OVITUMINO Viapelwe Moisesi ankho kaviilika okuaana iya ovanthu vapondola okuana okupopia okuti: “Na Huku umwe” ine “Ndyiana menyina lia Jeova.” Mahi pononthiki mba Jesus ovanthu ankho vena otyituwa tyokuaana kese tyipuka vapopia. Ankho vaana opo ovanthu vetavele etyi vapopia. Mahi Jesus ailika otyituwa otyo ovikando vivali. Walongesa okuti: “Yekei ondaka yenyi ‘Eenga’ ikale umwe eenga iya o ‘Au’ yenyi, aikala umwe au.”​—Mateus 5:33-37; 23:16-22.

Ngetyi tyipopia o Dicionário Teológico do Novo Testamento “ova Judeu ankho vena otyituwa tyokuaana kese etyi vapopia.” Omukanda Talmude uhangununa nawa onondaka patyi mbesukisa okuaana nambuna mbehesukisile okuaana.

JJesus haeko vala wayalele otyituwa otyo otyivi tyokuaana. Mongeleka, Flávio Josefo wahoneka konthele yongeleya imwe yova Judeu pononthiki mba Jesus okuti: “Ankho kavaane, mokonda ankho vetavela okuti okuaana onkhali onene vali tyipona okukemba. Palavo inkha omunthu tyina apopia otyipuka tyimwe ankho waana pala vakuavo vetavele etyi apopia, otyo tyilekesa okuti ukemba.” Omukanda utiwa apócrifo, hono wihanua okuti Eclesiástico, (23:11) upopia otyipuka tyelifwa notyo, wati: “Una waana ukahi nokulipakela ovivi.” Jesus ankho uyele otyituwa tyokuaana kese tyipuka. Inkha onthue apeho tupopia otyili, kamatusukisa okuaana opo ovanthu vetavele etyi tuapopia.