1-3. (a) Exeeni enrowa onikhaliherya ovikaniha okhala oororomeleya mahiku ala ookiserya? (b) Exeeni ninrowa ahu wiixutta mwaha ola?

OLELO-VA nikhala waattamela wanikisa wa mahiku ookiserya. Ninnaaweha atthu anceene ootakhala. Awo ‘anniphuwa ntoko munyepu’. (Esalimo 92:7, Biblya Exirima) Tthiri olelo-va atthu anceene annikhootta moonelo wa Muluku voohimya sa itthu sooloka ni soohiloka. Paulo aahaaleela maKristau wira: “mukhaleke ntoko anamwane, masi mota wo wupuwela mukhaleke atthu alupale”. (1 aKorinto 14:20) Ninrowa opaka sai eyo?

² Ninniphwanya waakhuliwa waya ni yoolepa ahu ya mwaha ola, yeeyo enihimya so: “Atthu òtakhala khansuwela exariya: anaphavela Apwiya, annìwa sothene”. (Miruku 28:5) Tthiri anaxariya anniwerya wiiwexexa wala osuwela itthu sotheene sinitthuneya opaka wira emuhakalalihe Yehova. Nave Miruku 2:7, 9, onniixuttiha wira Yehova onnaavaha miruku ale  aniphavela opaka itthu sooreera. Nuumala-vo, awo ‘annisuwela othanla itthu sa exariya ni soloka ni annixutta weettela makhalelo òrera’.

³ Nowe, Daniyeli, ni Yobi yaahikhalana miruku sinikhuma wa Muluku. (Ezekiyeli 14:14) Nave eyo enniiraneya ni arumeyi a Yehova olelo-va. Ankhi nyuwo? Niireke mookhalana miruku sa Muluku? Wira ‘mwiiwexexe itthu sothene’ munitthuneya anyu opaka wira mmuhakalalihe Yehova, muhaana omusuwela saana yena. Nto mwaha ola ninrowa wiixutta (1) moota Nowe, Daniyeli, ni Yobi yaamusuwenle aya Muluku, (2) moota omusuwela Muluku waakhalihenrye aya arumeyi awo, (3) ni moota woolipiha waamini wahu sintoko awosa.

4. Nowe aawenrye sai omusuwela Yehova, nave omusuwela Muluku waamukhalihenrye sai?

⁴ Nowe aamusuwenle sai Yehova? Okhuma okathi Adamu ni Eva yaapacenrye aya waayara anamwane, atthu yaaniixutta voohimya sa Yehova mwa inamuna tthaaru: wuupuwelele itthu sipattuxiwe, wiixutta ni matakiheryo a arumeyi akina a Muluku oowaamini, ni mireerelo yaaphwannye aya mwaha womwiiwelela Muluku. (Yesaya 48:18) Mwaha woovaha ephoole soopattuxiwa, Nowe aahikupalixa wira Muluku ookhala, nave aahiixutta mikhalelo sawe. Eyo yaahimukhaliherya Nowe osuwela wira Yehova toowerya ni tori paahi Muluku ekeekhai. (aRoma 1:20) Nave Nowe khahiyo paahi aamukupali Muluku, masi-tho aahilipiha omwaamini wawe.

5. Nowe asuwenle sai etthu yaamwiirinhe Muluku waapattuxa apinaatamu?

⁵ Biibiliya onihimya wira “waamini onnitthara etthu wiiwale aya”, nto eyo entaphulela wira wiiwa etthu enihimmwa ni atthu akina pooti onikhaliherya okhalana waamini. (aRoma 10:17) Woonasa wene Nowe aahileeliwa ni amusi awe voohimya sa Yehova. Paapa awe, Lameki, aanimwaamini Muluku ni aayariwe ohinatthi Adamu okhwa. (Nwehe elatarato yoopacerya.) Taata awe Nowe aari Metuxela, nave muhavinre awe (wala apapaya apapawe) aari, Yeredi, yoowo aakhwiiye sivinre ene iyaakha 366 nuumala Nowe oyariwa. * (Nwehe enoota.) (Luka 3:36, 37) Waaniheryasa alopwana awo, ni axaaraya yaahimwiixuttiha Nowe wira Yehova taapattunxe apinaatamu ni oniphavela wira awo yaayareke anamwane, esareye valaponi ni emurumeeleke Yena. Nave Nowe woonasa wene aahileeliwa wira Adamu ni Eva khiyaamwiwelenle Yehova, ni aahiweha mixankiho saakhumelenle mwaha wa soothanla saya soohiloka. (Maphattuwelo 1:28; 3:16-19, 24) Nowe aanisiveliwa ni itthu aixutta awe, ni eyo yaahimwiiriha omurumeela Yehova.​—Maphattuwelo 6:9.

