Yu No Jiova Jɔs Lɛk Noa, Daniɛl, ɛn Job?
“Bad pɔsin nɔ no wetin na fia ple, bɔt udat de wɔship PAPA GƆD [“Jiova,” NW] no wetin dat min.”—PRƆVABS 28:5.
1-3. (a) Wetin go ɛp wi fɔ kɔntinyu fɔ de fetful wan to Gɔd insay dis las dez? (b) Wetin wi go tɔk bɔt insay dis atikul?
TIDE, wi de nia di tɛm we di las dez go dɔn. Wi de si wikɛd pipul dɛn de bɔku mɔ ɛn mɔ. Dɛn de “gro lɛk gras.” (Sam 92:7, NW) So wi nɔ sɔprayz we bɔku pipul dɛn nɔ de du wetin rayt na Gɔd in yay. Pɔl bin tɛl Kristian dɛn se: “Una fɔ tan lɛkɛ pikin wɛn i kam pan bad, bɔt una fɔ tink lɛkɛ bigman.” (Fɔs Lɛta Fɔ Kɔrint 14:20) Aw wi go du dis?
2 Wi go fɛn di ansa na di tim tɛks we se: “Udat de wɔship PAPA GƆD [“Jiova,” NW] no wetin dat min.” (Prɔvabs 28:5) Dat min se, dɛn fɔ ɔndastand ɔl wetin dɛn fɔ no we go mek Jiova gladi. Prɔvabs 2:7, 9 tich wi bak se Jiova de gi sɛns to di wan dɛn we de du wetin rayt. Dat go mek dɛn “no aw fɔ du tin tret wan, wetin gud ɛn aw fɔ trit pɔsin fia wan. Yu go no wetin fɔ du.”
3 Noa, Daniɛl, ɛn Job bin gɛt dis sɛns we Gɔd de gi. (Izikɛl 14:14) Ɛn Gɔd in pipul dɛn bak tide gɛt di sɛns we i de gi. We yu, yu tink se yu gɛt di sɛns we Gɔd de gi? Fɔ lɛ yu “no” ɔl wetin yu nid fɔ du fɔ mek Jiova gladi, yu nid fɔ no am gud gud wan. So insay dis atikul, wi go lan bɔt (1) aw Noa, Daniɛl, ɛn Job bin lan bɔt Gɔd, (2) aw di lan we dɛn lan bɔt Gɔd bin ɛp dɛn, ɛn (3) aw wi go gɛt fet lɛk dɛn.
NOA NA BIN GƆD IN PADI PAN ƆL WE PIPUL DƐN BIN WIKƐD
4. Aw Noa bin lan bɔt Jiova? Aw di lan we Noa bin lan bɔt Jiova bin ɛp am gud gud wan?
Noa go mɔs dɔn lan bɔt Gɔd in kwaliti dɛn bay we i bin de wach di tin dɛn we Gɔd mek
4 Aw Noa bin lan bɔt Jiova? Frɔm di tɛm we Adam ɛn Iv bin stat fɔ bɔn pikin dɛn, na tri we dɛn pipul dɛn bin de yuz fɔ lan bɔt Jiova: di tin dɛn we i mek, Gɔd in ɔda fetful savant dɛn, ɛn di bɛnifit dɛn we dɛn dɔn gɛt fɔ we dɛn bin de obe am. (Ayzaya 48:18) I go mɔs bi se we Noa bin de pe atɛnshɔn pan di tin dɛn we Gɔd mek, dat go dɔn ɛp am fɔ si klia wan se Gɔd de, ɛn i go dɔn lan bak bɔt in kwaliti dɛn. We Noa bin de du dis, dat go dɔn ɛp am fɔ no se Jiova gɛt pawa ɛn na in wangren na di tru Gɔd. (Lɛta Fɔ Rom 1:20) Noa nɔ bin jɔs biliv Gɔd, bɔt i bin gɛt strɔng fet.
