1, 2. (a) Ki mannyer bokou frer ek ser i santi konsernan spirityalite? (b) Ki bann kestyon enportan nou pou reponn dan sa lartik?

EN SER Kanada i dir ki vin en dimoun spirityel in fer li pli ere e ed li avek son bann problenm. En frer Brezil ki’n marye pour 23 an i dir ki vin en dimoun spirityel in ed li ek son madanm pour annan en lavi maryaz ere. En frer Filipin i dir ki vin en dimoun spirityel in donn li lape lespri e ed li pour annan en bon relasyon avek bann frer ek ser ki sorti partou kote.

² I kler ki nou ganny bokou byenfe ler nou en dimoun spirityel. Ki nou kapab fer pour vin pli spirityel e profit sa bann byenfe? Premyerman, nou bezwen konpran sa ki Labib i dir lo bann dimoun spirityel, andotmo, bann dimoun ki ganny gide par lespri sen Bondye e ki annan menm fason panse avek Zeova. Dan sa lartik, nou pou reponn trwa kestyon enportan: (1) Ki savedir en dimoun spirityel? (2) Ki legzanp ki pou ed nou devlop nou spirityalite? (3) Ler nou fer zefor pour “konn fason panse Kris,” ki  mannyer sa i ed nou vin bann dimoun spirityel?

3. Ki mannyer Labib i dekrir diferans ant en dimoun ki pa spirityel ek en dimoun spirityel?

³ Zapot Pol i ed nou pour konpran diferans ant en “dimoun ki pa spirityel” ek en “dimoun spirityel.” (Lir 1 Korentyen 2:14-16.) En dimoun ki pa spirityel “pa aksepte bann keksoz spirityel, parski pour li sa i bet e i pa kapab konpran li.” De lot kote, en dimoun spirityel i “egzamin tou keksoz” e i “konn fason panse Kris,” ki vedir ki i fer zefor pour mazin parey Kris i mazinen. Pol i ankouraz nou pour vin bann dimoun spirityel. Dan ki lezot fason bann dimoun ki pa spirityel i diferan avek bann dimoun spirityel?

4, 5. Ki mannyer nou kapab idantifye en dimoun ki pa spirityel?

⁴ Ki mannyer en dimoun ki pa spirityel i reflesi? I adopte bann latitid sa lemonn, ki konsantre lo bann dezir egois. Pol i dekrir sa latitid konman “sa leta lespri ki pe azir dan bann zanfan dezobeisans.” (Efezyen 2:2) Sa latitid i enfliyans laplipar dimoun pour imit bann otour zot. Zot zis fer sa ki paret byen dapre zot, san pran kont bann standar Bondye. En dimoun ki pa spirityel i reflesi plis lo bann keksoz fizik e souvandfwa i santi ki son pozisyon, larzan oubyen drwa personnel i pli enportan ki tou lezot keksoz.

⁵ Souvandfwa, en dimoun ki pa spirityel i pratik sa ki Labib i apel “bann move kondwit lekor enparfe.” (Galat 5:19-21) Dan premye let Pol pour bann Kretyen Korent, i mansyonn lezot keksoz ki bann dimoun ki pa spirityel i fer. Zot pran kote dan bann dezakor, zot esey kree divizyon ant bann dimoun, zot ankouraz lezot pour rebele, zot anmenn kanmarad ankour, zot napa okenn respe pour lotorite e zot fer manze ek bwar vin tro enportan dan zot lavi. En dimoun ki pa spirityel pa fer zefor pour reziste tantasyon pour fer en keksoz mal. (Proverb 7:21, 22) Zid ti dir ki bann dimoun ki pa spirityel ti menm kapab perdi lespri sen Zeova.​—Zid 18, 19.

6. Ki mannyer nou kapab idantifye en dimoun spirityel?

⁶ Kontrerman avek en dimoun ki pa spirityel, en dimoun spirityel i vreman enterese avek son relasyon avek Bondye. I les li ganny gide par lespri sen Bondye e i fer zefor pour imit Zeova. (Efezyen 5:1) I fer zefor pour aprann ki mannyer Zeova i panse e pour esey vwar keksoz parey Zeova i vwar. Bondye i vreman reel pour li. En dimoun spirityel i diferan avek en dimoun ki pa spirityel akoz i respekte bann standar Zeova dan tou laspe son lavi. (Psonm 119:33; 143:10) I pa pratik “bann move kondwit lekor enparfe” me i esey devlop “fri lespri sen.” (Galat 5:22, 23) Pour nou pli byen konpran ki savedir en dimoun spirityel, mazin sa konparezon: En dimoun ki konn fer byen biznes i ganny apele en biznesmenn, en dimoun ki konsantre lo bann keksoz spirityel i ganny apele en zonm spirityel.