6, 7. Moota xeeni nlipelelo naalipinhe aya waamini wa Nowe?

 ⁶ Nlipelelo ninnilipiha waamini. Tthiri waamini wa Nowe waahilipa vanceene okathi aasuwenle awe wira nsina nawe naataphulela ‘Okurunuxa murima’, nlo naahela muhina yoolipelela ya muhoolo. (Maphattuwelo 5:29) Omuhimyaka Nowe, Lameki aalavunle: “Mwan’ola ononikurunuxa murima wa miteko sowoma sinivarahu nilimaka etthaya etakhalihiwe n’Apwiya”. Nowe aanilipipelela wira Muluku aamulokiherya itthu. Moolikanasa ni Abeli ni Enookhi, owo aaniroromela wira “osùlu” aamunyakela muru wa enowa.​—Maphattuwelo 3:15.

⁷ Nowe khaiwexexa moomalela yooleiherya ya Muluku eri Maphattuwelo 3:15. Masi yena anisuwela wira eprofesia ele yaanivaha nlipelelo na muhoolo. Enookhi aahilaleya ihapari imosaru, ohimyaka wira Yehova amwaapwetexa atakhali. (Yuda 14, 15) Tthiri ihapari sa Enookhi, seiyo sinirowa waakhwanihereya okathi wa Armagedoni, saahilipiha waamini wa Nowe ni nlipelelo nawe!

8. Moota xeeni omusuwela saana Muluku waamukhapelenle aya Nowe?

⁸ Moota Xeeni Osuwela Wekeekhai Onikhuma wa Muluku Waamukhalihenrye Aya Nowe? Okhala wira Nowe aahiixutta voohimya sa Yehova, owo aahiwerya okhalana waamini ni miruku sinikhuma wa Muluku. Eyo yaahimukhapelela, vanceenexa wira ohipake etthu yaakhanle oomwiiriha Yehova oriipiwa murima. Moota xeeni? Nowe aaphavela okhala mpatthani a Muluku, nto khaaphavela waataana ni atthu yahaamurumeela Yehova ni yaamukhootta. Moovirikana ni atthu awo, Nowe khootothiwe ni malaikha ootakhala yaarwiiye valaponi. Atthu a okathi ole yaanitikiniheya ni ikuru sa malaikha ale ni waaniheryasa yaanikokhorela malaikha awo. (Maphattuwelo 6:1-4, 9) Nave Nowe aanisuwela wira Yehova aaphavela wira apinaatamu yaayareke anamwane ni esareye valaponi. (Maphattuwelo 1:27, 28) Vaavo malaikha ootakhala yathenle aya athiyana ni waayara anamwane, Nowe aahisuwela wira, eyo yaari etthu yoohiloka. Anamwane awo okathi yannuwa aya yaakhala ooneneva, oorakama vanceene ni aikuru waavikana anamwane akina. Okathi wooreerela, Yehova aahimuleela Nowe wira aamuruuha epula yuulupale wira owiive atthu otheene ootakhala murima. Mwaha wa Nowe okupali soolopola sa Yehova, aahiteka ekalawa yuulupale, nto owo ni emusi awe yaahoopowa.​—aHéberi 11:7.

9, 10. Munrowa okhalana sai waamini sintoko wa Nowe?

