OVANTHU aveho vahanda okukala nehambu. Mahi tukahi mononthiki mbonthyulilo iya atuho tuna ovitateka “vipuiya okuvikoleleya.” (2 Timóteo 3:1) Ovanthu vamwe kavakala nehambu mokonda valingwa onya, vavela, vapolwa movilinga, ine hamwe vankhisa umwe vehole. Ovakuavo nkhele vetupu ehambu mokonda vamonekelwa notyitateka tyimwe tyevesoyesa. Alo umwe ovaumbili va Jeova vapondola okusoya iya katutu-katutu avakala tyehena ehambu. Inkha otyo tyamoneka nove, oñgeni upondola okukala vali nehambu?

Opo tukumbulule epulo olio, tete tuesukisa okunoñgonoka oityi ehambu iya oñgeni vakuetu vetyivila okutualako tyina ehambu namphila valambelele movitateka. Tupu matutale oñgeni tupondola okutualako nehambu lietu iya no ñgeni tupondola okuyawisa ehambu.

Okukala nehambu liotyotyili, hakuyola vala. Soka kuetyi: Omunthu wokuakolwa upondola okuyola unene. Mahi tyina amakololokwa, kayolo vali iya utualako novitateka viae. Ehambu olio kaliakalele omuvo omunyingi mokonda halioko ehambu liotyotyili.—Provérbios 14:13.

Tyelikalela notyo, ehambu liotyotyili otyituwa otyiwa tuna momutima tyina tukala notyipuka tyimwe ankho tuhanda, ine tyina tukevelela otyipuka tyimwe otyiwa. Ehambu liotyotyili tyihangununa okuhambukwa momuvo ukahi nawa no momuvo wovitateka. (1 Tessalonicenses 1:6) Tyotyili, tupondola okukala tyanumana mokonda yotyipuka tyimwe, mahi no ngotyo atutualako nehambu. Mongeleka, ono apostolu vavetelwe mokonda yokulongesa konthele ya Jesus. Mahi no ngotyo “vatunda meliongiyo Liombonge Onene nehambu, mokonda vatalwa okuti vatokala okupenyenyekwa mokonda yenyina liae.” (Atos 5:41) Ono apostolu ankho kavakalele nehambu mokonda vavetelwe, mahi omokonda vatuaileko noukuatyili ku Huku.

Ehambu hatyituwa onthue tuatyitwa natyo ine tyiya vala tyihalingile natyike. Omokonda yatyi? Omokonda ehambu onthele yotyinyango tyospilitu sandu ya Huku. Ospilitu sandu ya Huku itukuatesako “okukala omunthu omupe” tyakutikinya ehambu. (Efésios 4:24; Gálatas 5:22) Tyina tuna ehambu, matyitupepukila okutetulula ovitateka.

Jeova ankho uhanda mouye mukale ovipuka oviwa, ankho kahande ovipuka ovivi onthue tumona hono. Mahi namphila ovanthu valinga ovipuka ovivi, Jeova utualako tyina ehambu. Ombimbiliya ipopia okuti: “Momphangu akala muna epondolo nehambu.” (1 Crônicas 16:27) Tupu, ovipuka oviwa ovaumbili vae valinga vimuhambukiswa unene.—Provérbios 27:11.

Onthue tuhetekela Jeova tyina tutualako nehambu, alo umwe tyina ovipuka vihaende ngetyi ankho tukevelela. Onthue katusoyo, mahi tutala ovipuka oviwa tuna iya atukevelela noumphua-lundo okuti ovipuka mavikakala nawa komutwe wandyila. *—Tala onondaka pokatoi.

 Mo Mbimbiliya muna onongeleka ononyingi mbovanthu vatuaileko nehambu namphila ankho vena ovitateka ovinyingi. Abraiau watuaileko nehambu alo umwe tyina omuenyo wae ankho ukahi motyiponga iya no putyina ovanthu vakuavo ankho vahanda okulinga ovipuka vimuetela ovitateka. (Gênesis 12:10-20; 14:8-16; 16:4, 5; 20:1-18; 21:8, 9) Oñgeni etyivila okulinga ngotyo? Abraiau wasokele kekevelelo liokukakala mouye omupe moutumini wa Mesiya. (Gênesis 22:15-18; Hebreus 11:10) Jesus wati: “Abraiau, tate yenyi, wahambukilwe nekevelelo liokutala onthiki yange.” (João 8:56) Onthue tuhetekela Abraiau tyina tutualako okusokolola kehambu matukakala nalio komutwe wandyila.—Romanos 8:21.

Paulu na Sila navo ankho vena ekolelo liapama iya vatuaileko nehambu namphila valambelele movitateka ovinyingi. Mongeleka, konyima yokuavetwa unene iya avapakwa mokaleya, Paulu na Sila “ankho vekahi nokulikuambela nokuhivilika Huku noviimbo.” (Atos 16:23-25) Vakoleleyile mononkhumbi mokonda vatuaileko okusokolola komilao via Huku. Iya okunoñgonoka okuti ankho vekahi nokumona ononkhumbi mokonda yokulandula Kristu, tyevehambukisilwe. Onthue tuhetekela Paulu na Sila tyina tuhinangela ovipuka oviwa vitundilila kokuumbila Huku noukuatyili.—Filipenses 1:12-14.

