TUCUICUNAMI cushilla causasha ninchij. Pero tucuri punllacunapi causacushcamantami cushilla causanaca sinchi can (2 Timoteo 3:1). Achca gentecunaca mana alli ruraicuna tiyashcamanta, ungüicunamanta, trabajo mana tiyashcamanta o familia huañushcamantami llaquilla cancuna. Diosta sirvijcunapish asha asha desanimarishpami llaquilla sintiri tucuncuna. Ñucanchijpish llaquilla cashpaca cutin cushilla sintiringapajca ¿imatataj rurai tucunchij?

Caita yachangapajca cushicuna ima cashcatami yachana canchij. Shinallataj maijancunaca llaquihuan cashpapish ima shina cushilla causashcatami ricuna canchij. Qꞌuipaca ashtahuan cushilla cangapaj imata ruranatami yachashun.

Caita intindingapajca shuj ejemplota ricushun. Shuj runa achca tragota ubyashpa asirijta ricushpaca, cushillami can ninchijchari. Pero machai anchujpica asinata saquishpami cutin paipaj problemacunata yuyarin. Chai runaca shuj ratollami asiricurca. Paica mana cushicuita charircachu (Proverbios 14:13).

Cushicunaca ima allita charishcamanta o ima allita shuyacushcamanta, allipipish mana allipipish shungu ucupi tranquilo alli sintirinami can (1 Tesalonicenses 1:6). Shuj runaca ima problemata charishcamantachari preocupado cai tucun. Pero shungu ucupica cushillami sintiri tucun. Por ejemplo, Jesusmanta yachachicushcamantami apostolcunataca azotircacuna. Pero paicunaca “tandanacushcacunapaj ñaupajmantaca, Jesucristomanta llaquita apajcunatajmi cashcanchij nishpami cushicushpa llujshircacuna” (Hechos 5:41). Caipi ricushca shinaca mana azotishcamantachu cushicurcacuna, ashtahuanpish Diosta cazucushcamantami cushicurcacuna.

Mana chashnallamanta ña cushicujcuna canchijchu. ¿Imamantataj chaita ninchij? Cushicunaca Diospaj espiritupaj granomi can. Cai espirituta charishcamantami ‘mushuj causaita churari’ tucunchij, cushicujcunapish cai tucunchij (Efesios 4:24; Gálatas 5:22). Cushicuita charishpaca ima problemacuna tiyajpipish ahuantashunmi.

Jehová Dios cai Allpata rurashpaca tucui imapish alli cachun, ima llaquipish ama tiyachunmi munarca. Cunan punllapi mana allita ruraj gentecuna tiyajpipish paica cushi Diosmi can. Bibliapica: “Pai causacunpica, tucuita rurai tucunapish, cushicuipishmi tiyan” ninmi (1 Crónicas 16:27). Shinallataj Jehová Diosca paita sirvijcuna allita rurajta ricushpaca cushillami sintirin (Proverbios 27:11).

¿Ima shinataj Jehová Dios shina cushi cai tucunchij? Imapish ñucanchij munashca shina mana llujshijpica ama yallitaj preocuparishunchij. Llaquilla canapaj randica, ñucanchij ima allita charishcata yuyarishpa cushicushunchij. Shinallataj ashtahuan alli punllacuna shamungacama mana utca pꞌiñarishpa shuyashunchij * (urapi tiyaj notata ricui).

 Bibliapica problemacunata charishpapish Diosta cushicushpa sirvijcunamantami parlan. Por ejemplo Abraham runamanta parlashun. Shujtaj gentecunamanta llaquicunata charishpapish, shinallataj casi huañunchijpish paica ahuantarcami (Génesis 12:10-20; 14:8-16; 16:4, 5; 20:1-18; 21:8, 9). Chashna llaquicunata charishpapish Abrahamca cushicuita mana chingachircachu. ¿Imamantataj chaita ninchij? Paica Mesías nishca cai pachata mandacujpi mushuj Allpapi causanataca siempremi yuyaipi charirca (Génesis 22:15-18; Hebreos 11:10). Jesusca: “Cancunapaj ñaupa yaya Abrahamca, ñuca shamuna punllata ricuna cashcamanta cushicurcami” nircami (Juan 8:56). Ñucanchijpish Abraham shinami cai tucunchij. Shamuj punllacunapi tucui bendicioncunata chasquinata yuyashpaca cushillami sintirishun (Romanos 8:21).

