1, 2. (a) Kai nina piga-piga turang senina kerna kalak si ndeher ras Dibata? (b) Penungkunen penting kai si man bahasenta bas artikel enda?

IKATAKEN sekalak turang senina i Kanada maka kalak si ndeher ras Dibata lebih ermeriah ukur janah reh beluhna ia ndungi masalahna. Ikataken sekalak turang senina ka i Brasil si nggo 23 tahun erjabu maka jadi kalak si ndeher ras Dibata erban perjabunna ermeriah ukur. Janah ikataken sekalak turang senina i Filipina maka jadi kalak si ndeher ras Dibata erban dame perukurenna janah banci erteman ras turang senina arah erbage latar belakang.

² Payo, melala kel gunana adi ndeher kita ras Dibata. Kai nge si banci silakoken gelah reh deherna ras Ia janah sigejapken gunana? Perlu lebe siteh kai nina Pustaka kerna kalak si ndeher ras Dibata, si itegu-tegu kesah si badia janah bagi Jahwe carana rukur. Bas artikel enda, sijawap kari telu penungkunen si penting: (1) Kai maksudna kalak si ndeher ras Dibata? (2) Ise nge si banci sicontoh gelah banci kita reh deherna ras Dibata? (3) Kai si arus silakoken  gelah lit bas kita “perukuren Kristus” si banci erban kita ndeher ras Dibata?

3. Menurut Pustaka, kai bedana kalak si ndeher ras Dibata ras si lang?

³ Isampati rasul Paulus kita gelah sieteh bedana kalak si ndeher ras Dibata ras si lang. (Baca 1 Korinti 2:14-16.) Kalak si la ndeher ras Dibata “labo ngaloken kasa kai si asalna i bas kesah Dibata nari. La ia ngasup ngangkasa, janah si lang-lang nge e iakapna.” Tapi, kalak si ndeher ras Dibata “ngasup ia ertimbang kerna kai pe” janah lit bas ia “perukuren Kristus,” maksudna iusahakenna kel gelah carana rukur seri ras cara Kristus rukur. Iahken Paulus kita gelah ndeher ras Dibata. Kai ka bedana kalak si ndeher ras Dibata ras si lang?

4, 5. Ja nari sieteh sekalak jelma la ndeher ras Dibata?

⁴ Uga cara rukur kalak si la ndeher ras Dibata? Kalak si la ndeher ras Dibata, iikutkenna kebiasan doni enda, si utamana akapna eme dirina saja. Ikataken Paulus maka kebiasan e “kesah si genduari erdahin i bas kalak si la nggit erkemalangen man Dibata.” (Epesus 2:2) Kebiasan e erban nterem jelma iusihna kalak si lit isekelilingna. Langsung saja ilakokenna kai siakapna benar, la iperdiatekenna hukum Dibata. Kalak si la ndeher ras Dibata, si iukurina eme kai si meriah akap doni enda saja janah si pentingna akapna asangken kai pe eme jabaten, sen, ntah pe hakna.

⁵ Ikataken Pustaka maka kalak si la ndeher ras Dibata rusur ilakokenna “perbahanen-perbahanen si erpalasken sura-sura ukur manusia.” (Galati 5:19-21) Bas surat Paulus si pertama man kalak Kristen i Korinti ikatakenna ka perbahanen-perbahanen si deban si ilakoken kalak si la ndeher ras Dibata. Meriah akapna mbela salah sada kalak si sanga erjengil, erban kalak la sicocoken, ipengaruhina kalak gelah mberontak, minter nuntut ku pengadilen, la iergaina kepalana, janah pangan ras inemen kapna si pentingna. Kalak si la ndeher ras Dibata la ilawanna sanga igoda ngelakoken kai si salah. (Kuan-kuanen 7:21, 22) Ikataken Judas maka kalak si la ndeher ras Dibata banci bene kesah si badia bas ia nari.​—Judas 18, 19.

6. Ja nari sieteh sekalak jelma ndeher ras Dibata?

⁶ Tapi, kalak si ndeher ras Dibata penting kel akapna hubungenna e. Nggit ia itegu-tegu kesah si badia janah iusahakenna kel ngusih Jahwe. (Epesus 5:1) Terus ipelajarina kerna uga cara Jahwe rukur ras uga Jahwe ngadapi sada situasi. Gejapkenna kel Dibata e bas geluhna. Ergaina kel hukum Jahwe bas kerina kegeluhenna. (Masmur 119:33; 143:10) La ilakokenna “perbahanen-perbahanen si erpalasken sura-sura ukur manusia” tapi iusahakenna gelah lit “ulih kesah si badia” bas ia. (Galati 5:22, 23) Gelah menukah siakap ngangkaisa banci siandingken bagenda: Kalak si beluh erbisnis ikataken me ia pebisnis, bege pe kalak si penting akapna hubungenna ras Dibata ikataken me ia ndeher ras Dibata.

