MOSIA Dân hnuaiah chuan mite chu “Pathian hmaah chhia ka chham e,” a nih loh leh “Jehova hmingin chhia ka chham e,” tia chhechham phâl a ni a. Mahse, Isua hun a lo thlen chuan mite’n chhechham an uar ta lutuk a, an thusawi apiang deuh thawhah chhia an chham a. An thusawi chu rin tlâk a nihzia lantîr nâna chhechham an ni a; mahse, tih tak tak awm si lo va chutianga chhechham vak vak chu Isua’n a sawisêl a ni. Ani chuan: “In thu sawi chu ‘A ni, a ni,’ ‘Ni lo , ni lo’ ni ngawt rawh se,” tiin a zirtîr a ni.—Matthaia 5:33-37; 23:16-22.

Theological Dictionary of the New Testament chuan Juda mite’n an thusawi chu a dik tih nemngheh nân chhia an chham ngunzia hre thiam tûrin Talmud lehkhabuin min ṭanpui tiin a sawi. A chhan chu Talmud lehkhabuah chuan chhechham vawn tûr leh vawn loh tûrte chipchiar taka a hrilhfiah vâng a ni.

He chîn dân dik lo tak sawisêltu hi Isua chauh a ni lo. Entîr nân, Judate chanchin zir mi Flavius Josephus-a chuan chhechham ve ngai lo Juda pâwl pakhat chungchâng a ziak a. Chu pâwl mi leh sate chuan chhechham chu dawtsawi ai pawhin sual zâwkah an ring a ni. Miin mi dang rintîr a duh avânga chhechham ngaia a inhriat chuan chu pa chu dawtsawi hmang a nih ngei an ring tlat a. Judate lehkhabu Apocryphal ziak, Sirach thufingte, a nih loh leh Thuhriltute (23:11) chuan chutiang bawkin: “Chhechhamtu chuan dân a bawhchhia a ni,” tiin a sawi a. Isua chuan thil pawimawh vak lova chhechham chu a sawisêl a ni. Englai pawha thutak kan sawi reng chuan, mite’n kan thusawi an rin lehzual theih nâna chhia kan chham khêr a ngai lo.