Pablopish Silaspish Abraham shinallatajmi sinchi llaquicunata charishpapish Diospi tucui shunguhuan crishpa cushilla carcacuna. Shuj cutinca vara caspicunahuanmi macarcacuna. Chai qꞌuipaca carcelpimi churarcacuna. Bibliapica: “Pabloca Silasndijmi chaupi tutataca Taita Diosta mañashpa cantacurcacuna” ninmi (Hechos 16:23-25). Paicunaca Dios cusha nishca bendicioncunapi yuyashpa, Jesusta catijcuna cashcamantami llaquichicujpipish cushilla sintirircacuna. Paicuna shina casha nishpaca Diosta tucui shunguhuan sirvishcamanta achca bendicioncunata charishcatami mana cungarina canchij (Filipenses 1:12-14).

Cunan punllapish achca huauqui panicuna sinchi llaquicunata charishpapish cushicuihuanmi ahuantashcacuna. Por ejemplo, noviembre de 2013 huatapica shuj jatun acapanami Filipinas llajtata llaquichirca. Chai acapana tiyashcamantami 1000 yalli testigo de Jehovacuna huasi illaj saquirircacuna. Filipinas llajta Tacloban pueblopi causaj huauqui Georgemanta parlashun. Paica huasi illajmi saquirirca. Cai huauquica: “Cai tucui llaquicunata charishpapish huauqui panicunaca contentomi sintirircacuna. Paicuna ima shina cushicushcataca mana tucuita parlai tucunichu” nircami. Llaquicunahuan cashpapish Jehová Dios ñucanchijta ima shina ayudashcata yuyarishpa, agradecishpami cushicushun. ¿Ñucanchij cushilla cangapajca Jehová Diosca imatataj ashtahuan rurashca?

Ñucanchijcunaca Jehová Diosta alli rijsishcamanta, paihuan alli apanacushcamantami ashtahuan cushicunchij. Paica tucuita Mandaj Jatun Dios, ñucanchij Yaya, ñucanchij Amigomi can (Salmo 71:17, 18).

Shinallataj ñucanchijman causaita cushcamanta, cushicushpa causachun Jehová Dios rurashcamantami agradecidos sintirinchij (Eclesiastés 3:12, 13). Ñucanchijcunataca Jehová Diosmi paipajman cꞌuchuyachun cayashca. Chaimantami Dios ñucanchijpaj imata munashcata, ima shina causana cashcatapish yachanchij (Colosenses 1:9, 10). Pero achca gentecunaca Dios ñucanchijpaj imata munashcataca mana yachanchu. Chaimanta parlashpaca Pabloca: ‘Ñahui mana ricushcata, rinrin mana uyashcata, pi mana shungupi yuyashcatapishmi, Diosca, paita cꞌuyajcunapajca allichishca ninmi. Ashtahuanpish Diosca, paipaj Espirituhuanmi chaicunataca ñucanchijmanca ricuchishca’ nircami (1 Corintios 2:9, 10). Dios imata munashcata, pai imata ruragrishcata yachashpaca ¿manachu cushi sintirinchij?

Jehová Dios ñucanchijpaj imata ashtahuan rurashcata ricushun. Paica ñucanchij juchacunata perdonangapajmi tucui minishtishcata rurashca (1 Juan 2:12). Shinallataj paica llaquij cashcamantami paraisopi causana esperanzata cushca. Cai Allpaca ñallami shuj paraíso tucunga (Romanos 12:12). Shinallataj huauqui panicunahuan paita adorachunmi permitishca (Salmo 133:1). Ashtahuanpish Bibliapica Diablopish supaicunapish ñucanchijta ama llaquichichun Jehová huaquichij cashcatami yachashcanchij (Salmo 91:11). Cai bendicioncunata yuyaipi charishpaca ashtahuanmi cushilla sintirishun (Filipenses 4:4).