7. Ki Labib i dir konsernan bann dimoun spirityel?

 ⁷ Zezi ti dir ki bann dimoun spirityel i ere. Dan Matye 5:3 nou lir: “Ere bann ki rekonnet ki zot bezwen gidans Bondye, parski Rwayonm lesyel i pour zot.” Romen 8:6 i eksplike ki nou bezwen annan menm fason panse avek Zeova pour nou ganny lavi: “Mazin bann move dezir i vedir lanmor, me mazin bann keksoz ki annan pour fer avek lespri sen i vedir lavi ek lape.” Alor si nou en dimoun spirityel, la konmela menm nou kapab annan lape avek Bondye e dan nou menm e nou kapab annan lespwar pour ganny lavi eternel.

8. Akoz i kapab difisil pour vin e reste en dimoun spirityel?

⁸ Par kont, nou viv dan en lemonn danzere. Vi ki nou viv parmi bann dimoun ki napa menm fason panse avek Bondye, nou bezwen fer bokou zefor pour protez nou lespri. Si nou pa ranpli nou lespri avek bann panse Zeova, lemonn pou ranpli nou lespri avek son bann move latitid ek fason panse. Ki nou kapab fer pour evit sa? Ki mannyer nou kapab devlope spirityelman?

9. (a) Kwa ki kapab ansenny nou pour vin bann dimoun spirityel? (b) Ki bon legzanp nou pou diskit lo la?

⁹ Zis parey en zanfan i bezwen aprann avek son paran e imit zot bon legzanp, nou bezwen aprann avek bann ki annan en bon relasyon avek Zeova e imit zot. Sa pou montre nou ki mannyer pour vin en dimoun spirityel. De lot kote, ler nou obzerv bann dimoun ki pa spirityel, nou aprann kwa ki nou pa devret fer. (1 Korentyen 3:1-4) Dan Labib i annan bann bon legzanp ek bann move legzanp. Annou  vwar serten bon legzanp ki nou kapab aprann avek: Zakob, Mari ek Zezi.

10. Ki mannyer Zakob ti montre ki i ti en dimoun spirityel?

¹⁰ Parey bokou parmi nou, lavi Zakob pa ti fasil. Son prop frer Ezai, ti anvi touy li. Son boper ti esey eksplwat li plizyer fwa. Me lafwa Zakob dan sa promes ki Zeova ti’n fer avek Abraam ti reste for. Zakob ti konnen ki son fanmir ti pou enplike dan lakonplisman sa zoli promes, alor i ti pran byen swen avek zot. (Zenez 28:10-15) Zakob pa ti les move latitid bann dimoun otour li fer li oubliy bann promes Zeova. Par egzanp, ler Zakob ti krwar ki i ti an danze akoz son frer, i ti sipliy Zeova pour ed li. I ti priye: “Ou’n dir: Mon pou fer ou dibyen, e mon pou fer ou desandans vin parey disab lo bor lanmer ki pa kapab ganny konte.” (Zenez 32:6-12) Zakob ti annan en lafwa for dan bann promes Zeova e i ti demontre sa par lafason ki i ti viv son lavi.

11. Ki mannyer nou konnen ki Mari ti en dimoun spirityel?

¹¹ Aprezan annou vwar legzanp Mari. Zeova ti swazir li pour vin manman Zezi akoz i ti en dimoun spirityel. Lir sa ki Mari ti dir ler i ti vizit Zekarya ek Elizabet ki ti son fanmir. (Lir Lik 1:46-55.) Nou kapab vwar ki Mari ti kontan Parol Bondye e ki i ti konn Lekritir Ebre byen. (Zenez 30:13; 1 Samyel 2:1-10; Malaki 3:12) Deplis, menm apre ki Mari ek Zozef ti’n marye, zot ti espere ziska ler Zezi ti ne pour zot fer relasyon seksyel. Sa responsabilite ki Bondye ti’n donn zot ti pli enportan pour zot ki zot bann dezir. (Matye 1:25) Mari ti osi obzerv byen tou keksoz ki ti pase anmezir ki Zezi ti grandi e i ti  ekout bann keksoz ki Zezi ti ansennyen. Mari ti “gard tou sa bann parol dan son lespri.” (Lik 2:51) I kler ki i ti vreman enterese dan bann promes Bondye konsernan Mesi. Eski nou kapab imit Mari e esey toultan fer sa ki Bondye i anvi nou fer?

12. (a) Ki mannyer Zezi ti imit son Papa? (b) Ki mannyer nou kapab imit Zezi? (Vwar portre o konmansman sa lartik.)

¹² Dan tou bann dimoun ki’n deza viv, Zezi i sa pli bon legzanp en dimoun spirityel. Pandan son lavi ek minister lo later, i ti montre ki i ti anvi imit son Papa. Zezi ti mazin, santi e azir parey Zeova. I ti fer lavolonte Bondye e respekte son bann standar. (Zan 8:29; 14:9; 15:10) Par egzanp, konpar lafason ki Izai ti dekrir konpasyon Zeova avek lafason ki Mark ti dekrir santiman Zezi. (Lir Izai 63:9; Mark 6:34.) Eski nou imit Zezi par touzour pare pour demontre konpasyon anver bann ki bezwen led? Parey Zezi, eski nou konsantre lo anons e ansenny sa bon nouvel? (Lik 4:43) Bann dimoun spirityel i annan konpasyon e zot esey ed lezot.

