ပှၤလၢအဘၣ်ဃးဒီးသးန့ၣ် မ့ၢ်ပှၤဒ်လဲၣ်တဂၤလဲၣ်
“တၢ်မၤမုာ်အကစၢ်မ်အဟ့ၣ်သု သးဆိကမိၣ်တၢ်တမံၤဃီသကိးသကိး, ဒ်ယ့ၣ်ၡူးခရံာ်အသိး” တက့ၢ်.—ရိမ့ၤ ၁၅:၅.
၁, ၂. (က) ဒီပုၢ်ဝဲၢ်မုၣ်ခွါတဖၣ် ပျဲဝဲယွၤအသးစီဆှံ ဟံးစုနဲၣ်ကျဲအီၤအဃိ ကဲဘျုးလၢအဝဲသ့ၣ်အဂီၢ်ဒ်လဲၣ်. (ခ) လၢတၢ်မၤလိအံၤအပူၤ ပကမၤလိဘၣ် တၢ်သံကွၢ်အရ့ဒိၣ် မနုၤတဖၣ်လဲၣ်.
ဒီပုၢ်ဝဲၢ်မုၣ်တဂၤလၢ အအိၣ်လၢ ကီၢ်ခဲနဒၣ်န့ၣ် တဲဝဲလၢ အဝဲကဲထီၣ်ပှၤလၢအဘၣ်ဃးဒီးသး မ့တမ့ၢ် အမၤထွဲယွၤအသးစီဆှံ အတၢ်ဟံးစုနဲၣ်ကျဲအဃိ အတၢ်အိၣ်မူပှဲၤဒီးတၢ်သးခု ဒီးမၤစၢၤအီၤဒ်သိးအလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ်လီၤ. ဒီပုၢ်ဝဲၢ်တဂၤလၢအအိၣ်လၢ ဘြၣ်စ့(လ်)န့ၣ် အဝဲဆီဟံၣ်ဆီဃီန့ၢ် ၂၃ နံၣ် ဒီးတဲဝဲလၢ အဝဲပျဲယွၤသးစီဆှံဟံးစုနဲၣ်ကျဲအီၤလၢ အတၢ်အိၣ်မူပူၤအဃိ မၤစၢၤအီၤဒီးအမါ ဒ်သိးအဝဲသ့ၣ်အဟံၣ်ဖိဃီဖိ ကပှဲၤဒီးတၢ်သးခုအဂီၢ်လီၤ. ဒီပုၢ်ဝဲၢ်တဂၤလၢ အအိၣ်လၢကီၢ်ဖံးလံးဖံ(စ်)န့ၣ် တဲဝဲလၢ အဝဲမၤထွဲ ယွၤအသးစီဆှံအတၢ်ဟံးစုနဲၣ်ကျဲအဃိ ဒိးန့ၢ်ဘၣ်တၢ်သူၣ်မံသးမုာ် ဒီးမၤစၢၤအီၤဒ်သိး အကအိၣ်ဃူအိၣ်ဖိးဒီး ဒီပုၢ်ဝဲၢ်မုၣ်ခွါလၢ ကလုာ်ဒူၣ် ဒီးတၢ်ဆဲးတၢ်လၤ တဒ်သိးလိာ်အသးတဖၣ်န့ၣ်လီၤ.
၂ ပသ့ၣ်ညါဘၣ်လၢ ပမ့ၢ်ကဲထီၣ်ပှၤလၢအဘၣ်ဃးဒီးသးန့ၣ် ကကဲဘျုးလၢပဂီၢ်လၢကျဲအါဘိလီၤ. ဒ်သိးပကကဲထီၣ်ပှၤလၢ အဘၣ်ဃးဒီးသးအဂီၢ် ပကဘၣ်မၤဒ်လဲၣ်. ဒီးပမ့ၢ်ကဲထီၣ်ပှၤလၢ အဘၣ်ဃးဒီးသးန့ၣ် ကကဲဘျုးလၢပဂီၢ်ဒ်လဲၣ်. အဆိကတၢၢ်န့ၣ် ပကဘၣ်နၢ်ပၢၢ်တၢ်ဂ့ၢ်လၢအဘၣ်ဃးဒီး ပှၤလၢအမၤထွဲယွၤအသးစီဆှံ အတၢ်ဟံးစုနဲၣ်ကျဲလၢအမ့ၢ် ပှၤလၢအဘၣ်ဃးဒီးသး ဒီးအဆိကမိၣ်တၢ်ဒ် ယဟိဝၤယွၤအသိးန့ၣ် လံာ်စီဆှံပာ်ဖျါထီၣ်ဝဲဒ်လဲၣ်န့ၣ်လီၤ. လၢတၢ်မၤလိအံၤအပူၤ ပကသ့ၣ်ညါဘၣ် တၢ်သံကွၢ်လၢအရ့ဒိၣ်သၢဖျၢၣ်အံၤ အတၢ်စံးဆၢလီၤ. (၁) ပှၤလၢအဘၣ်ဃးဒီးသး မ့တမ့ၢ် ပှၤလၢသးစီဆှံဟံးစုနဲၣ်ကျဲအီၤန့ၣ် အခီပညီဒ်လဲၣ်. (၂) ဒ်သိးပကဒိၣ်ထီၣ်ထီထီၣ်လၢ နီၢ်သးတကပၤအဂီၢ် တၢ်အဒိအတဲာ်မနုၤတဖၣ် ကမၤစၢၤပှၤလဲၣ်. (၃) ပမ့ၢ်ဂုာ်ကျဲးစၢး “အိၣ်ဒီးခရံာ်အသး” န့ၣ်ကမၤစၢၤပှၤလၢ ပကဲထီၣ်ပှၤလၢအဘၣ်ဃးဒီးသးကသ့ဒ်လဲၣ်.
ပှၤလၢအဘၣ်ဃးဒီးသးန့ၣ် အခီပညီဒ်လဲၣ်
၃. လံာ်စီဆှံပာ်ဖျါထီၣ်ဝဲ ပှၤနီၢ်ခိဖိဒီး ပှၤလၢအဘၣ်ဃးဒီးသးန့ၣ် လီၤဆီလိာ်အသးဒ်လဲၣ်.
