1, 2. (a) Ħafna aħwa kif iħossuhom dwar l-​ispiritwalità? (b) Liema mistoqsijiet importanti se niddiskutu f’dan l-​artiklu?

OĦT fil-​Kanada tgħid illi li tkun persuna spiritwali, jew li jkollha moħħha ffokat fuq affarijiet spiritwali, għamilha iktar ferħana u għenha fil-​problemi li kellha f’ħajjitha. Ħu fil-​Brażil li ilu miżżewweġ għal 23 sena jgħid illi li jkun moħħu ffokat fuq affarijiet spiritwali għen lilu u lil martu jkollhom żwieġ ferħan. Ħu fil-​Filippini jgħid illi li jkun moħħu ffokat fuq affarijiet spiritwali tah paċi tal-​moħħ u għenu jingwalaha m’aħwa minn backgrounds differenti.

² Jidher ċar li aħna nibbenefikaw b’ħafna modi meta jkollna moħħna ffokat fuq affarijiet spiritwali. X’nistgħu nagħmlu biex ikollna moħħna ffokat iktar fuq affarijiet spiritwali u ngawdu dawn il-​benefiċċji? L-​ewwel, għandna bżonn nifhmu dak li tgħid il-​Bibbja dwar nies spiritwali, jiġifieri, dawk li huma ggwidati bl-​ispirtu qaddis t’Alla u li jaħsbu kif jaħseb Ġeħova. F’dan l-​artiklu, se nwieġbu tliet mistoqsijiet importanti: (1) Xi jfisser li tkun persuna spiritwali, jew li tkun moħħok iffokat fuq affarijiet spiritwali?  (2) Liema eżempji se jgħinuna nikbru spiritwalment? (3) L-​isforzi tagħna biex ikollna “l-​moħħ taʼ Kristu” kif se jgħinuna nkunu nies spiritwali?

3. Il-​Bibbja kif tiddeskrivi d-​differenza bejn persuna fiżika u persuna spiritwali?

³ L-​appostlu Pawlu jgħinna nifhmu d-​differenza bejn “bniedem spiritwali” u “bniedem fiżiku.” (Aqra l-​1 Korintin 2:14-16.) Persuna fiżika ‘ma tilqax l-​affarijiet taʼ l-​ispirtu t’Alla, għax huma bluha għaliha; u ma tistax issir tafhom.’ B’kuntrast, persuna spiritwali ‘tistħarreġ kolloxʼ u għandha “l-​moħħ taʼ Kristu,” li jfisser li tistinka biex taħseb bħalma jaħseb Kristu. Pawlu jinkuraġġina biex inkunu nies spiritwali. B’liema modi oħra huma n-​nies fiżiċi differenti minn dawk spiritwali?

4, 5. Kif nistgħu nagħrfu li persuna hi fiżika?

⁴ Kif taħseb persuna fiżika? Persuna fiżika tadotta l-​attitudni tad-​dinja, li tiffoka fuq xewqat egoisti. Pawlu jiddeskrivi din l-​attitudni bħala “l-​ispirtu li issa qed jaħdem f’ulied id-​diżubbidjenza.” (Efesin 2:2) Din l-​attitudni tinfluwenza l-​biċċa l-​kbira min-​nies biex jimitaw lil dawk taʼ madwarhom. Huma sempliċement jagħmlu dak li jidhrilhom li hu tajjeb, mingħajr ma jagħtu kas il-​livelli t’Alla. Persuna fiżika, jew moħħha ffokat fuq affarijiet tal-​laħam, l-​iktar li taħseb hu dwar affarijiet fiżiċi u spiss tħoss li l-​pożizzjoni, il-​flus, jew id-​drittijiet persunali tagħha huma iktar importanti minn kwalunkwe ħaġa oħra.

⁵ Persuna fiżika spiss tagħmel affarijiet li l-​Bibbja ssejħilhom “għemejjel tal-​laħam.” (Galatin 5:19-21) Fl-​ewwel ittra tiegħu lill-​Kristjani f’Korintu, Pawlu jsemmi affarijiet oħra li n-​nies fiżiċi jagħmlu. Huma jżommu maʼ naħa jew oħra meta jkun hemm nuqqas taʼ qbil, jipprovaw jifirdu n-​nies, jinkuraġġixxu oħrajn biex jirribellaw, itellgħu lil xulxin il-​qorti, ma jirrispettawx lil dawk fl-​awtorità, u jagħtu wisq importanza lill-​ikel u x-​xorb. Persuna fiżika ċċedi meta tiġi ttantata biex tagħmel xi ħaġa ħażina. (Proverbji 7:21, 22) Ġuda qal li nies fiżiċi jistgħu saħansitra jitilfu l-​ispirtu taʼ Ġeħova.—Ġuda 18, 19.