5. Aw Noa bin lan bɔt di tin dɛn we Gɔd want fɔ mɔtalman?
5 Di Baybul se “pipul dɛn mɔs yɛri di mɛsej bɔt Jizɔs Krays fɔs, bifo dɛn biliv am,” we min se di tin dɛn we wi de yɛri frɔm ɔda pipul kin mek wi gɛt fet. (Lɛta Fɔ Rom 10:17) I go mɔs bi se Noa bin yɛri bɔt Jiova frɔm in fambul dɛn. In papa we nem Lamɛk bin gɛt fet pan Gɔd ɛn dɛn bin bɔn am bifo Adam day. (Luk di pikchɔ nia dis atikul in taytul.) Noa bin gɛt in granpa we nem Mɛtyusila, ɛn in gret-gret-granpa we nem Jerɛd, we bin day 366 ia afta we dɛn bɔn Noa. * (Luk di futnot.) (Lyuk 3:36, 37) Sɔm tɛm, na dɛn man dɛn ya ɛn dɛn wɛf dɛn bin tich Noa bɔt Jiova fɔ se na in mek mɔtalman, ɛn I want mɔtalman fɔ bɔn pikin dɛn, ful-ɔp di wan ol wɔl, ɛn wɔship Am. Noa go dɔn lan bak se Adam ɛn Iv nɔ bin obe Jiova, ɛn i go dɔn si di bad tin dɛn we bin de apin bikɔs Adam ɛn Iv nɔ disayd di rayt tin. (Jɛnɛsis 1:28; 3:16-19, 24) Noa bin lɛk wetin i bin de lan, ɛn dat bin ɛp am fɔ sav Jiova.—Jɛnɛsis 6:9.
6, 7. Aw di op we Noa bin gɛt ɛp am fɔ gɛt fet mɔ ɛn mɔ?
6 We yu abop pan Gɔd, dat de mek yu gɛt fet mɔ ɛn mɔ. Imajin aw Noa bin gɛt fet mɔ ɛn mɔ we i bin lan se in nem we min “pɔsin we go pul dɛn pan pen ɔ trɔbul,”gɛt sɔntin fɔ du wit op. (Jɛnɛsis 5:29) Jiova bin yuz in oli spirit fɔ mek Lamɛk tɔk bɔt in bɔy pikin we nem Noa se: “PAPA GƆD [“Jiova,” NW] bin dɔn swɛ dis grɔn se i nɔ go bɛtɛ. Dis pikin ya so go ɛp pul wi pan di traŋa wok we wi bin dɔn de du.” So Noa bin gɛt di op se Gɔd go mek tin bɛtɛ fɔ dɛn. Jɔs lɛk Ebɛl ɛn Inɔk, Noa bin gɛt fet se wan “pikin” go wund di snek na in ed.—Jɛnɛsis 3:15.
7 Noa nɔ bin rili ɔndastand di prɔmis we Gɔd bin mek dɛn rayt na Jɛnɛsis 3:15. Bɔt i bin ɔndastand se dis tin we di Baybul bin dɔn tɔk se go apin dɔn mek wi gɛt op fɔ tumara bambay. Inɔk bin dɔn prich mɛsej lɛk dis se Jiova go dɔnawe wit di wikɛd wan dɛn kpatakpata. (Jud In Lɛta 14, 15) Inɔk in mɛsej we i bin de prich go apin insay Amagɛdɔn ɛn dis go mɔs dɔn mek Noa gɛt fet ɛn op mɔ ɛn mɔ!
Fet ɛn di sɛns we Gɔd de gi de protɛkt wi frɔm Setan in trik dɛn ɛn frɔm di tin dɛn we di pipul dɛn na dis wɔl go want wi fɔ du
