1, 2. (a) Nemene la mekuna ne la itre xa trejin göne la troa ce mekun me Iehova? (b) Nemene la hne së hna troa ce ithanatane ngöne la tane mekun celë?

ÖNINE la ketre trejin föe e Canada ka hape, ame hë la angeic a waiewekë tui Iehova tre, hetre madrine i angeic, nge celë hi ka xatua angeic ngöne la itre jol hnei angeic hna qëmeke kow. Nge, önine la ketre trejin e Brésil, ka faipoipo koi 23 lao macatre ka hape, ame hë la angeic a waiewekë tui Iehova, mele madrine hë angeic me föi angeic ngöne la mele ne trefën. Nge, önine la ketre trejin e Philippines ka hape, celë hi ka hamë tingeting koi angeic, me xatua angeic troa ce mel memine la itre trejin ka isapengöne aqane mel.

² Eje hi laka, nyimutre la itre eloine hne së hna kapa qa ngöne la troa waiewekë tui Iehova. Nemene la nyine tro sa kuca matre troa ce mekun me Iehova, me kepe thangane qa ngön? Loi e tro sa pane trotrohnine la pengöne la atr ka ce mekun me Iehova e hnine la Tusi Hmitrötr. Kola qaja la atre ka nue la uati hmitrötr troa xatua angeic, nge casi hi la aqane waiewekë i  angeic me Iehova. Ame ngöne la tane mekun celë, troa sa la köni hnying: (1) Nemene la pengöne la atr ka ce mekun me Iehova? (2) Nemene la itre tulu ka troa xatua së troa waiewekë tui Iehova? (3) Nemene la itre eloine hne së hna kapa qa ngöne la hna ce mekun me Keriso?

3. Nemene la aliene la “ate ne ngönetei” me “ate ne u” e hnine la Tusi Hmitrötr?

³ Paulo aposetolo a xatua së troa trotrohnine la aliene la kola hape, “ate ne u” me “ate ne ngönetei.” (E jë la 1 Korinito 2:14-16.) Ame la “ate ne ngönetei” tre, “tha kapa kö [angeic] la ite ewekë ne la [u]a i Akötesie ; ke qene hmo lai koi angeic ; kete tha ’teine kö angeice wangate hmekun’ it’ ej.” Ngo, ame la “ate ne u,” ene la atre ka imelekeu hnyawa me Iehova tre, angeic a “trotrohnine la nöjei ewekë asë,” nge “hetenyi hë [angeic] la mekuana i Keriso.” Paulo a thuecatre koi së troa ce mekun me Iehova. Nemene la itre xa aqane mama la eisapengönene la “ate ne ngönetei,” memine la atre ka ce mekune me Iehova?

4, 5. Nemene la aqane waiewekë ne la “ate ne ngönetei”?

⁴ Nemene la aqane waiewekë ne la “ate ne ngönetei”? Hna löthi angeic hnene la aqane mekune i fen laka, ka ukune la atr troa sipu meku angeice kö. Öni Paulo, kolo “[men], ate huliwa hnine la ite ka tha idei.” (Efeso 2:2) Ka ihul la mene cili, matre itre atr a ixomithiina. Angatr a ujë thenge la sipu meköti angatr, nge tha nyipiewekëne kö la itre trepene meköti Akötresie. Ame la “ate ne ngönetei,” angeic a wangatrune la itre ewekë ne fen, nge ka tru kö ngöne la mele i angeic la hnëqa, me mani, me meköti angeic hune la itre xa ewekë.

⁵ Ketre, angeic a kuca la hna hën hnei Tusi Hmitrötr ka hape, “ite huliwa ne la ngönetei.” (Galatia 5:19-21) Ame ngöne la pane tusi Paulo kowe la itre keresiano ne Korinito, hnei angeic hna qaja la itre xa huliwa ka ngazo hna kuca hnene la “ate ne ngönetei.” Ame la atre cili, angeic a lö hnine la itre iwesitrë, me thel troa aisane la itre atr, me uku itre xan troa icilekeu, me iutisai, me pë metrötr kowe la itre ka mus, me amë panëne la xen me ij ngöne la mele i angeic. Ame la kola tupathi angeic, canga tro hi angeic a kei. (Ite Edomë 7:21, 22) Öni Iuda, ame la atre ka ujë tune lai, thatreine kö tro la uati hmitrötre i Iehova a xatua angeic.—Iuda 18, 19.

