О МАНУША мангена те овен радосна. Ама, адалеске со живинаја ко последна диве, секоле јекхе амендар иси ле проблемија (2. Тим. 3:1). Несаве мануша нашавѓе пли радост адалеске со доживинѓе неправда, насвалиле, нашавѓе пли бути, муло лендар некој со мангена ле или тари несави јавер причина. Чак о слуге е Јеховаскере шај те овен обесхрабриме хем хари похари те нашавен пли радост. Ако случинѓа пе туке акава, сар шај палем те ове радосно?

Те шај те одговорина ко акава пучибе, прво ваљани те хаљова сој тани и чачутни радост хем сар јавера ачхиле радосна иако сине лен проблемија. Пало адава, ка дикха сар шај те ачхова радосна, па чак те ова панда порадосна.

Те овел пе радосно нане исто сар те овел пе расположимо. Размислин башо акава пример: Некој со матило шај бут те асал. Ама, кеда ка овел нерно, нане више те асал хем шај ка хаљовел кај иси ле панда о иста проблемија. Ов сине расположимо само несаво време, ама адава на сине чачутни радост (Изр. 14:13).

И радост тани силно чувство со иси амен ко вило кеда добинаја или аџикераја нешто шукар. И радост на зависинела таро адава саве тане амаре околностија (1. Сол. 1:6). Чак ако сием вознемириме башо нешто, палем шај те ова радосна. На пример, о апостолија сине марде соске проповединена сине башо Исус. Ама, ола иклиле радосна таро Судско совет соске сине лаџакерде башо лескоро анав (Дела 5:41). Ола на сине радосна со марѓе лен, него адалеске со ачхиле верна е Девлеске.

И радост нане особина колаја со бијанѓоваја хем на авела коркори пестар. Соске? Адалеске со и чачутни радост тани особина со авела таро е Девлескоро свети дух. Ов поможинела аменге те овел амен „и неви личност“, колате сој вклучими и радост (Еф. 4:24; Гал. 5:22). Кеда иси амен радост, полокхе шај те икљова ко крајо е проблеменцар.

О Јехова мангља ки Пхув те овен шукар буќа, а на о лошна буќа со дикхаја лен секова диве. Ама, иако о мануша керена лошна буќа, о Јехова на нашавѓа пли радост. Ки Библија пишинела: „И сила хем и радост тане коте со бешела ов“ (1. Лет. 16:27). Исто аѓаар, о шукар буќа со керена лескере слуге радујнена е Јехова (Изр. 27:11).

Шај те џа пало пример е Јеховаскоро аѓаар со нане те нашава амари радост кеда о буќа нане те овен аѓаар сар со мислинѓем. Наместо бут те секирина амен, шај те концентририна амен ко шукар буќа со иси амен хем стрпливо те аџикера те добина панда пошукар буќа ко време со авела. * (Дикх и фуснота.)

 Ки Библија иси бут примерија таро мануша со ачхиле радосна иако сине лен бут проблемија. О Авраам ачхило радосно чак кеда лескоро живото сине ки опасност хем кеда о јавера мануша керена леске сине проблемија (1. Мој. 12:10-20; 14:8-16; 16:4, 5; 20:1-18; 21:8, 9). Сар успејнѓа ко адава? Аѓаар со размислинела сине баши пли надеж кај ка живинел ко нево свето кеда ка владинел о Месија (1. Мој. 22:15-18; Евр. 11:10). О Исус вакерѓа: „Тумаро дад о Авраам бут радујнѓа пе баши надеж кај ка дикхел о диве кеда ка авав“ (Јован 8:56). Амен да, сар о Авраам, шај те размислина баши радост со ка овел амен ко време со авела (Рим. 8:21).

О апостол Павле хем о Сила исто аѓаар сине лен зорали вера хем ачхиле радосна иако сине лен баре проблемија. На пример, откеда сине марде хем чхивде ко затвор, ола молинѓе пе хем гиљаја фалинѓе е Јехова (Дела 16:23-25). О Павле хем о Сила шај сине те издржинен са адава адалеске со понадари да размислинена сине башо е Девлескере ветувања. Исто аѓаар, ола сине радосна соске џанена сине кај цидена муке адалеске сој тане е Исусескере ученикија. Амен да шај те ова сар о Павле хем о Сила ако на бистраја о шукар резултатија со ка овен амен кеда ачховаја верна е Девлеске (Фил. 1:12-14).

Авдиве да иси бут пхраља хем пхења со ачховена радосна иако иси лен проблемија. На пример, ко ноември 2013 берш, о силно тајфуни Хајан уништинѓа повише таро 1.000 кхера амаре пхраленгере ко Филипини. О Џорџ, каскоро кхер сине целосно уништимо ки диз Таклобан, вакерѓа: „Иако случинѓа пе са адава, о пхраља тане радосна. Нане ман лафија те вакерав кобор сием радосна“. Ако размислинаја башо са со керела аменге о Јехова хем сием благодарна, ка ачхова радосна чак кеда иси амен баре проблемија. Кола јавера причине иси амен те ова радосна?

