ABANTU bagonza kuba n’okusemererwa. Baitu habwokuba tuli omu biro bya hampero, buli muntu nahikwaho ebizibu. (2 Timoseo 3:1) Abantu abamu nibasobora kuburwa okusemererwa habwokuba bahikirweho obutali bwinganiza, barwaire, baferiirwe emirimo yabo, rundi baferiirwe omugonzebwa. Abamu baburwa okusemererwa habwokuba haroho ebintu ebibaho nibiberalikiriza rundi nibibabihiza. N’abaheereza ba Yahwe nabo nibasobora kuhwamu amaani kandi mpora mpora nibesanga batakyaine okusemererwa. Naiwe obu kiraba kikuhikireho, nosobora ota kwongera kutunga okusemererwa?

Kusobora kugarukamu ekikaguzo kinu, tusemeriire kubanza kwetegereza, okusemererwa kwonyini nukwo okurukusisana kuta kandi n’omulingo abandi baikaire n’okusemererwa nobu baraba batungire obulemeezi. Hanyuma nitwija kurora omulingo tusobora kwikara n’okusemererwa kandi tukongera ha kusemererwa oku twine.

Kuba n’okusemererwa nikyahukanaho n’okukyanganuka. Tekereza hali kinu: Omuntu obwanywa amarwa akatamiira, nasobora kuseka muno. Baitu obu gamuhwaho, nasobora kutongera kuseka kandi nayesanga akyaine n’ebizibu ebyasangirwe nabyo. Abaire n’okukyanganuka habw’akaire kake kandi kubaire kutali kusemererwa kwonyini.—Enfumo 14:13.

Baitu okusemererwa niyo enyehurra ei tuba nayo omu mutima obu tutunga rundi obu tunihira kutunga ekintu ekirungi. Kuba n’okusemererwa nikimanyisa kwikara tusemeriirwe, omu nyikara enungi, rundi embi. (1 Abasesalonika 1:6) Amananu gali, ekintu nikisobora kutubihiza baitu nitwikara twine okusemererwa. Ekyokurorraho, abakwenda bakaterwa habw’okutebeza hali Yesu. Baitu, bakaruga “omu maiso gorukurato basemeriirwe habwokutekerezebwa basemeriire okugizibwa ensoni Habwibara [lye].” (Engeso Ezabakwenda 5:41) Batasemererwe habwokuterwa baitu habwokuba bakasobora kusigara bali besigwa hali Ruhanga.

Okusemererwa tikiri kintu eki tuzarwa nakyo rundi ekintu ekisobora kwereta kyonka. Habwaki? Habwokuba okusemererwa kwonyini kiri kimu ha bintu ebiretwa omwoyo gwa Ruhanga. Omwoyo gwa Ruhanga gutukonyera kujwara “omuntu omuhyaka,” anyakutwarramu okusemererwa. (Abefeso 4:24; Abagaratiya 5:22) Kandi obu tuba n’okusemererwa, kitwanguhira kugumisiriza obu tutunga ebizibu.

Yahwe akaba nagonza ensi ebe nungi hatali kubamu ebintu bibi ebirukukorwa omu kasumi kanu. Baitu abantu n’obu baraaba nibakora ebintu ebibi, kinu tikimazireho Yahwe okusemererwa. Baibuli negamba: “Amani nokusemererwa biri omu kiikarokye.” (1 Ekyebyomubusinge 16:27) Kwongerrezaaho, ebintu ebirungi eby’abaheereza be barukukora nibimuletera kusemererwa.—Enfumo 27:11.

Tuhondera ekyokurorraho kya Yahwe obu twikara tusemeriirwe ebintu n’obu bigenda nk’oku tubaire tutarukunihira. Omu kiikaro kyokweralikirra, nitusobora kuta omutima gwaitu ha bintu ebirungi ebitwine omu kasumi kanu, kandi tulindirre ebirungi ebirukukiraho ebiraija omu kasumi  ak’omu maiso. *—Rora obugambo obuli hansi.