8. Aw di no we Noa bin no Gɔd bin protɛkt am?
8 Aw di tru tin dɛn we Noa bin lan bɔt Gɔd ɛp am? Bikɔs Noa bin lan bɔt Jiova, dat bin mek i gɛt fet ɛn di sɛns we Jiova de gi. Dat bin protɛkt am mɔ fɔ mek i nɔ du ɛnitin we go mek Jiova in at pwɛl. Aw i bin du dis? Noa bin want fɔ bi Gɔd in padi, so i nɔ bin mek padi wit dɛn wan dɛn we nɔ gɛt fet pan Jiova ɛn we nɔ de du wetin I want. Noa nɔ bin tan lɛk dɛn bikɔs i nɔ bin alaw di dɛbul dɛn we bin kam dɔŋ na dis wɔl fɔ ful am. Pipul dɛn bin de kɔle di pawaful tin dɛn we di dɛbul dɛn bin de du ɛn i go mɔs bi se dɛn bin de ivin tray fɔ wɔship dɛn. (Jɛnɛsis 6:1-4, 9) Dɔn, Noa bin no se Jiova want mɔtalman dɛn fɔ bɔn pikin dɛn ɛn ful-ɔp di wɔl. (Jɛnɛsis 1:27, 28) So we di dɛbul dɛn bin tek uman dɛn ɛn bɔn pikin dɛn wit dɛn, Noa bin no se na bad tin dɛn du. Dis bin sho klia wan bay di we aw di pikin dɛn bin de big ɛn gɛt trɛnk pas ɔl di ɔda pikin dɛn. Leta, Jiova bin tɛl Noa se i go mek ebi ebi ren kam ɛn dɔnawe wit ɔl dɛn wikɛd pipul dɛn de. Bikɔs Noa bin biliv di tin dɛn we Jiova bin de tɔk fɔ wɔn dɛn, dat bin mek i bil di ak, ɛn in ɛn in famili bin sev.—Di Ibru Pipul Dɛn 11:7.
9, 10. Aw wi go gɛt di kayn fet we Noa bin gɛt?
9 Aw wi go gɛt di kayn fet we Noa bin gɛt? I rili impɔtant fɔ tek tɛm stɔdi Gɔd in Wɔd, fɔ lɛk wetin wi de lan, ɛn yuz am fɔ ɛp wi fɔ lɛf di bad tin dɛn we wi bin dɔn de du ɛn fɔ ɛp wi fɔ disayd di rayt tin. (Pita In Fɔs Lɛta 1:13-15) Dɔn, fet ɛn di sɛns we Gɔd de gi wi go protɛkt wi frɔm Setan in trik dɛn ɛn di tin dɛn we pipul dɛn na dis wɔl go want wi fɔ du. (Sɛkɛn Lɛta Fɔ Kɔrint 2:11) Bɔku pipul dɛn na di wɔl lɛk fɛt fɛt ɛn fri layf ɛn dɛn kin lɛk fɔ du di bad tin dɛn we dɛn want fɔ du. (Jɔn In Fɔs Lɛta 2:15, 16) Dɛn nɔ want fɔ no se wi de nia di tɛm we dis wikɛd wɔl go dɔn. If wi nɔ gɛt strɔng fet, wisɛf go stat fɔ tink da kayn we de. Nɔ fɔgɛt se we Jizɔs bin de kɔmpia wi tɛm to Noa in tɛm, i nɔ bin tɔk bɔt fɛt fɛt ɔ fri layf bɔt i bin tɔk bɔt di tin dɛn we go mek wi nɔ pe atɛnshɔn fɔ sav Gɔd.—Rid Matyu 24:36-39.
10 Aks yusɛf dɛn kwɛstyɔn dɛn ya: ‘Di we aw a de liv mi layf de sho se a rili no Jiova? Di fet we a gɛt de mek a du wetin rayt na Jiova in yay ɛn tich ɔda pipul dɛn fɔ du wetin Gɔd want dɛn fɔ du?’ Di we aw yu go ansa dɛn kwɛstyɔn dɛn ya, go ɛp yu fɔ no if yusɛf na Gɔd in padi jɔs lɛk Noa.
DANIƐL BIN SHO SE I GƐT DI SƐNS WE JIOVA DE GI WE I BIN DE NA BABILƆN
11. (a) Daniɛl na pɔsin we bin rili lɛk Gɔd. Wetin dat tich wi bɔt in mama ɛn papa? (b) Us wan pan Daniɛl in kwaliti dɛn yu go lɛk fɔ falamakata?