6. Nemene la aqane waiewekë ne la “ate ne u”?

⁶ Ame la “ate ne u,” ene la atre ce mekun me Iehova tre, angeic a wangatrune la aqane imelekeu i angeic me Nyidrë. Angeic a nue la uati hmitrötr troa xatua angeic, me thel troa nyitipu Iehova. (Efeso 5:1) Nge, angeic a thel troa waiewekë tui Nyidrë. Ka mele Akötresie koi angeic. Ketre, angeic a trongëne la itre trepene meköti Iehova ngöne la mele i angeic. (Salamo 119:33; 143:10) Tha angeice kö a kuca la “ite huliwa ne la ngönetei,” ngo angeice pe a thel troa melën la “wene la [u]a.”—Galatia 5:22, 23.

7. Nemene la hna qaja hnei Tusi Hmitrötr göne la atre ce mekun me Iehova?

⁷ Öni Iesu, ka madrine palahi la atre ce mekun me Iehova. Kola qaja ngöne Mataio 5:3, MN ka hape: “Hetre madrinene la itre ka trotrohnine ka hape, angatr a aja Akötresie, ke thatraqai angatre la baselaia ne hnengödrai.” Ketre, kola mama ngöne Roma 8:6 la eloine troa ce mekun me Iehova, kola hape: “E hnine la ngönetei, meci hë ; ngo e hnine la  u, melë hë me tingeting.” Matre, e tro sa ce mekun me Iehova, tro hë së enehila a mele tingeting me Nyidrë, me tingeting la hni së, me hetrenyi la mejiun troa mel epine palua.

8. Pine nemene matre jole catr troa ce mekun me Iehova?

⁸ Ngo, ngazo catre la fene celë ke, isazikeu catr la aqane waiewekë ne la itre atr memine la aqane waiewekë i Iehova. Matre, nyipiewekë tro sa thupëne hnyawa la itre mekune së. E tha nyialiene kö së la he së hnene la itre mekune i Iehova, tro pena ha fene lai a nyialiene hnene la itre mekun me thiina ne ej. Nemene la aqane tro sa neëne lai? Nemene la aqane tro palahi së a ce mekun me Iehova?

9. (a) Nemene la aqane tro sa ce mekun me Akötresie? (b) Drei la itre tulu ka lolo hne së hna troa ce ithanatan?

⁹ Hetrenyi e hnine la Tusi Hmitrötr la itre tulu ka loi, me ka ngazo. Eje hi laka, nyipiewekë tro la itre nekönatr a xomi ini qaathei keme me thin, me nyitipu nyidro. Ketre tune mina fe, loi e tro sa xomi ini qaathene la itre atr ka imelekeu hnyawa me Iehova, me nyitipu angatr. Tro lai a xatua së troa ce mekun me Akötresie. Nge ame pena ha itre tulu ka ngazo, kola hmekë së matre tha tro kö sa xötrethenge la itre huliwa ne la “ate ne ngönetei.” (1 Korinito 3:1-4) Tro sa ce ithanatane la köni tulu ka loi nyine tro sa xomi ini qa ngön, ene Iakobo, me Maria, me Iesu.

10. Nemene la aqane amamane Iakobo laka, angeic a ce mekune me Iehova?

¹⁰ Tui Iakobo, alanyimu la itre atr ka cile kowe la itre jol ka tru ngöne la mele i angatr. Hnei Esau, sipu trejin me angeic, hna thel troa humuthi angeic. Nge, hna iaö angeic hnei Labana, keme ne la lue föi angeic. Ngo, hnei Iakobo palahi hna catre lapaune kowe la hna thingehnaeane hnei Iehova koi Aberahama.  Atre hnyawa hi angeic laka, troa eatrëne la hna thingehnaeane cili jëne la lapa i angeic, matre angeic a thupë nyudreni hnyawa. (Genese 28:10-15) Hnei Iakobo palahi hna lapa mekune lai, ngacama kola mel nyipine la itre atr ka kuca la “ite huliwa ne la ngönetei.” Ame lo kola thel troa humuthi angeic hnei Esau, hnei angeic hna sipo iele Iehova troa amele angeic. Öni angeic: “Hnei cilieti hna ulatin, ka hape, Tro ni a kuca la loi koi ’ö, nge tro ni a amanane la ite matra i ’ö mate tune la ngöni ne hnagejë lo tha nune e ke mana.” (Genese 32:6-12) Ka catre la lapaune i Iakobo kowe la itre hnei Iehova hna thingehnaean, nge hnei angeic hna amamane lai ngöne la aqane mele i angeic.

