Itandaindu nge Jahwe bali bagi Nuah, Daniel, ras Jop?
“Kalak jahat la iertina kai si [adil], tapi kalak si [ndarami Jahwe], iangkana kerina.”—KUAN-KUANEN 28:5.
ENDE-ENDEN: 126, 150
1-3. (a) Kai si arus silakoken gelah banci tetap setia man Dibata bas wari-wari pendungi enda? (b) Kai si man bahasenta bas artikel enda?
GUNDARI kita nggeluh bas wari-wari pendungi. Banci siidah maka reh buena kalak jahat. Kalak e “turah mehumur desken dukut.” (Masmur 92:8) Emaka la teta mamang melala kalak lanai ngikutken kai si benar menurut Dibata. Nina Paulus man kalak Kristen, ‘I bas perkara kejahaten bagi anak-anak min kam,’ tapi “i bas rukur, bagi kalak dewasa min.” (1 Korinti 14:20) Uga cara ngelakokenca?
2 Jawapna lit bas ayat tema artikel enda, nina, “Kalak si [ndarami Jahwe], iangkana kerina.” (Kuan-kuanen 28:5) Enda ertina banci iangkai kalak e kerina maka penting kel erban Jahwe senang. Kuan-kuanen 2:7, 9 pe ngajari kita maka ibere Jahwe kepentaren man kalak si ngelakoken kai si benar. Asilna, banci ‘ieteh kalak e kai si bujur, si benar dingen adil. Ietehna pe kai si arus ilakokenna.’
Esekiel 14:14) Bage ka pe umat Dibata gundari. Adi kam uga? Lit nge bas kam kepentaren Dibata? Gelah ‘iangkaindu kerina’ si erban Jahwe senang perlu tuhu-tuhu itandaindu Jahwe. Emaka bas artikel enda sipelajari kari (1) uga carana Nuah, Daniel, ras Jop nandai Dibata, (2) kai gunana man kalak e nandai Dibata, ras (3) uga carana gelah reh paguhna kinitekenta bagi kalak e.
3 Lit kepentaren Dibata bas Nuah, Daniel, ras Jop. (NUAH ERDALAN RAS DIBATA BAS DONI SI JAHAT
4. Uga maka banci itandai Nuah Jahwe? Kai gunana man Nuah nandai Dibata?
Ieteh Nuah kerna sipat-sipat Jahwe alu mperdiateken ciptan
4 Uga maka banci itandai Nuah Jahwe? Sanga mulai lit anak Adam ras Hawa, manusia erlajar kerna Jahwe alu telu cara: arah ciptan, arah umat Dibata si setia, ras igejapkenna sendiri kai gunana sanga patuh ia man Jahwe. (Jesaya 48:18) Alu mperdiateken ciptan, banci iidah Nuah bukti maka Dibata e lit, janah banci ka ia erlajar kerna sipat-sipat Dibata je nari. Asilna, iangka Nuah dungna maka Jahwe e mbelin kuasaNa janah Ia ngenca Dibata situhu-tuhu. (Roma 1:20) Dungna, labo tek saja ia maka Dibata e lit, tapi pe erkiniteken man baNa.
5. Ise saja si ngajari Nuah kerna sura-sura Jahwe man manusia?
5 Ikataken bas Pustaka maka “kiniteken rehna arah megi,” ertina kai si ibegi kita arah kalak si deban banci erban kita erkiniteken. (Roma 10:17) Banci jadi ibegi Nuah kerna Jahwe arah keluargana. Bapakna, Lameh, tek man Dibata janah tubuh sope Adam mate. (Nen gambar pemena artikel.) Bulangna eme Metusalah ras bulang-nini bulangna eme Jaret, mate 366 tahun kenca Nuah tubuh. * (Nen keterangen tambahen.) (Lukas 3:36, 37) Banci jadi, kerina dilaki e ras diberuna si ngajari Nuah. Iajarina maka Jahwe si nciptaken manusia janah ate Jahwe lit min anak kalak e guna ndemi doni enda ras ngelayani Ia. Ieteh Nuah ka maka Adam ras Hawa la patuh man Jahwe janah banci idahna kai akibatna. (Kejadin 1:28; 3:16-19, 24) Meriah kel akap Nuah mpelajari kerina e, janah enda me si erbanca nggit ia ngelayani Jahwe.—Kejadin 6:9.
6, 7. Arapen kai si erban kiniteken Nuah reh paguhna?
