matius 5:33-37; 23:16-22.

Theological Dictionary of the New Testament ikofen snar ro Talmud bisa kofawi snar snonkaku Yahudi napyan kaku fa sifores snar rosai sikofenna ima nkaku. Ine snaro Talmud fyasnaḇair kaku fafores ḇemnis rariso fandun fa sifrurna ma fafores ḇemnis rariso bisa siyukna.

Yesus demir ḇedwarek fararur ine ḇa. Imnis raris, sejarawan Yahudi Flavius Josefus fyas kuker sekte ḇero Yahudi ḇedwarek snonkaku ḇero sekte ine sifores. Snonkaku ḇero sekte ine sikyar kofores ima iḇyeḇa syadi kuker kawos ankarkar. Skara rofyor snonkaku oso ifores insama snonkaku ḇese sikyar faro i, ima kyurfasna snonkaku ani dankarkar. Apokrifa Yahudi, kitab Kebijaksanaan Sirakh, ḇaido Eklesiastikus (23:11) ikofen kako, ”Snonkaku ḇefores ima sneri iḇyeḇa.” Yesus imewer kofores kuker roi ḇefandun mankunḇa. Rofyor kokofen kakaku pdef ido, kofores awer fa kofrur snonkaku sya sikyar rosai kawosna.