1, 2. (a) Wenyi myit rawng ai hte seng nna hpunau nauna ni gara hku hkamsha ai kun? (b) Ndai sumhpa hta ahkyak ai gara ga san hpe bawng ban na kun?

CANADA mungdan kaw nna nauna langai ndai hku tsun ai: “Wenyi myit rawng wa ai majaw ngai grau pyaw wa nna, nye a prat hta hkrum ai manghkang ni hpe atsawm hparan lu wa ai.” Dinghku shang ai 23 ning rai sai Brazil kaw nna hpunau langai mung, ‘wenyi myit rawng ai gaw, ngwi pyaw ai dinghku byin na matu shi hte shi madu jan hpe karum ya wa ai’ ngu tsun ai. Wenyi myit rawng ai majaw, myit simsa nna shingdu labau n bung ai hpunau nauna ni hte mung, atsawm kanawn mazum lu ai ngu Hpilipai kaw nna hpunau langai tsun ai.

² Anhte hta wenyi myit rawng yang, lam law law hta akyu nga ai gaw dan dawng nga ai. Anhte hta wenyi myit grau rawng wa na matu hte dai zawn akyu ni lu na matu anhte hpa galaw ra ai kun? Shawng nnan, wenyi myit rawng ai ni hte seng nna, Chyum Laika hta tsun da ai lam hpe anhte chye na ra ai. Ndai sumhpa hta, ahkyak ai ga san masum a mahtai hpe anhte chye  lu na re. (1) Wenyi myit rawng ai wa ngu ai gaw hpa lachyum kun? (2) Wenyi lam hta rawt jat wa na matu gara kasi ni gaw anhte hpe karum ya lu ai kun? (3) Wenyi myit rawng ai wa byin na matu karum ya ai “Hkristu a myit” nga hkra anhte gara hku shakut ra ai kun?

3. Chyum Laika hta wenyi myit rawng ai wa hte n rawng ai wa a shai ai lam hpe gara hku tsun da ai kun?

³ Pawlu gaw “Wenyi rawng ai wa” hte “myi na ta naw re ai shinggyim masha [wenyi myit n rawng ai wa]” a lapran shai ai lam hpe anhte chye hkra tsun dan da ai. (1 Korinhtu 2:14-16 hpe hti u.) Wenyi myit n rawng ai wa gaw, “Karai kasang a Wenyi hte seng ai lam hte hpe hkam la lu ai n rai, dai hte gaw shi a matu angawk angak rai nga ai rai nna, . . . shi gaw dai hte hpe chye na lu ai n rai.” Wenyi myit rawng ai wa gaw, “yawng mayawng hte hpe jeyang lu” nna shi hta “Hkristu a amyit rawng nga” ai. Lachyum gaw Hkristu myit ai zawn myit na matu shakut ai. Wenyi myit rawng ai wa byin na matu anhte hpe Pawlu n-gun jaw ai. Wenyi myit n rawng ai wa hte wenyi myit rawng ai wa gaw gara hku shai ai kun?

4, 5. Wenyi myit n rawng ai wa hpe gara hku chye ginhka lu ai kun?

⁴ Wenyi myit n rawng ai wa gaw gara hku myit ai kun? Shi gaw mungkan a myit jasat hku hkan galaw nna, tinang a ra marin ai lam hta sha myit maju jung ai. Dai zawn myit jasat ni gaw “n madat mara ai kasha ni hta” chyam bra nga ai ngu Pawlu tsun ai. (Ehpesu 2:2) Ndai myit jasat gaw, masha law malawng galaw ai hku hkan galaw na matu, shing kang ka-up nga ai. Shanhte gaw Karai a tsang madang ni hpe n myit ai sha, shanhte jaw ai ngu mu mada ai lam yawng hpe galaw ai. Wenyi myit n rawng ai wa gaw hkum shan hte seng ai lam hpe sha myit maju jung ai. Shi a ahkang aya, gumhpraw, shi a ahkaw ahkang gaw kaga lam ni hta grau ahkyak ai ngu myit ai.