7. Kai si ikataken Pustaka kerna kalak si ndeher ras Dibata?

 ⁷ Ikataken Jesus maka ermeriah ukur me kalak si ndeher ras Dibata, ntah pe si megiken KataNa. Nina Lukas 11:28, “[Meriah] tuhu-tuhu ate kalak si megiken Kata Dibata dingen ndalankenca!” Ijelasken bas Roma 8:6, gelah sidat kegeluhen, bagi Jahwe min carata rukur, nina, “Kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena.” Emaka adi ndeher kita ras Dibata, gundari pe banci kita erdame ras Ia, pusuhta pe dame, janah lit arapen nggeluh si rasa lalap.

8. Engkai maka arus kita erjuang gelah banci terus ndeher ras Dibata?

⁸ Tapi gundari kita nggeluh bas doni si berbahaya. Perban kalak si isekelilingta la bagi Dibata carana rukur, emaka arus erjuang kel kita guna ngelindungi pikirenta. Adi la siisi pikirenta alu pemikiren Jahwe, doni enda me si dungna ngisisa, emaka kebiasan ras pemikirenta pe nggo bagi doni enda. Uga carana gelah ula kita bage? Kai si arus silakoken gelah terus reh deherna kita ras Dibata?

9. (a) Uga carana gelahna banci kita ndeher ras Jahwe? (b) Contoh si mehuli kai kari si man bahasenta?

⁹ Bali bagi anak-anak si perlu erlajar bas orang tuana nari janah ngusih kai si mehuli arah orang tuana e, kita pe perlu erlajar arah kalak si ndeher ras Jahwe janah nggit kita ngusihsa gelah kita pe banci ndeher ras Jahwe. Selain si e, sinen ka kai si la ilakoken kalak si ndauh arah Jahwe. (1 Korinti 3:1-4) Bas Pustaka lit contoh si mehuli ras si la  mehuli. Emaka mari sinen contoh si mehuli, eme Jakup, Maria, ras Jesus.

10. Kai buktina maka ndeher Jakup ras Jahwe?

¹⁰ Bali bagi kita, kegeluhen Jakup pe la menukah. Ibunuh seninana atena ia, eme Esau. Rusur ka ia itipu mamana. Tapi tetap paguh kiniteken Jakup man janji Jahwe ku Abraham. Itehna maka keluargana ikut jadi bagin i bas janji si luar biasa e, emaka iusahakenna ngelindungi keluargana. (Kejadin 28:10-15) Amin pe la mehuli sipat-sipat kalak i sekelilingna, tapi e la erban ia lupa man janji Jahwe. Contohna, mindo kel Jakup man Jahwe gelah iselamatkenNa ia sanga iakapna iserang Esau ia. Ertoto ia, nina, ‘Nggo ijanjikenNdu sange man bangku maka kerina ibahanNdu erdalan alu mehuli, ras mereken man bangku kesusuren bali teremna ras kersik i tepi lawit.’ (Kejadin 32:6-12) Tek kel Jakup man janji Jahwe janah ibuktikenna arah kegeluhenna.

11. Ja nari banci sieteh maka ndeher Maria ras Dibata?

¹¹ Gundari sinen contoh Maria. Perban ndeher ia ras Jahwe, ipilih Jahwe ia jadi mamak Jesus. Bacalah kai si ikataken Maria sanga idahina Sakaria ras Elisabet. (Baca Lukas 1:46-55.) Banci siidah maka iergai Maria kel Kata Dibata janah melala kel si ietehna kerna Kitap-Kitap Heber. (Kejadin 30:13; 1 Samuel 2:1-10; Maleaki 3:12) Janah, kenca erjabu pe Maria ras Jusup, itimai kalak e lebe Jesus tubuh maka ia erhubungen seksual. Pentingen akapna tugasna arah Dibata asangken sura-surana. (Matius 1:25, Terjemahan Dunia Baru) Bage ka pe, iperdiateken Maria kel kerina si terjadi sanga Jesus reh belinna janah ibegikenna kerina si  iajarken Jesus. ‘Itimbangkenna i bas ukurna.’ (Lukas 2:51) Jelas me maka tertarik kel ia man janji Dibata kerna Mesias. Banci nge siusih Maria janah lalap siusahaken ngelakoken kai si ngena ate Dibata?

12. (a) Ja nari siteh maka iusih Jesus Bapana? (b) Uga caranta ngusih Jesus? (Nen gambar pemena artikel.)

¹² Arah kerina kalak si pernah nggeluh, Jesus me contoh si mehulina si ndeher ras Dibata. Arah kegeluhen ras pelayanenna i doni, ibuktikenna maka iusihna atena Bapana. Perukurenna, perasanna, ras perbahanenna seri bagi Jahwe. Idalankenna peraten Jahwe janah iergaina perentah-perentahNa. (Johanes 8:29; 14:9; 15:10) Contohna, cuba bandingken perkuah ate Jahwe si icatat nabi Jesaya ras perkuah ate Jesus si icatat Markus. (Baca Jesaya 63:9; Markus 6:34.) Siusih nge Jesus, si mekuah atena kalak si perlu penampat? Bagi Jesus siutamaken nge erberita ras ngajarken berita si meriah? (Lukas 4:43) Kalak si ndeher ras Jahwe pasti perkuah ate janah isampatina kalak si deban.