၃ တၢ်မၢဖိပီလူး မၤစၢၤပှၤဒ်သိး ပကနၢ်ပၢၢ်ထီၣ် “ပှၤဘၣ်ဃးဒီးသး” ဒီး “ပှၤနီၢ်ခိဖိ” န့ၣ်လီၤဆီလိာ်အသးဒ်လဲၣ်န့ၣ်လီၤ. (ဖး ၁ ကရံၣ်သူး ၂:၁၄-၁၆ တက့ၢ်.) ပှၤနီၢ်ခိဖိန့ၣ် “တတူၢ်လိာ်ဘၣ် တၢ်ဘၣ်ဃးဒီးယွၤအသးဘၣ်. အဂ့ၢ်ဒ်အံၤ, မ့ၢ်တၢ်ကလီကလီလၢအမဲာ်ညါ, ဒီးသ့ၣ်ညါဝဲတသ့ဘၣ်.” မ့မ့ၢ် ပှၤလၢဘၣ်ဃးဒီးသးန့ၣ် “သ့ၣ်ညါထံတၢ်ခဲလၢာ်” ဒီး “အိၣ်ဒီးခရံာ်အသး” လီၤ. အခီပညီမ့ၢ်ဝဲ အဝဲသ့ၣ်ဂုာ်ကျဲးစၢး ဆိကမိၣ်တၢ်ဒ် ခရံာ်အသိးန့ၣ်လီၤ. စီၤပီလူး ဟ့ၣ်သဆၣ်ထီၣ်ပှၤလၢ ပကဘၣ်ကဲထီၣ်ပှၤလၢ အဘၣ်ဃးဒီးသးန့ၣ်လီၤ. ပှၤနီၢ်ခိဖိန့ၣ် လီၤဆီလိာ်အသးဒီး ပှၤလၢအဘၣ်ဃးဒီးသးလၢ ကျဲဒ်လဲၣ်.
၄, ၅. ပှၤနီၢ်ခိဖိန့ၣ် ပသ့ၣ်ညါအီၤကသ့ဒ်လဲၣ်.
၄ ပှၤနီၢ်ခိဖိန့ၣ် ဆိကမိၣ်တၢ်ဒ်လဲၣ်. ပှၤနီၢ်ခိဖိန့ၣ် အတၢ်ပာ်သူၣ်ပာ်သး လီၤဂာ်ဒီးပှၤတၢ်ချၢတဖၣ် ဒီးသးစၢၢ်ဆၢဝဲထဲ အနီၢ်ကစၢ်အတၢ်လိၣ်ဘၣ်လီၤ. စီၤပီလူးတဲနၢ်ပၢၢ်ဝဲလၢ တၢ်ပာ်သူၣ်ပာ်သးဒ်အံၤန့ၣ် လီၤဂာ်ဒီး “သးလၢအမၤတၢ်ခဲကနံၣ်အံၤလၢ ပှၤတစူၢ်ဘၣ်တၢ်အပူၤအသိးန့ၣ်လီၤ.” (အ့းဖ့းစူး ၂:၂) ပှၤလၢအိၣ်ဒီးတၢ်ပာ်သူၣ်ပာ်သးဒ်အံၤန့ၣ် အဝဲသ့ၣ်မၤဝဲဒ်ပှၤလၢ အခိၣ်အဃၢၤတဖၣ်မၤဝဲအသိးလီၤ. အဝဲသ့ၣ်မၤဝဲဒ် တၢ်လၢအဆိကမိၣ်ဝဲလၢအဂ့ၤ ဒီးတကနၣ်ဃုာ် ယွၤအတၢ်သိၣ်တၢ်သီဘၣ်. ပှၤနီၢ်ခိဖိ မ့တမ့ၢ် ပှၤလၢအဘၣ်ဃးဒီး တၢ်ဖံးတၢ်ညၣ်န့ၣ် အဲၣ်ဒိးတဲဝဲ ပှၤလၢအဆိကမိၣ်တၢ်အါတက့ၢ် လၢနီၢ်ခိတကပၤအဂီၢ် ဒီးအဝဲပာ်ဒိၣ်ဝဲအလီၢ်အလၤ, ကျိၣ်စ့ ဒီးပာ်ဒိၣ်အနီၢ်ကစၢ် အတၢ်ခွဲးတၢ်ယာ် ဒိၣ်န့ၢ်တၢ်အဂၤခဲလၢာ်လီၤ.
၅ ပှၤလၢအဘၣ်ဃးဒီးနီၢ်ခိန့ၣ် အါတက့ၢ်အဝဲသ့ၣ်မၤဝဲ တၢ်လၢလံာ်စီဆှံကိးဝဲလၢ “တၢ်မၤဘၣ်ဃးဒီးပဖံးပညၣ်” တဖၣ်န့ၣ်လီၤ. (ကလၤတံ ၅:၁၉-၂၁) ဖဲစီၤပီလူးကွဲးလံာ် အဆိကတၢၢ်တဘ့ၣ်လၢ ကရံၣ်သူးတၢ်အိၣ်ဖှိၣ်အအိၣ်အခါ အဝဲပာ်ဖျါထီၣ်ဝဲ တၢ်လၢပှၤလၢအဘၣ်ဃးဒီးနီၢ်ခိတဖၣ် မၤဝဲအဂ့ၢ်လီၤ. အဝဲသ့ၣ် အိၣ်ဃူတခီတၢၤတၢ်, ဒုးအိၣ်ထီၣ် တၢ်လီၤမုၢ်လီၤဖး, ဆီၣ်ထွဲပှၤဂၤလၢ ကထီဒါတၢ်, အဝဲသ့ၣ်ကဒဲးကဒဲး လဲၤကိးထီၣ်လိာ်အသးလၢရူ, တပာ်ကဲပှၤလၢ အတီခိၣ်ရိၤမဲတၢ်တဖၣ်ဘၣ် ဒီးပာ်ဒိၣ်ဝဲတၢ်အီၣ်တၢ်အီလၢ အတၢ်အိၣ်မူအပူၤအါတလၢန့ၣ်လီၤ. ပှၤလၢအဘၣ်ဃးဒီးနီၢ်ခိန့ၣ် ဖဲအဝဲသ့ၣ်ထံၣ်ဘၣ် တၢ်မၤကွၢ်လၢ ကမၤတၢ်ကမၣ်တမံၤမံၤအခါ တတြီဆၢက့ၤဝဲဘၣ်. (ကတိၤဒိ ၇:၂၁, ၂၂) စီၤယူဒၤတဲဝဲလၢ ပှၤလၢအဘၣ်ဃးဒီး တၢ်ဖံးတၢ်ညၣ်န့ၣ် ယဟိဝၤယွၤအသးစီဆှံ တအိၣ်ဒီးအီၤလၢၤဘၣ်.—ယူဒၤ ၁၈, ၁၉.