⁵ Wenyi myit n rawng ai wa gaw Chyum Laika hta “hkum shan a bungli” ngu tsun da ai lam ni hpe galaw ma ai. (Galati 5:19-21) Korinhtu kaw nga ai Hkristan ni hpe, Pawlu shawng nnan ka ai laika hta, wenyi myit n rawng ai wa galaw ai kaga lam ni hpe mung madun da ai. Shanhte gaw myit n hkrum ai maga hta sha nga ai, masha ni hpe hka bra hkra galaw ai, gumlau na matu kaga ni hpe n-gun jaw ai, tara shawk hkat ai, woi awn ai ni hpe n hkungga ai, lu na sha na hpe sha ahkyak shatai ai. Wenyi myit n rawng ai wa gaw, shut ai lam lama ma galaw na matu gunglau hkrum wa yang mung, ninghkap ai lam n galaw ai. (Ga Shagawp 7:22-23) Yehowa a wenyi lu la ai lam pyi sum mat chye ai nga nna Yuda tsun wa ai.​—⁠Yuda 18, 19.

6. Wenyi myit rawng ai wa hpe gara hku chye ginhka lu na kun?

⁶ Wenyi myit n rawng ai wa hte n bung ai sha, wenyi myit rawng ai wa gaw Karai Kasang hte hku hkau ai lam hpe grai ahkyak shatai ai. Karai Kasang a chyoi pra ai wenyi a lam matsun ya ai hku hkan sa nna, Yehowa hpe kasi la na matu shakut ai. (Ehpesu 5:1) Shi gaw Yehowa myit mang ai lam hte galaw ai lam ni hpe chye na hkra shakut ai. Karai Kasang gaw shi a matu teng sha nga ai Karai re. Wenyi myit n rawng ai wa hte n bung ai sha, wenyi myit rawng ai wa gaw shi a aprat hta Yehowa a tsang madang ni hpe hkan sa ai. (Shakawn 119:33; 143:10) Shi gaw “hkum shan a bungli” hpe galaw na matu n shakut ai sha, “wenyi a asi” grau si hkra shakut ai. (Galati 5:22, 23) Marai langai gaw wenyi lam hpe manu shadan ai (sh) nawku daw jau ai  lam hpe myit lawm ai nga yang, wenyi myit rawng ai wa ngu anhte mai tsun ai.

7. Wenyi myit rawng ai wa hte seng nna Chyum Laika hpa tsun da ai kun?

⁷ Wenyi myit hte seng nna Chyum Laika hta tsun da ai lam ni nga ai. Mahte 5:3 hta, “Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga ma lu ai” nga nna tsun da ai. Roma 8:6 hta mung anhte a aprat gaw Yehowa myit ai hku myit ai hta madung ai nga nna ndai hku tsun da ai: “Hkum shan myit gaw si mat ai lam rai nga ai; Wenyi a myit chyawm gaw, hkrung ai lam hte ngwi pyaw ai lam rai nga ai.” Anhte hta wenyi myit rawng yang, ya aten hta Karai Kasang hte hku hkau ai lam nga nna, myit simsa lam hte htani htana asak myit mada lam mung nga wa ai.

8. Wenyi myit rawng ai wa matut byin na matu hpa majaw yak ai kun?

⁸ Shoihpa nga ai mungkan hta anhte asak hkrung nga ai. Makau grup yin na masha ni gaw Karai Kasang myit ai hku n myit ai ni re ai majaw, anhte a myit hpe makawp maga na matu shakut ra ai. Lama na, anhte a myit hpe Yehowa a myit mang ai lam ni hte n jahpring da ai nga yang, mungkan gaw hkum shan a myit jasat ni hte sa jahpring ya na re. Dai hpe koi na matu hpa galaw ra ai kun? Wenyi lam hta kung hpan na matu gara hku galaw lu ai kun?

9. (a) Wenyi myit rawng ai wa byin wa na matu hpa gaw anhte hpe sharin ya lu ai kun? (b) Kadai ni a kaja ai kasi ningli ni hpe anhte bawng ban na kun?