11 Aw Daniɛl bin kam fɔ no Jiova? Daniɛl in mama ɛn papa go mɔs dɔn tich am fɔ lɛk Jiova ɛn fɔ lɛk in Wɔd. Ɛn Daniɛl bin du so te i day. Pan ɔl we i bin dɔn ol, i bin de stil tek tɛm stɔdi di Skripchɔ dɛn. (Daniɛl 9:1, 2) Daniɛl bin no Jiova gud gud wan. I bin no bak ɔl wetin Jiova bin dɔn du fɔ di Izrɛlayt dɛn. Wi no dis frɔm di we aw Daniɛl bin put insɛf dɔŋ ɛn pre to Jiova. Dis prea de na Daniɛl 9:3-19. Rid dis prea, ɛn tek tɛm tink bɔt am. Aks yusɛf dis kwɛstyɔn, ‘Wetin dis prea de tich mi bɔt Daniɛl?’
12-14. (a) Aw Daniɛl bin sho se i gɛt di sɛns we Gɔd de gi? (b) Aw Jiova bin blɛs Daniɛl fɔ di maynd we i bin gɛt ɛn fɔ we i nɔ kɔmɔt biɛn am?
12 Aw di tin dɛn we Daniɛl bin lan bɔt Gɔd bin ɛp am? I nɔ bin izi fɔ lɛ pɔsin we na Ju sav Gɔd fetful wan na Babilɔn usay dɛn bin de wɔship lay lay gɔd dɛn. Fɔ ɛgzampul, Jiova bin tɛl di Ju pipul dɛn se mek dɛn ‘du ɔltin fɔ ɛp di siti we i dɔn sɛn dɛn go na ɛgzayl.’ (Jɛrimaya 29:7) Bɔt Jiova bin tɛl dɛn bak se dɛn fɔ wɔship in wangren wit ɔl dɛn at. (Ɛksodɔs 34:14) Aw Daniɛl go ebul fɔ obe dɛn tu tin dɛn ya we Jiova tɛl dɛn fɔ du? Di sɛns we Gɔd de gi bin ɛp Daniɛl fɔ no se i fɔ obe Jiova fɔs, dɔn i go obe mɔtalman rula. Afta lɔng lɔng tɛm, Jizɔs bin tich dis sem tin.—Lyuk 20:25.
13 Tink bɔt wetin Daniɛl bin du we dɛn bin put lɔ se nɔbɔdi nɔ fɔ pre to ɛni gɔd ɔ pɔsin pas di kiŋ fɔ 30 dez. (Rid Daniɛl 6:7-10.) Daniɛl fɔ dɔn fɛn ɛkskyuz ɛn tɔk se, ‘Na fɔ 30 dez nɔmɔ.’ Bifo dat, Daniɛl nɔ bin gri fɔ alaw mɔtalman lɔ fɔ bi di tin we impɔtant to am pas in wɔship to Gɔd. Daniɛl fɔ dɔn go pre to Jiova na say we nɔbɔdi nɔ de si am. Bɔt i no se bɔku pipul dɛn kin si am we i de pre ɛvride. So pan ɔl we i nɔ bin sef, Daniɛl bin kɔntinyu fɔ pre usay pipul dɛn de si am bikɔs i nɔ want pipul dɛn fɔ tink se i dɔn stɔp fɔ sav Jiova.
14 Jiova bin blɛs Daniɛl fɔ di maynd we i bin gɛt ɛn fɔ we i bin disayd nɔ fɔ kɔmɔt biɛn am. I bin mek wan mirekul ɛn sev Daniɛl fɔ mek di layɔn dɛn nɔ kil am. Dat bin mek ɔl di pipul dɛn na Mɛdo-Pashia bin no bɔt Jiova!—Daniɛl 6:25-27.