Omu Baibuli halumu ebyokurorraho bingi eby’abantu abalinzire okusemererwa nobu baraba babaire n’ebizibu bingi. Iburahimu akaikara n’okusemererwa omu obwomeezi bwe n’obu buraaba bwali omu kabi kandi n’obukiraaba ngu haroho abantu obu bamuleteraga ebizibu. (Okubanza 12:10-20; 14:8-16; 16:4, 5; 20:1-18; 21:8, 9) Eki akakikora ata? Akaikara natekerezaaho okunihira kw’okwikara omu nsi empyaka hansi y’obulemi bwa Masiya. (Okubanza 22:15-18; Abaheburaniya 11:10) Yesu akagamba: “Iburahimu isenkuru inywe akasemererwa kurora ekiro kyange.” (Yohana 8:56) Tuhondera ekyokurorraho kya Iburahimu obu twikara nitutekereza ha kusemererwa oku tulitunga omu busumi obw’omu maiso.—Abarumi 8:21.

Paulo na Sira nabo bakaba nokwikiriza okugmire kandi bakaikara baine okusemererwa nobu baraba barabire omu bizibu bingi. Ekyokurorraho, hanyuma y’okuterwa muno n’okutekwa omu nkomo, bakaikara “nibasaba, nibazinira Ruhanga ebizina.” (Engeso Ezabakwenda 16:23-25) Bakasobora kugumisiriza habwokuba bakaikara nibatekereza ha mirago ya Ruhanga ey’omu kasumi ak’omu maiso. Kandi n’okumanya ngu bakaba nibabonabana habwokuba bahondezi ba Kristo kikabaletera okusemererwa. Naitwe tuhondera ekyokurorraho kya Paul na Sira obu twikara nitwijuka ebirungi ebiruga omu kuheereza Ruhanga n’obwesigwa.—Abafiripi 1:12-14.

Omu kasumi kanu, haroho ab’oruganda n’abanyaanya itwe, abaikaire n’okusemererwa n’obu baraba bahikirweho ebizibu bingi. Ekyokurorraho, omu Novemba 2013, omuyaga gw’amaani ogurukwetwa Super Typhoon Haiyan gukasiisa amaju ag’Abakaiso ba Yahwe abarukuhingura 1000 omu ihanga lya Philippines. Ow’oruganda George, ayaferiirwe enju ye yoona omu rubuga orukwetwa Tacloban, akagamba ngu: “Binu byona nobu biraba bibaireho, ab’oruganda baine okusemererwa. Tindukumanya omulingo nsobora kubasoborra okusemererwa oku twine.” Kakuba tutekerezaaho ebintu Yahwe atukoliire kandi tukaikara nitumusiima, nitwija kwikara twine okusemererwa nobu turaba tuli omu nyikara enyakugumangaine muno. Bintu ki ebindi ebi Yahwe atuhaire ebituletera kuba n’okusemererwa?

Ekintu ekirukukirayo kutuletera okusemererwa niyo enkoragana yaitu na Yahwe. Nitumanya ngu nuwe Mukama w’ebihangwa byona. Nuwe Isiitwe, Ruhanga waitu, kandi Munywani waitu!—Zabuli 71:17, 18.

Kandi nitusiima Yahwe habwokutuha obwomeezi n’obusobozi obw’okubwegondezaamu. (Omugambizi 3:12, 13) Habwokuba atwiriize haihi nauwe, nitusobora kwetegereza eby’agonza kandi nitumanya n’omulingo tusemeriire kutwaza obwomeezi bwaitu. (Abakolosai 1:9, 10) Baitu abantu baingi tibamanyire ekigendererwa ky’obwomeezi. Kwoleka enyahukana enyakuroho, Paulo akagamba ngu: “Eriso ebiritakabonahoga, kandi okutu ebikutakahurrahoga, ebitakataahaga omu mutima gwomuntu, nibyo Ruhanga yatekaniriize abarukumugonza. Baitu Ruhanga akabisukurra halitwe omu mwoyo.” (1 Abakolinso 2:9, 10) Kumanya ebya Yahwe agonza n’ekigendererwa kye kituletera okusemererwa.

Yahwe atukoliire n’ebirukukiraho. Ataireho omulingo ogutusobozesa kuganyirwa ebibi byaitu. (1 Yohana 2:12) Atuhaire okunihira okw’obwomeezi omu nsi empyaka, enyakuli haihi kwija. (Abarumi 12:12) N’omu kasumi kanu, Yahwe natuha abanywani baingi aba turukuramya nabo. (Zabuli 133:1) Atulinda hali Setani n’abadaimoni. (Zabuli 91:11) Obu turaikara nitutekerezaaho ebintu ebirungi ebi Yahwe atuhaire, nitwija kuba n’okusemererwa kwingi.—Abafiripi 4:4.

