1-3. (a) Ngera mo ngosukid me kede melemolem el oumerang er a Dios er a chelsel tia el taem er a uriul sils? (b) Ngera kede mo mesuub er tia el suobel?

 CHELECHA el taem e kede kiei er a ulebongel er a uriul sils. Me ngsebeched el mesterir a relmuut el betok el mekngit a omerellir el chad. E tirkang a “sebechir el mo meklou el ua chudel.” (Psalm 92:7) Me ngdiak lemechas a rengud a lsekum a rebetok el chad a oltngakl a tekoi el ledu Dios el kmo ngmelemalt. A Paulus a dilu er a Rekristiano el kmo: “Bo mua re ngalek el diak lodenge omerellel a mekngit,” e dirrek bom ua re “meklou el chad me bo lultebechel omelebedebekiu.” (1 Korinth 14:20) Ngmekera doruul er tiang?

² Kede metik er a nger er tiang er a bades el kmo: “Tirkel osiik er a RUBAK a kmal ungil el medengelii a llemalt.” (Osisechakl 28:5) Tia belkul a kmo te medengei a rokui el tekoi el lousbech me bo lsebechir loldeu er a rengul a Jehovah. A Osisechakl 2:7, 9, a  dirrek el osisecheklid el kmo, a Jehovah a mesterir a llomeserreng tirke el meruul a llemalt. E seikid e ngmo sebechir el mo “medengelii a llemalt ma tabesul el omeruul.”

³ A Noah me a Daniel me a Job a uleba llomeserreng er a Dios. (Esekiel 14:14) A rechedal a Dios er chelecha el taem me te dirrek el uaisei. E kau a kuk mekerang? Ke oba llomeserreng er a Dios? A bo ‘dungil medengei’ aike el tekoi el kired el meruul me bo el sebeched lodeuir a rengul a Jehovah, e ngkired el mo ungil medengelii. Me ngar tia el suobel, e kede mo suubii (1) sel rolel e a Noah me a Daniel me a Job a mlo ungil medengelii a Dios, (2) sel rolel e a Dios a ngilsuterir me a (3) sel rolel e ngsebeched el mekurulii a klaumerang er kid el mo ua sel klaumerang er tir.

4. Ngmilekera Noah e mlo ungil medengelii a Dios? E milekera tia el klemedengei er ngii er a Dios e ngilsuir?

⁴ Ngmilekera Noah e mlo ungil medengelii a Dios? Ngulemuchel er sel taem er a bo loungalek a Adam me a Eva, e a rechad a milsuub el kirel a Jehovah el okiu a edei el rolel el ngii a blebelel, me a rekuk bebil el mesiungel, me a klungiaol el mo er ngii a lsekum kede olengesenges er ngii. (Isaia 48:18) Me a Noah a mle kerekikl el omtab a blebelel a Dios, me ngmilsa el kmo ngmera el ngar ngii a Dios, e dirrek el locha milsuub el kirel a blekerdelel a Dios. Me tia locha rirellii el mo ungil medengelii a Jehovah el kmo, ngkot el mesisiich e di ngii el tang a mera el Dios. (Rom 1:20) Engdi Noah a dimlak di blo loumerang er a Dios e lemerekong, e ngdirrek el milekurulii a mesisiich el klaumerang er ngii er a Dios.

5. Ngmilekera Noah e mesuub el kirel aike el soal a Dios el kirel a klechad?

⁵ A Biblia a mesaod el kmo a “chad a mo oumerang el okiu a tekoi el le renges,” el belkul a kmo a tekoi el derenges er a rebebil a sebechel rullid el mo oumerang. (Rom 10:17) A Noah a locha ullerrenges a chisel a Jehovah er a rechedal. A demal er a Lamek a uluumerang er a Dios, e dirrek el milechell er a uchei er a lemad a Adam. (Momes er a siasing er a uchelel a suobel.) A demal el rubak a mle Methusela e a demal a demal a demal a demal el rubak a mle Jared el mlad er a 366 el rak er a uriul er a lemechell a Noah. * (Momes er a footnote.) (Lukas 3:36, 37) Tirka el chad me a rebecherir a locha ulsisecheklii a Noah el kmo a Jehovah a ngike el ulemeob er a rechad, e Ngii a mle soal a rechad a bo lomechell el omekeek er tia el chutem e bo losiou er Ngii. A Noah a locha dirrek el silubii el kmo a Adam me a Eva a mlo diak lolengesenges er a Jehovah, me ngmle sebechel el mesa telemellel a omelilt er tir. (Genesis 1:28; 3:16-19, 24) A Noah a kmal mle soal aike el tekoi el lulsuub, me tia millisiich er ngii el mo mesiou er a Jehovah.​—Genesis 6:9.