၆. ပှၤလၢအဘၣ်ဃးဒီးသးန့ၣ် ပသ့ၣ်ညါအီၤကသ့ဒ်လဲၣ်.
၆ မ့မ့ၢ်ပှၤလၢအဘၣ်ဃးဒီးသးန့ၣ် လီၤဆီလိာ်အသးဒီး ပှၤနီၢ်ခိဖိန့ၣ်လီၤ. အဝဲပာ်ဒိၣ်ဝဲ အတၢ်ရ့လိာ်သးဒီးယဟိဝၤယွၤလီၤ. တကးဒံးဘၣ် အဝဲပျဲဝဲလၢ ယွၤအသးစီဆှံ ကဟံးစုနဲၣ်ကျဲအီၤ ဒီးဂုာ်ကျဲးစၢးကွၢ်လိမၤဒိးဝဲ ယဟိဝၤယွၤလီၤ. (အ့းဖ့းစူး ၅:၁) အဝဲဂုာ်ကျဲးစၢးဃုသ့ၣ်ညါဝဲ ယဟိဝၤယွၤအတၢ်ဆိကမိၣ် ဒီးဂုာ်ကျဲးစၢးအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ. လၢအဝဲအဂီၢ်န့ၣ် ယွၤမ့ၢ်ပှၤနီၢ်နီၢ်တဂၤလီၤ. ပှၤလၢယွၤအသးစီဆှံ ဟံးစုနဲၣ်ကျဲအီၤန့ၣ် လီၤဆီဒီးပှၤနီၢ်ခိဖိ ခီဖျိအဝဲသ့ၣ်ပာ်ကဲ ဒီးမၤပိာ်ထွဲဝဲယွၤအတၢ်သိၣ်တၢ်သီလၢ အတၢ်အိၣ်မူကိးသနၢၣ်ဒဲးအပူၤလီၤ. (စံးထီၣ်ပတြၢၤ ၁၁၉:၃၃; ၁၄၃:၁၀) အဝဲတမၤ “တၢ်မၤဘၣ်ဃးဒီးပဖံးပညၣ်” ဘၣ်. လၢတၢ်န့ၣ်အလီၢ် အဝဲဂုာ်ကျဲးစၢး မၤအါထီၣ် “သးအတၤသၣ်” လၢအတၢ်အိၣ်မူအပူၤလီၤ. (ကလၤတံ ၅:၂၂, ၂၃) ဒ်သိးပကနၢ်ပၢၢ် ပှၤလၢယွၤအသးစီဆှံ ဟံးစုနဲၣ်ကျဲအီၤ အခီပညီအဂီၢ် ဆိကမိၣ်ကွၢ်ဒ်အံၤတက့ၢ်. ပှၤတနီၤန့ၣ် အသးစၢၢ်ဆၢထဲ မုၢ်ကျိၤဝဲၤကွာ် (စံပွါယ့) အဃိ ဆိကမိၣ်ထဲ တၢ်ဖံးတၢ်မၤအဂ့ၢ်လီၤ. ဒ်န့ၣ်အသိး ပှၤလၢအသးစၢၢ်ဆၢထဲ တၢ်ဘူၣ်ထီၣ်ဘါထီၣ်ယွၤန့ၣ် ပကိးအီၤလၢ ပှၤလၢအဘၣ်ဃးဒီးသးလီၤ.
၇. လံာ်စီဆှံ ပာ်ဖျါထီၣ်ဝဲ ပှၤလၢသးစီဆှံဟံးစုနဲၣ်ကျဲအီၤတဖၣ် အဂ့ၢ်ဒ်လဲၣ်.
၇ ယ့ၣ်ၡူးတဲဝဲလၢ ပှၤလၢသးစီဆှံဟံးစုနဲၣ်ကျဲအီၤန့ၣ် ကအိၣ်ဒီးတၢ်သးခုလီၤ. မးသဲ ၅:၃ nwt “ပှၤလၢသ့ၣ်ညါလီၤအသးလၢ အလိၣ်ဘၣ်ကစၢ်ယွၤ အတၢ်ဟံးစုနဲၣ်ကျဲန့ၣ် သးခုဝဲလီၤ. မ့ၢ်လၢမူခိၣ်အဘီအမုၢ်န့ၣ် မ့ၢ်ပှၤတဖၣ်န့ၣ်အတၢ်လီၤ.” မ့မ့ၢ် ရိမ့ၤ ၈:၆ န့ၣ်တဲနၢ်ပၢၢ်ပှၤလၢ “တၢ်ဖံးတၢ်ညၣ်အသးအိၣ်တၢ်န့ၣ် မ့ၢ်တၢ်သံလီၤ. မ့မ့ၢ်သးအသးအိၣ်တၢ်န့ၣ်, မ့ၢ်တၢ်မူဒီးတၢ်ဃူတၢ်ဖိးလီၤ.” လၢတၢ်န့ၣ်အဃိ ဒ်သိးပကန့ၢ်ဘၣ်တၢ်မူအထူအယိာ်အဂီၢ် ပကဘၣ်ဆိကမိၣ်တၢ်ဒ် ယဟိဝၤယွၤအသိးလီၤ. ပမ့မ့ၢ်ပှၤလၢအဘၣ်ဃးဒီးသးန့ၣ် ပကအိၣ်ဃူအိၣ်ဖိးဒီးယွၤ, ပကအိၣ်ဒီးတၢ်သူၣ်မံသးမုာ် ဒီးပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လီၤထူလီၤယိာ်လီၤ.