6. Kif nistgħu nagħrfu li persuna hi spiritwali?

⁶ B’kuntrast maʼ persuna fiżika, persuna spiritwali jimpurtaha ħafna mir-​relazzjoni tagħha m’Alla. Hi tħalli l-​ispirtu qaddis t’Alla jiggwidaha u tistinka biex timita lil Ġeħova. (Efesin 5:1) Din tagħmel sforz biex titgħallem kif Ġeħova jaħseb u biex tara l-​affarijiet kif jarahom Ġeħova. Alla hu reali ħafna għaliha. Għall-​kuntrarju taʼ persuna fiżika, persuna spiritwali tirrispetta l-​livelli taʼ Ġeħova f’kull aspett taʼ ħajjitha. (Salm 119:33; 143:10) Din ma tipprattikax “l-​għemejjel tal-​laħam” imma tipprova tiżviluppa “l-​frott taʼ l-​ispirtu.” (Galatin 5:22, 23) Sabiex nispjegaw iktar xi jfisser li tkun moħħok iffokat fuq affarijiet spiritwali, aħseb dwar dan il-​paragun: Bħalma xi ħadd li hu tajjeb fin-​negozju jkun moħħu ffokat fuq in-​negozju, xi ħadd li jimpurtah verament mill-​qima tiegħu lejn Alla jkun moħħu ffokat fuq l-​affarijiet spiritwali.

7. Il-​Bibbja x’tgħid dwar dawk li għandhom moħħhom iffokat fuq affarijiet spiritwali?

 ⁷ Ġesù qal li dawk li għandhom moħħhom iffokat fuq affarijiet spiritwali huma ferħanin. F’​Mattew 5:3 naqraw: “Henjin dawk li huma konxji tal-​bżonn spiritwali tagħhom, għax tagħhom hi s-​saltna tas-​smewwiet.” Rumani 8:6 jispjega li l-​ħajja tagħna tiddependi fuq li naħsbu bħalma jaħseb Ġeħova: “Li tkun moħħok fil-​laħam ifisser mewt, imma li tkun moħħok fl-​ispirtu jfisser ħajja u paċi.” Allura, jekk aħna moħħna ffokat fuq affarijiet spiritwali, issa stess jistaʼ jkollna l-​paċi m’Alla u magħna nfusna, u jistaʼ jkollna t-​tama taʼ ħajja taʼ dejjem.

8. Għala jistaʼ jkun diffiċli li ssir u tibqaʼ persuna spiritwali?

⁸ Madankollu, aħna ngħixu f’dinja perikoluża. Peress li mdawrin b’nies li ma jaħsbux bħal Alla, jirrikjedi sforz kbir biex nipproteġu ’l moħħna. Jekk ma nimlewhx bil-​ħsibijiet taʼ Ġeħova, id-​dinja se timlihulna bl-​attitudnijiet u l-​ħsibijiet tal-​laħam li toffri hi. X’nistgħu nagħmlu sabiex nevitaw dan? Kif nistgħu nikbru spiritwalment?

9. (a) X’jistaʼ jgħallimna nsiru moħħna ffokat fuq affarijiet spiritwali? (b) Liema eżempji tajbin se niddiskutu?

⁹ L-​istess bħalma tifel jew tifla għandha bżonn titgħallem mill-​ġenituri u timita l-​eżempju tajjeb tagħhom, aħna għandna bżonn nitgħallmu minn dawk li għandhom relazzjoni mill-​qrib maʼ Ġeħova u nimitawhom. Dan se jgħallimna kif insiru moħħna ffokat fuq affarijiet spiritwali. Mill-​banda l-​oħra, dawk li ħsiebhom biss fil-​laħam huma eżempju taʼ twissija għalina. (1 Korintin 3:1-4) Il-​Bibbja fiha kemm eżempji  tajbin kif ukoll ħżiena. Ejja neżaminaw l-​eżempji tajbin taʼ Ġakobb, Marija, u Ġesù u naraw x’nistgħu nitgħallmu minnhom.

10. Ġakobb kif wera li kien persuna spiritwali?

¹⁰ Bħal ħafna minna, Ġakobb ma kellux ħajja faċli. Ħuh stess, Għesaw, ried joqtlu. Il-​kunjatu tiegħu kompla jipprova jingannah. Imma l-​fidi taʼ Ġakobb fil-​wegħda li Ġeħova għamel lil Abraham baqgħet b’saħħitha. Ġakobb kien jaf li familtu kienet parti mit-​twettiq taʼ din il-​wegħda mill-​isbaħ, u għalhekk ħa ħsiebha sew. (Ġenesi 28:10-15) Ġakobb ma ħalliex l-​attitudni tal-​laħam taʼ dawk madwaru tnessih il-​wegħdi taʼ Ġeħova. Pereżempju, meta Ġakobb ħaseb li kien fil-​periklu minħabba ħuh, hu talab bil-​ħrara lil Ġeħova biex isalvah u qal: “Int, int għedt, ‘Bla dubju jien nittrattak tajjeb u nagħmel lil nislek bħar-​ramel tal-​baħar.’” (Ġenesi 32:6-12) Ġakobb kellu fidi b’saħħitha fil-​wegħdi taʼ Ġeħova u wera dan bil-​mod kif għex.