6, 7. Ngmilekera omelatk e smisichii a klaumerang er a Noah?

⁶ A omelatk a smisichii a klaumerang. Ka molatk er sel rolel e a klaumerang er a Noah a  mlo mesisiich er a bo lodengei el kmo, a ngklel el belkul a kmo “duoseberreng” me a lechub e ngulengull a uldimukl er a uldasu el kirel a omelatk. (Genesis 5:29, footnote) A Jehovah a ulemekrael er a Lamek el mo mesaod el kirel a ngelekel er a Noah el kmo: “Ngikal mechellang er tial beluu el mildebeakl er a RUBAK mo odoseb a rengud er a rengelel a bek el urered.” Me a Noah a uleba omelatk el kmo, a Dios a mo remuul a rokui el tekoi el mo ungil. Ngdi mle ua uldesuel a Abel me a Enok el uluumerang el kmo, a ‘uldidellel a rasech’ a mo rukemii a bdelul a bersoech.​—Genesis 3:15.

⁷ A Noah a dimlak lecherrungel a klemedengei er ngii er a telbilel a Dios el ngar er a Genesis 3:15. Engdi ngmle medengei el kmo, tia el ulaoch a meskid a omelatk er a ngar medad el klebesei. Me a Enok a dirrek el ulemerk er a osisiu el klumech el kmo a Jehovah a mo okngemedii a chelebirukel. (Jude 14, 15) Me ngulterekokl tia el klemechel a Enok el ngii a mo tmaut er a taem er a Armakedon el silisichii a klaumerang me a omeltkel a Noah!

8. Ngmilekera mukerreu a Noah e le ngmle ungil medengelii a Dios?

⁸ Ngmilekera mera el klemedengei el kirel a Dios e ngilsuir a Noah? A Noah a milsuub el kirel a Jehovah me ngmilekurulii a klaumerang me a llomeserreng er a Dios. E tia ulemekerreu er ngii a uchul me ngdimlak bo loruul a ngii di el tekoi el mo tomellii a rengul a Jehovah. Ngmilekerang? Ngmle soal el mo sechelil a Dios, me ngdimlak bo el sechelirir tirke el dimlak loumerang er a Jehovah me tirke el uleltngakl er Ngii. A Noah a kuk mle ngodech er tir e le ngdimlak el mecheblad er tirke el mekngit el anghel el mlei er a chutem. A rechad a mle mechas a rengrir er tirka el mesisiich el anghel e locha millasem el mo mengull er tir. (Genesis 6:1-4, 9) A Noah a dirrek el mle medengei el kmo, a Jehovah a soal a rechad a bo loungalek e lomekeek er tia el beluulechad. (Genesis 1:27, 28) Me tirka el mekngit el anghel er a bo lebecherir a redil e lebo er ngii a rengelekir, e a Noah a mle medengei el kmo tiang a mle mekngit el tekoi. E tiang a liluut lobeketakl er a bo lemeklou tirka el ngalek e bo lemesisiich er a rokui el ngalek. Me a Jehovah a dilu er a Noah el kmo, ngmo otengelii a Ieleb el mo olekngemed er a rokui el mekngit el chad. Me a Noah a uluumerang er tia el omengelechel a uchul me ngtileketekii a arhe me bo el sebechel ngii me a telungalek er ngii el mo suobel.​—Hebru 11:7.

9, 10. Kede mekera mekurulii a klaumerang er kid el ua Noah?

