ƆLMAN want fɔ gladi. Bɔt wi de insay di las dez ɛn ɔlman gɛt prɔblɛm dɛn we “traŋa.” (Sɛkɛn Lɛta To Timoti 3:​1) Sɔm pipul dɛn nɔ kin gɛt gladi at bikɔs dɛn nɔ de trit dɛn fayn, dɛn sik, dɛn nɔ gɛt wok igen, ɔ pɔsin we dɛn lɛk dɔn day. Ɔda pipul dɛn nɔ gladi igen bikɔs sɔntin apin to dɛn we mek dɛn wɔri ɔ dɛn at pwɛl. Ivin di wan dɛn we de wɔship Jiova kin fil bad sɔntɛnde ɛn dɛn nɔ kin gladi igen. If dis kayn tin dɔn apin to yu, aw yu go gɛt gladi at bak?

Fɔ ansa da kwɛstyɔn de, wi nid fɔ ɔndastand fɔs wetin i min fɔ gɛt tru tru gladi at ɛn wetin ɔda pipul dɛn dɔn du fɔ gɛt gladi at pan ɔl we dɛn gɛt prɔblɛm dɛn. Afta dat, wi go tɔk bɔt aw fɔ gɛt gladi at naw ɛn kɔntinyu fɔ gladi.

If pɔsin de laf, dat nɔ min se i gladi. Tink bɔt dis: Pɔsin we chak kin laf bɔku. Bɔt we di rɔm lɛf am i nɔ de laf igen ɛn i kin si se i stil gɛt bɔku prɔblɛm dɛn. Na fɔ shɔt tɛm nɔmɔ i bin gladi ɛn dat nɔto tru tru gladi at.—Prɔvabs 14:​13.

Bɔt tru tru gladi at na di kayn we aw pɔsin de fil insay in at we dɛn du am gud ɔ we pɔsin prɔmis fɔ du gud to am. Fɔ gɛt gladi at min se wi gladi ilɛksɛf gud ɔ bad tin de apin to wi. (Fɔs Lɛta Fɔ Tɛsalonayka 1:​6) Infakt, sɔntin go mek wi vɛks bɔt wi stil gladi. Fɔ ɛgzampul, dɛn bin bit di apɔsul dɛn bikɔs dɛn bin de prich bɔt Jizɔs. Bɔt “di apɔsul dɛn bin gladi bad wɛn dɛn de kɔmɔt na di Ju gran kot bikɔs dɛn bin no se Gɔd pik dɛn fɔ sɔfa fɔseka Jizɔs.” (Di Apɔsul Dɛn Wok [Akt] 5:​41) Dɛn nɔ bin gladi bikɔs dɛn bit dɛn, bɔt dɛn bin gladi bikɔs dɛn bin fetful to Gɔd.

Gladi at nɔto sɔntin we dɛn de bɔn pɔsin wit ɔ sɔntin we pɔsin kin gɛt wantɛm wantɛm. Wetin mek? Bikɔs tru tru gladi at na wan pan di kwaliti dɛn we Gɔd in oli spirit de mek wi gɛt. Gɔd in spirit de ɛp wi fɔ gɛt “di nyu abit dɛn,” ɛn wan pan dɛn na gladi at. (Lɛta fɔ Ɛfisɔs 4:​24, NW; Lɛta fɔ Galeshya 5:​22, NW) We wi gɛt gladi at, dat kin mek am izi fɔ wi fɔ bia we wi gɛt prɔblɛm dɛn.

Jiova bin want mek gud tin dɛn apin na di wɔl, nɔto di bad tin dɛn we wi de si naw. Bɔt pan ɔl we pipul dɛn de du bad tin dɛn, Jiova stil gladi. Di Baybul se: “Trɛnk ɛn gladi de usay i de.” (Fɔs Kronikul 16:​27) Apat frɔm dat, di gud tin dɛn we Jiova in savant dɛn de du, de mek i gladi.—Prɔvabs 27:​11.

Wi go falamakata Jiova ɔ tray fɔ tan lɛk am bay we wi kɔntinyu fɔ gladi ilɛksɛf tin dɛn we wi nɔ bin no se go apin to wi, apin. Bifo wi bigin wɔri, wi fɔ pe atɛnshɔn pan di gud tin dɛn we wi gɛt naw ɛn peshɛnt wet fɔ di  ɔda fayn fayn tin dɛn we wi go ɛnjɔy tumara bambay. *—Luk di futnot.