11. Nemene la aqane amamane Maria laka, angeic a ce mekune me Iehova?

¹¹ Pane mekune jë la pengöi Maria. Pine nemene matre ië angeice jë troa nyi thine i Iesu? Pine laka, angeic a thel troa ce mekun me Iehova. E jë la hnei Maria hna qaja lo kola iöhnyi me Zakaria me Elisabethe. (E jë la Luka 1:46-55.) Ka tru koi Maria la Wesi Ula i Akötresie, nge atre hnyawa hi angeic la Itre Hna Cinyihane Qene Heberu. (Genese 30:13; 1 Samuela 2:1-10; Malaki 3:12) Nyipiewekë catre kö koi Maria me Iosefa la hnëqa hna athipe koi nyidro, hune la sipu aja i nyidroti kö. Thupene la hna faipoipo, tha hnei nyidroti kö hna canga ce meköl trefën. Hnei nyidroti pe hna treqene hnyawa matre mala Iesu pi. (Mataio 1:25) Ketre, hnei Maria hna goeëne hnyawa la nöjei huliwa hna kuca hnei Iesu la nyidrëti a tru trootro, me drenge hnyawa la itre ewekë hnei nyidrëti hna qaja. Maria a “amë hutine . . . la nöjei ewekë asë cili e kuhu hni nyido.” (Luka 2:51) Eje hi laka, ka tru koi Maria la itre hna thingehnaean hnei Akötresie göne la Mesia. Loi e tro fe sa nyitipu Maria, me thel troa kuca la aja i Akötresie.

12. (a) Nemene la aqane nyitipu Iehova hnei Iesu? (b) Nemene la aqane tro sa nyitipu Iesu? (Wange ju la pane iatr.)

 ¹² Iesu la tulu ka sisitria göi troa ce mekun me Akötresie. Hnei nyidrëti hna nyitipune la Keme i nyidrë ngöne la aqane mel, me catre cainöje i nyidrë. Casi hi la aqane mekun, me aqane ujë, me aliene hni nyidrë me Iehova. Hnei nyidrëti hna kuca la aja i Iehova, me trongëne la itre hna amekötin. (Ioane 8:29; 14:9; 15:10) Hanawange la aqane qejepengöne Isaia la utipine i Iehova, memine la aqane qejepengöne Mareko la utipine i Iesu. (E jë la Isaia 63:9; Mareko 6:34.) Hapeu, easë kö a nyitipu Iesu, me amamane la utipine së kowe la itre atr ka ajan? Tui Iesu, easë kö a wangatrune la huliwa ne cainöjëne la maca ka loi? (Luka 4:43) Ame la atr ka ce mekun me Akötresie, angeic a utipine la itre atr me xatua angatr.

13, 14. (a) Nemene la hne së hna inine qa ngöne la itre trejin ka ce mekun me Iehova enehila? (b) Qaja jë la ketre hna melën.

¹³ Ame enehila, alanyimu la itre trejin ka ce mekun me Akötresie, angatr a thel troa nyitipu Keriso. Angatr a catre cainöj, me hnimi trenyiwa, me utipine la itre atr. Ngacama itre atr ka tha pexeje kö, ngo angatr a isine troa melëne la itre thiina ka lolo, me kuca la aja i Iehova. Öni Rachel, ketre trejin föe qa Brésil: “Pi tro catre ni ekö a amë la itre iheetr ka mingöming, nge hna amamane ngöne la itre zonal ne fen. Matre, pëkö metrötr ngöne la aqane heetreng. Ngo, ame hë la eni a atre la nyipici, eni ha thele troa ce mekun me Akötresie me saze. Tha ka hmaloi kö koi ni troa saze, ngo tru catre la madrineng enehila, nge hetre aliene hë la meleng.”

¹⁴ Hnei Reylen, ketre trejin föe qa Philippines hna cil kowe la ketre jol. Ngacama ka nyihlue i Iehova ha angeic, ngo angeice palahi a thel troa sisedrën la itre ini ka tru, matre troa hetre huliwa ka loi. Ame e cili, tha nyipiewekë hë la huliwa i Akötresie koi angeic. Öni angeic, “Eni a nyiqaane dreng laka, hetre ewekë ka pë theng, nge ewekë lai ka sisitria catre kö hune la huliwang.” Ame hnei Reylen hna wenë amekötin la aqane waiewekë i angeic, me amë panëne la huliwa i Iehova ngöne la mele i angeic. Qaane ju hi lai, ketre tulu angeic göi troa lapaun kowe la hna qaja xeciën hnei Iehova ngöne Mataio 6:33, 34. Öni angeic, “Xecie hnyawa koi ni laka, tro kö Iehova a thupë ni!” Maine jë, hetre trejin ngöne la ekalesia i epun ka lapaune tune lai. Ame la easa öhne la aqane nyitipu Keriso hnei angatr tre, kola upi së troa xötrethenge la lapaune i angatr.—1 Korinito 11:1; 2 Thesalonika 3:7.