⁹ Ma langai gaw shi a kanu kawa kaw nna sharin la na matu hte shanhte a kaja ai kasi ni hpe hkan sa ra ai zawn, anhte mung Karai Kasang hte hku hkau lam kaja ai ni a kasi ningli hpe sharin la nna, hkan sa ra ai. Dai hku galaw yang, wenyi myit rawng ai wa gara hku byin wa lu na lam hpe chye wa na re. Dai sha n-ga, wenyi myit n rawng ai ni a galaw ai lam hpe anhte chye da ra ai. Rai  yang she, dai ni hpe anhte koi lu na re. (1 Korinhtu 3:1-4) Chyum Laika hta kaja ai hte n kaja ai kasi ningli ni lawm ai. Ya, kaja ai kasi ningli madun wa ai Yaku, Mari hte Yesu kaw nna sharin la ga.

10. Yaku gaw wenyi myit rawng ai wa re ai lam gara hku madun wa ai kun?

¹⁰ Anhte ni zawn, Yaku mung yakhkak jamjau hkrum wa ai. Shi a kahpu majing Esaw gaw shi hpe sat mayu ai. Shi a katsa mung shi hpe maw sha wa ai. Raitim, Yaku a makam masham gaw, Abraham hpe Yehowa jaw da ai ga sadi hta sha manoi nga ai. Shi a dinghku gaw, hpring tsup wa na ga sadi hta lawm ai hpe chye ai majaw, shanhte hpe atsawm yu lanu lahku ai. (Ningpawt 28:10-15) Yaku gaw shi a makau hta nga ai masha ni a n kaja ai myit jasat ni a majaw, Yehowa a ga sadi ni hpe n malap kau ai. Ga shadawn, shi hpe kahpu shoihpa jaw na ngu hkam sha ai shaloi, hkye la na matu, Yehowa hpang ndai hku akyu hpyi ai: “Gaja wa nang hpe ngamai shangun na de ai; na a amyu matu ni hpe nammukdara hka kau na n dang hti ai zaibru zawn ngai shalaw na we ai, nga nna nang tsun nit dai.” (Ningpawt 32:7-13) Yaku gaw, Yehowa a ga sadi ni hpe grai kam sham wa ai lam, shi a asak hkrung hkawm sa ai lam hta madun wa ai.

11. Mari gaw wenyi myit rawng ai wa re ai hpe gara hku chye lu ai kun?

¹¹ Ya, Mari a lam hpe myit yu ga. Mari gaw wenyi myit rawng ai wa re ai majaw, Yesu a kanu byin na matu shi hpe Yehowa lata wa ai. Shi a jinghku Zakari hte Elisabet kaw sa chyai ai shaloi shi tsun ai ga hpe hti yu u. (Luka 1:46-55 hpe hti u.) Mari gaw Karai a Mungga hpe ra sharawng nna, Ga Shaka Dingsa hpe atsawm chye ai lam anhte mu lu ai. (Ningpawt 30:13; 1 Samuela 2:1-10; Malahki 3:12) Mari yan Yosep hkungran ngut ai hpang pyi, Yesu shangai wa ai du hkra, shanhte hkum shan n kanawn ai sha la nga ai. Karai Kasang kaw nna lu da ai lit gaw, shanhte a ra marin ai myit hta grau nna ahkyak ai ngu myit la ai. (Mahte 1:25) Mari  mung Yesu kaba wa ai lam yawng mayawng hpe atsawm yu nna Yesu sharin ya ai lam yawng hpe mung madat wa ai. Shi gaw, “dai ga mahkra hpe shi kraw hta matsing da” ai. (Luka 2:51) Shi gaw Meshia hte seng ai Karai a ga sadi ni hpe, grai myit lawm ai gaw danleng nga ai. Mari hpe kasi la nna Karai Kasang anhte hpe galaw shangun mayu ai hpe galoi mung hkan galaw na matu shakut mai na kun?

