A NAYO wa Mosi wu wa vumelela vanhu ku hlambanya hi magezu yo kota ku: “Nza hlambanya hi Nungungulu” kutani ku: “Nza hlambanya hi vito ga Jehova.” Kanilezi, masikwini ya Jesu, a ku hlambanya zi wa mahile mukhuwo laha ka kuza a vaJuda va hlambanya ni ka xihi va nga wula. Va wa maha lezo kasi ku maha vanhu va kholwa lezi va wulako. Kanilezi, Jesu i kawukile mukhuwo lowo wa hava makhati mambiri. I te: “Loku muku, Ina, a kuve ina; a Ahihi ava ahihi.” — Mateu 5:33-37; 23:16-22.

Hi kuya hi Dicionário Teológico do Novo Testamento, a Talmude gi hi vuna ku wona lezi zi nga tolovelekisile zona ka vaJuda a ku hlambanya. Hikuyini? Hi ku a Talmude gi tlhamusela khwatsi a zihlambanyo lezi zi nga fanele ku tatisiwa ni lezi zi nga ringana ku nga zi tatisi.

A hi yena yece Jesu a nga kawuka a mukhuwo wa ku hlambanya. Hi xikombiso, Flávio Josefo, a nga mutsali wa matimu ya vaJuda, i tsalile lezaku ku wa hi ni ntlawa wo kari wa vaJuda va nga kala va nga hlambanyi. A vaJuda lavo, va wa kholwa lezaku a ku hlambanya zi bihile nguvu. Va wa alakanya ku loku munhu a kala a hlambanya kasi ku kholwisa vanwani lezi a wulako, muhembi. A ginwe ga mabhuku ma nga engetelwa hi vanhu ka maBiblia yo kari gi vitaniwako lezaku i Eclesiástico (23:11) gonawo gi wula lezi: “A munhu a ranzako ku hlambanya, muonhi wa hombe.” Jesu i kawukile ku hlambanya ka zilo zi nga vuniko nchumu. Loku hi wulawula lisine xontlhe xikhati, a zizi zi lava ku hi hlambanya kasi ku kholwisa vanhu lezi hi wulako.