SEMUA orang deka gaga ati. Tang ba hari ti penudi tu, semua kitai napi “mayuh macham penusah.” (2 Timoti 3:1) Sekeda orang enda gaga laban napi pengawa ti enda lurus, sakit, lenyau kereja, tauka lenyau orang ti dikesayauka. Sekeda nya enda gaga laban irau tauka tusah ati. Indah bala penyembah Jehovah nemu lemi ati lalu enda agi gaga ati. Enti nuan bisi napi tu, baka ni nuan ulih gaga ati baru?

Kena nyaut tanya nya, keterubah kitai patut nemu reti pengaga ati ti bendar sereta baka ni orang bukai ulih ngetanka pengaga ati taja pan sida napi mayuh penanggul. Udah nya, kitai deka nemu baka ni kitai ulih mengkang gaga ati lalu nambahka pengaga.

Gaga ati enda sama enggau senang ati. Perundingka tu: Orang ke mabuk engka bendar amat ketawa. Tang pengudah badu mabuk, iya enda agi ketawa lalu nemu diri agi bisi mayuh penusah. Pengaga ke diasaika iya enda lama, lalu nya ukai pengaga ti bendar.—Jaku Dalam 14:13.

Tang, pengaga nya asai ati ti gagit lebuh kitai bulih utai tauka ngadangka utai ti manah. Reti nya, kitai mega deka gaga enda ngira senang tauka tusah. (1 Tesalonika 1:6) Kitai engka tusah ati ketegal siti-siti utai tang kitai agi ulih gaga ati. Ambika chunto, bala rasul disipat ketegal nusui pasal Jesus. Taja pia, sida “angkat ari balai Kunsil, sida lalu rami gaga ati ke diri ke udah dikira patut kena perinsa ketegal nama Jesus.” (Kereja Rasul 5:41) Sida ukai gaga ati ketegal disipat tang ketegal mengkang tetap ati ngagai Petara.

Pengaga ukai utai ti dibai ari ada tauka datai kediri empu. Nama kebuah? Laban pengaga nya sebagi ari buah roh kudus Petara. Roh kudus Petara ulih nulung kitai “nyadi mensia ti baru,” lalu nya nyengkaum pengaga. (Epesus 4:24; Galatia 5:22) Enti kitai ngembuan ati ti gaga, kitai senang agi mutarka penanggul.

Jehovah dekaka utai ti manah, ukai utai ti jai nyadi ba bumi. Taja pan orang ngereja utai ti jai, Jehovah mengkang gaga ati. Bup Kudus madahka: “Kuasa enggau pengaga ngemenuhka Rumah Sembiang Iya.” (1 Bansa Israel 16:27) Kelimpah ari nya, utai manah ti dikereja nembiak Iya ngasuh ati Iya gaga.—Jaku Dalam 27:11.

Kitai deka neladan Jehovah. Kitai deka mengkang gaga ati taja pan enda bulih utai ti dikinginka kitai. Ari ke berasai irau, kitai patut beberatka utai manah ti dikembuan kitai diatu lalu enggau sabar nganti utai ti manah agi ke jemah ila. *—Peda nota kaki.

Dalam Bup Kudus bisi mayuh chunto pasal orang ke mengkang gaga ati taja pan  napi mayuh penanggul. Abraham mengkang gaga ati indah lebuh pengidup iya enda likun sereta lebuh orang bukai ngenataika penusah ngagai iya. (Pemungkal 12:10-20; 14:8-16; 16:4, 5; 20:1-18; 21:8, 9) Nama nulung iya mengkang gaga ati? Iya berunding pasal pengadang idup ba dunya baru di baruh perintah Messiah. (Pemungkal 22:15-18; Hebrew 11:10) Jesus madahka: ‘Aki kita Abraham gaga ati deka meda hari aku.’ (John 8:56) Kitai neladan Abraham lebuh kitai berunding pasal pengaga ati ti deka diulih kitai jemah ila.—Rome 8:21.

Paul seduai Silas mega tegap ba pengarap sereta mengkang gaga ati taja pan napi mayuh penanggul. Ambika chunto, pengudah balat disipat lalu dijil, seduai iya ‘besampi sereta belagu muji Petara.’ (Kereja Rasul 16:23-25) Seduai iya ulih tan natka pemedis laban mengkang berundingka semaya Petara ke jemah ila. Lalu seduai iya gaga ati laban nemu diri merinsa ketegal nyadi murid Kristus. Kitai neladan seduai iya lebuh ingatka utai manah ti diulih kitai ari gawa enggau tetap ati ke Petara.—Pilipi 1:12-14.

Kemayaharitu mega bisi mayuh teladan ari bala menyadi kitai ke mengkang gaga ati taja pan napi penusah. Ambika chunto, kena November 2013, taufan Haiyan udah ngerusak rumah ke diuan lebih ari 1,000 ruang bilik Saksi di Filipina. George bisi rumah di Tacloban lalu rumah iya nadai agi. Ku iya madahka: “Taja pan napi penusah nya, bala menyadi mengkang gaga ati. Aku enda ulih ngambarka pengaga ati kami.” Enti kitai mikirka utai ti udah digaga Jehovah ke kitai lalu meruan beterima kasih ngagai Iya, kitai deka mengkang gaga ati taja pan napi penusah ti besai. Nama utai bukai ti disediaka Jehovah ke ngasuh kitai gaga ati?

