1-3. (a) Nama deka nulung kitai mengkang tetap ati ngagai Jehovah ba hari ti penudi tu? (b) Nama deka dipelajarka kitai ba artikel tu?

PENGUJUNG hari ti penudi majak semak. Orang jai majak mayuh-semayuh. Sida “tumbuh baka rumput.” (Mas. 92:7) Nya alai kitai enda tekenyit ati enti mayuh orang nulak utai ke dikumbai Petara ngena. Paul ngasuh orang Kristian: “Ba pekara ti jai, awakka kita baka anak mit, tang ba jalai kita berunding, kita patut nyadi orang ke besai tuai.” (1 Kor. 14:20) Baka ni kitai ulih ngereja tu?

² Saut iya bisi ba ayat tema kitai. Ayat nya madahka: “Orang ke nyembah Jehovah nemu reti semua utai.” (J-lam. 28:5, NW) Reti nya sida nemu semua utai ke patut ngambika ulih ngelantangka ati Jehovah. Ayat ba Jaku Dalam 2:7, 9 mega madahka Jehovah meri penemu-dalam ngagai orang ke ngereja utai ti ngena. Nya alai Jehovah ulih  nulung sida “nemu utai ti ngena, lurus sereta betul,” iya nya semua pekara bekaul enggau utai ti manah.

³ Noah, Daniel, enggau Jop bisi penemu-dalam Petara. (Esk. 14:14) Pia mega enggau nembiak Petara kemayaharitu. Baka ni enggau nuan? Kati nuan bisi penemu-dalam Petara? Ngambika “nemu reti semua utai” ke ulih ngelantangka ati Jehovah, nuan patut ngelala Iya enggau manah. Nya alai ba artikel tu, kitai deka belajarka (1) chara Noah, Daniel, enggau Jop ngelala Petara, (2) baka ni ngelala Petara mai penguntung ngagai sida, sereta (3) chara kitai ulih ngembuan pengarap baka sida.

4. Baka ni Noah ngelala Jehovah, lalu baka ni tu ulih meri penguntung ngagai iya?

⁴ Baka ni Noah ngelala Jehovah? Kenyau ari Adam seduai Hawa berengkah ngembuan anak, orang belajar pasal Jehovah nengah tiga iti chara: ari beratika utai ti ditempa Iya, ari nembiak Iya ti tetap ati ke bukai, sereta ari ngasaika penguntung ketegal ngasika Iya. (Isa. 48:18) Ari beratika utai ti ditempa, Noah ulih meda bukti ke nunjukka Petara nya endang bisi lalu iya mega nemu Petara bisi kualiti. Noah nemu Petara bisi kuasa ti besai lalu semina Iya aja Petara ti bendar. (Rom. 1:20) Tu nulung Noah andal sereta arap bendar ke Petara.

5. Baka ni Noah ulih nemu pasal peneka Petara bekaul enggau mensia?

⁵ Bup Kudus madahka, “pengarap datai ari ke ningaka pesan.” Tu nunjukka utai ti didinga ari orang ulih nulung kitai ngembuan pengarap. (Rom. 10:17) Noah engka ninga pasal Jehovah ari kaban belayan iya. Apai iya Lamek, arapka Jehovah lalu ada sebedau Adam mati. (Peda gambar ba pun artikel.) Aki iya Metuselah, lalu aki wit iya Jaret mati lebuh Noah beumur 366 taun. * (Peda nota kaki.) (Luk. 3:36, 37) Sida enggau bini sida engka ngajar Noah pasal Jehovah ke nempa mensia lalu Jehovah deka mensia ngemenuhka dunya enggau bala anak sida, sereta nyembah Iya. Noah mega belajar pasal Adam seduai Hawa ke enda ngasika Jehovah sereta ulih meda penusah ke datai ari pemutus ke digaga seduai iya. (P-kal. 1:28; 3:16-19, 24) Noah rindu enggau utai ti dipelajar iya, lalu nya meransang iya nyembah Jehovah.—P-kal. 6:9.

6, 7. Baka ni pengadang ulih ngeringka pengarap Noah?

⁶ Pengadang ulih ngeringka pengarap. Uji gambarka, pengarap Noah tentu dikeringka lebuh iya nemu nama diri ngembuan reti “Belelak” tauka “Pengelantang,” ke bekaul enggau pengadang. (P-kal. 5:29) Nengah iring roh kudus Jehovah, Lamek madah pasal anak iya Noah: ‘Anak mit tu deka ngelantangka  kitai ti ngereja pengawa ti mar ba tanah ti udah disumpah Jehovah.’ Nya alai Noah andalka Jehovah. Baka Abel enggau Enok, Noah pechaya “anak” deka ngeredakka pala ular.—P-kal. 3:15.