Амари најбари причина баши радост тано амаро амалипе е Јеховаја. Амен пенџараја околе со владинела ко цело универзум. Ов тано амаро Девел, Дад хем Амал! (Пс. 71:17, 18).

Исто аѓаар сием благодарна со о Јехова денѓа амен живото хем способност те уживина ки лесте (Проп. 3:12, 13). Адалеске со о Јехова анѓа амен те ова паше леа, шај те хаљова која тани лескири намера аменцар хем иси амен смисла ко живото (Кол. 1:9, 10). Ама, бут мануша на џанена која тани и смисла е животоскири. Те шај те сикавел кобор тани бари и разлика, о Павле пишинѓа: „’Со и јакх на дикхља хем о кан на шунѓа, хем со на ало е манушеске ко вило, адава о Девел спреминѓа околенге со мангена ле‘. А аменге о Девел сикавѓа адава те џана преку лескоро духо“ (1. Кор. 2:9, 10). Адава со хаљоваја е Јеховаскири волја хем намера, поможинела аменге те ова радосна.

Размислин со јавер керѓа о Јехова аменге. Ов керѓа те шај те овен простиме амаре гревија (1. Јов. 2:12). Ов дела амен надеж те живина ко нево свето кова сој бут паше (Рим. 12:12). Панда авдиве, о Јехова денѓа амен пхраља хем пхења коленцар со шај заедно те служина леске (Пс. 133:1). Ов исто аѓаар заштитинела амен таро Сатана хем таро демонија (Пс. 91:11). Ако размислинаја башо са акала шуже буќа со денѓа амен о Девел, ка ова порадосна (Фил. 4:4).

Дали јекх христијани сој радосно шај те овел панда порадосно? О Исус вакерѓа: „Акава вакерѓум туменге те шај мли радост те овел туменде хем тумари радост те овел целосно“ (Јован 15:11). Акава сикавела кај секогаш шај те ова порадосна. И радост шај те споредина ла јагаја. Ако мангаја и јаг те овел побари, ваљани те чхива повише кашта. Ма те бистра, о свети дух поможинела аменге те ова радосна. Адалеске, ако мангаја те ова  порадосна ваљани редовно те молина е Јехова те дел амен пло свети дух. Исто аѓаар ваљани хор те размислина башо е Девлескоро Лафи, соске сине водимо таро свети дух те овел пишимо (Пс. 1:1, 2; Лука 11:13).

Јавер бути со ка поможинел аменге те ова радосна тани ако сием зафатиме буќенцар кола со радујнена е Јехова (Пс. 35:27; 112:1). Соске? Ки Библија пишинела: „Нека овел тут дар таро чачутно Девел хем икер лескере заповедија, соске адава тано са о мануш со ваљани те керел“ (Проп. 12:13). Амен сием створиме те кера е Девлескири волја. Значи, ако служинаја е Јеховаске, чаче ка уживина ко живото. * (Дикх и фуснота.)

Адава со ка трудина амен те ова порадосна ка користинел аменге ко бут начинија. На пример, о Јехова ка овел задоволно амендар кеда ка дикхел кај радосно служинаја леске чак кеда иси амен проблемија (5. Мој. 16:15; 1. Сол. 5:16-18). Исто аѓаар, адалеске со иси амен чачутни радост, на мислинаја кај најважно ко живото тано те овен амен материјална буќа. Наместо адава, ка трудина амен те кера панда побаре жртве башо е Девлескоро Царство (Мат. 13:44). Хем кеда ка дикха о шукар резултатија таро адала жртве, ка ова порадосна, ка осетина амен панда пошукар хем ка трудина амен те кера е јаверен порадосна (Дела 20:35; Фил. 1:3-5).

Исто аѓаар, кеда сием радосна, адава шукар ка влијајнел упро амаро састипе. Ки Библија пишинела: „О радосно вило тано шукар иљачи“ (Изр. 17:22). Јекх научнико таро универзитети ки Небраска (Америка) истражинѓа башо састипе хем вакерѓа нешто со сложинела пе е Библијаја. Ов вакерѓа: „Ако сиан радосно хем задоволно таро тло живото акана, побаре тане о шансе кај ка овел тут пошукар састипе понадари“.

Значи, иако живинаја ко пхаро време, шај те ова чаче радосна кеда добинаја о свети дух џикоте молинаја амен, проучинаја е Девлескоро Лафи хем хор размислинаја башо адава со читинаја. Исто аѓаар, ка ова порадосна ако размислинаја баши са о шукар буќа со дела амен о Јехова авдиве, ако џаја пало пример е јавере верна слугенгоро хем ако трудинаја амен те кера е Девлескири волја. Аѓаар ка шај упри аменде те осетина о лафија сој пишиме ко Псалм 64:10, коте со пишинела: „О праведно мануш ка радујнел пе е Јеховаске, хем ов ка овел лескоро тхан гарајбаске“.