6 Arapen erban kinitekenta reh paguhna. Bayangken uga perasan Nuah sanga itehna erti gelarna eme “Istirahat” ntah pe “Penghiburen.” Kata e erban kalak mbayangken maka pasti lit pagi malemna. (Kejadin 5:29) Jahwe si erbanca Lameh ngataken kerna anakna Nuah, “Anak enda me si mereken kemalemen ate man banta i bas kelatihenta erdahin ngusahai taneh si enggo isumpahi [Jahwe].” Emaka erpengarapen Nuah maka iban Dibata nge pagi kerina reh ulina. Bagi Abil ras Enoh, tek ia maka lit pagi “kesusuren” si merperken takal nipe.—Kejadin 3:15.
7 Labo iangkai Nuah kel janji Dibata si itulis bas Kejadin 3:15. Tapi iangkana maka nubuat enda mereken arapen bas wari si pepagi. Enoh pe iberitakenna kerna si enda. Ikatakenna maka ikernepken Jahwe me pagi kalak jahat. (Judas 14, 15) Tentu, berita si ipeseh Enoh enda terjadi pagi kerina bas Harmagedon, si pasti erban kiniteken ras arapen Nuah reh paguhna!
Adi reh tekna janah reh pentarna kita, enda ngelindungi kita arah godan Setan bage pe arah pengaruh doni enda
8. Kai gunana man Nuah nandai Dibata?
8 Kai gunana man Nuah nandai Dibata? Perban erlajar Nuah kerna Jahwe, reh tekna ia janah reh pentarna. Dungna banci la ilakokenna kai si erban Jahwe la senang. Engkai maka banci bage? Jadi teman Dibata ate Nuah, emaka la ia nggit erteman ras kalak si la tek man Jahwe ras kalak si nulak Jahwe. La bagi kalak e, la ia nggit itokohi malekat-malekat jahat si nusur ku doni. Hebat kel akap kalak malekat-malekat si megegeh e janah lit ka si nembah ia. (Kejadin 6:1-4, 9) Ieteh Nuah ka maka ate Jahwe keturunen manusia saja si ndemi doni enda. (Kejadin 1:27, 28) Emaka sanga empo malekat-malekat e ras diberu-diberu i doni janah lit anakna, ieteh Nuah maka e salah. Enda reh jelasna sanga anak-anak malekat e galangen ras gegehen asangken anak-anak si deban. Dungna, ikataken Jahwe man Nuah maka ikernepkenNa ateNa kerina kalak jahat alu banjir si mbelin. Perban tek Nuah man persinget Jahwe e, ibanna me bahtra, janah selamat me ia ras keluargana.—Heber 11:7.
9, 10. Uga carana gelah reh paguhna kinitekenta bagi Nuah?
9 Uga carana gelah reh paguhna kinitekenta bagi Nuah? Penting kel sipelajari Kata Dibata alu megermet, meherga min siakap kai si nggo sipelajari, janah sipake e guna erban perubahen i bas geluhta ras erban keputusen si mehuli. (1 Petrus 1:13-15) Adi reh tekna janah reh pentarna kita, enda ngelindungi kita arah godan Setan bage pe arah pengaruh doni enda. (2 Korinti 2:11) Nterem kalak ngena atena kekerasen ras perbahanen seks si salah janah iikutkenna sura-surana si salah. (1 Johanes 2:15, 16) La ia nggit mperdiateken bukti maka nggo reh deherna kedungen doni si jahat enda. Adi la paguh kinitekenta, banci dungna carata rukur seri ras kalak e. Perlu siinget maka sanga ibandingken Jesus jamanta ras jaman Nuah, labo isingetkenna kerna kekerasen ras perbahanen seks si salah. Tapi kerna lanai tutus ngelayani Jahwe.—Baca Matius 24:36-39.
10 Cuba sungkuni bandu, ‘Teridah nge arah kegeluhenku maka kutandai Jahwe? Paguh nge kinitekenku si erban aku ngelakoken kai si benar menurut Jahwe janah kukataken ka man kalak si deban?’ Arah jawapenndu itehndu maka kam erdalan ras Dibata bagi Nuah ntah lang.
TERBUKTI LIT KEPENTAREN DIBATA BAS DANIEL I BABILON
11. (a) Kai si banci siteh kerna orang tua Daniel? (b) Sipat-sipat Daniel si apai si atendu iusihndu?
11 Uga maka banci itandai Daniel Jahwe? Pasti iajari orang tua Daniel ia gelah keleng atena Jahwe bage pe KataNa. Janah segedang geluhna ia bage. Seh asa ia nggo metua tetap ipelajarina Kata Dibata alu megermet. (Daniel 9:1, 2) Tuhu-tuhu itandai Daniel Jahwe. Ietehna ka kerina si nggo ilakoken Jahwe man kalak Israel. Enda teridah arah pertoton Daniel si meteruk rukur si itulis bas Daniel 9:3-19. Bacalah pertotonna e janah ukuri alu mbages. Kenca e sungkuni bandu, ‘Kai si banci kupelajari kerna Daniel arah pertoton enda?’