၈. ပကကဲထီၣ်ပှၤလၢအဘၣ်ဃးဒီးသး ဒီးပကဆဲးဒိၣ်ထီၣ်ထီထီၣ်အဂီၢ် ဘၣ်မနုၤအဃိ ကီဝဲလဲၣ်.
၈ ပအိၣ်မူဘၣ်လၢ ဟီၣ်ခိၣ်လၢအပှဲၤဒီး တၢ်ဘၣ်ယိၣ်ဘၣ်ဘှီအံၤအပူၤလီၤ. တကးဒံးဘၣ် ပှၤလၢပခိၣ်ပဃၢၤတဖၣ် အိၣ်ထဲပှၤလၢ တဆိကမိၣ်တၢ်ဒ်ကစၢ်ယွၤအသိးဘၣ် အဃိပကဘၣ်ထဲးဂံၢ်ထဲးဘါဒီး ပလီၢ်ပသးဒ်သိး ပသုတအိၣ်ဒီး တၢ်ဆိကမိၣ်ဒ်အဝဲသ့ၣ်အသိး တဂ့ၤအဂီၢ်လီၤ. ပမ့ၢ်တဆိကမိၣ်တၢ်ဒ် ယဟိဝၤယွၤအသိးဘၣ်န့ၣ် ပတၢ်ဆိကမိၣ် ဒီးပတၢ်ပာ်သူၣ်ပာ်သးန့ၣ် ကလီၤဂာ်ဒီး ပှၤတၢ်ချၢတဖၣ်လီၤ. ဒ်သိးတၢ်သုတကဲထီၣ်အသးဒီးပှၤ ဒ်န့ၣ်တဂ့ၤအဂီၢ် ပကဘၣ်ဟးဆှဲးတၢ်မနုၤလဲၣ်. ပဒိၣ်ထီၣ်လၢ နီၢ်သးတကပၤကသ့ဒ်လဲၣ်.
မၤလိန့ၢ်တၢ်လၢ ပှၤလၢအဒိဂ့ၤတဲာ်ဘၣ်တဖၣ် အအိၣ်တက့ၢ်
၉. (က) ဒ်သိးပကကဲထီၣ်ပှၤတဂၤလၢ သးစီဆှံဟံးစုနဲၣ်ကျဲအီၤအဂီၢ် ပကဘၣ်မၤတၢ်မနုၤလဲၣ်. (ခ) ပကမၤလိသကိး မတၤတဖၣ်အဒိအတဲာ်လဲၣ်.
၉ ဖိသ့ၣ်တဖၣ် ကဘၣ်မၤလိန့ၢ်တၢ်လၢ အမိၢ်အပၢ်အအိၣ် ဒီးကဘၣ်ကွၢ်လိမၤဒိးအဝဲသ့ၣ် အဒိအတဲာ်လၢအဂ့ၤန့ၣ်လီၤ. ဒ်န့ၣ်အသိး ပဝဲသ့ၣ်တဖၣ် ပကဘၣ်မၤလိန့ၢ်တၢ်လၢ ပှၤလၢအရ့လိာ်သးဒီး ယဟိဝၤယွၤဘူးဘူးတံၢ်တံၢ် တဖၣ်အအိၣ် ဒီးကွၢ်လိမၤဒိးအဝဲသ့ၣ် အဒိအတဲာ်လၢအဂ့ၤန့ၣ်လီၤ. ပမ့ၢ်မၤဒ်န့ၣ်န့ၣ် ပကသ့ၣ်ညါထီၣ်လၢ ဒ်သိးပကကဲထီၣ်ပှၤတဂၤလၢ ယွၤအသးစီဆှံဟံးစုနဲၣ်ကျဲအီၤအဂီၢ် ပကဘၣ်မၤဒ်လဲၣ်. တကးဒံးဘၣ် ပမ့ၢ်မၤလိပှၤလၢအဘၣ်ဃးဒီး တၢ်ဖံးတၢ်ညၣ်တဖၣ်အဂ့ၢ်န့ၣ် ပကသ့ၣ်ညါထီၣ်လၢ ပကဘၣ်ဟးဆှဲး တၢ်မနုၤတဖၣ်လဲၣ်န့ၣ်လီၤ. (၁ ကရံၣ်သူး ၃:၁-၄) လံာ်စီဆှံပာ်ဖျါထီၣ်ဝဲ တၢ်အဒိအတဲာ်လၢအဂ့ၤဒီး တၢ်အဒိအတဲာ်လၢ အတဂ့ၤစ့ၢ်ကီးလီၤ. ခဲအံၤပကမၤလိသကိး ပှၤလၢအဒိဂ့ၤတဲာ်ဘၣ် တဖၣ်လၢအမ့ၢ် စီၤယၤကိာ်, နီၢ်မၤရံ ဒီးယ့ၣ်ၡူးအဂ့ၢ်န့ၣ်လီၤ.
စီၤယၤကိာ် ဒီးနီၢ်မၤရံ အဒိအတဲာ်န့ၣ် ပမၤလိန့ၢ်ဘၣ် တၢ်မနုၤလဲၣ် (ကွၢ်လံာ်အဆၢ ၁၀)
၁၀. စီၤယၤကိာ် မ့ၢ်ပှၤလၢအဘၣ်ဃးဒီးသးန့ၣ် ပာ်ဖျါထီၣ်ဝဲလၢ ကျဲဒ်လဲၣ်.
