1, 2. (a) Hama no hambzaji zinji jinozwa kudini ngo pamusoro po umujimu? (b) Ngojapi mubvunjo jinosisira jatinozobhuya mu musoro uno?

IMWE HAMBZAJI yo ku Kanadhaa yakananga kuti kuva mundhu wo kumujimu, kana ano murangariro wo kumujimu, zvakaiita kuti ive yakadakara zve zvakaibesera pa zvineso zvo upenyu hwayo. Imwe hama yo Bharaziri, yaano 23 o makore noyacadha, yakananga kuti kuva no murangariro wo kumujimu, kwakabesera iyona no mukaji wayo kuti vave no mucadho unodakajisa. Hama imweni yo ku Firipina yakananga kuti kuva no murangariro wo kumujimu kwakaipa runyararo hwo mukati zve kwakaibesera kuti ibatane ushoni no hama no hambzaji jo nyika jimweni.

² Zvakajeka kuti tinobesereka mu njira zinji patinova no murangariro wo kumujimu. Zvicinyi zvatingaita kuti tinase kuva no murangariro wo kumujimu no kunasa kubesereka ngo muviyo ijowaro? Cokutanga, tinodikana kuzwisisa zvinonanga Bhaibheri ngo pamusoro po mundhu wo kumujimu, ngo pamusoro po vaya vanotungamirihwa ngo mujimu mucena wa Mwari zve no vaya vanorangarira inga Jehovha. Mu musoro uno, tinozodavira mubvunjo  mutatu jinosisira: (1) Zvinoda kurevenyi kuva mundhu wo kumujimu kana mundhu ano murangariro wo kumujimu? (2) Ngojapi muezaniso jingatibesera kuti tikurise umujimu hwedu? (3) Kuitisa kudini kuvangisira kwedu kuti tive no “murangariro wa Kristu” kunotibesera pa kuva mundhu wo kumujimu?

3. Bhaibheri rinosanangurisa kudini musiano uripo pakati po mundhu wokunyama no mundhu wo kumujimu?

³ Mupostori Pauro anotibesera kuti tizwisise musiano uripo pakati po ‘mundhu wo kumujimu’ no ‘mundhu wo kunyama.’ (Verenganyi 1 VaKorinto 2:14-16, Shanduro yeNyika Itsva.) Mundhu wo kunyama ‘aashiri zviro zvo mujimu wa Mwari, ngokuti i upenji kwaari; aakwanisi kuzwisisa.’ Mukusiana, mundhu wo kumujimu ‘anopopora zviro zvese’ zve ano ‘murangariro wa Kristu,’ kureva kuti iyena anoeja kurangarira inga zvinoita Kristu. Pauro ari kutivangisa kuti tive mundhu wo kumujimu. Mu njira japi jimweni mundhu wokunyama wakasiana no mundhu wo kumujimu?

4, 5. Tingavonesa kudini mundhu wokunyama?

⁴ Ngoapi marangaririre o mundhu wokunyama? Mundhu wokunyama anotora murangariro wo ku nyika, uwo unobatanija zvido zvo umbau. Pauro wakasanangura murangariro uwu inga “mujimu . . . unofambisa vana vanotama kupurukira.” (VaEfeso 2:2) Murangariro uwu unopsasa vandhu vazinji kuti vatevejere vaya vakavatendeneja. Ivona vanoita basi zviya zvavanovona kuva zvakanaka kwavari, vacina basa no ndhungamiro ja Mwari. Mundhu wokunyama, kana anomurangariro wo kunyama, anorangarira kazinji ngo pamusoro po zviro zvokunyama zve kazinji anovona kuti cigaro cake, mare, kana zvinodiwa zvake zvinosisira maningi kupinda ciro cimweni haco.

⁵ Mundhu wokunyama kazinji anoita zviya zvinodanijwa ngo Bhaibheri kuva “mabasa o nyama.” (VaGalàsia 5:19-21) Mu karata ya Pauro kuno maKristu o ku Korinto, wakananga zviro zvimweni zvinoithwa ngo vandhu vo kunyama. Wakananga kuti vandhu vakadaro vanotora rutivi pa kutama kuzwana, vanoeja kuparajanisa vandhu, vanovangisa vamweni kuti vapandukire, vanoendesa vamweni ku banje, avareremeji vanotungamirira zve vanoita kuti kuha no kumwa kuve kunosisira maningi mu upenyu hwavo. Mundhu wo kunyama aacungiriri paanoejwa kuita cakashata. (Mazwi Akangwara 7:21, 22) Judha wakananga kuti mundhu wo kunyama waizotoruza mujimu wa Jehovha.—Juda 1:18, 19.