11. Kif nafu li Marija kienet moħħha ffokat fuq affarijiet spiritwali?

¹¹ Issa aħseb dwar Marija. Ġeħova għażilha biex tkun omm Ġesù għax kienet moħħha ffokat fuq affarijiet spiritwali. Aqra dak li qalet Marija meta żaret lill-​qraba tagħha Żakkarija u Eliżabetta. (Aqra Luqa 1:46-55.) Nistgħu naraw li Marija kienet tħobbha l-​Kelma t’Alla u kienet tafha sew l-​Iskrittura Ebrajka. (Ġenesi 30:13; 1 Samwel 2:1-​10; Malakija 3:12) U anke wara li Marija u Ġużeppi żżewġu, huma stennew sakemm twieled Ġesù biex ikollhom relazzjonijiet sesswali. Għalihom, l-​inkarigu li tahom Alla kien iktar importanti mix-​xewqat tagħhom. (Mattew 1:25) Ukoll, Marija nnotat b’attenzjoni dak kollu li ġara hekk kif Ġesù kien qed jikber u tat widen għat-​tagħlim tiegħu.  Hi “baqgħet iżżomm dan il-​kliem kollu f’qalbha.” (Luqa 2:51) Jidher ċar li kienet interessata ħafna fil-​wegħdi t’Alla dwar il-​Messija. Nistgħu aħna nimitaw lil Marija billi dejjem nipprovaw nagħmlu dak li Alla jrid minna?

12. (a) Ġesù kif imitah lil Missieru? (b) Aħna kif nistgħu nimitaw lil Ġesù? (Ara l-​ewwel stampa.)

¹² Mill-​bnedmin kollha li qatt għexu, Ġesù hu l-​aqwa eżempju taʼ persuna b’moħħha ffokat fuq affarijiet spiritwali. Matul il-​ħajja u l-​ministeru tiegħu fuq l-​art, hu ta prova li ried jimita lil Missieru. Ġesù ħaseb, ħass, u aġixxa bħal Ġeħova. Hu għamel ir-​rieda t’Alla u rrispetta l-​livelli tiegħu. (Ġwanni 8:29; 14:9; 15:10) Pereżempju, qabbel il-​mod kif Isaija ddeskriva l-​mogħdrija taʼ Ġeħova mal-​mod kif Marku ddeskriva s-​sentimenti taʼ Ġesù. (Aqra Isaija 63:9; Marku 6:34.) Nimitaw aħna lil Ġesù billi nkunu dejjem lesti nuru mogħdrija maʼ dawk li għandhom bżonn l-​għajnuna? Niffokaw aħna fuq li nippritkaw u ngħallmu l-​aħbar tajba, bħal Ġesù? (Luqa 4:43) Dawk li għandhom moħħhom iffokat fuq affarijiet spiritwali juru mogħdrija u jipprovaw jgħinu lil oħrajn.

13, 14. (a) X’nistgħu nitgħallmu minn dawk li għandhom moħħhom iffokat fuq affarijiet spiritwali llum? (b) Agħti eżempju.

¹³ Illum, hemm ħafna aħwa b’moħħhom iffokat fuq affarijiet spiritwali li jistinkaw biex jimitaw lil Kristu. Inti forsi tinnota li huma żelużi fil-​ministeru, ospitabbli, u juru mogħdrija. Għalkemm mhumiex perfetti, huma jipprovaw kemm jistgħu biex jiżviluppaw kwalitajiet tajbin u biex jagħmlu dak li Ġeħova jrid minnhom. Rachel, oħt fil-​Brażil, tgħid: “Kont inħobb inżomm mal-​moda. B’hekk, ma kontx nilbes daqshekk modest. Imma li nitgħallem il-​verità mmotivani biex nagħmel l-​isforz meħtieġ ħalli nkun persuna spiritwali. Li nagħmel dawn il-​bidliet ma kienx faċli, imma sirt iktar ferħana u sibt skop veru f’ħajti.”