13, 14. (a) Kai si banci sipelajari arah turang seninanta si ndeher ras Jahwe? (b) Bereken contohna.

¹³ Gundari nterem turang senina si ndeher ras Jahwe iusahakenna ngusih Kristus. Banci jadi iperdiatekenndu maka semangat kalak e i bas erberita, ramah, ras perkuah ate. Amin gia kalak e la sempurna, iusahakenna kel gelah reh ulina sipat-sipatna janah ngelakoken kai si ngena ate Jahwe. Ikataken Rachel, turang senina arah Brasil nari, “Meriah kel kuakap ngikuti gaya peruis si gundari. Dungna lanai sopan peruisku. Tapi perban erlajar Pustaka aku, reh deherna aku ras Jahwe. Labo gampang erban perubahen tapi reh riahna kuakap janah lit tujunku nggeluh.”

¹⁴ Reylene, turang senina arah Filipina nari, beda ka masalahna. Amin gia ia Saksi Jahwe, tapi si iutamakenna eme pendidiken tinggi ras pendahin si mejile. Dungna lanai penting akapna ndeher ras Jahwe. Nina, “Kusedari maka lit si bene bas geluhku, si ndauh pentingen asangken dahinku.” Iubah Reylene carana rukur janah ngelayani Jahwe ibanna si pentingna bas geluhna. Nggo tek ia janji Jahwe bas Matius 6:33, 34 janah nina, “Tek aku maka iurus Jahwe nge aku!” Banci jadi itehndu lit turang senina bas runggunndu si seri ras Reylene. Sanga siidah uga kalak e ngusih Kristus, siusih ateta kalak e.​—1 Korinti 11:1; 2 Tesalonika 3:7.

15, 16. (a) Kai si perlu silakoken gelah bali bagi Kristus? (b) Uga gelah “perukuren Kristus” erpengaruh bas geluhta?

¹⁵ Uga carata ngusih Kristus? Ikataken bas 1 Korinti 2:16 maka perlu lit bas kita “perukuren Kristus.” Ipersingeti kita bas Pilipi 2:5 gelah perukurenta “bali min ras perukuren Kristus Jesus.” Gelah bagi Kristus kita, perlu sipelajari uga carana rukur, perasanna, ras perbahanenna. Iperdiateken Jesus kel hubungenna ras Dibata lebih asangken kai pe. Adi reh serina kita ras Jesus, reh serina ka kita ras Jahwe. Emaka  penting kel sipelajari uga cara Jesus rukur.

¹⁶ Uga carana mpelajari cara Jesus rukur? Banci iidah murid-muridna ia ngelakoken mukjizat, ibegina ia ngajar man jelma si nterem, iidahna uga perbahanenna man kerina kalak, janah iperdiatekenna maka bagi Jahwe carana rukur. Nina kalak e, “Kami saksina kerna kerina si ibahanna.” (Perbahanen Rasul-Rasul 10:39) Gundari la kap banci siidah Jesus. Tapi lit buku Injil si nampati kita meteh kerna ia. Sanga sibaca ras siukuri buku Matius, Markus, Lukas, ras Johanes, melala si banci sipelajari kerna cara Jesus rukur. Enda erban kita tuhu-tuhu ‘ngikutken dalanna’ alu bage seri me perukurenta ras “perukuren si lit i bas ia.”​—1 Petrus 2:21; 4:1.

17. Kai gunana bagi Kristus caranta rukur?

¹⁷ Kai gunana adi bagi Kristus carata rukur? Adi sipan pangan si sehat banci erban dagingta paguh, bage ka pe adi sipelajari uga cara Kristus rukur banci erban reh paguhna hubungenta ras Jahwe. Alu bage reh dekahna siteh me kai si ilakokenna i bas erbage situasi. Bage pe, banci siban keputusen si mehuli si erban senang ukur Dibata janah pusuh ras perukurenta pe bersih. E me alasenna ngkai maka perlu ‘sicidahken biak Jesus Kristus.’​—Roma 13:14.

18. Kai dage si nggo ipelajarindu kerna kalak si ndeher ras Jahwe?

¹⁸ Enggo sipelajari bas artikel enda kai ertina ndeher ras Dibata. Enggo ka sipelajari contoh-contoh si mehuli arah kalak si itegu-tegu kesah si badia. Bage pe nggo sipelajari ka maka adi lit “perukuren Kristus” bas kita enda erban bagi Jahwe carata rukur janah reh deherna kita ras Ia. Tapi lit denga terbuen si banci sipelajari. Contohna: Ja nari siteh maka ndeher kita ras Jahwe? Kai si banci silakoken gelah reh deherna kita ras Ia? Janah adi ndeher kita ras Jahwe kai pengaruhna man kegeluhenta? Enda sibahas kari bas artikel seterusna.