12-14. (a) Kai buktina lit kepentaren Dibata bas Daniel? (b) Kai pasu-pasu Jahwe man Daniel si perpang ras setia?
12 Kai gunana man Daniel nandai Dibata? Labo gampang iakap kalak Jahudi ngelayani Jahwe perban tading ras kalak Babilon si nembah dibata palsu. Contohna ikataken Jahwe man kalak Jahudi, “Erdahinlah guna kiniulin kuta-kuta ku ja kam enggo Kubuang jadi tabanen.” (Jeremia 29:7) Tapi iperentahken Jahwe ka gelah Ia saja isembah kalak e alu buat ukur. (Keluaren 34:14) Engkai maka banci Daniel patuh man duana perentah enda? Kepentaren si rehna arah Dibata erban Daniel lebih patuh man Jahwe asangken pemerentahen manusia. Janah ratusen tahun kenca si e, iajarken Jesus ka kerna perentah si bage.—Lukas 20:25.
13 Cuba ukuri kai si ilakoken Daniel sanga lit hukum kerna la banci ertoto man ise pe sedekah 30 wari selain man raja. (Baca Daniel 6:7-10.) Situhuna banci saja ikatakenna, ‘Adi 30 wari nge.’ Tapi la ipediat Daniel hukum manusia jadi si pentingna asangken ngelayani Dibata. Janah situhuna banci saja Daniel ertoto bas ingan si la iidah kalak. Tapi ietehna maka nterem kalak nggo ngidah ia ertoto tiap wari. Emaka amin pe berbahaya, terus Daniel ertoto i bas ingan si banci iidah kalak gelah ieteh kalak maka tetap ia ngelayani Jahwe.
14 Ipasu-pasu Jahwe Daniel si perpang ras setia man baNa. IbanNa mukjizat janah iselamatkenNa ia bas singa nari. Asilna, nterem kalak si dungna nembah Jahwe bas Medi-Persia!—Daniel 6:25-27.
15. Uga carana gelah reh paguhna kinitekenta bagi Daniel?
15 Uga carana gelah reh paguhna Matius 13:23) Sieteh min uga perukuren ras perasan Jahwe kerna persoalen kai pe. Emaka perlu siukuri alu mbages kai si sangana sibaca. Janah penting kel rusur ertoto, khususna sanga lit masalahta. Teklah kita maka pasti ibere Jahwe kepentaren ras gegeh adi sipindo man baNa.—Jakup 1:5.
kinitekenta bagi Daniel? Gelah paguh kinitekenta labo cukup mbaca Pustaka saja. Perlu siangkai kai si ibaca e. (IUSAHAKEN JOP BAGI JAHWE PERUKURENNA BAS MASA SI MEHULI BAGE PE SI MESERA
16, 17. Uga maka banci itandai Jop Jahwe?
16 Uga maka banci itandai Jop Jahwe? Jop labo kalak Israel. Tapi lit denga perkade-kadenna ras Abraham, Isak, bage pe Jakup. Iajari Jahwe kalak e kerna Ia bage pe sura-suraNa man manusia. Bage ka pe, Jop erlajar arah kalak si ngergai kebenaren. (Jop 23:12) Nina man Jahwe, “Kepeken pemetehku kerna Kam, terjeng si ituriken kalak ngenca.” (Jop 42:5) Janah ikataken Jahwe sendiri maka nggit Jop cerita kerna Ia man kalak si deban.—Jop 42:7, 8.
Reh paguhna kinitekenta adi siperdiateken ciptan janah sipelajari terbuen sipat-sipat Jahwe (Nen paragraf 17)
17 Ieteh Jop ka sipat-sipat Jahwe arah kai si idahna bas ciptan. (Jop 12:7-9, 13) Elihu ras Jahwe pe igunakenna ciptan guna ngajarken man Jop maka labo lit ertina manusia e ibandingken ras Dibata. (Jop 37:14; 38:1-4) Erpengaruh kel kata-kata Jahwe man Jop, emaka alu meteruk ukur ikatakenna man Jahwe, “Genduari kueteh [Jahwe], maka kai pe ngasup Kam ngelakokenca kai isuraNdu seh kerina.” Nina ka, “Erkadiola aku, e maka kundul aku i bas abu dapur ras abu taneh.”—Jop 42:2, 6.
18, 19. Kai buktina maka tuhu-tuhu itandai Jop Jahwe?