⁹ Ninrowa okhalana sai waamini sintoko wa Nowe? Ti vootthuneya vanceene osoma Nuulumo na Muluku ni ephoole, osiveliwa ni ele enisoma ahu, ni opaka marukunuxo ni soothanla sooloka. (1 Pedru 1:13-15) Napaka eyo, waamini ni miruku sa Muluku sinonikhaliherya ohootothiwa ni olavilavi  wa Satana ni ohihapuxiwa ni olumwenku ola. (2 aKorinto 2:11) Atthu anceene waasivela mweettelo wootakhala ni orupihana woohiloka ni aneettela soophavela sa murima aya. (1 Yohani 2:15, 16) Awo annivaanya wira ninkhala waattamela wanikisa wa olumwenku ola wootakhala. Naahikhalane waamini woolipa, hiyo pooti-tho opacerya wuupuwelaka sintoko atthu awo. Muhiliyale wira vaavo Yesu aalikanyinhe awe okathi ahu ni mahiku a Nowe, owo khaalavunle sa otakhala wala orupihana woohiloka, masi aalavunle sa woopiha waya oluttuweliwa ni itthu sikina mpakha ohiya omurumeela Muluku.​—Mmusome Matheyo 24:36-39.

¹⁰ Mwiikoheke so: ‘Mweettelo aka onnooniherya wira kinnimusuwela saana Yehova? Kiireke waamini waka onnikiiriha opaka itthu sinimusivela Yehova ni owiixuttiha akina itthu Muluku oniphavela awe wira awo epakeke?’ Waakhula wanyu makoho ala onimookhaliheryani osuwela akhala wira munneetta ni Muluku eekeekhai sintoko Nowe.

11. (a) Moota Daniyeli amphenta awe Yehova, onniixuttiha exeeni voohimya sa anamuyari awe? (b) Mikhalelo xeeni sa Daniyeli muniphavela anyu okhalana?

¹¹ Daniyeli aamusuwenle sai Yehova? Woonasa wene anamuyari awe Daniyeli yaahimwiixuttiha omphenta Yehova ni Nuulumo nawe. Nave Daniyeli aahipaka eyo okumi awe wotheene. Hata okathi annunwe awe , aahivikaniha osoma ni ephoole Soolempwa. (Daniyeli 9:1, 2) Daniyeli aanimusuwela saana Yehova. Nave aanisuwela itthu sotheene sooloka Yehova aawiirenle awe aIsarayeli. Hiyo ninniweha eyo mwaha wa wiiyeviha wawe ni nivekelo nawe na vamurimani nenlo niri Daniyeli 9:3-19. Musome nivekelo nlo ni muupuwelele ni ephoole. Mwiikoheke so: ‘Exeeni nivekelo nla ninkiixuttiha aya voohimya Daniyeli?’

12-14. (a) Daniyeli oonihenrye sai wira aahikhalana miruku sa Muluku? (b) Yehova aamureelinhe sai Daniyeli mwaha wa olipa wawe murima ni ororomeleya?

¹² Moota xeeni omusuwela saana Yehova waamukhalihenrye aya Daniyeli? Khahiyo vaari vookhweya muYuda omurumeela Yehova moororomeleya oBabilonia. Mwa ntakiheryo, Yehova aahaaleela aYuda wira: “Mphaveleke oreriwa w’elapo ewomolenlyakani”. (Yeremiya 29:7) Nave Yehova aahaaruma omukokhorela yena ni murima aya wotheene. (Okhuma 34:14) Daniyeli aawenrye sai wiiwelela sooruma iyo piili? Miruku sa Muluku saahimukhaliherya Daniyeli osuwela wira woopaceryani aahaana omwiiwelela Yehova, nuumala vo owiiweleleke anamalamulela. Sivinre ene iyaakha sinceene, Yesu aahiixuttiha etthu emosaru.​—Luka 20:25.

¹³ Nkuupuwelani etthu Daniyeli aapanke awe vaavo nlamulo naahimya aya wira, khuuvo mutthu eemereriwa omulompa muluku mukina, masi aahaana omulompa paahi mwene mpakha ovira mahiku 30. (Mmusome Daniyeli 6:7-10.) Waaniheryasa anwerya wuupuwela so: ‘Mahiku ala vakhaani, ari 30 paahi’. Ohikhanle wuupuwela siiso, Daniyeli aahikhootta ovaha efaita yuulupale nlamulo na apinaatamu ovikana waataana wawe ni Muluku. Daniyeli anwerya omulompaka Muluku opuro wowiipitheya. Masi owo aanisuwela wira atthu anceene yaaninweha olompaka khula nihiku. Owo aahiweha wira olompa opuro wowiipitheya  yaari etthu yowoopiha, nto aahivikaniha olompa opuro aawerya awe owehiwa ni atthu akina mwaha woowi khaaphavela owiiriha atthu awo wuupuwelaka wira Daniyeli aahihiya omulompa Yehova.

