KUA akatika te Ture a Mose i te tangata kia rave i tetai au tia na te tuatuaanga, “Te tia nei au kia koe i tika i te Atua,” me kore “Te tia nei au ma te ingoa o Iehova.” Inara, i to Iesu tuatau, kua riro te taputou ei mea matauia e ka taputou te ngati Iuda i tetai ua atu apinga ta ratou ka tuatua. Kua akapera ratou ei akapapu kia irinakiia ta ratou tuatua, inara e rua taime kua akaapa a Iesu i teia peu puapinga kore. Kua apii aia ia ratou: “Kia riro ra ta kotou Koia, ei koia; e ta kotou Kare, ei kare.”—Mataio 5:33-37; 23:16-22.

Kia tau ki te Theological Dictionary of the New Testament, te tauturu maira te Talmud ia tatou kia kite mei teaa rai te matau no te ngati Iuda kia rave i te au taputou, me kore kia tia i ta ratou tuatua ei mea tika. Kua akamārama maata te Talmud e ko teea te au taputou ka akonoia e ko teea te au taputou ka aatiia.

Kare ko Iesu anake tei akaapa i teia au peu tarevake. Ei akaraanga, kua tata te tangata ngati Iuda tuatua enua ko Flavius Josephus no runga i tetai pupu ngati Iuda tei kopae i te au taputou. Irinaki ratou e te aronga tei maani i teia au taputou nei e kino roa atu i te pikikaa. Manako ratou e me anoanoia tetai tangata kia rave i te taputou kia irinakiia aia e tetai ke, e pikikaa aia. Te akakite ra te tataanga Jewish apocryphal Wisdom of Sirach, me kore Ecclesiasticus, (23:11) e: “Te tangata tei tia ua e meameau tikai.” Akaapa a Iesu i te maani taputou no te au mea puapinga kore ua. Me akakite ua rai tatou i te tika, kare e anoanoia kia taputou kia irinakiia ta tatou e tuatua ra.