ABANTU nibaba nibenda kushemererwa. Kwonka ahabw’okugira ngu turi omu biro by’emperu, buri omwe aine oburemeezi obugumire kwemera. (2 Timoseo 3:1) Abantu abamwe tibaine kushemererwa ahabw’okutwarizibwa kubi, okurwara, okufeerwa emirimo yaabo, nari ahabw’okufeerwa abakundwa. Abandi tibaine kushemererwa ahakuba baine ebindi ebirikubeerarikiriza nari ebirikubareetera enaku. Nangwa n’abaheereza ba Yehova nibabaasa kuhwamu amaani, reero okushemererwa kwabo kutuube mporampora. Eki ku kiraabe kyakubaireho, okushemererwa kwawe nikubaasa kugarukaho kuta?

Okugarukamu ekibuuzo eki, twine kubanza kwetegyereza eki okushemererwa okwabuzima kirikumanyisa, n’oku abandi babaasize kuguma bashemereirwe n’obu baraabe baine embeera zigumire. Bwanyima, nitwija kureeba oku turikubaasa kuguma twine okushemererwa n’oku turikubaasa kukwongyeraho.

Okushemererwa tikyo kimwe n’okusheka. Teekateeka ahari eki: Omuntu yaasinda naabaasa kusheka munonga. Kwonka yaasiinduuka, naaba atakisheka kandi akiine oburemeezi bwe. Okusheka kwe nikuba kuri okw’akaanya bwanya, beitu kutari kushemererwa okwabuzima.​—Enfumu 14:13.

Kwonka, okushemererwa n’enyehurira y’amaani ei turikuba twine omu mutima twatunga ekintu kirungi nari twaba twine ekihika ky’okukitunga. Omuntu naagira okushemererwa yaaba ari omu mbeera nungi nari embi. (1 Abatesalonika 1:6) Nangwa, ekintu nikibaasa kutukora kubi kwonka nabwo tugume tushemereirwe. Nk’eky’okureeberaho, entumwa zikateerwa ahabw’okubuurira ebirikukwata ahari Yesu. Kwonka, zikaruga “omu maisho g’eishengyero, nizishemererwa ahabw’okuheebwa ekitiinisa eky’okuhemurwa niziturwa eiziina rya Yesu.” (Ebyakozirwe 5:41) Tibarashemereirwe ahabw’okugira ngu bakateerwa, kureka ahabw’okuguma bari abeesigwa ahari Ruhanga.

Okushemererwa ti mutwarize ogu turikuzaarwa nagwo, nari ogu turikutunga tutaine eki tukozire. Ahabw’enki? N’ahabw’okugira ngu okushemererwa okwabuzima n’omutwarize gw’omwoyo gwa Ruhanga ogurikwera. Omwoyo nigutuhwera kutaho ‘omuntu omusya,’ ekirikutwariramu okushemererwa. (Abaefeso 4:24; Abagalatia 5:22) Twaba twine okushemererwa, nikituhwera kwemera embeera zigumire.

Yehova akaba naayenda ngu ensi ebemu ebintu birungi beitu bitari ebibi ebi turikureebamu obunaku obu. Kwonka n’obu abantu baraabe nibakora ebintu bibi, Yehova naaguma ashemereirwe. Baibuli neegira eti: “Amaani n’okushemererwa biri ahi atuura.” (1 Obusingye 16:27) Kandi ebintu birungi ebi abaheereza be barikukora nibimureetera okushemererwa.​—Enfumu 27:11.

Nitutooreza Yehova nari nituteeraho kuba nkawe, turikuguma tushemereirwe n’obu ebintu byakuba bitabaire nk’oku tubaire nituteekateeka. Omu mwanya gw’okwerarikirira, nitubaasa kuta omutima aha bintu birungi ebi twine hati, kandi tugumisirize kutegyereize ebirikukiraho  omu biro by’omumaisho. *​—Reeba obugambo obw’ahansi.