12. (a) Yesu gaw shi a Kawa hpe gara hku nna kasi la ai kun? (b) Yesu hpe anhte gara hku kasi la mai ai kun? (Ndai sumhpa shawng na sumla hpe yu u.)

¹² Asak hkrung wa ai masha yawng hta, Yesu gaw wenyi myit rawng ai hta kasi kaja htum re. Shi mungkan ga hta asak hkrung nna magam gun ai shaloi, shi a Kawa hpe kasi la mayu ai lam hpe sakse madun wa ai. Yesu gaw Yehowa myit ai, hkamsha ai hte galaw ai hku sha hkan galaw ai. Shi gaw Karai Kasang myit ra ai hpe sha galaw nna, Karai a tsang madang hpe hkungga ai. (Yawhan 8:29; 14:9; 15:10) Ga shadawn, Yehowa a matsan dum myit hte seng nna Esaia Laika hta madun da ai lam hte Marku Laika hta Yesu a hkamsha ai lam hpe shing daw yu u. (Esaia 63:9; Marku 6:34 hpe hti u.) Karum shingtau ai lam ra nga ai ni hpe karum na matu, galoi mung jin jin rai nga ai hku nna Yesu hpe anhte kasi la nga ai kun? Yesu zawn, kabu gara shiga hpe hkaw tsun ai hte sharin ya ai lam hpe anhte madung da ai kun? (Luka 4:43) Wenyi myit rawng ai wa gaw matsan dum chye nna kaga ni hpe shakut nna karum ya ai.

13, 14. (a) Dai ni aten na wenyi myit rawng ai ni kaw nna anhte hpa sharin la lu ai kun? (b) Ga shadawn jaw u.

¹³ Dai ni na aten hta, wenyi myit rawng ai hpunau nauna law law gaw Hkristu hpe kasi la na matu shakut nga ai. Shanhte gaw hkaw tsun bungli, manam daw ai hte matsan dum ai lam ni hta myit rawt ai hpe nang sadi hkrup na re. Shanhte ni gaw n hkum tsup ai ni raitim, kaja ai atsam ningja ni rawt jat wa hkra shakut nna, Yehowa shanhte hpe galaw shangun mayu ai hpe hkan galaw ai. Brazil hta nga ai nauna Rahkela ndai hku tsun ai: “Mungkan a prat dep ai bu hpun palawng ni hpe ngai bu hpun mayu ai. Dai majaw, ngai bu hpun ai ni gaw sari n rawng ai. Raitim, teng man ai lam hpe chye wa ai shaloi, wenyi myit rawng ai wa byin hkra shakut mayu wa ai. Galai shai na matu yak tim, ngai grau ngwi pyaw wa nna teng man ai myit mada lam nga wa ai.”

¹⁴ Hpilipai kaw nna nauna Ralen hta gaw, kaga manghkang amyu mi nga ai. Shi gaw teng man ai lam hta nga taw tim, madang tsaw ai hpaji hte kaja ai bungli hpe sha myit maju jung ai. Aten na wa ai hte maren, shi a wenyi bandung ni gaw, shi a matu nau n ahkyak mat sai. Shi ndai hku tsun ai: “Nye a prat hta lama ma ra nga ai ngu ngai hkamsha wa ai. Dai gaw nye a bungli hta na grau ahkyak ai lam re.” Ralen gaw shi a myit mang ai lam hpe galai shai nna, shi a prat hta ahkyak htum re ai Yehowa a magam gun na matu dawdan wa ai. Ya gaw Mahte 6:33, 34 hta Yehowa jaw da ai ga sadi hpe shi kam nna ndai hku tsun ai: “Yehowa ngai hpe yu lanu lahku na hpe ya ngai kam sai.” Na a nawku hpung hta dai zawn myit jasat nga ai hpunau nauna ni hpe nang chye na re. Shanhte gaw Hkristu hpe gara hku kasi la nga ai hpe anhte mu nna, shanhte a sadi dung ai kasi hpe anhte hkan sa mayu wa na re.​—⁠1 Korinhtu 11:1; 2 Htesaloni 3:7.