18 Kai gunana man Jop nandai Dibata? Tuhu-tuhu ieteh Jop uga perukuren Jahwe janah tuhu-tuhu ka itandaina Ia. Enda ngiahken Jop ngelakoken kai si benar. Contohna, ietehna maka labo banci ikatakenna keleng atena Dibata adi la ia mehuli man kalak. (Jop 6:14, Terjemahan Dunia Baru) Labo ulin akapna ia asangken kalak si deban, ibanna kalak bagi keluargana, la soal kalak e bayak ntah mesera. Nina Jop, “Ma kin Dibata si nepa aku enda, Ia pe si nepa suruh-suruhenku kerina?” (Jop 31:13-22) Amin gia Jop e bayak ras erpengaruh, la ia sombong janah la pentingen akapna ia asangken kalak si deban. Beda kel ras nterem jelma si gundari, si bayak ras si erpengaruh bas masyarakat.
19 Pentingen akap Jop Jahwe asangken kai pe, termasuk erta. Ietehna maka adi pentingen akapna erta banci itulakna “Dibata si meganjangna.” (Baca Jop 31:24-28.) Janah badia kel iakap Jop perjabun, perban perbulangen ras ndehara nggo erjanji. Emaka, erjanji ia man dirina sendiri maka la ia nggit ngenen diberu-diberu alu pikiren si salah. (Jop 31:1) Tuhu-tuhu luar biasa kel, sebap bas masa Jop ipeturut Jahwe denga lebih sada diberu sekalak dilaki. Emaka banci saja dua iban Jop diberuna adi e atena. Tapi pasti ietehna maka perjabun si pemena iban Jahwe sada dilaki sada diberu, emaka iikutken Jop e. * (Nen keterangen tambahen.) (Kejadin 2:18, 24) Janah, 1.600 tahun kenca si e iajarken Jesus ka kerna perjabun ras seks eme antara sada dilaki ras sada diberu ngenca.—Matius 5:28; 19:4, 5.
20. Adi sitandai Jahwe ras perentah-perentahNa, teman ras hiburen si uga nge sipilih?
20 Uga carana gelah reh paguhna kinitekenta bagi Jop? Bali ka bagi si ndai, perlu tuhu-tuhu sitandai Jahwe janah lakokenlah kai si benar bagi si nggo siteh. Contohna, ikataken Pustaka maka “nembeh kal ate [Jahwe] kempak kalak si erngena ate man si jahat.” Janah, ula kita erteman ras kalak si la siteh ise ia. (Baca Masmur 11: 5; 26:4.) Sungkuni bandu, ‘Kai si ikataken dua ayat enda man bangku kerna kai si ipindo Jahwe? Adi bage, kai nge si kuutamaken bas geluhku? Kai nge sikunen bas Internet, ise teman si kupilih bage pe hiburenku?’ Arah jawapenndu banci itehndu tuhu-tuhu itandaindu Jahwe ntah lang. La ateta ipengaruhi doni si jahat enda. Emaka perlu kita erlajar gelah sieteh apai si benar ras si salah bage pe apai si pentar ras si lang.—Heber 5:14; Epesus 5:15.
21. Kai si nampati kita gelah ‘siangkai kerina’ si erban Jahwe senang?
21 Perban iusahaken Nuah, Daniel, ras Jop gelah tuhu-tuhu nandai Jahwe, isampati Jahwe kalak e gelah banci “iangkana kerina” maka penting kel erban ukur Jahwe senang. Arah contoh-contoh enda, terbukti maka banci sukses geluhta adi silakoken kerina si iperentahken Jahwe. (Masmur 1:1-3) Emaka sungkuni bandu, ‘Kutandai nge Jahwe bali bagi Nuah, Daniel, ras Jop?’ Situhuna, banci ulin sitandai Jahwe gundari asangken kalak si setia enda ndai, perban ndauh buen keterangen si ibereken Jahwe man banta kerna Ia. (Kuan-kuanen 4:18) Emaka rajinlah kam erlajar Pustaka. Ukuri alu mbages. Janah pindo kesah si badia. Alu bage la kam terpengaruh doni si jahat enda. Tapi, banci kam pentar janah reh deherna ras Bapata si i surga.—Kuan-kuanen 2:4-7.
^ par. 5 Enoh, nini bulang Nuah pe “tetap ia erdalan i bas dalan Dibata.” Tapi ia mate 69 tahun sope Nuah tubuh.—Kejadin 5:23, 24.
^ par. 19 Nuah pe bage. Sada ngenca diberuna, amin pe sanga si e nggo nterem kalak lebih sada diberuna kenca Adam ras Hawa la patuh man Dibata.—Kejadin 4:19.