¹⁴ Yehova aahimureeliha Daniyeli mwaha woolipa wawe murima ni opaka yoothanla yooloka. Owo aahipaka mwiiriirya wira Daniyeli ohiiviwe ni akharamu. Nto owo aahiwiiriha atthu anceene yaakhala omwene wa Olamulelo wa oMedo-oPersia, wiixutta voohimya sa Yehova.​—Daniyeli 6:26, 27.

15. Ninrowa okhalana sai waamini sintoko wa Daniyeli?

¹⁵ Ninrowa okhalana sai waamini sintoko aarina awe Daniyeli? Wira mutthu okhalane waamini woolipa, khonitthuneya paahi osoma Nuulumo na Muluku. Owo ohaana wiiwexexa ele enisoma awe. (Matheyo 13:23) Nihaana wiimananiha osuwela miyuupuwelo sa Yehova ni moonelo awe itthu. Nto nihaana wuupuwelela saana ele enisoma ahu. Nave ti vootthuneya ovekelaka, vanceenexa okathi wa mixankiho. Naaminiki wira Yehova onoonivaha  miruku ni ikuru akhala wira nnonvekela.​—Yakobo 1:5.

16, 17. Yobi aamusuwenle sai Yehova?

¹⁶ Yobi aamusuwenle sai Yehova? Yobi khahiyo ari mwIsarayeli. Masi Abrahamu, Isakhi, ni Yakobe yaari amusi awe oorakamelana, nto Yehova aahiwiixuttiha atthu awo malamulo awe ni itthu aarowa awe owiirela apinaatamu. Nto Yobi aahiixutta ikeekhai sinceene sootthuneya. (Yobi 23:12) Owo aahimuleela Yehova wira: “Miyo kanosuwelani kìwaka muhimmwaka pahi”. (Yobi 42:5) Yehova aahimuhimeerya Elifazi wira Yobi aahaaleela atthu akina ekeekhai voohimya sa Muluku.​—Yobi 42:7, 8.

¹⁷ Nave Yobi aahiixutta mikhalelo sa Yehova owehaka itthu opattunxe awe. (Yobi 12:7-9, 13) Elihu ni Yehova yaahirumeela itthu sipattuxiwe wira emwiixuttihe Yobi wira apinaatamu ni Muluku, muulupale Muluku. (Yobi 37:14; 38:1-4) Nuulumo na Yehova naahiphiya vamurimani va Yobi ni owo moowiiyeviha aahihimya so: “Miyo kosuwela wira nyuwo munniwerya sothene ni wira khivo enojelanyu”. Nuumala-vo aahihimya-tho wira: “Kottharuwa, kìyevihaka vantthupini ni vatturwani”.​—Yobi 42:2, 6.

18, 19. Yobi oonihenrye sai wira aanimusuwela saana Yehova?

¹⁸ Omusuwela saana Muluku waamukhalihenrye sai Yobi? Yobi aanisuwela saana malamulo a Muluku. Tthiri owo aanimusuwela saana Yehova nto eyo yaanimwiiriha opaka itthu sooreera. Mwa ntakiheryo, Yobi aanisuwela wira khivaaweryaneya ohimya wira aanimphenta Muluku nave okathi omosaru yoowo aahaaxaka atthu akina. (Yobi 6:14) Yobi khuupuwela wira owo aari ootthuneyexa waavikana atthu akina, masi anaathokorerya atthu awo sintoko amusi awe, moohiweha akhala wira mutthu owo aari thaaciri wala namuhaawi. Yobi aahimmye so: “Ole okùmpe mmirimani mw’ame aka, khàpattuxale-tho arumeyi aka?” (Yobi 31:13-22) Hata okathi Yobi aari awe thaaciri wala namuhaawi, owo khaaixinnuuha aahiiso ohiwoonela vatthu akhwaawe. Moonelo owo ti woovirikana ni anamuhakhu anceene wala atthu arina owerya olelo-va.