6. Tingavonesa kudini mundhu wo kumujimu?

⁶ Mukusiana no mundhu wokunyama, mundhu wo kumujimu anonasa kurangarira ngo pamusoro po ushamwari hwake na Mwari. Iyena pacake anotendera kutungamirihwa ngo mujimu mucena wa Mwari no kuvangisira kuti atevejere Jehovha. (VaEfeso 5:1) Iyena anovangisira kuti ajije marangarire anoita Jehovha no kuvona zviro mu mavonero a Jehovha. Mwari ariyodi kamare kwaari. Mukusiana no mundhu wokunyama, mundhu wo kumujimu anoreremeja ndhungamiro ja Jehovha mu mativi ese o upenyu hwake. (Nduyo 119:33; 143:10) Iyena aaiti “mabasa o nyama” asi anoeja kusakurira “mucero wo mujimu, [Shanduro yeNyika Itsva].” (VaGalàsia 5:22, 23) Kuti tisanangure ngo pamusoro po revo yo kuva no murangariro wo kumujimu, rangariranyi ngo kuezanisira uku basi: Mundhu anokwanisa ushoni kuita  nyagoso anonangwa kuti anoziva nyagoso, zve mundhu anoreremeja kunamata kwake Mwari anonangwa kuti ano murangariro wo kumujimu.

7. Bhaibheri rinonangenyi ngo pamusoro po mundhu ano murangariro wo kumujimu?

⁷ Jesu wakati, mundhu ano murangariro wo kumujimu ano mudakaro. Patinoverenga Mateu 5:3, Shanduro yeNyika Itsva inoti: ‘Vanodakara nga vaya vano ziva zvinodiwa zvavo zvo kumujimu, ngo kuti Umambo hwo kudenga ngo hwavo.’ VaRoma 8:6 inosanangura kuti upenyu hwedu unofira pa kurangarira inga anorangarira Jehovha: “Muyemuro yo muviri inoendesa ku rufu; kaveta muyemuro yo Mwiha inoendesa ku uhomi no rugarisiko.” Ngokudaro, kudari tino murangariro wo kumujimu, tinova no runyararo na Mwari wari, pacedu, zve tingava no vetero yo upenyu ucikaperi.

8. Ngenyi zvingatinesera kuva no kuramba tiri mundhu wo kumujimu?

⁸ Asi, tiri kupona mu nyika ino ngozi. Ngokuti takatendenejwa ngo vandhu vacikana murangariro ja Mwari, tinodikana kutovangisa kamare murangariro no kunasa kuungwarira. Kudari tikatama kuzaja murangariro wedu ngo ndangariro ja Jehovha, nyika inozozaja murangariro wedu ngo murangarijo jo kunyama. Tingaitenyi kuti titize kuita zvakadaro? Tingakurisa kudini kumujimu?

9. (a) Zvicinyi zvingatijijisa kuva mundhu ano murangariro wo kumujimu? (b) Ngojapi muezaniso jakanaka jaticada kupopora?

⁹ Kudari inga mwana anoda kujija kubvira ku vabari vake no kutevejera muezaniso wavo wakanaka, itusu tinoda kujija kubvira ku vaya vano ushamwari hwo phedo na Jehovha no kuvatevejera. Izvi zvinotijijisa kuti tingagumisa kudini pa kuva no murangariro wo  kumujimu. Ngo divi rimweni, tingajijira zvoticikadikani kuita ngo kuvona vandhu vo kunyama. (1 VaKorinto 3:1-4) Bhaibheri rino muezaniso jakanaka no jakashata. Ngatende tipopore muezaniso munganani jakanaka, jakadari inga ja: Jakobe, Maria na Jesu.

10. Jakobe wakatatijisa kudini kuti wainga mundhu wo kumujimu?

¹⁰ Inga vazinji vedu, Jakobe aazivi kuva no upenyu hwakareruka. Hama yake imwe basi, Izau, yaida kumuuraya. Vatebzara vake vaindoeja kumuungisa. Asi gonda ra Jakobe ku zvigondiso zva Jehovha kuitira Abhirahama zvakaramba zvakavanga. Jakobe waiziva kuti mbhuri yake yainga no divi pa kukwanirisa cigondiso ici cinoshamaisa, ngokudaro wakanasa kucingwarira. (Genesi 28:10-15) Jakobe aazivi kutendera kuti murangariro yo kunyama yo vandhu vaimutendeneja imuite kuti akanganwe zvigondiso zva Jehovha. Inga muezaniso, Jakobe wakadeketerera Jehovha kuti amuponese paakavona kuti wainga pa ngozi ngo ndava yo hama yake. Wakaita mukumbiro eciti: “Ndimwi mwakati . . . ‘Ndinozokuitira bzakanaka, no mbhuri yako inozowanda inga musanga wo mu jombe.’” (Genesi 32:7-13) Jakobe wainga no gonda rakavanga ku zvigondiso zva Jehovha zve wakazvivonesa ngo mararamiro aaita.

