1, 2. (a) Utmege mapol giwinyo nining i kom bedo dano ma maro jami me cwiny? (b) Lapeny ma pigi tego mene ma wabinyamo i pwony man?

LAMEGO mo i lobo Canada owaco ni bedo ngat ma cwiny pa Lubanga aye telo nyo ngat ma maro jami me cwiny tye ka konye me bedo ngat ma cwinye yom ki dok me kanyo peko ma etye ka kato ki iye. Omego mo i lobo Brazil ma dong onyomme pi mwaki 23 owaco ni bedo dano ma cwiny pa Lubanga telo tye ka konyo en gin ki dakone me bedo ki yomcwiny i nyomgi. Omego mo i lobo Philippines owaco ni bedo ngat ma cwiny pa Lubanga aye telo tye ka konye me bedo ki cwiny ma opye mot dok ki wat maber ki utmege ma gia ki i kwo mapatpat.

² Nen ka maleng ni wanongo adwogi mabeco ka wabedo jo ma maro jami me cwiny. Ngo ma watwero timone me bedo jo ma maro jami me cwiny wek wanong adwogi mabeco? Mukwongo, omyero kong waniang kit ma Baibul loko kwede i kom jo ma maro jami me cwiny, jo ma cwiny maleng telogi ki dong  jo ma gitute me tam calo Jehovah. I pwony man, wabinongo lagam pi lapeny adek ma pigi tego: (1) Tyen lokke ngo ka kiwacci ngat moni maro jami me cwiny nyo ni cwiny pa Lubanga aye telo? (2) Labol mene ma bikonyowa me dongo i yo me cwiny? (3) Tutewa me bedo ki “tam pa Kricito” bikonyowa me dongo i yo me cwiny nining?

3. Baibul nyutiwa apokapoka ango ma tye i kin dano ma pe ki cwiny pa Lubanga ki dano ma tye ki cwiny pa Lubanga?

³ Lok pa Lakwena Paulo konyowa me niang apokapoka ma tye i kin “dano ma tye ki cwiny pa Lubanga” ki “dano ma pe ki cwiny pa Lubanga [nyo dano pe lubo tela pa cwiny pa Lubanga].” (Kwan 1 Jo Korint 2:14-16.) Dano ma pe ki cwiny pa Lubanga nyo ma pe lubo tela pa cwiny pa Lubanga “pe twero gamo gin ma cwiny pa Lubanga miyo, pien ki tung bote obedo gin me mingo; en pe twero niang iye.” Kitungcel, dano ma tye ki cwiny pa Lubanga nyo ma cwiny pa Lubanga aye telo “pimo jami ducu” dok bedo ki “tam pa Kricito,” ma tyen lokke ni en tute me tam calo Kricito. Paulo cuko cwinywa me bedo jo ma cwiny pa Lubanga aye telogi. Apokapoka ango mukene ma tye i kin dano ma pe lubo tela pa cwiny pa Lubanga ki dano ma cwiny pa Lubanga aye telo?

4, 5. Watwero ngeyo ni ngat moni pe lubo tela pa cwiny pa Lubanga nining?

⁴ Dano ma pe lubo tela pa cwiny pa Lubanga tamo nining? Dano ma pe lubo tela pa cwiny pa Lubanga tamo calo jo me lobo-ni, giparo pi cobo mitigi keken. Paulo otito ni meno aye “cwiny ma kombeddi tye ka tic i i jo ma dag winyo lok ma Lubanga waco.” (Jo Epeco 2:2) Lakodi cwiny man miyo jo mapol gicako kwo calo jo ma orumogi. Gitimo jami ma gineno ni opore botgi keken ma ka lubo cik pa Lubanga. Dano ma pe lubo tela pa cwiny pa Lubanga tamo pi jami me kom keken dok kitung bote centene, rwomme, ki twerone obedo jami ma pigi tego loyo gin mo keken.