15, 16. (a) Yesu hte bung hkra anhte hpa galaw ra ai kun? (b) “Hkristu a amyit” anhte hta nga wa na matu gara hku galaw ra ai kun?

¹⁵ Hkristu hpe anhte gara hku kasi la mai  na kun? Anhte hta “Hkristu a amyit rawng” ra ai lam hpe Langai Korinhtu 2:16 hta tsun da ai. Roma 15:5 (NW) hta mung “Yesu Hkristu hta nga ai myit jasat” anhte hta nga hkra galaw na matu tsun da ai. Hkristu hte bung na matu, shi gara hku myit ai, hkamsha ai hte galaw ai hpe chye hkra galaw ra ai. Yesu gaw Karai Kasang hte hku hkau ai lam hpe kaga yawng mayawng hta grau nna ahkyak shatai ai. Yesu hte bung hkra galaw yang, Yehowa hte mung anhte bung wa na re. Dai majaw Yesu myit ai, galaw ai hpe anhte chye na matu grai ahkyak ai.

¹⁶ Yesu zawn myit na matu anhte gara hku sharin la na kun? Shi a sape ni gaw shi galaw ai mauhpa amu ni hpe yu ai, masha wunawng kaba hpe sharin ya ai hpe na ai, masha amyu myu hpe gara hku kanawn mazum ai hpe mu nna, Yehowa myit mang ai hku lam matsun nga ai hpe sadi hkrup ai. Shanhte ndai hku tsun ai: “Shi galaw hkawm wa ai amu yawng mayawng a sakse ni, anhte rai nga ga ai.” (Kasa 10:39) Dai ni na aten hta gaw anhte Yesu hpe n mu lu ai. Raitim, anhte hta shi hpe grai chye hkra karum ya lu ai Kabu Gara Shiga Laika ni nga ai. Mahte, Marku, Luka hte Yawhan laika ni hpe hti nna myit sawm sumru na nga yang, Yesu gara hku myit ai hpe anhte chye wa na re. Dai lam gaw anhte hpe “shi a hkang hta hkan nang” lu hkra karum ya nna “Hkristu zawn myit jasat” nga wa shangun ai.​—⁠1 Petru 2:21; 4:1, NW.

17. Hkristu zawn myit ai gaw anhte hpe gara hku akyu jaw ai kun?

¹⁷ Hkristu myit ai hku anhte myit yang gara akyu ni lu la na kun? Kaja ai shahpa sha yang, hkum hkrang hta n-gun nga wa ai zawn, Hkristu myit ai hku myit yang wenyi n-gun nga wa na re. Gara masa hta raitim, shi galaw ai hku angwi ngwi chye galaw wa na re. Bai nna, Karai Kasang ra sharawng ai hku dawdan chye wa nna san seng ai myit nsam mung nga wa na re. Dai majaw “Madu Yesu Hkristu hpe bu hpun dagraw” ging ai n re i?​—⁠Roma 13:14.

18. Wenyi myit rawng ai wa hte seng nna hpa ni hkaja lu wa sai kun?

¹⁸ Ndai sumhpa hta wenyi myit rawng ai wa ngu ai gaw hpa lachyum re ai hpe anhte chye na wa sai. Chyoi pra ai wenyi lam matsun ya ai hku hkan ai kasi kaja madun wa ai ni a lam hpe anhte chye wa sai. “Hkristu a amyit” nga ai gaw, Yehowa myit ai hku myit lu hkra karum ya nna, Yehowa hte hku hkau ai lam kaja wa shangun ai lam hpe mung hkaja wa sai. Dai hta n-ga, anhte hkaja lu ai lam ni naw nga ai. Ga shadawn: Anhte hta wenyi n-gun nga ai hpe gara hku chye lu ai kun? Wenyi n-gun rawng wa hkra gara hku galaw lu na kun? Anhte a prat hta wenyi lam gaw gara hku akyu jaw ai kun? Hpang na sumhpa hta hkaja lu na re.