၁၀ ဒ်ပဝဲအါဂၤအသိး စီၤယၤကိာ် အတၢ်အိၣ်မူစ့ၢ်ကီး တညီဝဲဘၣ်. အဒီပုၢ်ဝဲၢ် စီၤဧ့ၡီၤ အဲၣ်ဒိးမၤသံအီၤလီၤ. တကးဒံးဘၣ် အမံၤပှၢ်စ့ၢ်ကီး လံၣ်အီၣ်လီအီၣ်အီၤလီၤ. ဘၣ်ဆၣ် ယဟိဝၤယွၤအတၢ်အၢၣ်လီၤအီလီၤ ဒီးစီၤအၤဘြၤဟၣ်န့ၣ် အဝဲနာ်ဝဲသပှၢ်တၢၢ်လီၤ. စီၤယၤကိာ်သ့ၣ်ညါဝဲလၢ ဒ်သိးယွၤအတၢ်အၢၣ်လီၤအီလီၤ ကလၢထီၣ်ပှဲၤထီၣ်အဂီၢ် အဟံၣ်ဖိဃီဖိ ကပၣ်ဃုာ်ဝဲအဃိ အဝဲကွၢ်ထွဲဝဲ အဟံၣ်ဖိဃီဖိဂ့ၤဂ့ၤလီၤ. (၁ မိၤၡ့ ၂၈:၁၀-၁၅) စီၤယၤကိာ်တပျဲဝဲလၢ ပှၤလၢအဘၣ်ဃးဒီး တၢ်ဖံးတၢ်ညၣ်တဖၣ် အတၢ်ပာ်သူၣ်ပာ်သး ကဒိၣ်စိလၢအဖီခိၣ် ဒ်သိးအဝဲကသးပ့ၤနီၣ်ကွံာ် ယဟိဝၤယွၤ အတၢ်အၢၣ်လီၤအီလီၤဘၣ်. အဒိ, ဖဲအဝဲဘၣ်ယိၣ်ဝဲလၢ အဒီပုၢ်ဝဲၢ်ကမၤသံအီၤအခါ အဝဲဃ့ဝဲလၢ ယဟိဝၤယွၤကမၤပူၤဖျဲးအီၤ ဒီးဃ့ဘါထုကဖၣ်လၢ “နစံး, ယကမၤဂ့ၤနၤသပှၢ်တၢၢ်, ဒီးယကမၤနချံနသၣ် ဒ်မဲးလၢပီၣ်လဲၣ်နံၤအသိး, လၢပဂံၢ်တသ့ဘၣ်လၢအအါအဃိလီၤ.” (၁ မိၤၡ့ ၃၂:၆-၁၂) ဘၣ်ဃးဒီးယဟိဝၤယွၤ အတၢ်အၢၣ်လီၤအီလီၤတဖၣ်န့ၣ် စီၤယၤကိာ်နာ်ဝဲ ဂၢၢ်ဂၢၢ်ကျၢၤကျၢၤ ဒီးပာ်ဖျါထီၣ်ဝဲလၢ အတၢ်အိၣ်မူအပူၤလီၤ.
စီၤယၤကိာ် ဒီးနီၢ်မၤရံ အဒိအတဲာ်န့ၣ် ပမၤလိန့ၢ်ဘၣ် တၢ်မနုၤလဲၣ် (ကွၢ်လံာ်အဆၢ ၁၁)
၁၁. နီၢ်မၤရံ မ့ၢ်ဝဲပှၤတဂၤလၢသးစီဆှံ ဟံးစုနဲၣ်ကျဲအီၤန့ၣ် ပသ့ၣ်ညါဘၣ်ဒ်လဲၣ်.
၁၁ ဆိကမိၣ်ကွၢ် နီၢ်မၤရံအဂ့ၢ်တက့ၢ်. အဝဲမ့ၢ်ပှၤတဂၤလၢ ယွၤအသးစီဆှံဟံးစုနဲၣ်ကျဲအီၤအဃိ ယဟိဝၤယွၤ ဃုထၢအီၤလၢ ကကဲထီၣ်ယ့ၣ်ၡူးအမိၢ်လီၤ. ဖးတၢ်ဂ့ၢ်လၢအဘၣ်ဃးဒီး နီၢ်မၤရံလဲၤအိၣ်သကိးဝဲ အဘူးအတံၢ် စီၤစဃၤရံ ဒီးနီၢ်အ့းလံၤစါဘ့းတက့ၢ်. (ဖး လူၤကၣ် ၁:၄၆-၅၅ တက့ၢ်.) ပသ့ၣ်ညါဘၣ်လၢ နီၢ်မၤရံ အဲၣ်ယွၤအကလုၢ်ကထါ ဒီးသ့ၣ်ညါဝဲလံာ်စီဆှံလၢ ဧ့ၤဘြံၤကျိာ်တကတြူၢ် ဂ့ၤဂ့ၤလီၤ. (၁ မိၤၡ့ ၃၀:၁၃; ၁ ၡမူၤအ့လး ၂:၁-၁၀; မၤလကံ ၃:၁၂) နီၢ်မၤရံဒီးစီၤယိၤသးန့ၣ် အဝဲသ့ၣ်ဖျီအသးဝံၤဘၣ်ဆၣ် အဝဲသ့ၣ်အိၣ်ခိးဝဲတုၤလၢ ယ့ၣ်ၡူးအိၣ်ဖျဲၣ်ထီၣ်ဝံၤမး မံဃုာ်လိာ်အသးလီၤ. အဝဲသ့ၣ်ပာ်ဒိၣ်ဝဲ အမူဒါလၢ ယွၤဟ့ၣ်လီၤအီၤဒိၣ်န့ၢ်ဒံး အနီၢ်ကစၢ် တၢ်သူၣ်လီသးကွံလီၤ. (မးသဲ ၁:၂၅) တကးဒံးဘၣ် နီၢ်မၤရံ ကွၢ်ဝဲတၢ်ကဲထီၣ်အသးဒီး ယ့ၣ်ၡူးတခါဘၣ်တခါ တုၤလၢအနီၢ်ဒိၣ်ထီၣ် ဒီးဒိကနၣ်တၢ်လၢ ယ့ၣ်ၡူးသိၣ်လိဝဲတဖၣ်လီၤ. ဒီး “တၢ်တဖၣ်န့ၣ် . . . တိၢ်န့ၢ်လၢအသးခဲလၢာ်လီၤ.” (လူၤကၣ် ၂:၅၁) အဝဲသးစၢၢ်ဆၢဝဲ ကစၢ်ယွၤအတၢ်စံးပာ်လၢ ဘၣ်ဃးဒီးမ့းၡံအၤန့ၣ်လီၤ. ပကွၢ်လိမၤဒိ နီၢ်မၤရံ ဒီးမၤယွၤအတၢ်ဘၣ်သး ထီဘိကသ့ဒ်လဲၣ်.