⁷ Noah enda entu ulih meretika semaya Jehovah ti ditulis ba Pemungkal 3:15. Tang iya nemu semaya nya meri pengadang ke jemah ila. Enok udah nusui semaya ti sama, iya nya pasal Jehovah ti deka ngerusak orang ke jai. (Jud. 14, 15) Semaya ke ditusui Enok nya deka dikeamatka maya Armagedon. Semaya tu tentu udah ngeringka pengarap sereta pengadang Noah!

8. Baka ni ngelala Petara udah nyaga Noah?

⁸ Baka ni penemu ti bendar pasal Petara nulung Noah? Laban Noah bisi belajar pasal Jehovah, iya ngembuan pengarap sereta penemu-dalam Jehovah. Tu nyaga iya ari ngereja utai ti enda ngelantangka ati Jehovah. Baka ni? Noah deka nyadi pangan Petara, nya alai iya enda bepangan enggau orang ke enda arap sereta nulak Jehovah. Enda baka sida, Noah enda ulih ditipu bala antu ke datai ngagai dunya. Orang alit ati enggau pengering bala antu lalu engka mega deka nyembah sida. (P-kal. 6:1-4, 9) Noah mega nemu Jehovah deka mensia ngembuan anak sereta ngemenuhka dunya. (P-kal. 1:27, 28) Nya alai lebuh bala antu ngambi indu mensia ke bini lalu ngembuan anak, Noah nemu pengawa sida nya salah. Pengawa nya ngengerang salah lebuh tubuh bala anak sida besai sereta kering agi ari tubuh anak mensia bukai. Nya alai Jehovah madah ngagai Noah, Iya deka ngenataika ai bah kena ngerusak semua orang ke jai. Ketegal Noah arapka jaku tangkan Jehovah, iya ngaga bandung lalu nyelamatka sida sebilik.—Heb. 11:7.

9, 10. Baka ni kitai ulih ngembuan pengarap baka Noah?

⁹ Baka ni kitai ulih ngembuan pengarap baka Noah? Kitai patut mansik Jaku Petara, rinduka utai ti dipelajarka kitai, sereta ngena utai nya ngaga ubah enggau pilih ti manah ba pengidup. (1 Pet. 1:13-15) Lalu pengarap enggau penemu-dalam Petara deka ngelindung kitai ari dipanjuk Sitan sereta dilimpangka dunya tu. (2 Kor. 2:11) Mayuh orang ba dunya tu rinduka pemangah, ulah ti kamah, sereta nitihka pengingin sida ti salah. (1 Jhn. 2:15, 16) Sida enda bedulika penemu ke madahka kitai semak enggau pengujung dunya ti jai tu. Enti pengarap kitai lemi, kitai mega berunding baka nya. Anang enda ingat, lebuh Jesus mandingka jeman kitai enggau jeman Noah, iya nadai nyebut pasal pemangah tauka ulah ti kamah. Tang iya nyebut pasal utai ke ulih ngelimpangka kitai ari nyembah Petara.—Bacha Matthew 24:36-39.

¹⁰ Tanya diri empu: ‘Kati pendiau aku  nunjukka aku amat ngelala Jehovah? Kati pengarap aku meransang aku ngereja utai ti dikumbai Jehovah ngena sereta ngajar orang bukai pasal utai nya?’ Saut ngagai semua tanya tu deka nulung nuan nemu sekalika nuan idup sejalai enggau Petara baka ke digaga Noah.

11. (a) Nama ulih dipelajarka kitai ari apai indai Daniel ke udah nulung iya rinduka Petara? (b) Ni bagi kualiti Daniel ti deka dikembuan nuan?

¹¹ Baka ni Daniel ngelala Jehovah? Apai indai Daniel tentu bisi ngajar Daniel rinduka Jehovah sereta Jaku Iya. Lalu Daniel ngereja nya sepemanjai pengidup iya. Indah lebuh udah tuai, iya agi belajarka Bup Kudus. (Dan. 9:1, 2) Daniel amat ngelala Jehovah. Iya mega nemu semua utai ke udah digaga Jehovah ke orang Israel. Kitai ulih nemu tu ari beratika sampi Daniel ti baruh ati ke bisi ba Daniel 9:3-19. Bacha lalu belematika sampi tu. Tanya diri empu, ‘Nama dipelajarka aku pasal Daniel ari sampi nya?’