Utai ti ngasuh kitai balat gaga ati nya kaul kitai enggau Jehovah. Kitai ngelala Raja dunya raya nya. Iya Apai, Petara, sereta Pangan kitai!—Masmur 71:17, 18.

Kitai mega beterima kasih ngagai Jehovah ketegal udah meri kitai pengidup sereta penau ngena pengidup. (Pengajar 3:12, 13) Ketegal Iya udah mai kitai semak ngagai Iya, kitai ulih nemu peneka Iya sereta chara ngena pengidup. (Kolosi 1:9, 10) Taja pia, mayuh orang enda nemu tuju pengidup. Paul madahka bida tu: “‘Utai ti enda kala dipeda tauka didinga mensia, utai ti nadai kala diperagam mensia, nya meh utai ti udah disedia Petara ke orang ti rinduka Iya.’ Nya utai ti udah dipandangka Petara ngagai kitai ulih roh kudus.” (1 Korint 2:9, 10) Kitai gaga ati laban ulih nemu peneka enggau tuju Jehovah ke kitai.

Mayuh utai udah digaga Jehovah ke kitai. Iya ngampun dosa kitai. (1 John 2:12) Iya meri kitai pengadang idup ba dunya baru ti deka datai. (Rome 12:12) Iya meri mayuh pangan ke ulih sama enggau kitai nyembah Iya. (Masmur 133:1) Iya mega nyaga kitai ari Sitan enggau bala antu. (Masmur 91:11) Enti kitai seruran berundingka utai manah tu, ati kitai deka gaga agi.—Pilipi 4:4.

Ulih orang Kristian nambahka pengaga ati? Jesus madahka: ‘Aku udah madahka utai tu ngagai kita, ngambika pengaga aku bisi dalam kita, ngambika ati kita chukup gaga.’ (John 15:11) Ayat tu nunjukka kitai ulih nambahka pengaga ati. Kitai ulih mandingka nya enggau api. Enti kitai deka api nya angat agi, kitai patut nambahka mayuh agi kayu. Kingatka: Roh kudus ulih nulung kitai gaga ati. Nya alai enti kitai deka nambahka pengaga ati, kitai patut seruran besampi minta roh kudus Petara sereta belematika Bup Kudus ti diiring roh kudus Iya.—Masmur 1:1, 2; Luke 11:13.

Siti agi utai ke ulih nambahka pengaga  ati kitai nya seruran kisuk ngereja utai ke ngelantangka ati Jehovah. (Masmur 35:27; 112:1) Nama kebuah? Bup Kudus madahka kitai digaga ngambi ‘nangika Petara, lalu ngasika pesan Iya, laban nya endang kebuah kitai mensia digaga.’ (Pengajar 12:13) Kitai endang ditempa ngambika ngereja peneka Petara. Nya alai lebuh kitai gawa ke Jehovah, kitai amat gaga ati ba pengidup. *—Peda nota kaki.

Seraya pengaga ati kitai nambah, kita deka bulih mayuh agi penguntung. Ambika chunto, Jehovah lantang ati ngagai kitai seraya kitai majak gawa ke Iya enggau gaga ati taja pan napi penanggul. (Ulang Adat 16:15; 1 Tesalonika 5:16-18) Ketegal kitai ngembuan pengaga ati ti bendar, kitai enda ngumbai reta tengkira nya utai ti patut dikenuluka ba pengidup. Tang kitai deka bebendar agi ngelengkaka sekeda utai ketegal Perintah Petara. (Matthew 13:44) Lalu lebuh meda penguntung ke datai ari ngereja mayuh pengawa ke Jehovah, kitai berasai gaga, andal agi ke diri empu sereta ngagaka ati orang bukai.—Kereja Rasul 20:35; Pilipi 1:3-5.

Pia mega, enti kitai gaga, pengerai kitai deka manah agi. Bup Kudus madahka: “Ati ti selalu lantang ngasuh nuan bepengerai.” (Jaku Dalam 17:22) Seiku pakar ke mansik pasal pengerai ba Universiti Nebraska di Amerika Serikat setuju enggau utai ku Bup Kudus nya. Ku iya madahka: “Enti nuan gaga sereta puas ati enggau pengidup nuan diatu, nuan deka bepengerai dudi hari.”

Taja pan kitai idup ba maya ti tusah, kitai ulih ngembuan pengaga ti bendar maya kitai bulih roh kudus lebuh besampi, belajar, sereta belematika Bup Kudus. Kitai mega deka gaga agi enti kitai mikirka mayuh utai manah ti udah diberi Jehovah ngagai kitai, nunda pengarap orang bukai, sereta ngereja peneka Iya. Nya baru kitai ulih ngasaika utai ti dipadah ba Masmur 64:10: ‘Semua orang ke lurus deka rami gaga ketegal utai ti udah dikereja Jehovah. Sida deka diau likun dalam Iya.’