၁၂. (က) ယ့ၣ်ၡူးကွၢ်လိမၤဒိး အပၢ်လၢကျဲဒ်လဲၣ်. (ခ) ပကွၢ်လိမၤဒိး ယ့ၣ်ၡူးကသ့လၢကျဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၂ ပှၤလၢအဘၣ်ဃးဒီးသးခဲလၢာ်အကျါ ပှၤလၢအဒိအတဲာ်ဂ့ၤကတၢၢ်န့ၣ်မ့ၢ်ဝဲ ယ့ၣ်ၡူးလီၤ. ဖဲအဝဲအိၣ်လၢဟီၣ်ခိၣ် ဒီးဟးစံၣ်တဲၤတဲလီၤတၢ်အဆၢကတီၢ် အဝဲပာ်ဖျါထီၣ်ဝဲလၢ အကွၢ်လိမၤဒိးအပၢ်လီၤ. ယ့ၣ်ၡူးအတၢ်ဆိကမိၣ်, အတၢ်ပာ်သူၣ်ပာ်သး ဒီးအတၢ်ဖံးတၢ်မၤန့ၣ် လီၤဂာ်ဒ်ယဟိဝၤယွၤအသိးလီၤ. အဝဲမၤယွၤအတၢ်ဘၣ်သး ဒီးပာ်လုၢ်ပာ်ပှ့ၤဝဲ ကစၢ်ယွၤအတၢ်သိၣ်တၢ်သီတဖၣ်လီၤ. (ယိၤဟၣ် ၈:၂၉; ၁၄:၉; ၁၅:၁၀) အဒိ, ထိၣ်သတြီၤကွၢ် ယၡါယၤ ပာ်ဖျါထီၣ်ဝဲ ယဟိဝၤယွၤအတၢ်သးကညီၤ ဒီးမၢ်ကူး ပာ်ဖျါထီၣ်ဝဲ ယ့ၣ်ၡူး အတၢ်တူၢ်ဘၣ်အဂ့ၢ်တက့ၢ်. (ဖး ယၡါယၤ ၆၃:၉; မၢ်ကူး ၆:၃၄ တက့ၢ်.) မ့ၢ်ပကွၢ်လိမၤဒိးယ့ၣ်ၡူး ခီဖျိပအိၣ်ကတဲာ်ကတီၤပသးလၢ ပကပာ်ဖျါထီၣ် တၢ်သးကညီၤလၢ ပှၤလၢအလိၣ်ဘၣ် တၢ်မၤစၢၤတဖၣ်အဂီၢ်ဧါ. ဒ်ယ့ၣ်ၡူးအသိး မ့ၢ်ပသးစၢၢ်ဆၢ တၢ်စံၣ်တဲၤတဲလီၤတၢ်မၤ ဒီးတၢ်သိၣ်လိပှၤဂၤလၢ တၢ်သးခုကစီၣ်န့ၣ်ဧါ. (လူၤကၣ် ၄:၄၃) ပှၤလၢသးစီဆှံ ဟံးစုနဲၣ်ကျဲအီၤတဖၣ်န့ၣ် အိၣ်ဒီးတၢ်သးကညီၤ ဒီးဂုာ်ကျဲးစၢးမၤစၢၤပှၤဂၤလီၤ.
၁၃, ၁၄. (က) မုၢ်မဆါတနံၤအံၤ ပမၤလိန့ၢ်တၢ်လၢ ပှၤလၢယွၤအသးစီဆှံ ဟံးစုနဲၣ်ကျဲအီၤတဖၣ်အအိၣ် ကသ့ဒ်လဲၣ်. (ခ) ဟ့ၣ်တၢ်အဒိတက့ၢ်.
၁၃ မုၢ်မဆါတနံၤအံၤ ပဒီပုၢ်ဝဲၢ်မုၣ်ခွါလၢ ယွၤသးစီဆှံဟံးစုနဲၣ်ကျဲအီၤ ဒီးလၢအကွၢ်လိမၤဒိးယ့ၣ်ၡူးန့ၣ် အိၣ်ဝဲအါမးလီၤ. ဘၣ်သ့ၣ်သ့ၣ် နကထံၣ်လၢအဝဲသ့ၣ် အိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤ, တၢ်တူၢ်လိာ်တမှံၤတပျီၤ ဒီးအိၣ်ဒီးတၢ်သးကညီၤလီၤ. အဝဲသ့ၣ်တမ့ၢ်ပှၤလၢပှၤပှဲၤဘၣ်ဆၣ် ဂုာ်ကျဲးစၢးမၤအါထီၣ် အတၢ်ဂ့ၤတၢ်ဝါတဖၣ် ဒီးမၤတၢ်လၢ ယဟိဝၤယွၤအဲၣ်ဒိးလၢ အမၤဝဲတဖၣ်န့ၣ်လီၤ. ဒီပုၢ်ဝဲၢ်မုၣ် ရ့ခၠိၤ လၢအအိၣ်လၢ ကီၢ်ဘြၣ်စ့(လ်) တဲဝဲလၢ “ယကၠဲးတၢ်ကူတၢ်ကၤလၢ အဟဲထီၣ်သီတဖၣ်ဒိၣ်မး. လၢတၢ်န့ၣ်အဃိ ယတၢ်ကူတၢ်ကၤတဖၣ် တသညူးသပှၢ်လၢၤဘၣ်. ဘၣ်ဆၣ် မ့ၢ်လၢယမၤလိဘၣ် တၢ်မ့ၢ်တၢ်တီအဃိ မၤစၢၤယၤလၢ ယကမၤတၢ်ဆီတလဲ ဒ်သိးယကကဲထီၣ် ပှၤလၢအဘၣ်ဃးဒီးသးအဂီၢ်လီၤ. ယကမၤတၢ်ဆီတလဲအဂီၢ် တမ့ၢ်တၢ်လၢအညီဘၣ်. ဘၣ်ဆၣ် ယဒိးန့ၢ်ဘၣ်တၢ်သးခုအါထီၣ် ဒီးယတၢ်အိၣ်မူပှဲၤဒီး တၢ်သူၣ်မံသးမုာ်လီၤ.”