15. Aw wi go gɛt di kayn fet we Daniɛl bin gɛt?
15 Aw wi go gɛt di kayn fet we Daniɛl bin gɛt? If wi want fɔ gɛt strɔng fet, wi nɔ fɔ jɔs rid Gɔd in Wɔd. Wi nid fɔ ɔndastand am. (Matyu 13:23) Wi want fɔ no aw Jiova de tink ɛn fil bɔt sɔm tin dɛn. So wi nid fɔ tink gud gud wan bɔt wetin wi de rid. I rili impɔtant bak fɔ pre ɛvride, mɔ we wi gɛt prɔblɛm dɛn. Wi biliv se Jiova go gi wi di sɛns ɛn di trɛnk we wi de pre fɔ.—Jems 1:5.
JOB BIN TINK DI WE AW JIOVA DE TINK DI TƐM WE TIN BIN FAYN ƐN DI TƐM WE TIN BAD
16, 17. Aw Job bin kam fɔ no Jiova?
16 Aw Job bin kam fɔ no Jiova? Job nɔto bin Izrɛlayt. Bɔt Ebraam, Ayzak, ɛn Jekɔb na bin in fawe fambul dɛn, ɛn Jiova bin dɔn tich dɛn bɔt insɛf ɛn wetin i want fɔ mɔtalman. I go mɔs bi se Job insɛf bin lan bɔku valyu tin dɛn bɔt di trut. (Job 23:12) I bin tɔk bɔt Jiova se: “A bin no yu nɔmɔ bay wetin a yɛri pipul dɛn de se.” (Job 42:5) Ɛn Jiova insɛf sɛf bin tɔk se Job bin de tɛl ɔda pipul dɛn di tru tin bɔt am.—Job 42:7, 8.
Wi go gɛt mɔ fet bay we wi de wach di tin dɛn Jiova mek ɛn lan mɔ bɔt in kwaliti dɛn (Luk na paregraf 17)
17 Dɔn, Job bin kam fɔ lan bɔt Jiova in kwaliti dɛn bak bay we i bin de luk di tin dɛn we Jiova mek. (Job 12:7-9, 13) Bɔt Jiova ɛn Ilayu bin yuz di tin dɛn we I mek fɔ tich Job aw mɔtalman smɔl we yu kɔmpia am wit Gɔd. (Job 37:14; 38:1-4) Di tin dɛn we Jiova bin tɔk bin afɛkt Job ɛn i bin put insɛf dɔŋ ɛn tɔk se: “A no se natin nɔ de we yu nɔ ebul du, ɛn nɔbɔdi nɔ go ebul tap ɛnitin we yu wan du.” Job bin kɔntinyu fɔ tɔk se: ‘A de rɔb dɔst ɛn ashis beg yu, lɛ yu sɔri fɔ mi.’—Job 42:2, 6.
18, 19. Aw Job bin sho se i rili no Jiova?
18 Aw di lan we Job bin lan bɔt Gɔd bin ɛp am? Job bin ɔndastand di we aw Jiova de tink gud gud wan. I bin rili no Jiova, ɛn dis bin ɛp am fɔ du tin di rayt we. Fɔ ɛgzampul, Job bin no se i nɔ go se i lɛk Gɔd if i nɔ de trit ɔda pipul dɛn fayn. (Job 6:14) Job nɔ bin tink se i bɛtɛ pas ɔda pipul dɛn, bifo dat, i bin de trit dɛn lɛk in yon famili, ilɛksɛf dɛn jɛntri ɔ dɛn po. Job bin tɔk se: “Nɔto di sem PAPA GƆD mek mi ɛn dɛn?” (Job 31:13-22) Ivin di tɛm we Job bin jɛntri ɛn gɛt pawa, i nɔ bin ɛva mek prawd ɛn i nɔ bin si insɛf se i impɔtant pas ɔda pipul dɛn. Dis rili difrɛn frɔm di we aw bɔku pipul dɛn we jɛntri ɛn we gɛt pawa de biev tide.