⁹ Kede mekera mekurulii a klaumerang er kid el ua Noah? Ngklou a ultutelel a dekerekikl el mesuub er a Tekingel a Dios, e bo lebetik a rengud er a tekoi el desuub, e bo dousbech el melodech a blekerdeled, e dirrek el bo dungil melilt a tekoi. (1 Petrus 1:13-15) Seikid e a klaumerang me a llomeserreng er a Dios a mo omekerreu er kid er a bedeklel a Satan, me a uldasu er tia el beluulechad. (2 Korinth 2:11) A rebetok el chad er tia el beluulechad a sorir a uldikel me a deleboes lomeruul, e dirrek el di  oltirakl a ngelbesel a rengrir. (1 Johanes 2:15, 16) Te mengemikr er a uldasu el kmo, kede kmedang er a ulebongel er tia el mekngit el beluulechad. Me a lsekum ngmechitechut a klaumerang er kid, e ngsebeched el mo oba osisiu el uldasu. Me lak dobes, a Jesus er a lomekesiu er a taem er kid er a taem er a Noah, e ngdimlak lolekoi el kirel a uldikel me a deleboes lomeruul, e ngbai milsaod el kirel a telemellel a bo demechesang e bo lak dosiou er a Dios.​—Monguiu er a Mateus 24:36-39.

¹⁰ Ka di lekau el merriter el kmo: ‘A klengar er ngak, ngochotii el kmo a kungil medengelii a Jehovah? A klaumerang er ngak, ngrullak el mo semeriar el meruul a tekoi el ledu Jehovah el kmo ngmelemalt, e mo olisechakl er a rechad el kirel a tekoi el soal a Dios a doruul?’ A nger er aika el ker a mo ngosukau el tirterau el kmo, ke oltirakl er a Dios el ua Noah me a lechub e ngdiak.

11. (a) A bltkil a rengul ngika el buik el Daniel el mora Dios, ngera ngouchais el kirel a demal me a delal? (b) Ngera el blekerdelel a Daniel a soam loukerebai?

¹¹ Ngmilekera Daniel e mlo ungil medengelii a Dios? A demal me a delal a Daniel a ulterekokl el ulsisecheklii el mo betik a rengul er a Jehovah me a Tekingel. Me a Daniel a millemolem el blak a rengul el mora Dios er a klengar er ngii el rokir. Ngmo lmuut er sera lechudelang, me ngdi mle kerekikl el mesuub a Bades. (Daniel 9:1, 2) Ngmle ungil medengelii a Jehovah me aike el rokui el tekoi el Jehovah a riruul el mora rechad er a Israel. E tia sebeched el mesang er a nglunguchel el ngar er a Daniel 9:3-19. Monguiu er tia el nglunguuch, e molebedebek er ngii, e di lekau el oker el kmo: ‘Tia el nglunguuch, ngosisecheklak er a ngera el kirel a Daniel?’

12-14. (a) Ngmilekera Daniel e ochotii a llomeserreng er a Dios? (b) Ngmilekera Jehovah e omekngeltengat er a blekengel me a blakerreng er a Daniel?

¹² Ngmilekera klemedengei er a Daniel el kirel a Dios e ngilsuir? Ngdimlak lebeot er ngika el blak a rengul chad er a Judea el mesiou er a Dios er a beluu er a Babilon. El ua tiang, a Jehovah a dilu er a Rechijudea el kmo: “Mosiik a klungiolel sel beluu el kngilikemiu el mo kelebus er ngii.” (Jeremia 29:7) E a osisiu el taem, e ngmilengelechel er tir el mo mengull er ngii el loba rengrir el rokir. (Exodus 34:14) Me ngmilekera Daniel e mo sebechel lolengesenges aika el eru el omengelechel? A llomeserreng er a Dios a ngilsuir el mo medengei el kmo, ngkirel lolengesenges er a Jehovah el kot, e mochu olengesenges er a rulab a dereder. Me a uriul er a betok el dart el rak, e a Jesus a uluusbech er tia el osisiu el omellach.​—Lukas 20:25.

¹³ Ka di molatk a tekoi el lurruul a Daniel er sel taem er a letobed a llach el kmo, ngdiak el sebechir a rechad el mengull er a ngii di el chelid me a lechub e ngchad el 30 el klebesei, ngdi ta el king. (Monguiu er a Daniel 6:7-10.) Ngmle sebechel el di melebelubet er ngii e dmu el kmo: ‘Tiang a di 30 el klebesei.’ Nguaisei, engdi ngdimlak lenguu a llecherir a rechad el mo ruchei er a omengull er ngii el mora Dios. E mle sebechel el mo mertii e meluluuch el mora Jehovah. Engdi ngmle medengei el kmo, a rebetok el chad a ulemes er ngii el meluluuch er a bek el sils. Me alta tia el omerellel a mle sebechel mo uchul a telemellel, engdi ngmillemolem el meluluuch er sel basio el sebechir a rechad el mesang, e le ngdimlak el soal a bo lomdasu el kmo, ngmla mo diak losiou er a Jehovah.