12-14. (a) Baka ni Daniel mandangka penemu-dalam Petara? (b) Baka ni Jehovah merekat pemerani enggau penaluk Daniel?

¹² Baka ni ngelala Petara mai penguntung ngagai Daniel? Orang Judah ke tetap ati enda senang deka nyembah Jehovah ba menua Babilon ke kapir. Ambika chunto, Jehovah ngasuh orang Judah: “Bekereja kita ke penguntung nengeri ti udah alai Aku muai kita.” (Jer. 29:7) Tang Jehovah mega ngasuh sida nyembah Iya aja enggau pengabis ati. (P-sut. 34:14) Baka ni Daniel ulih ngasika dua iti pesan tu? Penemu-dalam Petara nulung Daniel ngasika Jehovah dulu, udah nya baru ngasika pemerintah mensia. Beratus-ratus taun udah nya, Jesus ngajar prinsip ti sama.—Luk. 20:25.

¹³ Pikirka utai ti dikereja Daniel lebuh bisi atur ke nagang orang besampi ngagai petara bukai tauka mensia kelimpah ari ngagai raja sepengelama 30 hari. (Bacha Daniel 6:7-10.) Iya ulih ngiga kebuah lalu madahka, ‘Tu semina 30 hari aja.’ Tang Daniel enggai ngenuluka atur mensia ari sembah iya ngagai Petara. Daniel ulih besampi ngagai Petara ba endur ke enda dipeda orang. Tang iya nemu mayuh orang meda iya besampi ninting hari. Nya alai taja pan atur nya ulih nganu nyawa, Daniel majak besampi ba endur ke ulih dipeda orang laban enggai orang ngumbai iya ngetu nyembah Jehovah.

¹⁴ Daniel udah ngaga pemutus enggau berani sereta mengkang taluk, nya alai Jehovah merekatka iya. Jehovah ngaga kereja ajih lalu nyelamatka Daniel ari diempa singa. Ketegal nya, orang di serata Perintah Media-Persia nemu pasal Jehovah!—Dan. 6:25-27.

15. Baka ni kitai ulih ngembuan pengarap baka Daniel?

¹⁵ Baka ni kitai ulih ngembuan pengarap baka Daniel? Enti deka ngembuan pengarap ti tegap, kitai ukai semina macha Bup Kudus aja. Kitai patut meretika iya. (Mat. 13:23) Kitai deka nemu runding sereta asai ati Jehovah pasal sekeda utai. Nya alai kitai patut belematika utai ti dibacha kitai. Kitai mega patut bejarit besampi, kelebih agi lebuh bisi penanggul. Jehovah tentu deka meri kitai penemu-dalam sereta pengering ke dipinta kitai dalam sampi.—Jas. 1:5.

16, 17. Baka ni Jop ngelala Jehovah?

¹⁶ Baka ni Jop ngelala Jehovah? Jop ukai orang Israel. Iya kaban belayan Abraham, Isak, enggau Jakop. Jehovah udah ngajar kaban belayan Jop nya pasal Iya sereta utai ti dikedekaka Iya ba mensia. Kitai enda nemu baka ni chara Jop belajar pasal Petara, tang kitai nemu iya endang bisi belajar pasal Petara. (Jop 23:12) Ku Jop madah ngagai Jehovah: “Dulu menya, aku semina nemu utai ti dipadahka orang ngagai aku.” (Jop 42:5) Lalu Jehovah madahka Jop bisi nusui pemendar pasal Iya ngagai orang.—Jop 42:7, 8.

¹⁷ Jop mega nemu pasal kualiti Jehovah ari beratika utai ti ditempa Iya. (Jop 12:7-9, 13) Elihu enggau Jehovah ngena utai ti ditempa lebuh ngajar Jop pasal kitai mensia nya mit enti dibanding  enggau Petara. (Jop 37:14; 38:1-4) Jaku Jehovah udah ngubah runding Jop lalu meransang iya enggau ati ti baruh madah ngagai Jehovah: “Aku nemu Nuan endang bekuasa ari atas semua, lalu Nuan ulih ngereja semua utai ti dikedekaka Nuan.” Ku iya agi: “Aku nesal ati lalu ngerabu diri enggau amau enggau abus.”—Jop 42:2, 6.

18, 19. Baka ni Jop mandangka diri amat ngelala Jehovah?