Bɔku bɔku ɛgzampul dɛn de na di Baybul bɔt pipul dɛn we stil gladi pan ɔl we dɛn gɛt bɔku prɔblɛm dɛn. Ebraam bin stil gladi pan ɔl we in layf bin de pan denja ɛn ɔda pipul dɛn bin de du tin dɛn fɔ ambɔg am. (Jɛnɛsis 12:​10-20; 14:​8-16; 16:​4, 5; 20:​1-18; 21:​8, 9) Aw i bin du dat? Na bay we i bin de tink bɔt di op we i gɛt fɔ de na di nyu wɔl we di Mɛsaya go rul. (Jɛnɛsis 22:​15-18; Di Ibru Pipul Dɛn 11:​10) Jizɔs bin se: “Bifo a bɔn, [Ebraam] bin dɔn no se a go kam so i bin gladi.” (Jɔn 8:​56) Wi go falamakata Ebraam bay we wi kɔntinyu fɔ tink bɔt di gladi at we wi go gɛt tumara bambay.—Lɛta Fɔ Rom 8:​21.

Pɔl ɛn Saylas bak bin gɛt strɔng fet ɛn gɛt gladi at pan ɔl we dɛn bin gɛt bɔku prɔblɛm dɛn. Fɔ ɛgzampul, afta dɛn bin dɔn bit dɛn bad bad wan ɛn trowe dɛn na jel, dɛn bin “de pre ɛn siŋ to Gɔd.” (Di Apɔsul Dɛn Wok [Akt] 16:​23-25) Dɛn bin ebul fɔ bia di sɔfa we dɛn bin de sɔfa bikɔs dɛn bin kɔntinyu fɔ tink bɔt Gɔd in prɔmis dɛn fɔ tumara bambay. Ɛn dɛn bin gladi bak bikɔs di sɔfa we dɛn bin de sɔfa na bikɔs dɛn bin de fala Krays. Wi de falamakata Pɔl ɛn Saylas we wi mɛmba di gud tin we go apin to wi we wi kɔntinyu fɔ sav Gɔd fetful wan.—Lɛta Fɔ Filipay 1:​12-14.

Tide bak, bɔku ɛgzampul dɛn de bɔt brɔda ɛn sista dɛn we stil gladi pan ɔl we dɛn de gɛt prɔblɛm dɛn. Fɔ ɛgzampul, insay Novɛmba 2013, wan big big briz ɛn ebi ren bin pwɛl pas 1,000 Jiova Witnɛs dɛn os dɛn insay di Filipins. Jɔj we in os bin pwɛl kpatakpata na wan siti we nem Takloban bin se: “Pan ɔl wetin bin apin, di brɔda dɛn bin stil gladi. A nɔ ebul fɔ ɛksplen di kayn we aw wi bin gladi.” If wi de tink bɔt wetin Jiova dɔn du fɔ wi ɛn kɔntinyu fɔ tɛl am tɛnki, dat go mek wi kɔntinyu fɔ gɛt gladi at ivin we wi gɛt prɔblɛm. Us ɔda tin dɛn Jiova dɔn gi wi fɔ mek wi gɛt gladi at?

Di men rizin we fɔ mek wi gladi na wi padi biznɛs wit Jiova. Wi no se na in na di Kiŋ fɔ di wan ol wɔl. Na in na wi Papa, wi Gɔd, ɛn wi Padi!—Sam 71:​17, 18.

Wi gladi bak we Jiova dɔn gi wi layf ɛn mek wi ebul fɔ ɛnjɔy am. (Ɛkliziastis 3:​12, 13) Bikɔs i dɔn mek wi go nia am, wi ɔndastand wetin i want fɔ wi ɛn wi no aw fɔ liv wi layf. (Lɛta Fɔ Kɔlɔse 1:​9, 10) Bɔt bɔku pipul dɛn nɔ ɔndastand wetin mek Gɔd mek wi. Fɔ mek wi no mɔ bɔt aw i difrɛn, Pɔl bin rayt se: “‘Yay nɔ si yet, yes nɔ yɛri yet, mɔtalman nɔ no yet wetin Gɔd dɔn rɛdi fɔ dɛn wan we lɛk am.’ Bɔt Gɔd dɔn mek in Spirit sho wi dis sɛns ya we i nɔ bin dɔn mek wi no yet.” (Fɔs Lɛta Fɔ Kɔrint 2:​9, 10) We wi ɔndastand wetin Jiova want ɛn wetin i dɔn plan fɔ wi, dat de mek wi gladi.