⁵ Dano ma pe lubo tela pa cwiny pa Lubanga pol kare timo jami ma Baibul lwongo ni “tic me kit pa dano.” (Jo Galatia 5:19-21) I waraga mukwongo ma Paulo ocoyo bot Lukricitayo ma i Korint, en otito jami mukene ma dano ma pe lubo tela pa cwiny pa Lubanga timo. Dano ma pe lubo tela pa cwiny pa Lubanga donyo i daa pa jo mukene, poko kin dano, miyo tam me jemo bot jo mukene, doto dano i kot, pe woro jo ma tye ki twero, ki dong weko cam ki mat doko gin ma pire tek tutwal. Dano ma pe lubo tela pa cwiny pa Lubanga pe cung matek ka tye ka wok ki i atematema. (Carolok 7:21, 22) Juda owaco ni jo ma gimaro jami me kom mukato kare woko pe gibibedo ki cwiny pa Lubanga.​—Juda 18, 19.

6. Watwero ngeyo nining ni ngat moni maro jami me cwiny?

⁶ Ka iporo dano ma pe lubo tela pa cwiny pa Lubanga ki dano ma maro jami me cwiny, dano ma maro jami me cwiny paro pi watte ki Lubanga. En ye tela pa cwiny pa Lubanga dok tute matek me lubo kit pa Jehovah. (Jo Epeco 5:1) En tute matek me pwonyo kit ma Jehovah tamo ki dok neno jami kit ma Jehovah neno kwede. Dano ma lubo tela pa cwiny pa Lubanga pe ki akalakala mo i kom Lubanga. Ka kiporo dano ma pe lubo tela pa cwiny pa Lubanga ki dano ma  maro jami me cwiny, dano ma maro jami me cwiny woro dok lubo cik pa Jehovah i kwone ducu. (Jabuli 119:33; 143:10) En pe lubo “tic me kit pa dano” ento tute me dongo “nyig ma nyak pi cwiny maleng.” (Jo Galatia 5:22, 23) Me niang maber ngat ma maro jami me cwiny, tam kong i kom lapor man: Kit macalo labiacara keto cwinye i cato wille, dano ma paro pi jami me cwiny bene keto cwinye i woro Lubangane.

7. Baibul loko i kom dano ma maro jami me cwiny nining?

⁷ Yecu owacci jo ma gimaro jami me cwiny bedo ki yomcwiny. Wakwano i Matayo 5:3 ni: “Gitye ki gum [yomcwiny] jo ma gingeyo ni gin lucan i lok me cwiny, pien Ker me polo megi.” Jo Roma 8:6 tittiwa adwogi maber ma bino ka waneno jami kit ma Jehovah neno kwede: “Tam ma lubo kit pa dano kelo to, ento tam ma lubo kit pa cwiny maleng miyo kwo ki kuc.” Pi meno ka wabedo jo ma maro jami me cwiny, wabibedo ki wat macok ki Lubanga, wabibedo ma cwinywa opye mot, dok ki gen me nongo kwo ma pe tum.

8. Pingo tek me bedo dano ma maro jami me cwiny?

⁸ Wakwo i kare marac adada. Pi meno, mitte ni omyero watute matek me gwoko tamwa pien wakwo i kin jo ma pe gitamo calo Lubanga. Ka pe wayelle matek me tam i kom jami ma Jehovah maro, ci wabicako tam calo jo me lobo-ni. Gin ango ma watwero timone me gwokke ki i tam calo jo me lobo-ni? Watwero dongo i yo me cwiny nining?

9. (a) Ngo ma twero pwonyowa me bedo jo ma maro jami me cwiny? (b) Wabineno lanen maber pa jo mene?

⁹ Kit macalo latin myero onong pwony ki bot lunyodone dok olub lanengi maber, wan bene myero wanong pwony dok walub lanen  pa jo ma gitye ki wat macok ki Jehovah. Man bikonyowa me bedo jo ma maro jami me cwiny. Kitungcel, ka waneno kwo pa jo ma gimaro jami me kom, ci man konyowa me ngeyo gin ma myero pe watim. (1 Jo Korint 3:1-4) I Baibul kicoyo lok kom jo mogo ma guwekiwa lanen maber ki marac. Kong dong wanenu pwony ma wanongo ki i lanen maber pa: Yakobo, Maliam, Ki Yecu.

