HUKUNG Musa tawe nẹ̌sěding taumata mẹ̌salu, kụ mẹ̌bera, ”Iạ mẹ̌salu si kau su arengu Mawu”, arau ”iạ mẹ̌salu su areng i Yehuwa.” Katewe, su tempong i Yesus, tau Yahudi seng nawiasa mẹ̌salu su haghing wisarang i sire. I sire někoạ kerene tadeạu taumata wal᷊inẹ mangimang apa niul᷊ị i sire, katewe i Yesus duang sul᷊ẹ nẹ̌sěding hal᷊ẹ̌ ene. I sie naul᷊ị, ”Pẹ̌berạe ’Ore’ arau ’Tala’.”—Mat. 5:33-37; 23:16-22.

Tumuhụ Theological Dictionary of the New Testament, bọu kitab Talmud i kitẹ makasingkạ kerea kasaune tau Yahudi mẹ̌salu bawerang i sire ene kahěngang. Ini ual᷊ingu Talmud nělahẹ salu sude koateng dingangu tawe harusẹ̌ koateng.

Bal᷊inẹ kětạeng i Yesus tawe setuju dingangu hal᷊ẹ̌ ndaị ene. Contone, sejarawan Yahudi Flavius Yosefus němohẹ soal u sěmbaụ sekte Yahudi seng nẹ̌sěding tumatol᷊ene mẹ̌salu. Tumuhụ si sire mẹ̌salu ene limembong dal᷊akị bọu mẹ̌konti. Su pěndang i sire mạeng piạ u harusẹ̌ mẹ̌salu tadeạu taumata mangimang si sie, tau ene seng nẹ̌konti. Su apokrifa Yahudi, kitab Kebijaksanaan Sirakh, arau Eklesiastikus, (23:11) lai naul᷊ị, ”Taumata puluang mẹ̌salu tawẹ apa naunge mapia.” Yesus naul᷊ị i kitẹ tawe wotonge mẹ̌salu gunang hal᷊ẹ̌ tawe penting. Mạeng i kitẹ sěntiniạ jujurẹ̌, i kitẹ tawe harusẹ̌ mẹ̌salu tadeạu taumata mangimang si kitẹ.