13, 14. (a) Ki nou kapab aprann avek bann dimoun spirityel ozordi? (b) Donn en legzanp.

¹³ Ozordi, i annan en kantite frer ek ser spirityel ki fer bokou zefor pour imit Zezi. Petet ou’n remarke ki zot devoue dan predikasyon e ki zot demontre lospitalite ek konpasyon. Menm si zot enparfe, zot fer en ta zefor pour esey devlop bann bon kalite e fer sa ki Zeova i anvi zot fer. En ser sorti Brezil ki apel Rachel, i dir: “Mon ti kontan swiv lanmod sa lemonn. Sa ti fer ki mon pa ti sanz dan en fason modes. Me ler mon ti aprann laverite, sa ti pous mwan pour fer bann zefor neseser pour vin en dimoun spirityel. I pa ti fasil pour fer bann sanzman, me mon ti vin pli ere e trouv en vre bi dan lavi.”

¹⁴ En ser sorti Filipin ki apel Reylene, ti annan en lot kalite problenm. Menm si i ti dan laverite, i ti konsantre lo letid avanse pour li ganny en bon plas travay. Avek letan, bann lobzektif spirityel ti nepli enportan pour li. I dir, “Mon ti konmans realize ki i ti annan en keksoz ki manke dan mon lavi, en keksoz ki pli enportan ki mon travay.” Reylene ti sanz son fason panse e fer son servis pour Zeova sa keksoz pli enportan dan son lavi. Aprezan i annan konfyans dan promes Zeova ki dan Matye 6:33, 34 e i dir, “Mon napa okenn dout ki Zeova pou pran swen avek mwan!” Petet ou konn bann frer ek ser dan ou kongregasyon ki annan menm latitid. Ler nou vwar lafason ki zot imit Kris, nou anvi swiv zot legzanp fidelite.​—1 Korentyen 11:1; 2 Tesalonisyen 3:7.

15, 16. (a) Ki nou bezwen fer pour vin parey Kris? (b) Ki mannyer nou kapab les “fason panse Kris” annan en lefe lo nou?

¹⁵ Ki mannyer nou kapab imit Kris? Premye Korentyen 2:16 i eksplike ki nou bezwen “konn fason panse Kris.” Romen 15:5 i fer nou rapel ki nou bezwen devlop “menm fason panse ek latitid ki Kris Zezi ti annan.” Pour vin parey Kris, nou bezwen aprann konn son fason panse, son santiman ek fason  azir. Zezi ti pli enterese dan son relasyon avek Bondye ki avek okenn lezot keksoz. Alor vin parey Zezi i fer nou vin pli parey Zeova. Sanmenm sa i vreman enportan ki nou aprann pour mazin parey Zezi.

¹⁶ Ki mannyer nou kapab aprann pour mazin parey Zezi? Son bann disip ti obzerv li pe fer bann mirak, zot ti ekout li pe ansenny bann gran lafoul dimoun, zot ti vwar ki mannyer i ti tret tou sort kalite dimoun e zot ti vwar ki mannyer i ti ganny gide par bann panse Zeova. Zot ti dir: “Nou temwen tou sa bann keksoz ki i ti fer.” (Akt 10:39) Ozordi nou pa kapab vwar Zezi. Me nou annan bann resi dan Levanzil ki ed nou pour aprann konn li byen. Ler nou lir e medit lo liv Matye, Mark, Lik ek Zan, nou aprann plis lo fason panse Zezi. Sa i ed nou pour “swiv son lepa fidelman” pour ki nou kapab annan “menm fason panse” ki i ti annan.​—1 Pyer 2:21; 4:1.

17. Ki mannyer nou pou benefisye ler nou annan fason panse Kris?

¹⁷ Ki mannyer nou pou benefisye ler nou mazin parey Kris? Zis parey nou lekor i vin pli for ler nou manz bann manze ki bon pour lasante, ler nou ranpli nou lespri avek bann panse Kris, sa i fer nou for spirityelman. Ptitapti, nou arive konpran ki Zezi ti pou fer dan nenport sityasyon. Apre nou kapab fer bann desizyon saz ki fer Bondye kontan e ki donn nou en konsyans kler. Pa ou ti pou dakor ki sa i bann bon rezon pour “vin parey Senyer Zezi Kri”!​—Romen 13:14.

18. Ki ou’n aprann konsernan vin en dimoun spirityel?

¹⁸ Sa lartik in ed nou konpran ki savedir en dimoun spirityel. Nou’n aprann avek bon legzanp bann dimoun ki ti ganny gide par lespri sen. Nou’n osi aprann ki “konn fason panse Kris” i ed nou pour mazin parey Zeova i mazinen e annan en bon relasyon avek li. Me i annan ankor plis ki nou kapab aprann. Par egzanp: Ki mannyer nou kapab konnen si nou for spirityelman? Ki nou kapab fer pour vin pli for spirityelman? Ki lefe spirityalite i annan dan nou lavi? Nou pou vwar sa dan sa lot lartik.