10. Yakobo onyuto nining ni emaro jami me cwiny?

¹⁰ Yakobo bene owok ki i kwo matek calo pol pa wan. Ominne kikome Ecau onongo mito neke woko. Jal wonne [nyo papa cege] bene otere marac. Ento niye pa Yakobo i kom cikke pa Jehovah bot Abraim omedde ki bedo matek. Yakobo onongo ngeyo ni cikke man ma mwonya-ni bene bicobbe i kom jo gange, man oweko en ogwoko jo gange maber adada. (Acakki 28:10-15) Yakobo pe oye ni tam pa jo maraco ma gurume owek wiye owil woko i kom cikke pa Jehovah. Me labolle, i kare ma Yakobo obedo ki tam ni ominne biwanne, en obako doge bot Jehovah ni olare. En olego ni: “Yam onongo iwaco ni, ‘Abitimi ber, abimiyo likwayi bedo macalo kweyo ma i dog nam, ma pe kwanne pi dwongnge.’” (Acakki 32:6-12) Yakobo onongo tye ki niye matek i kom cikke pa Jehovah dok en onyuto man i kit ma en okwo kwede.

11. Wangeyo nining ni Maliam onongo maro jami me cwiny?

¹¹ Kong dok itam i kom Maliam. Jehovah oyere me bedo min Yecu pien en obedo dano ma maro jami me cwiny. Kwan kong lok pa Maliam i kare ma en olimo Jekaria gin ki Elicabet. (Kwan Luka 1:46-55.) Gin ma Maliam owaco nyuto ni en onongo maro lok pa Lubanga matek dok bene onongo ngeyo Ginacoya me Cik Macon maber. (Acakki 30:13; 1 Camuel 2:1-10; Malaki 3:12) Kadiwa madong gunyomme, Maliam gin  ki cware Yucepu gukuro wang ma Maliam onywalo Yecu ka dong gurwatte i kingi. Tic ma Lubanga ominigi onongo pire tek loyo mitigi. (Matayo 1:25) Maliam bene obedo ka keto cwinye i kom jami ducu ma timme ka Yecu woto ki dongo dok obedo ka winyo pwonye. En “okano lok meno ducu i cwinye.” (Luka 2:51) Dong nen kene ni en onongo tye ki miti madwong adada me neno kit ma cikke pa Jehovah i kom Meciya bicobbe kwede. Tika watwero lubo lanen pa Maliam kun watute me timo jami ducu ma Lubanga mito ni watim?

12. (a) Yecu olubo kit pa Wonne nining? (b) Watwero lubo lanen pa Yecu nining? (Nen cal ma tye i pot karatac 16.)

¹² Yecu aye pud dong owekiwa lanen maber loyo ducu ma nyuto kit me bedo dano ma maro jami me cwiny. I kare ma en tye i ticce me pwony i lobo kany, en onyuto ni emito lubo kit pa Wonne. Yecu onongo winyo dok tamo calo Jehovah. En bene obedo ka lubo kit pa Jehovah. Yecu otimo jami ma Lubanga mito dok bene olubo cikke. (Jon 8:29; 14:9; 15:10) Me labolle, por kong kit ma Icaya oloko i kom kica pa Jehovah ki kit ma Marako otito kwede kit ma Yecu onongo winyo kwede. (Kwan Icaya 63:9; Marako 6:34.) Tika walubo lanen pa Yecu kun wabedo atera me miyo kony bot jo mukene? Tika waketo cwinywa i tito kwena ki pwonyo dano ki lok me kwena maber calo Yecu? (Luka 4:43) Jo ma lubo tela pa cwiny pa Lubanga gin lukica dok gikonyo jo mukene.

13, 14. (a) Gin ango ma watwero pwonyone ki bot utmege ma gimaro jami me cwiny i kare-ni? (b) Mi labol.

¹³ I kare-ni watye ki utmege mapol ma gimaro jami me cwiny dok gitute me lubo lanen pa Kricito. Twero bedo ni ineno gitye ki arima i ticwa me pwony, gijolo wele, dok bene gin lukica. Kadi bed ni gitye ki roc, pud gitute matek me dongo kit mabeco ki timo jami ma Jehovah mito ni gutim. Laminwa mo ma nyinge Rachel ma bedo i lobo Brazil owacci: “Onongo amaro ruk me lobo man tutwal. Macalo adwogine, rukka onongo rac adada. Ento ada ma apwonyo ki i Baibul okonya me tute matek me doko dano ma cwiny pa Lubanga telo. Loko kwona pe obedo yot, ento okela yomcwiny dok anongo tyen lok maber me kwo.”