၁၄ ဒီပုၢ်ဝဲၢ်မုၣ် ရဲလံၤ လၢအအိၣ်လၢ ကီၢ်ဖံးလံးဖံ(စ်) စ့ၢ်ကီးအိၣ်ဒီးတၢ်ကီတၢ်ခဲလၢ အဂၤတမံၤလီၤ. အဝဲအိၣ်လၢတၢ်မ့ၢ်တၢ်တီအပူၤသနာ်က့ အသးစၢၢ်ဆၢထဲ ကဃုတၢ်ကူၣ်ဘၣ်ကူၣ်သ့ လၢအပတီၢ်ထီ ဒီးကအိၣ်ဒီးတၢ်မၤလၢအဂ့ၤလီၤ. လၢတၢ်န့ၣ်အဃိ အဝဲအနီၢ်သးဖီတၢၣ်န့ၣ် တမ့ၢ်တၢ်အရ့ဒိၣ်လၢအဂီၢ်လၢၤဘၣ်. အဝဲတဲဝဲလၢ “ယသ့ၣ်ညါလၢယတသးခုအါအါလၢၤဘၣ် ဒီးလၢယတၢ်အိၣ်မူအပူၤ တၢ်လၢအရ့ဒိၣ်န့ၢ်ဒံး တၢ်မၤန့ၣ်အိၣ်ဝဲတမံၤလီၤ.” လၢတၢ်န့ၣ်အဃိ အဝဲဆီတလဲအတၢ်ဆိကမိၣ် ဒီးပာ်က့ၤဝဲ ယဟိဝၤယွၤအတၢ်မၤလၢ နီၣ်ဂံၢ်တၢလၢအတၢ်အိၣ်မူအပူၤန့ၣ်လီၤ. ခဲအံၤအဝဲနာ်ဝဲ ယဟိဝၤယွၤအတၢ်အၢၣ်လီၤလၢ မးသဲ ၆:၃၃, ၃၄ ဒီးအဝဲတဲဝဲလၢ “ယနာ်သပှၢ်ကတၢၢ်လၢ ယဟိဝၤယွၤ ကအံးထွဲကွၢ်ထွဲယၤလီၤ.” လၢနတၢ်အိၣ်ဖှိၣ်အပူၤန့ၣ် နကသ့ၣ်ညါဒီပုၢ်ဝဲၢ်မုၣ်ခွါလၢ အအိၣ်ဒီးတၢ်ထံၣ်ဒ်အံၤအိၣ်ဝဲလီၤ. ဖဲပထံၣ်ဘၣ်လၢ အဝဲသ့ၣ်ကွၢ်လိမၤဒိး ယ့ၣ်ၡူးခရံာ်အခါ ပအဲၣ်ဒိးကွၢ်လိမၤဒိး အဝဲသ့ၣ်လီၤ.—၁ ကရံၣ်သူး ၁၁:၁; ၂ သ့းစၤလနံ ၃:၇.
“အိၣ်ဒီးခရံာ်အသး” တက့ၢ်
၁၅, ၁၆. (က) ဒ်သိး ပကလီၤဂာ်ဒီး ယ့ၣ်ၡူးအဂီၢ် ပကဘၣ်မၤတၢ်မနုၤလဲၣ်. (ခ) ပ “အိၣ်ဒီးခရံာ်အသး” ကသ့ဒ်လဲၣ်.
၁၅ ပကွၢ်လိမၤဒိး ယ့ၣ်ၡူးကသ့ဒ်လဲၣ်. ၁ ကရံၣ်သူး ၂:၁၆ တဲနၢ်ပၢၢ်ပှၤလၢ ပကဘၣ် “အိၣ်ဒီးခရံာ်အသး” လီၤ. ရိမ့ၤ ၁၅:၅ ဒုးသ့ၣ်နီၣ်ထီၣ်ပှၤလၢ ပက “ဆိကမိၣ်တၢ် တမံၤဃီသကိးသကိး, ဒ်ယ့ၣ်ၡူးခရံာ်အသိး” လီၤ. ဒ်သိးပကလီၤဂာ် ယ့ၣ်ၡူးခရံာ်အဂီၢ် ပကဘၣ်သ့ၣ်ညါ အတၢ်ဆိကမိၣ်, အတၢ်ပာ်သူၣ်ပာ်သး ဒီးအတၢ်ဖံးတၢ်မၤအဂ့ၢ်န့ၣ်လီၤ. ယ့ၣ်ၡူးန့ၣ် ပာ်လုၢ်ပာ်ပှ့ၤဝဲ အတၢ်ရ့လိာ်သးဒီးယွၤအါန့ၢ် တၢ်အဂၤခဲလၢာ်လီၤ. ပမ့ၢ်လီၤဂာ်ဒီး ယ့ၣ်ၡူးန့ၣ် ပကလီၤဂာ်ဒီးယဟိဝၤယွၤလီၤ. လၢတၢ်န့ၣ်အဃိ ပကဘၣ်ဂုာ်ကျဲးစၢး ဆိကမိၣ်တၢ်ဒ် ယ့ၣ်ၡူးအသိးန့ၣ် မ့ၢ်တၢ်လၢအရ့ဒိၣ်လီၤ.