Nikisoboka Omukristaayo anyakwine okusemererwa kwongera ha kusemererwa okwaine? Yesu akagamba: “Ebi mbibagambiire, okusemererwa kwange kwikale omuliinywe, kandi okusemererwa kwanyu kwijurre kimu.” (Yohana 15:11, NW) Eki nikyoleka ngu nitusobora kwikara nitwongera ha kusemererwa oku twine. Okusemererwa kwaitu nitusobora kukulengesaniza n’omurro.  Kakuba tugonza omurro gweyongere kwaka, tuba tusemeriire kwongeramu enku. Ijuka: Omwoyo ogurukwera gutukonyera kuba n’okusemererwa. Nahabweki obu turaba nitugonza kwongera ha kusemererwa kwaitu, tusemeriire kwikara nitusaba Yahwe kutuha omwoyo gwe ogurukwera. Tusemeriire kwikara nitwecumitirizaaho Ebyahandikirwe ebyaterekereziibwe omwoyo ogurukwera.—Zabuli 1:1, 2; Luka 11:13.

Ekintu ekindi ekiratwongeraho ha kusemererwa nukwo kwikara nitukora ebintu ebirukusemeza Yahwe. (Zabuli 35:27; 112:1) Habwaki? Baibuli egamba ngu “tina Ruhanga, okwatege ebiragirobye; baitu nibyo byonka ebihikiriire omuntu okukora.” (Omugambizi 12:13) Tukahangwa kukora Ruhanga eby’agonza. Nahabweki obu turaheereza Yahwe, nitwija kuba n’okusemererwa omu bwomeezi bwaitu. *—Rora obugambo obuli hansi.

Kusemererwa kwaitu obu kurayeyongera, nitwija kutunga emigisa nyingi. Ekyokurorraho, nitwija kusemeza Yahwe obu turayeyongera kumuheereza n’okusemererwa nobu turukuba twine ebizibu. (Ekyebiragiro 16:15; 1 Abasesalonika 5:16-18) Ekintu ekindi, habwokuba n’okusemererwa kwonyini, titurukwija kutekereza ngu kuba n’eby’obuguda bingi nikyo ekirukukirayo obukuru. Baitu nitwija kweyongera kwefereza habw’Obukama bwa Ruhanga. (Matayo 13:44) Kandi obu turarora ebirungi ebirukuruga omu kwongeraho obuheereza bwaitu hali Yahwe, nitwija kweyongera kutunga okusemererwa, nitwija kwehurra kurungi, kandi nitwija n’okuletera abandi nabo kusemererwa.—Engeso Ezabakwenda 20:35; Abafiripi 1:3-5.

Ekintu ekindi, obu turayeyongera kuba n’okusemererwa, nikisobora kutuletera kuba n’obwomeezi oburungi. Baibuli egamba: “Omutima ogwokusemererwa mubazi murungi.” (Enfumo 17:22) Omuseruliza omu ayasomeriire eby’obwomeezi ha univasite erukwetwa Nebraska enyakuli omu Amerika akagamba ekintu ekirukwikiraniza na Baibuli. Akagamba ngu: “Obworaba oine okusemererwa kandi oine okumarwa omu kasumi kanu, nosobora kuba n’obwomeezi oburungi omu busumi bw’omu maiso.”

Nahabweki nobu turaba tuli omu bwire oburumu ebizibu, nitusobora kuba nokusemererwa kwonyini obu tutunga omwoyo ogurukwera, tukesomesa, kandi tukecumitirizaaho Ekigambo kya Ruhanga. Nitwija kweyongera kusemererwa obu turatekereza ha bintu ebirungi ebi Yahwe arukutuha omu kasumi kanu, obu turayegera ha kwikiriza kw’abantu abandi, kandi kakuba tulengaho kukora ebi Ruhaga agonza. Obu nubwo turayehurra nk’oku Zabuli 64:10, orukugamba ngu: “Anyakuhikiriire alisemere’rwa Mukama, alimwesiga.”