15, 16. (a) Nemene la aqane tro sa nyitipu Keriso? (b) Nemene la aqane tro sa ce mekun me Iesu?

¹⁵ Nemene la aqane tro sa nyitipu Keriso? Kola qaja ngöne 1 Korinito 2:16 ka hape, nyipiewekë tro sa hetrenyi “la mekuana i Keriso.” Nge Filipi 2:5 a qaja ka hape: “Loi e ej’ e kuhu ite hni nyipunie la mekune celë, lo ka eje thei Keriso Iesu.” Maine aja së troa nyitipu Keriso, nyipiewekë tro sa thel la aqane mekun, me aqane ujë, me aliene hni nyidrë. Ka sisitria catre kö koi Iesu la aqane imelekeu i nyidrë me Akötresie hune la itre xa ewekë. Haawe, e tro sa nyitipu Iesu, tro fe hë së lai a nyitipu Iehova. Celë hi matre, nyipiewekë catr tro sa thel troa ce mekun me Iesu.

¹⁶ Nemene la aqane tro sa ce mekun me Iesu?  Hnene la itretre drei nyidrë hna öhne la itre iamamanyikeu hnei nyidrëti hna kuca, me drenge la itre cainöje i nyidrë hna cile fë kowe la ka alanyim. Hnei angatre fe hna öhne la aqane ujë i nyidrë kowe la nöjei pengöne atr, me aqane trongëne nyidrë la itre trepene meköti Iehova. Öni angatre jë hi: “Eëhuni la angete anyipicine la nöjei ewekë asë hnei nyidëti hna kuca.” (Ite Huliwa 10:39) Ame enehila, tha öhnyi Iesu hë së. Ngo, easa atrepengöi nyidrë hnyawa jëne la itre hna melëne ngöne la itre tusi ne la Evangelia. Ame la easa waipengöne la itre tusi Mataio, me Mareko, me Luka, me Ioane, tru catre la itre ithuemacanyi hne së hna kapa göne la aqane mekune i Iesu. Kola xatua së troa “xöte thenge la ite thupa ca i nyidë,” matre troa ce “hni” me nyidrë.—1 Peteru 2:21; 4:1.

17. Nemene la itre eloine hne së hna kapa qa ngöne la hna ce mekun me Keriso?

¹⁷ Nemene la itre eloine hne së hna kapa qa ngöne la hna ce mekun me Keriso? Ame la easa xen la itre nyipi xen, kola aegöcatrenyi së. Haawe, e tro palahi sa nyialiene la he së hnene la aqane mekune i Keriso, tro lai a acatrene la aqane imelekeu së me Iehova. Tro ha mama trootro koi së la aqane troa ujë hnei Iesu, e traqa ju la itre xa itupath. Ketre, atreine hë së axecië mekun hnyawa, me amadrinë Akötresie, nge lolo la mekuthetheu së. Celë hi itre ewekë lai ka upi së troa ‘xetrëne la Joxu Iesu Keriso.’—Roma 13:14.

18. Nemene la hne së hna ce ithanatan göne la atr ka ce mekun me Akötresie?

¹⁸ Hnene la tane mekune celë hna xatua së troa trotrohnine la pengöne la atr ka ce mekun me Iehova. Hetre ini hne së hna xom qaathene la itre tulu ka lolo, itre ka nue la uati hmitrötr troa xatua angatr. Ketre, hne së hna ce wang la enyipiewekën troa hetrenyi “la mekuana i Keriso,” matre troa ce mekun me Iehova, me imelekeu hnyawa me Nyidrë. Ngo, hetre itre xa ini kö nyine tro sa xom. Ame ngöne la tane mekun ka troa xulu, troa sa la köni hnyinge celë: Nemene la aqane tro sa atre ka hape, easa ce mekun me Akötresie? Nemene la nyine tro sa kuca matre tro palahi sa ce mekun me Akötresie? Nge nemene la thangane lai kowe la mele së?