¹⁴ Laminwa mo ma nyinge Reylene ma bedo i lobo Philippines onongo dok tye ki peko mapat. Kadi bed ni en onongo tye i ada, cwinye onongo tye me kwan i rwom ma lamal ki nongo tic ma culle bup. I nge kare mo, yubbe me tic pi Jehovah onongo dong pire pe tek bote. En owacci, “Acako niang ni tye gin mo ma orem i kwona, gin mo ma pire tek loyo ticca.” Reylene oloko kit ma en onongo tamo kwede dok oketo ticce pi Jehovah odoko gin ma pire tek loyo. Kombeddi-ni dong en geno cikke pa Jehovah ma tye i Matayo 6:33, 34 dok en owaco ni, “Dong angeyo ni Jehovah bimina jami ma mitte me kwo!” Twero bedo ni ingeyo omege ki lumege i kacokkeni ma bene gitye ki cwiny acel-li. Ka waneno kit ma gitye ka lubo kit pa Kricito, man cuko cwinywa bene me lubo lanengi me niye.​—1 Jo Korint 11:1; 2 Jo Tecalonika 3:7.

15, 16. (a) Gin ango ma myero watim wek wabed calo Kricito? (b) Watwero ye ni “tam pa Kricito” olok kwowa nining?

¹⁵ Watwero lubo lanen pa Kricito nining? 1 Jo Korint 2:16 tittiwa ni omyero wabed ki  “tam pa Kricito.” Jo Pilipi 2:5 poyo wiwa ni omyero watute me dongo “cwiny ma rom ki cwiny ma yam Kricito Yecu obedo kwede-ni.” Wek wabed calo Kricito, omyero wapwony kit ma en onongo tamo kwede, winyo kwede, dok timo ki jami. Yecu onongo tero watte ki Lubanga calo gin ma pire tek loyo gin mo keken. Meno aye gin muweko lubo lanen pa Yecu weko wabedo calo Jehovah. Dok meno aye gin mumiyo omyero wapwonye me tam calo Yecu.

¹⁶ Watwero pwonye me tam calo Yecu nining? Lupwonnyene guneno kit ma en timo ki tango, pwonyo kwede lwak, tero ki jo ma kitgi patpat ki dok kit ma tam pa Jehovah obedo ka tele kwede. Lupwonnyene guwacci: “Wan lucadenne i kom gin ma en otiyo ducu.” (Tic pa Lukwena 10:39) I kare-ni, pe watwero neno Yecu. Ento watye ki Jiri ma kicoyo i Baibul ma twero konyowa me ngeyo en maber. Ka wakwano dok walwodo lok matut i kom Jiri pa Matayo, Marako, Luka, ki pa Jon, ci man bikonyowa me ngeyo kit ma Yecu tamo kwede. Man ‘weko walubo kore’ dok konyowa me bedo ki kit “tam acel” ma en obedo kwede.​—1 Petero 2:21; 4:1.

17. Adwogi maber ango ma wanongo ka watamo calo Kricito?

¹⁷ Adwogi maber ango ma wanongo ka watamo calo Kricito? Kit macalo camo cam mabeco weko komwa bedo tek, tam calo Kricito bene weko wabedo tek i yo me cwiny. Motmot, wacako ngeyo gin me atima kare mo keken. Ci man konyowa me moko tam ma yomo cwiny Lubanga dok weko cwinywa pe ngoliwa kop. Man mono pe obedo tyen lok maber adada ma weko ‘waruku Rwot Yecu Kricito’?​—Jo Roma 13:14.

18. Gin ango ma ipwonyo madok i kom dano ma lubo tela pa cwiny pa Lubanga?

¹⁸ Pwony man okonyowa me niang tyen lok me bedo dano ma cwiny pa Lubanga telo. Wanongo pwony ki i lanen maber pa jo ma gulubo tela pa cwiny pa Lubanga. Wapwonyo bene ni bedo ki “tam pa Kricito” konyowa me tam calo Jehovah dok weko wabedo ki wat macok kwede. Ento tye jami mapol ma pud watwero pwonyone. Me labolle: Wangeyo nining ni cwiny pa Lubanga aye telowa? Gin ango ma watwero timone wek wabed jo mucwiny i yo me cwiny? Lubo tela pa cwiny pa Lubanga gudo kwowa nining? Wabineno man i pwony ma lubo.