Jiova dɔn du bɔku tin dɛn fɔ wi. I dɔn mek am pɔsibul fɔ mek i fɔgiv wi sin dɛn. (Jɔn In Fɔs Lɛta 2:​12) I dɔn gi wi op fɔ gɛt layf na di nyu wɔl, we go kam jisnɔ. (Lɛta Fɔ Rom 12:​12) Ivin naw, Jiova dɔn gi wi bɔku padi dɛn we wi ɔl de wɔship am. (Sam 133:​1) I de protɛkt wi bak frɔm Setan ɛn in dɛbul dɛn. (Sam 91:​11) If wi kɔntinyu fɔ tink bɔt dɛn fayn fayn tin dɛn ya we Jiova dɔn gi wi, wi go gladi mɔ ɛn mɔ.—Lɛta Fɔ Filipay 4:​4.

I pɔsibul fɔ mek Kristian we gladi gɛt mɔ gladi at? Jizɔs bin se: “A dɔn tɛl una dɛn tin ya so dat una go gladi lɛkɛ aw a gladi, ɛn ɔl di gladi we fɔ de na una at go lib [de] de.” (Jɔn 15:​11) Dis de sho wi se wi kin gɛt mɔ gladi at. Wi kin kɔmpia di gladi at we wi gɛt to faya. If wi want di faya fɔ kɔntinyu fɔ  kech, wi fɔ ad mɔ wud de. Mɛmba se di oli spirit de ɛp wi fɔ gɛt gladi at. So if wi want fɔ gɛt mɔ gladi at, wi fɔ kɔntinyu fɔ pre ɛn aks Gɔd fɔ in oli spirit. Dɔn bak, wi fɔ kɔntinyu fɔ tink gud wan bɔt di Baybul we di oli spirit mek am pɔsibul fɔ mek dɛn rayt.—Sam 1:​1, 2; Lyuk 11:​13.

Ɔda tin we go mek wi gɛt gladi at na we wi spɛn mɔ tɛm fɔ du di tin dɛn we go mek Jiova gladi. (Sam 35:​27; 112:​1) Wetin mek? Di Baybul se dɛn mek wi fɔ “fred PAPA GƆD ɛn du wetin i se fɔ du; bikɔs na dat nɔmɔ mɔtalman gɛt fɔ de du.” (Ɛkliziastis 12:​13) Gɔd mek so dat wi go du wetin in want. So we wi de sav Jiova, wi go rili ɛnjɔy wi layf. *—Luk di futnot.

As wi kɔntinyu fɔ gɛt mɔ gladi at, wi go gɛt bɔku ɔda bɛnifit dɛn. Fɔ ɛgzampul, Jiova go gladi fɔ wi mɔ we wi kɔntinyu fɔ sav am wit gladi at ilɛksɛf wi gɛt prɔblɛm. (Ditarɔnɔmi 16:​15; Fɔs Lɛta Fɔ Tɛsalonayka 5:​16-18) Dɔn, we wi gɛt tru tru gladi at, wi nɔ go de tink se fɔ gɛda bɔku prɔpati na in fɔ impɔtant pas ɛni ɔda tin na wi layf. Bifo dat, wi go tray fɔ lɛf tin dɛn biɛn ɛn put Gɔd in Kiŋdɔm fɔs. (Matyu 13:​44) We wi si di gud tin dɛn we de apin to wi we wi du mɔ fɔ sav Jiova, wi go gɛt mɔ gladi at, wi go fil gud bɔt wisɛf, ɛn wi go mek ɔda pipul dɛn gladi.—Di Apɔsul Dɛn Wok [Akt] 20:​35; Lɛta Fɔ Filipay 1:​3-5.

Dɔn di mɔ gladi at we wi gɛt, na di mɔ wɛlbɔdi wi go gɛt. Di Baybul se: “Wɛn yu at layt yu de gɛt wɛlbɔdi.” (Prɔvabs 17:​22) Wan bukman we lan bɔt wɛlbɔdi biznɛs na di University of Nebraska insay Amɛrika bin tɔk sɔntin we gri wit di Baybul. I se: “If yu gladi ɛn satisfay wit yu layf naw, dat min se yu go gɛt wɛlbɔdi tumara bambay.”

So pan ɔl we tin tranga insay dis tɛm we wi de naw, wi go gɛt tru tru gladi at we wi pre fɔ oli spirit, we wi stɔdi, ɛn tink gud wan bɔt Gɔd in Wɔd. Wi go gɛt mɔ gladi at bak we wi tink bɔt di bɔku gud tin dɛn we Jiova dɔn gi wi naw, we wi falamakata ɔda pipul dɛn fet, ɛn we wi tray fɔ du wetin Gɔd want. Dɔn wi go si wetin dɛn tɔk bɔt na Sam 64:​10, we se: “Lɛ ɔl udat de du wetin PAPA GƆD [“Jiova,” NW] want, gladi ɛn go to am fɔ kɔba dɛn.”