၁၆ ပအိၣ်ဒီးတၢ်ထံၣ်ဒ် ယ့ၣ်ၡူးအသိးကသ့ဒ်လဲၣ်. ယ့ၣ်ၡူးအပျဲၢ်အဘီၣ်တဖၣ်န့ၣ် ထံၣ်ဘၣ်ဝဲ ယ့ၣ်ၡူးမၤတၢ်လီၤလး, နၢ်ဟူဘၣ်ဝဲအတၢ်သိၣ်လိ ဒီးထံၣ်ဘၣ်ဝဲ အဝဲရ့ဒီးပှၤအဂၤတဖၣ်ဒ်လဲၣ်န့ၣ်လီၤ. တကးဒံးဘၣ် အဝဲသ့ၣ်ထံၣ်ဘၣ်ဝဲလၢ ယ့ၣ်ၡူးဆိကမိၣ်တၢ်ဒ် ယဟိဝၤယွၤအသိးလီၤ. လၢတၢ်န့ၣ်အဃိ အဝဲသ့ၣ်တဲဝဲလၢ ‘ကယဲၢ်တၢ်လၢ အမၤဝဲန့ၣ် . . . ပမ့ၢ်ပှၤအုၣ်အသး’ လီၤ. (မၤတၢ် ၁၀:၃၉) မုၢ်မဆါတနံၤအံၤ ပထံၣ်ဘၣ်ယ့ၣ်ၡူးတသ့ဘၣ်. ဘၣ်ဆၣ် လံာ်တၢ်သးခုကစီၣ်တဖၣ် ကမၤစၢၤပှၤဒ်သိး ပကသ့ၣ်ညါယ့ၣ်ၡူးအဂ့ၢ်ဂ့ၤဂ့ၤလီၤ. ပမ့ၢ်ဖးဒီး ဆိကမိၣ်ထံ လံာ်မးသဲ, မၢ်ကူး, လူၤကၣ် ဒီးယိၤဟၣ်န့ၣ် ပကသ့ၣ်ညါဘၣ် ယ့ၣ်ၡူးအတၢ်ဆိကမိၣ် အိၣ်ဒ်လဲၣ်န့ၣ်လီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤလၢပက “ယီၢ်အခီၣ်လီၢ်” ဒီး ပကအိၣ်ဒီး “သးတမံၤဃီ” ဒ်ယ့ၣ်ၡူးအသိးလီၤ.—၁ ပ့းတရူး ၂:၂၁; ၄:၁.
၁၇. ပမ့ၢ်ဆိကမိၣ်တၢ်ဒ် ယ့ၣ်ၡူးအသိးန့ၣ် ကမၤစၢၤပှၤဒ်လဲၣ်.
၁၇ ပမ့ၢ်ဆိကမိၣ်တၢ်ဒ် ယ့ၣ်ၡူးခရံာ်အသိးန့ၣ် ကကဲဘျုးလၢပဂီၢ်ဒ်လဲၣ်. အဒိ, ပမ့ၢ်အီၣ် တၢ်အီၣ်တၢ်အီလၢအန့ၢ်ဂံၢ်န့ၢ်ဘါန့ၣ် ပဂံၢ်ပဘါကအါထီၣ်လီၤ. ဒ်န့ၣ်အသိး ပမ့ၢ်ဆိကမိၣ်တၢ်ဒ် ယ့ၣ်ၡူးအသိးန့ၣ် ပနီၢ်သးအဂံၢ်ကဆူၣ်ထီၣ်လီၤ. လၢခံယံာ်ထီၣ်ယံာ်ထီၣ်န့ၣ် ဖဲပဘၣ်မၤတၢ်ဆၢတဲာ်အခါ ပကမၤတၢ်ဆၢတဲာ်ဒ်ယ့ၣ်ၡူးအသိးလီၤ. ဖဲန့ၣ်အခါ ပမၤတၢ်ဆၢတဲာ်လၢ အဘၣ်ကစၢ်ယွၤအသးကသ့ ဒီးပကအိၣ်ဒီးသးလၢ အသ့ၣ်ညါဒၣ်တၢ်လၢအဂ့ၤလီၤ. လၢတၢ်န့ၣ်အဃိ ပကဘၣ် “ကူထီၣ်သိးထီၣ်ကစၢ် ယ့ၣ်ၡူးခရံာ်န့ၣ်” မ့ၢ်တၢ်လၢအရ့ဒိၣ်လီၤ.—ရိမ့ၤ ၁၃:၁၄.
၁၈. ဘၣ်ဃးဒီးပှၤလၢယွၤအသးစီဆှံ ဟံးစုနဲၣ်ကျဲအီၤအဂ့ၢ်န့ၣ် ပသ့ၣ်ညါဘၣ် တၢ်မနုၤလဲၣ်.
၁၈ လၢတၢ်မၤလိအံၤအပူၤ ပသ့ၣ်ညါဘၣ် ပှၤလၢယွၤအသးစီဆှံ ဟံးစုနဲၣ်ကျဲအီၤတဖၣ် အခီပညီလီၤ. ပမၤလိန့ၢ်တၢ်လၢ ပှၤလၢယွၤအသးစီဆှံ ဟံးစုနဲၣ်ကျဲအီၤတဖၣ် အဒိအတဲာ်န့ၣ်လီၤ. ဒီးပသ့ၣ်ညါဘၣ်စ့ၢ်ကီးလၢ ပမ့ၢ် “အိၣ်ဒီးခရံာ်အသး” န့ၣ်ကမၤစၢၤပှၤလၢ ပကဆိကမိၣ်တၢ်ဒ် ယဟိဝၤယွၤအသိး ဒီးပကအိၣ်ဒီးတၢ်ရ့လိာ်သး ဒီးအီၤဘူးဘူးတံၢ်တံၢ်လီၤ. ဘၣ်ဆၣ် တၢ်လၢပကဘၣ်မၤန့ၣ် အိၣ်ဒံးဝဲအါမးလီၤ. အဒိ, ပနီၢ်သးဆူၣ်ဧါ တဆူၣ်ဧါန့ၣ် ပသ့ၣ်ညါအီၤကသ့ဒ်လဲၣ်. ဒ်သိးပနီၢ်သးကဆူၣ်ထီၣ်အဂီၢ် ပကဘၣ်မၤဒ်လဲၣ်. ပနီၢ်သးမ့ၢ်ဆူၣ်န့ၣ် ကကဲဘျုးလၢ ပတၢ်အိၣ်မူအပူၤဒ်လဲၣ်. ပကတဲသကိး တၢ်သံကွၢ်တဖၣ်အံၤ လၢတၢ်မၤလိလၢခံတခါအပူၤလီၤ.