¹⁴ A Jehovah a ulemekngeltengat er a blekengel me a blakerreng er a Daniel. Me ngrirellii a mengasireng el tekoi er a losebelii a Daniel er  a laion. E tiang a mlo uchul me a rechad el meliuekl er a Renged er a Media me a Persia a mlo mesuub el kirel a Jehovah!​—Daniel 6:25-27.

15. Kede mekera mekurulii a klaumerang el ua klaumerang er a Daniel?

¹⁵ Kede mekera mekurulii a klaumerang er kid el ua Daniel? Ngdiak di lomengiuel a Tekingel a Dios a smisichii a klaumerang er kid, e ngdirrek el kired el mo ungil medengei a tekoi el losaod. (Mateus 13:23) Ngsoad el mo medengelii a uldesuel a Jehovah el kirel a tekoi. Sei a uchul me ngkired el mo dmolech el melebedebek aike el tekoi el donguiu. Ngdirrek el kmal klou a ultutelel el bo deblechoel meluluuch el ileakl sel bo dechelebangel a meringel el blekeradel. Ngsebeched el oumera el kmo a Jehovah a dmeu a rengul el omeskid a llomeserreng me a klisiich sel doluluuch lolengit er ngii.​—Jakobus 1:5.

16, 17. Ngmilekera Job e mlo ungil medengelii a Jehovah?

¹⁶ Ngmilekera Job e mlo ungil medengelii a Jehovah? A Job a dimlak el chad er a Israel.  Engdi a Abraham me a Isak me a Jakob a mla er ngii a rolir el mo chedal, e a Jehovah a ulsisecheklterir el kirel me aike el tekoi el mle soal a rechad a bo loruul. Me ngmla er ngii a rolel e a Job a milsuub a betok er aika el mekreos el tekoi er a klemerang. (Job 23:12) Ngdilu er a Jehovah el kmo: “Ak mle medengelkau el di ulekiu a ikel krirenges.” (Job 42:5) Me a Jehovah a dilu el kmo a Job a uluuchais a klemerang el Kirek el mora rechad.​—Job 42:7, 8.

¹⁷ A Job a dirrek el mlo medengei a blekerdelel a Jehovah lokiu sel lomes a blebelel. (Job 12:7-9, 13) A Elihu me a Jehovah a uluusbech a blebelel a Jehovah el osisecheklii a Job el mo medengei el kmo, a rechad a kmal diak el sebechir el mo mekesiur a Dios. (Job 37:14; 38:1-4) Me a tekingel a Jehovah a kmal rirtechii a rengul a Job me ngmle ngariou a rengul el melekoi er a Dios el kmo: “Ak medengei el kmo kau olab a bek el klisiich; ma ikel bek el soam a sebechem el remuul.” Ngdirrek el dilu el kmo: “Mak uuchela er a renguk mak ulat er a chebechab.”​—Job 42:2, 6.

18, 19. Ngmilekera Job e ochotii el kmo ngmle ungil medengelii a Jehovah?

¹⁸ Ngmilekera klemedengei er a Job el kirel a Dios e ngilsuir? A Job a mle ungil medengei a omellach er a Dios. Ngmle ungil medengelii a Jehovah a uchul me ngmle soal meruul a llemalt. El ua tiang, ngmle medengei el kmo ngdiak el sebechel melekoi el kmo ngbetik a rengul er a Dios a lsekum ngmekngit a omerellel el mora rechad. (Job 6:14) Ngdimlak lomdasu el kmo ngkuk ungil er a rebebil, e ngbai ulemes er tir el ua lechedal a telungalek er ngii, alta te mle merau me a lechub e te chebuul. Me ngdilu el kmo: “Ngikel Dios el milebak a dirrek el ulemeob er a re mesiungek.” (Job 31:13-22) Ngmo lmuut er sel taem el Job a mlo merau e klou a klisichel, me ngdimlak bo lekedidai a rengul e lomes er a rechad el ua lak a ultutelir. E tia kmal ngodech er a blekerdelir a rebetok el chad el tir a merau e klou a klisichir er chelecha el taem.