Hariho abantu baingi abarikugambwaho omu Baibuli abaagumire bashemereirwe n’obu baraabe baabaire baine oburemeezi bwingi. Abrahamu akaguma ashemereirwe obu amagara ge gaabaire gari omu kabi n’obu abantu abandi baamureeteire oburemeezi. (Okutandika 12:10-20; 14:8-16; 16:4, 5; 20:1-18; 21:8, 9) Niki ekyamuhwereire? Akateekateeka aha matsiko ge ag’okutuura omu nsi ensya eraabe neetegyekwa Mesia. (Okutandika 22:15-18; Abaheburaayo 11:10) Yesu akagira ati: “Shoimwe Abrahamu akashemererwa aine ekihika ky’okureeba ekiro kyangye.” (Yohaana 8:56) Nitutooreza Abrahamu twaguma nituteekateeka aha kushemererwa oku turikwija kutunga omu biro by’omumaisho.​—Abarooma 8:21.

Paulo na Siila nabo bakaba baine okwikiriza kuhami, kandi bakaguma baine okushemererwa n’obu baatungire oburemeezi bwingi. Nk’eky’okureeberaho, bwanyima y’okubateera bakanagwa n’omu kihome “bakaba nibashaba, nibeeshongorera Ruhanga.” (Ebyakozirwe 16:23-25) Bakabaasa kugumisiriza okubonabona okwo ahabw’okuguma nibateekateeka aha biraganiso bya Ruhanga eby’omu biro by’omumaisho. Okumanya ngu nibahiiganisibwa ahabw’okukuratira Kristo nakyo kikabareetera okushemererwa. Nitutooreza Paulo na Siila twateekateeka aha birungi ebirikuruga omu kuheereza Ruhanga n’obwesigwa.​—Abafilipi 1:12-14.

Obunaku obu haine ab’eishe-emwe baingi abatungire oburemeezi bw’amaani kwonka bakaguma bashemereirwe. Nk’eky’okureeberaho, omuri Novemba 2013, eihunga ry’amaani rikashiisha amaka agarikurenga 1,000 aga Abajurizi ba Yehova omuri Philippines. George, owaafeereirwe amaka ge omu rurembo rwa Tacloban naagira ati: “N’obu eki kyabaireho, ab’eishe-emwe bakaguma bashemereirwe. Tinyine bigambo by’okushoboorora gye okushemererwa oku twine.” Twateekateeka aha bi Yehova atukoreire nikiija kutuhiga kumusiima, n’okuguma tushemereirwe n’obu twakuhikwaho embeera ezigumire. Ni bintu ki ebindi ebi Yehova atuhaire ebirikutureetera okushemererwa?

Ekirikukirayo kutureetera okushemererwa n’okugira omukago murungi na Yehova. Nitumanya ngu niwe yaahangire byona. Ni Tataitwe, Ruhanga, kandi Munywani waitu!​—Zaaburi 71:17, 18.

Nitusiima Yehova ahabw’okutuha amagara n’obushoboorozi bw’okushemererwa. (Omubuurizi 3:12, 13) Ahabw’okutweyiriza haihi, nitubaasa kwetegyereza ekigyendererwa eki atwiniire n’eki twine kukora. (Abakolosai 1:9, 10) Kwonka, abantu baingi tibarikumanya ekigyendererwa ky’okubaho. Entumwa Paulo akahamiiriza entaaniso egi ati: “Ebi eriisho ritakareebaga n’okutu ebi kutakahuriraga, ebitakataahaga mu mutima gw’omuntu, byona ebi Ruhanga yaacumiire abarikumukunda, Ruhanga akabitushuuruurira, naabitumanyisisa omwoyo” gwe. (1 Abakorinso 2:9, 10) Okumanya ebi Yehova arikukunda n’ekigyendererwa kye nikitureetera okushemererwa.