11. Tinozvizivisa kudini kuti Maria wainga mundhu ano murangariro wo kumujimu?

¹¹ Wari rangariranyi ngo pamusoro pa Maria. Jehovha wakamusana kuti ave mai wa Jesu ngokuti iyena wainga mundhu ano murangariro wo kumujimu. Verenganyi kuti Maria wakanangenyi paakaenda koovona ukama hwake Zakaria na Erizabheti. (Verenganyi Luka 1:46-55.) Tingavona kuti Maria waida Soko ra Mwari zve wainasa kuziva Matahwa o ciHebheri. (Genesi 30:13; 1 Samueli 2:1-10; Malakia 3:12) Zve Maria na Jasefa pavakandopera kucadha, ivona vaidikana kuvetera mbhera Jesu abahwe kuti vaizoite zvo pa bonde. Basa raakagajwa ndi Mwari raisisira  maningi kupinda zvido zvavo. (Mateu 1:25) Cimwenizve, Maria wainasa kusotesesa zvese zvaiitika Jesu paairamba ecikura zve waipurukira zvese zvaajijisa. Maria ‘waiviga bzese ibzi mu hana make.’ (Luka 2:51) Zvakajeka kuti iyena wainga ecidakarira zvigondiso zva Mwari ngo pamusoro pa Mesia. Tingatevejeresa kudini Maria zve nguva jese toita zvatinokumbihwa ndi Mwari kuti tiite?

12. (a) Jesu wakatevejeresa kudini Baba wake? (b) Tingatevejeresa kudini Jesu? (Vonanyi pikica yo kutanga.)

¹² Ku vandhu vese vakamborarama, Jesu ndi muezaniso mukuru wo mundhu wakava no murangariro wo kumujimu. Pakati po upenyu hwake no mushando wake pa nyika, iyena wakatatija kuti waida kutevejera Baba wake. Jesu wairangarira, waizwa zve waiita zviro kudari inga ndi Jehovha. Wakaita kuda ka Jehovha zve wakareremeja ndhungamiro jake. (Johani 8:29; 14:9; 15:10) Inga muezaniso, ezanisanyi manera akasanangura Isaia usizi hwa Jehovha pamwepo no manera akasanangura Marko mazwiro a Jesu. (Verenganyi Isaia 63:9; Marco 6:34.) Nguva jese tinotevejera Jesu pa kutatija usizi kuno vaya vanoda besero here? Inga ndi Jesu, tinobatikana pa kucumaera no kujijisa masoko akanaka here? (Luka 4:43) Vandhu vano murangariro wo kumujimu vano usizi zve vanoeja kubesera vamweni.

13, 14. (a) Tingajijenyi kubvira ku vandhu vano murangariro wo kumujimu nyamasi uno? (b) Ipanyi muezaniso.

¹³ Nyamasi uno, kuno hama no hambzaji zinji jino murangariro wo kumujimu ijo jinovangisira kuti jitevejere Kristu. Mungazvivona izvi ngo kuvangisira kwavanoita mu mushando, pa kuashira vafambi no kuva kwavo no usizi. Pikija zvakadaro, ivona avazivi kukwana, vanoeja kuvangisira kuti vasakurire mavara aushoni no kuita zviya zvinoda Jehovha kuti ivona vaiite. Rachel, imwe hambzaji yo ku Bharaziri, yakananga kudari: “Ndaidakarira kuteverera muthapa jo mu nyika. Inga muviyo, andicaisimira mu njira yo kujibata. Asi, kujija cokwadi kwakandikwevera kuti ndiite no pandaikwanisa kuti ndive mundhu wo kumujimu. Kuita cinjo azvizivi kuva zvakareruka, asi ndakadakara maningi zve ndakawana cinangwa co upenyu.”