¹⁴ Reylene, oħt fil-​Filippini, kellha problema differenti. Għalkemm kienet fil-​verità, hi ffokat fuq li jkollha edukazzjoni għolja u xogħol tajjeb. Maż-​żmien, il-​miri spiritwali tagħha saru inqas importanti għaliha. Hi tgħid, “Bdejt nirrealizza li kien hemm xi ħaġa nieqsa f’ħajti, xi ħaġa ħafna iktar importanti mix-​xogħol tiegħi.” Reylene bidlet il-​mod taʼ kif kienet taħsibha u għamlet is-​servizz tagħha lil Ġeħova l-​iktar ħaġa importanti f’ħajjitha. Issa hi tafda fil-​wegħda taʼ Ġeħova f’​Mattew 6:33, 34 u tgħid, “Jien ċerta li Ġeħova se jieħu ħsiebi!” Int abbli taf b’aħwa fil-​kongregazzjoni tiegħek li għandhom l-​istess attitudni. Meta naraw kif dawn jimitaw lil Kristu, aħna nkunu rridu nimxu wara l-​eżempju leali tagħhom.—1 Korintin 11:1; 2 Tessalonikin 3:7.

15, 16. (a) X’għandna bżonn nagħmlu biex inkunu bħal Kristu? (b) Kif nistgħu nħallu “l-​moħħ taʼ Kristu” jeffettwana?

¹⁵ Kif nistgħu nimitaw lil Kristu? L-​1 Korintin 2:16 jispjega li jeħtieġ ikollna “l-​moħħ taʼ Kristu.” Rumani 15:5 jfakkarna biex niżviluppaw “l-​istess attitudni mentali li kellu Kristu Ġesù.”  Sabiex inkunu bħal Kristu għandna bżonn nitgħallmu kif kien jaħseb, iħossu, u jaġixxi. Iktar minn kull ħaġa oħra, hu kien jinteressah mir-​relazzjoni tiegħu m’Alla. Allura, li nkunu bħal Ġesù jressaqna eqreb lejn Ġeħova. Għalhekk huwa importanti ħafna li nitgħallmu naħsbu kif kien jaħseb Ġesù.

¹⁶ Kif nistgħu nitgħallmu naħsbu kif kien jaħseb Ġesù? Id-​dixxipli tiegħu rawh iwettaq il-​mirakli, semgħuh jgħallem folol kbar, raw kif ittratta lil kull tip taʼ nies, u nnotaw kif kien iggwidat mill-​ħsieb taʼ Ġeħova. Huma qalu: “Aħna xhieda taʼ kulma għamel.” (Atti 10:39) Illum, ma nistgħux naraw lil Ġesù. Imma għandna r-​rakkonti tal-​Evanġelji, li jgħinuna nsiru nafuh sew. Meta naqraw u nimmeditaw fuq il-​kotba taʼ Mattew, Marku, Luqa, u Ġwanni, nitgħallmu iktar dwar kif jaħseb Ġesù. Dan jgħinna ‘nimxu mill-​qrib wara l-​passi tiegħu’ ħalli jkun jistaʼ jkollna “l-​istess dispożizzjoni mentali” li kellu hu.—1 Pietru 2:21; 4:1.

17. Li naħsbu kif kien jaħseb Kristu kif jistaʼ jgħinna?

¹⁷ Kif se nibbenefikaw jekk naħsbu kif kien jaħseb Kristu? L-​istess bħalma l-​ikel bnin isaħħaħ lil ġisimna, li nimlew lil moħħna bil-​ħsieb taʼ Kristu jsaħħaħna spiritwalment. Bil-​mod il-​mod, insiru nafu dak li kieku jagħmel Kristu f’kull sitwazzjoni. Imbagħad inkunu kapaċi nieħdu deċiżjonijiet għaqlin li jogħġbu lil Alla u li jagħtuna kuxjenza nadifa. Ma taħsibx int li dawn huma raġunijiet tajbin biex ‘nilbsu l-​Mulej Ġesù Kristu’?—Rumani 13:14.

18. X’tgħallimt dwar li tkun moħħok iffokat fuq affarijiet spiritwali?

¹⁸ Dan l-​artiklu għenna nifhmu xi jfisser li nkunu moħħna ffokat fuq affarijiet spiritwali. Tgħallimna mill-​eżempji tajbin taʼ wħud li kienu ggwidati bl-​ispirtu qaddis. Tgħallimna wkoll illi li jkollna “l-​moħħ taʼ Kristu” jgħinna naħsbu kif jaħseb Ġeħova u jkollna relazzjoni mill-​qrib miegħu. Imma hemm iktar x’nistgħu nitgħallmu. Pereżempju: Kif nistgħu nkunu nafu jekk aħniex b’saħħitna spiritwalment? X’nistgħu nagħmlu biex insiru iktar b’saħħitna spiritwalment? U l-​ispiritwalità kif teffettwalna ħajjitna? Ejja naraw fl-​artiklu li jmiss.