¹⁸ Baka ni ngelala Petara mai penguntung ngagai Jop? Jop nemu prinsip Petara enggau manah. Iya amat ngelala Jehovah, lalu tu meransang iya ngereja utai enggau chara ti patut. Ambika chunto, Jop nemu iya enda ulih ngumbai diri rinduka Petara enti iya jai enggau orang bukai. (Jop 6:14) Iya enda ngasaika diri manah agi ari orang bukai. Iya ngintu sida baka diri sebilik, enda ngira sida nya kaya tauka seranta. Ku Jop madahka: ‘Petara ngaga aku lalu Iya mega ngaga orang gaji aku.’ (Jop 31:13-22) Taja pan Jop kaya sereta tebilang, iya enda sumbung sereta ngasaika diri pama agi ari orang bukai. Ulah iya enda sebaka enggau ulah orang kaya sereta bekuasa kemayaharitu.

¹⁹ Jop enggai ngenuluka pengaya lebih agi ari Jehovah. Laban iya nemu utai nya ulih ngasuh iya besangkalka ‘Petara ti Pemadu Bekuasa.’ (Bacha Jop 31:24-28.) Jop mega nemu, tikah nya semaya ti kudus entara seiku laki enggau seiku bini. Iya mega besemaya enggau diri empu enggai merening ngagai indu enggau ati ti kamah. (Jop 31:1) Tu endang semaya ti manah laban maya nya Jehovah bisi ngemendarka orang ke lelaki ngembuan lebih ari seiku bini. Nyadi enti Jop deka, iya ulih ngembuan seiku agi bini. Tang iya tentu nemu, tikah ti keterubah ke diatur Petara nya entara seiku lelaki enggau seiku indu, lalu nya meh utai ti dipilih Jop. * (Peda nota kaki.) (P-kal. 2:18, 24) Kira-kira 1,600 taun udah nya, Jesus madahka prinsip ti sama bekaul enggau tikah sereta besetubuh, iya nya semina entara seiku laki enggau seiku bini aja.—Mat. 5:28; 19:4, 5.

20. Enti kitai ngelala Jehovah sereta standard Iya, baka ni tu ulih nulung kita milih bala pangan sereta pemerindang ti patut?

²⁰ Baka ni kitai ulih ngembuan pengarap baka Jop? Kitai patut ngelala Jehovah enggau manah lalu ngawakka penemu tu ngiring kitai ba pengidup. Ambika chunto, Bup Kudus madahka, Jehovah “begedika orang ke mangah.” Bup Kudus mega madahka kitai enda patut begulai enggau orang ke pura-pura ngapa. (Bacha Masmur 11:5; 26:4.) Diatu tanya diri empu: ‘Nama dipadahka dua iti ayat nya pasal runding Jehovah? Nama kaul ayat nya enggau utai ti patut dikenuluka aku ba pengidup? Nama kaul ayat nya enggau utai ti dipeda aku ba internet, sapa ke patut dipilih nyadika pangan, sereta pemerindang ke dipilih aku kena ngelantangka ati?’ Saut ngagai tanya nya ulih nulung nuan nemu sekalika nuan amat ngelala Jehovah tauka enda. Kitai enggai dilimpangka dunya ti jai tu. Nya alai kitai patut “matihka diri ngelala bida entara utai ti badas enggau utai ti  jai,” sereta ukai idup baka orang ke beli, tang baka orang ke bepenemu-dalam.—Heb. 5:14; Eps. 5:15.

21. Nama deka nulung kitai “nemu reti semua utai” ngambika ulih ngelantangka ati Jehovah?

²¹ Ketegal Noah, Daniel, enggau Jop bebendar deka ngelala Jehovah enggau manah, Iya nulung sida “nemu reti semua utai” ngambika ulih ngelantangka ati Iya. Peneleba sida nunjukka kitai ulih mujur ba pengidup enti ngereja pengawa nitihka chara Jehovah. (Mas. 1:1-3) Nya alai tanya diri empu: ‘Kati aku ngelala Jehovah baka Noah, Daniel, enggau Jop?’ Kemayaharitu kitai ulih ngelala Jehovah enggau manah agi laban Iya udah meri mayuh agi penerang pasal Diri Empu. (J-lam. 4:18) Nya alai pansik Bup Kudus, belematika iya, sereta besampi minta roh kudus. Lalu dunya ti jai tu enda ulih ngelimpangka nuan. Nuan deka ngereja utai nitihka penemu-dalam Petara sereta ngerapatka kaul enggau Apai nuan ti di serega.—J-lam. 2:4-7.