¹⁴ Reylene, imwe hambzaji yo ku Firipina, yainga no cineso cakasiana. Pikija iyona yainga mu cokwadi, yakabatikana maningi ngo kuva no jijo yo pamusoro zve no basa raushoni. Mu kufamba ko nguva, zvido zvayo zvo kumujimu zvakatanga kuva zvicikasisiri maningi. Iyona yakati: “Ndakatanga kuzwa kuti paiinga no ciro caifarati mu upenyu hwangu, ciro cinosisira maningi kupinda basa rangu.” Reylene wakacinja manera aairangarira zve wakaita kuti kushandira kwake Jehovha kuve kunosisira maningi mu upenyu hwake. Wari anothemba cigondiso ca Jehovha ciri pana Mateu 6:33, 34 zve wakati: “Ndinozviziva kamare kuti Jehovha anozondikhorondha!” Kangaije munoziva hama no hambzaji mu ungano yenyu jino murangariroino murangariro. Patinovona manera avanotevejera Kristu, tinodavo kutevejera muezaniso wavo wokugondeka.—1 VaKorinto 11:1; 2 VaTesalònika 3:7.

15, 16. (a) Tinodikana kuitenyi kuti tive inga Kristu? (b) Tingatendera kudini kuti “murangariro wa kristu” utipsase?

¹⁵ Tingatevejeresa kudini Kristu? 1 VaKorinto 2:16, inosanangura kuti tinodikana kuva no “murangariro wa Kristu.” VaRoma 15:5, Shanduro yeNyika Itsva, inoticeukija kuti tive no ‘murangariro wakaezana no wainga na  Jesu Kristu.’ Kuti tive inga ndi Kristu, tinodikana kujija ngo manera aairangarira, aizwa no aiita zviro. Jesu wakaneseka maningi ngo pamusoro po ushamwari hwake na Mwari kusiapo ngo ciro cimweni. Ngokudaro, kuva inga ndi Jesu zvinotiita kuti tive inga ndi Jehovha. Ngo iyo ndava zvinosisira maningi kujija kurangarira inga zvakaita Jesu.

¹⁶ Tingajijisa kudini kurangarira inga Jesu? Vateveri vake vaimuvona aciita mushamaiso, vaimupurukira acijijisa mbungano huru, vaivona matajire aaita vandhu vo mushovo wakasiana-siana zve vaivona manera aaitungamirihwa ngo ndangariro ja Jehovha. Ivona vakati: “Itisu tiri vafakazi vo bziro bzese bzaakaita.” (Maitiro o Vapostori 10:39) Nyamasi uno, atikwanisi kuvona Jesu. Asi, zvinosumuhwa mu Mavhangeri, zvinotibesera kuti tinase kumuziva kamare. Patinoverenga no kurangarijisisa bhuku ra Mateu, Marko, Luka na Johani, tinozwa zvakawanda ngo pamusoro po marangaririre a Jesu. Izvi zvinotibesera ‘kuti titeveje gwanja rake’ ngo phedo kuti tive no ‘murangariro’ inga wake.—1 Pedru 2:21; 4:1.

17. Kuitisa kudini kurangarira inga Kristu kunotibesera?

¹⁷ Tinobesereka kudini kudari tikarangarira inga ndi Kristu? Kudari inga zvokuha zvaushoni zvinovangisa muviri wedu, kuzaja murangariro wedu ngo ndangariro ja Kristu kunotiita kuti tivange kumujimu. Padoko ngo padoko, tinoguma pa kuziva kuti zvicinyi zvatingaita pa mugariro uri wese. Perapo tinokwanisa kutema zvivaringo ngo ungwaru kuti tidakajise Mwari no kuva no hana yakacena. Amuvonivo here kuti aya ndi mathangwe akanaka kuti ‘tisimire Tenji wedu Jesu Kristu’?—VaRoma 13:14.

18. Mwajijenyi ngo pamusoro po mundhu ano murangariro wo kumujimu?

¹⁸ Musoro uno watibesera kuzwisisa kuti zvinoda kurevenyi kuva mundhu ano murangariro wo kumujimu. Tajija ngo muezaniso jakanaka jo vandhu vakatungamirihwa ngo mujimu mucena. Tajijazve kuti kuva no “murangariro wa Kristu” kunotibesera kuti tirangarire inga anorangarira Jehovha zve tova no ushamwari hwo phedo naye. Asi pano zvizinji zvatingajija. Inga muezaniso: Tingazvizivisa kudini kuti tino umujimu wakavanga? Tingaitenyi kuti tive no umujimu wakavanga? Zve kuitisa kudini umujimu hwedu unopsasa upenyu hwedu? Tinozozvivona pa musoro unotevera.