19 Job nɔ bin alaw ɛnitin lɛk prɔpati fɔ bi di tin we impɔtant to am pas Jiova. I bin no se if dat apin, i go dinay “PAPA GƆD we de ɔp.” (Rid Job 31:24-28.) Dɔn, Job bin si mared as impɔtant prɔmis we maredman ɛn in wɛf de mek to dɛnsɛf. (Job 31:1) Dat na bin fayn tin bikɔs Job bin de di tɛm we Jiova bin de alaw man dɛn fɔ mared pas wan uman. So if Job bin want i fɔ dɔn mared ɔda uman. I go mɔs bi se Job bin no bɔt di fɔs mared we Jiova bin mek bitwin wan man ɛn wan uman, ɛn Job bin disayd fɔ de da kayn we de. * (Luk di futnot.) (Jɛnɛsis 2:18, 24) Infakt, afta lɛk 1,600 ia, Jizɔs insɛf bin tich bɔt di sem tin fɔ se mami ɛn dadi biznɛs na fɔ maredman ɛn in wɛf.—Matyu 5:28; 19:4, 5.
20. If wi no Jiova ɛn di tin dɛn we i want wi fɔ du, aw dat go ɛp wi fɔ pik di rayt padi dɛn ɛn di we aw wi want fɔ ɛnjɔy wisɛf?
20 Aw wi go gɛt di kayn fet we Job bin gɛt? Wi nid fɔ no Jiova gud gud wan ɛn alaw di tin dɛn we wi de lan fɔ afɛkt ɔl wetin wi de du. Fɔ ɛgzampul, di Baybul se Jiova “et ɛnibɔdi we lɛk fɛt-fɛt” ɛn wi nɔ fɔ spɛn tɛm wit pipul dɛn we nɔ de tɔk tru. (Rid Sam 11:5 NW; 26:4.) Naw aks yusɛf dɛn kwɛstyɔn dɛn ya: ‘Wetin dɛn tu skripchɔ dɛn ya de tɛl mi bɔt di we aw Jiova de tink? Aw dat fɔ afɛkt di tin we impɔtant pas ɔl na mi layf? Aw dat de afɛkt di tin dɛn we a de wach na di Intanɛt, di wan dɛn we a de pik fɔ bi mi padi, ɛn wetin a de pik fɔ ɛnjɔy misɛf?’ Di we aw yu go ansa dɛn kwɛstyɔn dɛn ya go ɛp yu fɔ no if yu sabi Jiova gud gud wan. Wi nɔ want dis wikɛd wɔl fɔ afɛkt di tin dɛn we wi de du. So wi nid fɔ tren wisɛf fɔ “lan aw fɔ no wetin gud ɛn bad,” we min se, wi nid fɔ lan di difrɛns bitwin wetin rayt ɛn wetin rɔng ɛn bitwin wetin mek sɛns ɛn wetin nɔ mek sɛns.—Di Ibru Pipul Dɛn 5:14; Lɛta Fɔ Ɛfisɔs 5:15.
21. Wetin go ɛp wi fɔ “no” ɔl wetin wi nid fɔ no we go mek wi du wetin Jiova want?
21 Bikɔs Noa, Daniɛl, ɛn Job bin du ɔl wetin dɛn ebul fɔ no Jiova gud gud wan, Jiova bin ɛp dɛn fɔ “no” ɔltin we dɛn fɔ no so dat dɛn go du wetin i want. Dɛn ɛgzampul de sho klia wan se we wi de du tin di we aw Jiova want, dat go mek wi liv bɛtɛ layf. (Sam 1:1-3) So aks yusɛf dis kwɛstyɔn, ‘A no Jiova gud gud wan lɛk aw Noa, Daniɛl, ɛn Job bin no am?’ Infakt, tide wi kin no Jiova gud gud wan pas dɛn fetful man dɛn ya bikɔs Jiova dɔn gi wi bɔku bɔku tin dɛn fɔ lan bɔt am. (Prɔvabs 4:18) So na fɔ tek tɛm stɔdi di Baybul. Tink gud gud wan bɔt wetin yu dɔn rid, ɛn pre to Jiova fɔ in oli spirit. If yu du dat, dis wikɛd wɔl nɔ go ebul fɔ mek yu du di tin dɛn we Jiova nɔ want. Bɔt, yu go du tin wit sɛns ɛn kam nia yu Papa we de na ɛvin mɔ ɛn mɔ.—Prɔvabs 2:4-7.
