SHIMBI ya Mose, te yakwecha atu hanga alishinge hakwamba maliji ngwe, “Ni Zambi lume” hanji “mu jina lia Yehova.” Alioze ha mashimbu a Yesu, mashingo kokele chinji, chocho A-Yunda yaputuka kulishinga ha yuma yeswayo te mamba. Ayo te kakuchilinga hanga sololole ngwo yize te akwamba yili yilemu chinji, alioze Yesu yahisa chako chino kaali keswe. Iye yalongesa ngwenyi: “Liji lienu likapwe, ewa, ewa; hanji ka, ka.”—Mateu 5:33-37; 23:16-22.

Kulita ni Talmud, umwe Mukanda wa Ulumbunuwino wa Usendo Waha, mu Ingles, wakutukwasa kumona chize A-Yunda apwile chinji ni kulishinga, hanji ngwo maliji jo a shingo kapwile aumwenemwene. Yino yalingiwile mumu mukanda Talmud unalumbununa mu yimako-yimako shingo lize te atamba kufunga, ni lize te katambile kufunga.

Hi wika ko Yesu wahishile chako chino chipi. Chakutalilaho, umwe mukwa-sango ja yishima ja A-Yunda Flavius Josephus kasonekene hakutwala ku umwe uwayilo wa A-Yunda ngwo katamba kwehuka kulishinga. Akwa-uwayilo wacho te kakufuliela ngwo kulishinga chapwile chuma chipi kuhiana mahuza. Ayo kanyongene ngwo nyi mutu malishinga hanga akwo amufuliele, mutu wacho mahasa kupwa mukwa-mahuza. Yisoneko apócrifa ya A-Yunda Mana ja Siraque, hanji Eclesiástico, (23:11) neyo unambe ngwo: “Mutu yoze malishinga chamushingila akwo keshi kumujikijila.” Yesu kahishile kulinga shingo hakutwala ku yuma yize kuyishi ulemu. Nyi twakuhanjeka umwenemwene mashimbu eswe, kutwatambile kulishinga hanga tusolole kuli akwetu ngwo yize tunahajika yili yamwenemwene.