¹⁹ Yobi khaaphavela wira etthu ekina wala mihakhu sikhale sootthuneya vanceene onvikana Yehova. Owo aanisuwela wira otepa ovaha efaita itthu sikina wala mihakhu waamwiiriha omukhootta “Muluku a wirimu”. (Mmusome Yobi 31:24-28.) Nave Yobi aanithokorerya othelana okhala natiri ootepa otthuneya onipakiwa ni mulopwana ni mwaarawe. Owo aahivaanela ni maitho awe wira khaarowa onwehexexa muthiyana mwa enamuna yoophavela omurupiha. (Yobi 31:1) Eyo etthu yootinihiha maana okathi ole Yehova aaniweemererya alopwana waathela athiyana anceene. Nto Yobi anwerya omuthela muthiyana mukina wira okhalane anli. Owo aanisuwela wira ekasamento yoopacerya ya apinaatamu yeeyo yaakumiheriwe ni Yehova, yaapakiwe ni atthu anli paahi mulopwana ni muthiyana. Yobi aahithanla otakiha enamuna eyo. * (Nwehe enoota.) (Maphattuwelo 2:18, 24) Sivinre ene iyaakha sowiiraka 1.600, Yesu aahiixuttiha etthu emosaru, wira orupihana ni othelana etthu enipakiwa ni mulopwana mmosa ni muthiyana mmosa.​—Matheyo 5:28; 19:4, 5.

20. Moota xeeni omusuwela saana Yehova ni malakiheryo awe onrowa aya onikhaliherya waathanla apatthani ooloka vamosa ni matthekulelo?

 ²⁰ Ninrowa okhalana sai waamini sintoko wa Yobi? Nihaana-tho omusuwela saana Yehova, ni weemererya weettihiwa nuuwo mwa itthu sotheene ninvara ahu. Mwa ntakiheryo, Biibiliya onihimya wira Yehova Muluku ‘onniphweliwa n’alipa-òwali ni òhìwelela’. (Musome Esalimo 11:5; 26:4.) Nto mwiikoheke so: ‘Exeeni soolepa iya piili sinkiixuttiha aya voohimya sa muupuwelo wa Yehova? Eyo enrowa okikhaliherya sai othanlela itthu sootthuneya mookumini mwaka? Sinkikhaliherya sai okhalana ephoole ni itthu kinoona aka muinternetini, atthu kinrowa aka waathanla okhala apatthani aka, ni moota woothanla matthekulelo aka?’ Waakhuliwa wa makoho ala onimookhaliheryani osuwela akhala wira munnimusuwela saana Yehova. Hiyo khanimphavela ohapuxiwa ni olumwenku ola wootakhala. Nto nihaana “walimaleliha ankhili ahu” wala osuwela ovirikana okhanle eriyari ya itthu sooloka ni itthu soohiloka, itthu sa miruku ni itthu soololo.​—aHéberi 5:14; aÉfeso 5:15.

21. Exeeni enrowa onikhaliherya ‘wiiwexexa itthu sotheene’ nintthuneya ahu osuwela wira nimuhakalalihe Yehova?

²¹ Okhala wira Nowe, Daniyeli, ni Yobi yaahipaka sotheene yaawerya aya wira emusuwele saana Yehova, owo aahaakhaliherya ‘wiiwexexa itthu sotheene’ saatthuneya wira emuhakalalihe Yena. Matakiheryo aya anooniherya wira opaka itthu mwa enamuna enimusivela Yehova, onniphwanyiha ohakalala. (Esalimo 1:1-3) Nto mwiikoheke so: ‘Kiireke kinnimusuwela Yehova sintoko Nowe, Daniyeli ni Yobi?’ Olelo-va vanniweryaneya omusuwela saana Yehova waavikana alopwana awo oowaamini, mwaha oowi owo onninisuweliha itthu sinceene voohimya sa yena. (Miruku 4:18) Nto mmusomeke Biibiliya ni ephoole. Muupuweleleke ele enisoma anyu. Nave nvekeleke munepa wootteela. Mwiira siiso, khamunrowa ohapuxiwa ni olumwenku ola wootakhala. Nave munoopakaka itthu ni miruku sa Muluku ni omwaattamela Tiithi ahu a wiirimu.​—Miruku 2:4-7.