¹⁹ A Job a dimlak lekengei er a ngii di el tekoi, el mo lmuut er a klalo, me lebo ruchei er a Jehovah. Ngmle medengei el kmo a bo leuaisei, e ngmo otngeklii a “Dios el Olab a Bek el Klisiich.” (Monguiu er a Job 31:24-28.) Ngdirrek el ulemes er a chebechiil el mekreos el telbiil er a delongelel a bechiil sechal me a redil. Me ngtilbir el diak bo lengibes er a ta er a redil. (Job 31:1) E tiang a ileakl el tekoi, e le ngkiliei er a taem el Jehovah a kilengei er a sechal el mo betok a bechil. Me ngmla er ngii a techellel el mo er ngii a ongeru el bechil a ble lsoal. Engdi ngmle medengelii sel kot el chebechiil el lekiltmeklii a Jehovah er a delongelel a ta el sechal me a ta el redil a uchul me ngmillilt el mo oltirakl er tiang. * (Momes er a footnote.) (Genesis 2:18, 24) E a uriul er a bekord el 1,600 el rak, e a Jesus a milsaod er tia el osisiu el omellach, el kmo a durs er a chebechiil me a chebechiil a di kirel meketmokl er a delongelel a ta el bechiil sechal me a redil.​—Mateus 5:28; 19:4, 5.

20. Ngmekera klemedengei er kid er a Jehovah me a llechul e ngosukid el mo ungil melilt er a remo sechelid me a tekoi er ongelaod el soad?

²⁰ Kede mekera mekurulii a klaumerang er kid el ua Job? Ngkired el mo ungil medengelii a Jehovah e mecherei tia el klemedengei er kid me ngomekrael a rokui el doruul. El ua tiang, a Biblia a mesaod el kmo a Jehovah a ouketui a “chim el omekoad er a re diak a telemellir el chad” e dirrek el mesaod el kmo ngdiak el kired el lobengterir a rechad el mengeblad. (Monguiu er a Osisechakl 6:16-19; Psalm 26:4.) Me chelechang e molatk el  kmo: ‘Aika el eru el bades, ngera ngouchais er ngak el kirel a uldesuel a Jehovah? E mekera ngar er ngii a lerellii er a kot el klou a ultutelel el tekoi er a klengar er ngak? Ngera ngrullii er a uldesuek el kirel aike el kumes er a Internet me a rolel a kulilt er a remo sechelik, me a rolel a ongelaod el kulilt?’ A nger er kau a sebechel ngosukau el mo mesa el kmo ngua ngera klemedengei er kau er a Jehovah. Ngdiak el soad el mekesuseu el mo omdasu el ua rechad er tia el mekngit el beluulechad. Me ngkirel mo ‘meral oureor chomelebedebeked,’ el belkul a kmo ngkired el mesuub el mo medengelii a klekakerous er a melemalt me a cheleuid me a llomeserreng me a klebelung.​—Hebru 5:14, BT; Efesus 5:15.

21. Ngera mo ngosukid el mo ‘ungil medengei’ aike el kired el mo meruul me bo el sebeched lodeuir a rengul a Jehovah?

²¹ A Noah me a Daniel me a Job a mlo er a tkurrebab el sebechir el mo mekurulii a klemedengei er tir er a Jehovah, me ngilsuterir el mo ‘ungil medengei’ aike el tekoi el kirir el meruul me bo lodeuir a rengul. A kerebai er tir a ochotii el kmo a doruul a tekoi loltirakl er a rolel a Jehovah e ngmo ungil a klengar er kid. (Psalm 1:1-3) Me di lekau loker el kmo: ‘Ngak, a kungil medengelii a Jehovah el ua Noah me a Daniel me a Job?’ Chelecha el taem, e nglmuut el mo ungil a klemedengei er kid er a Jehovah, e le Jehovah a mla meskid a kuk betok el tekoi el mesaod el kirel. (Osisechakl 4:18) Me bo leblak a rengum el mesuub er a Biblia, e molebedebek a tekoi el mosuub, e moluluuch el kirel a chedaol reng. Seikid e ngmo diak el sebechel tia el mekngit el beluulechad el choitikikau e ke bai mo meruul a tekoi loba llomeserreng er a Dios, e lmuut el mo kmeed er a Demad el ngar er a eanged.​—Osisechakl 2:4-7.