Yehova atukoreire ebintu bingi. Atuteeraireho entebeekanisa y’okutusaasira ebibi byaitu. (1 Yohaana 2:12) Atuhaire amatsiko g’amagara agatahwaho omu nsi ensya, eri haihi kwija. (Abarooma 12:12) N’omu bunaku obu, Yehova atuhaire abanywani baingi abu turikuramya hamwe nabo. (Zaaburi 133:1) Kandi naaturinda Sitaane na baadaimoni. (Zaaburi 91:11) Twaguma nituteekateeka aha birungi ebi Yehova atuhaire nitwija kwongyera kugira okushemererwa.​—Abafilipi 4:4.

Omukristaayo oshemereirwe naabaasa kwongyera kugira okushemererwa? Yesu akagira ati: “Ebi naabibagambira, ngu okushemererwa kwangye kube omuriimwe, kandi ngu okushemererwa kwanyu kube okuhikire.” (Yohaana 15:11) Eki nikyoreka ngu nitubaasa kwongyera kugira okushemererwa. Nitubaasa kugyeragyeranisa okushemererwa kwaitu n’omuriro. Twaba nitwenda  omuriro gweyongyere kubuguma nitwongyeramu enku. Ijuka ngu omwoyo gurikwera nigutuhwera kugira okushemererwa. N’ahabw’ekyo twaba nitwenda kwongyera kugira okushemererwa, twine kuguma nitushaba Ruhanga kutuha omwoyo ogurikwera. Kandi twine kuteekateeka aha biri omu Baibuli, eyaahandiikisiibwe omwoyo gurikwera.​—Zaaburi 1:1, 2; Luka 11:13.

Ekindi ekiraatuhwere kwongyera kugira okushemererwa n’okuguma twine bingi by’okukora ebirikushemeza Yehova. (Zaaburi 35:27; 112:1) Ahabw’enki? Baibuli neegira ngu tukahangwa kutiina ‘Ruhanga, n’okworobera ebiragiro bye; ahakuba ekyo kyonka nikyo omuntu ashemereire kukora.’ (Omubuurizi 12:13) Tukahangwa kukora ebi Ruhanga arikukunda. N’ahabw’ekyo ku turikuheereza Yehova, nitushemererwa buzima. *​—Reeba obugambo obw’ahansi.

Twayongyera kugira okushemererwa, nitutunga ebirungi bingi. Nk’eky’okureeberaho, ku turikuheereza Yehova n’obu twakuba twine oburemeezi, eki nikimushemeza munonga. (Eky’Ebiragiro 16:15; 1 Abatesalonika 5:16-18) Kandi twaba twine okushemererwa okwabuzima, titurikutwara okusherura eby’obutungi nka kikuru. Kureka, nitwija kwongyera kwefeerereza ahabw’Obukama bwa Ruhanga. (Matayo 13:44) Kandi ku turikureeba ebirungi ebirikuruga omu kwongyera kuheereza Yehova, nitwongyera kushemererwa, kitugwisa gye, kandi nikireetera n’abandi okushemererwa.​—Ebyakozirwe 20:35; Abafilipi 1:3-5.

Ekindi, ku turikweyongyera kugira okushemererwa, nitwongyera kugira amagara marungi. Baibuli neegira eti: “Omutima ogushemereirwe n’omubazi murungi.” (Enfumu 17:22) Omucondooza owaashomire aha by’amagara omuri yunivasite ya Nebraska omuri United States akagamba ebirikuhikaana n’ebiri omu Baibuli. Naagira ati: “Waaba oshemereirwe kandi omazirwe hati, noobaasa kugira amagara marungi omu biro by’omumaisho.”

N’ahabw’ekyo n’obu turaabe turi omu biro bigumire munonga, nitubaasa kugira okushemererwa okwabuzima twashaba tukatunga omwoyo gurikwera, twayeshomesa, kandi tukateekateeka aha Kigambo kya Ruhanga. Nitwongyera kugira okushemererwa twateekateeka aha birungi byona ebi Yehova atuhaire obunaku obu, twatooreza okwikiriza kw’abandi, tukateeraho n’okukora ebi Ruhanga arikukunda. Ebiri omu Zaaburi 64:10, nibwo biraahikiirizibwe ahariitwe ebirikugira ngu: “Abahikiriire baryashemerererwa” omuri Yehova, bamwesigye.