¿Cushi causacushpapish ashtahuan cushilla causai tucunchijchu? Jesusca nircami: “Ñucaca cancunataca ñucahuan cushicuchunmi chashna nircani.  Chashna cashpami, cancunaca achca cushijlla canguichij” nircami (Juan 15:11, QC, 1989). Cai shimicunaca ashtahuan cushi cai tucushcatami yachachin. Cushi canaca shuj ninata japichishca shinami can. Nina lunyashpa catichunca ashtahuan yantatami churashpa catina canchij. Yuyarishun, ashtahuan cushi cangapajca Jehová Diospaj espíritu ayudachunmi minishtinchij. Chaimantami Jehová Diosta paipaj espíritu santota cuchun mañana canchij. Shinallataj Bibliapi yachashcacunata cutin cutin yuyashunchij. Bibliapi yachaicunataca Jehová Diosmi paipaj espirituhuan quillcachirca (Salmo 1:1, 2; Lucas 11:13).

Chashnallataj ashtahuan cushicujcuna cangapajca Dios munashcatami rurana canchij (Salmo 35:27; 112:1). ¿Imamantataj chaita ninchij? Jehová Diosca paipaj munaita rurachunmi ñucanchijtaca rurarca. Chaimantami Bibliapica: “Diostaca manchashpa cazungui, pai mandashcacunatapish pajtachingui. Cai pachapi causajcunapajca, tucuimanta yalli allica chaimi” ninmi (Eclesiastés 12:13). Chaimantami Diosta sirvishpaca cushilla sintirinchij * (urapi tiyaj notata ricui).

Cushicuita charishpaca shujtaj beneficiocunatapishmi charishun. Por ejemplo, llaquicunahuan cashpapish cushicuihuan Diosta sirvijpica paipish cushillami sintiringa (Deuteronomio 16:15; 1 Tesalonicenses 5:16-18). Cushicuita charishpaca charinallapi mana yuyashpami Diospajta rurangapaj ashtahuan esforzarishun (Mateo 13:44). Cai sacrificiocunata rurashpaca achca bendicioncunatami charishun. Ashtahuan cushillami sintirishun. Shinallataj shujtajcuna cushilla sintirichunpishmi ayudai tucushun (Hechos 20:35; Filipenses 1:3-5).

Shinallataj ashtahuan cushilla cangapaj esforzarijpica ñucanchij saludpish ashtahuan allichari canga. Bibliapica: “Cushijlla shunguhuan causanaca, aichapajpish alli jambimi” ninmi (Proverbios 17:22). Estados Unidosmanta shuj doctorpish Bibliapi yachachishca shinallatajmi nin. Paica: “Cunanpi cushilla causaj cashpaca shamuj punllacunapica manachari achca ungüicunata charinga” ninmi.

Caipi ricushca shinaca llaquicunahuan cashpapish cushillami causai tucunchij. Chaipajca Diospaj espiritutami minishtinchij. Diospaj espirituta chasquingapajca Diostami mañana canchij. Shinallataj Bibliata estudiashpa, yachashcapimi cutin cutin yuyana canchij. Ashtahuan cushicujcuna cangapajca cunan charishca bendicioncunatami yuyaipi charina canchij. Chashnallataj Diosta alli sirvijcuna shina tucui shunguhuan sirvingapaj, Diospaj munaita rurangapajpish esforzarishunchij. Chashnami Salmo 64:10-pi nishcata pajtachishun. Chaipica: “Cashcata ruraj runaca, Mandaj Dioshuanmari cushicunga. Paillapimari shunguta churanga” ninmi.