Hono, tupu tuna onongeleka ononyingi mbovakuatate no nomphange vatualako nehambu namphila valambela movitateka ovinyingi. Mongeleka, mohanyi ya Novembro yo 2013, omaande elunga ahanyene onondyuo mbo Nombangi mba Jeova mbulamba po 1000 ko Filipinas. George womepunda-umbo lio Tacloban, nae ondyuo yae yahanyenwe nomaande, wati: “Namphila tuli motyitateka otyinene, ovakuatate vatualako nehambu. Katutyivili okupopia ehambu tunalio.” Inkha tusoka kuetyi Jeova etulingila iya atutualako okumupandula, matukala nehambu alo umwe tyina tuna otyitateka otyinene. Ovipuka patyi ovikuavo Jeova etuavela vitukuatesako okukala nehambu?

Ehunga liakolela vali tuna pala okukala nehambu, oupanga wetu na Jeova. Onthue twii nawa Ohamba youye auho. Oe, o Tate yetu, o Huku yetu iya epanga lietu!—Salmo 71:17, 18.

Tupu, tupandula mokonda Jeova wetuavela omuenyo, nounongo opo tukale nehambu. (Eclesiastes 3:12, 13) Mokonda wetukokela kwe, tupondola okunoñgonoka ehando liae iya tutyii oñgeni tuna okutyinda omuenyo wetu. (Colossenses 1:9, 10) Mahi, ovanthu ovanyingi kavetyii omokonda yatyi vena omuenyo. Opo Paulu ahangunune okuelikalela oko, wapopia okuti: “‘Eiho kalinemone iya ekutwi kalineive ovipuka Huku ekahi nokupongiya pala vana vemuhole, no momutima womunthu kavineyemu-ale.’ Mokonda Huku wevihololola kuonthue nospilitu yae.” (1 Coríntios 2:9, 10) Okunoñgonoka ehando lia Jeova tyituavela ehambu.

Jeova wetulingila vali ovipuka ovikuavo. Walinga epongiyo opo ononkhali mbetu mbuevelwe. (1 João 2:12) Wetuavela ekevelelo liokukakala mouye omupe, iya apa katutu otyo matyimoneka. (Romanos 12:12) Alo umwe hono, Jeova wetuavela omapanga omanyingi tupondola okufenda navo. (Salmo 133:1) Jeova tupu utuyakulila ku Satanasi nokovilulu viae. (Salmo 91:11) Inkha tutualako okusoka kovipuka ovio oviwa Jeova etuavela, matukala vali nehambu.—Filipenses 4:4.

Okuti Omukristau una-le ehambu, upondola okuyawisa-ko vali? Jesus wati: “Nemupopila ovipuka evi, opo ehambu liange likale muonwe, iya ehambu lienyi likale liafuapo.” (João 15:11) Otyo tyilekesa okuti apeho tupondola okukala vali nehambu. Tupondola okueleka ehambu lietu notupia. Inkha tuhanda otupia tuteme unene, tuna okuyawisa-po ononkhuii. Hinangela okuti, ospilitu sandu itukuatesako okukala nehambu. Ngotyo,  inkha tuhanda okuyawisa kehambu lietu, tuna okutualako okulikuambela okuita ospilitu sandu ya Huku. Tupu, tuesukisa okutualako okusokolola kuetyi Ombimbiliya ipopia, mokonda yahonekwa nekuateso liospilitu sandu ya Huku.—Salmo 1:1, 2; Lucas 11:13.

Otyipuka otyikuavo matyiyawisa ehambu lietu, okumanena omuvo movipuka vihambukiswa Jeova. (Salmo 35:27; 112:1) Omokonda yatyi? Ombimbiliya ipopia okuti tuatungwa opo “tukale nonthilo na Huku yotyotyili, nokutualako okuendela movitumino viae. Mokonda etyi, otyo ovanthu aveho vena okulinga.” (Eclesiastes 12:13) Onthue tuatungwa opo tulinge ehando lia Huku. Ngotyo, tyina tuumbila Jeova, matukala nehambu liotyotyili. *—Tala onondaka pokatoi.

Tyina tuyawisa ehambu lietu, matupoloko vali ouwa. Mongeleka, Jeova mahambukwa vali unene nonthue putyina tutualako okumuumbila nehambu alo umwe tyina tuna ovitateka. (Deuteronômio 16:15; 1 Tessalonicenses 5:16-18) Tupu, mokonda tuna ehambu liotyotyili, kamatusoko okuti okukala nonombongo ononyingi otyipuka tyakolela vali momuenyo. Mahi, matusipo ovipuka vimwe tuhole mokonda Youhamba wa Huku. (Mateus 13:44) Iya tyina tutala ouwa utundilila kokusapo ovipuka ovio, matulitehelela vali nawa iya atukalesa vakuetu nehambu.—Atos 20:35; Filipenses 1:3-5.

Tupu, tyina tuna ehambu, ekongoko lietu likala vali nawa. Ombimbiliya yati: “Omutima wehambu otyihemba.” (Provérbios 17:22) Omunongo umwe walongesua mo Universidade yo Nebraska ko Estados Unidos wapopia otyipuka tyelikuata netyi Ombimbiliya ipopia. Wapopia okuti: “Inkha una ehambu iya uhambukilwa etyi una, upondola okukakala nekongoko likahi nawa komutwe wandyila.”

Ngotyo, namphila tukahi momuvo wovitateka, tupondola okukala nehambu liotyotyili tyina tutambula ospilitu sandu pokati komalikuambelo, nokulilongesa iya nokusokolola Mondaka ya Huku. Tupu, matukala vali nehambu tyina tusokolola kovipuka oviwa Jeova ekahi nokutuavela pehepano, tyina tuhetekela ekolelo lia vakuetu iya no putyina tulinga ononkhono mbokulinga ehando lia Huku. Konyima, matutale okuti etyi tyahonekwa mo Salmo 64:10 otyili, yati: “Omuviuki mahambukilwa mu Jeova iya aholama mwe.”