1, 2. (1) Anna ni arokora ancipale anoona hai vooloca sa okhala muchu oomunepani? (2) Makoho taani ookhweleya nnahaalaahu othokororya mmwaha yoola?

MUROKORA mmoha o Kanata olonce wi okhala muchu oomunepani, naari okhalano muupuwelo woomunepani, yoomweeriha okhala oohakalala nave yoomukhaviherya mu makacamiho a ekumi. Munna o Prasili yoowo ori mutheli mu iyaakha makhumi meeli nararu olonce wi okhala muchu oomunepani ennamukhaviherya vamoha ni mwaariye okhalano othela woohakalaliha. Munna o Filipina olonce wi okhala muchu oomunepani onnamvaha murecele wa mmuupuweloni nave onnamukhaviherya okhala awiiwanana ni anna ni arokora a ilapo soohiyana hiyana.

² Ti yawooneya wi ninnaphura sincipale vaavaa nnakhalaahu achu oomunepani. Tiheeni nnaphwanelaahu opaka wi nikhale achu oomunepani ni opuha miphurelo seiyo? Yoopacerya, nnaphwanela wiiwexexa yeeyo Piipiliya onaloceiye sa achu oomunepani, yaawo anahooleliwa ni munepa waweela wa Muluku, nave  anuupuwela hiiha ntoko Yehova. Mmwaha yoola, nnahaala waakhula makoho mararu ookhweleya. (1) Enataphulela eheeni okhala muchu oomunepani, naari okhalano muupuwelo woomunepani? (2) Sootakiherya taani sini inikhaviherye wunnuwa omunepani? (3) Wiilipiherya wahu okhalano “mupuwelo wa Kristu” oni onikhaviherye hai okhala achu oomunepani?

3. Piipiliya onathariha hai ohiyana orivovo variyari va muchu oomwiilini ni muchu oomunepani?

³ Murummwa Paulo oonikhaviherya wiiwexexa ohiyana orivovo variyari va “mutxhu ammunepani” ni “mutxhu onetxela miruku sa vathiru.” (Mwaalakhanye 1 Korinto 2:14-16.) Muchu oneecela miruku sa vathiru, naari muchu oomwiilini “hanema yele enarwa wa Munepa wa Muluku. Wa mutxhu yowo, itxhu seiha iri anepa. Hanawerya osuwela seiho.” Moohiyana, muchu ammunepani “onnawerya othoriha itxhu sothesene” nave ookhalano “mupuwelo wa Kristu,” yeeyo enataphulela wi onniilipiserya wuupuwela ntoko Kristu. Paulo onnanceenyerya okhala achu oomunepani. Mmikhalelo taani mikina achu aneecela miruku sa vathi enahiyanaaya ni achu oomunepani?

4, 5. Nni niwerye hai omusuwela muchu oomwiilini?

⁴ Muchu oomwiilini onuupuwela hai? Muchu oomwiilini onakhalano muupuwelo weelapo, yoowo onatikitheryeya mu minkhela sa nrima. Paulo oothariha muupuwelo yoola ntoko “munepa yowo onerano hihano mwa anamwane óhiwelela.” (Éfeso 2:2, Nlakano Nahihano) Muupuwelo yoola onnaavolowela achu ancipale waatakiherya yaale aari vakhiviru vaya. Awo pahiru anapaka yeeyo anoonaaya okhala yaphaama wa yaawo, ehipwanche malakiheryo a Muluku. Muchu oomwiilini naari muupuwelo woomwiilini, onuupuwela xaxaxa ichu soomwiilini nave wiiliwiili onuupuwela wi miteko sawe, ikhorowa, naari ophwanelela wawe ti sookhweleya opwaha echu ekina.

⁵ Muchu oomwiilini wiiliwiili onapaka ichu seiyo Piipiliya oniichaneiye “miteko sonanara sa mwili.” (Galasya 5:19-21) Mu ekaarata yoopacerya ya Paulo wa Akristu o Korinto, owo aahiromola ichu ikina seiyo achu oomwiilini anapakaaya. Awo haniiwananiheya, anneererya waakawanya achu, annaaceenyerya akina omwaryeya, annasomelana, hanacicimiha ohoolela, nave anneeriha yoolya ni owurya okhala ichu sookhweleya mu ikumi saya. Muchu oomwiilini hanavilela vaavaa oneehiweiye opaka echu yoonanara. (Masiposipo 7:21, 22) Yuta aahiloca wi achu oomwiilini annaphiyerya oyeleela munepa wa Yehova.—Yuda 18, 19.

6. Nni niwerye hai omusuwela muchu oomunepani?

⁶ Moohiyana ni muchu oomwiilini, muchu oomunepani onnakhapelela phaama onthamwene awe ni Muluku. Owo onniiseemereryiha wi ahooleliweke ni munepa waweela wa Muluku nave onniilipixerya omutakiherya Yehova. (Éfeso 5:1) Owo onnapaka soothene wi ahuserye mukhalelo Yehova onuupuweleiye ni woona ichu hiiha ntoko Yehova. Muluku muchu eeparipari wa yene. Moohiyana ni muchu oomwiilini, muchu oomunepani onnacicimiha malakiheryo a Yehova mmakupa oothene a okumi awe. (Salumu 119:33; 143:10) Owo hanapaka “miteko sonanara sa mwili” nyenya onniilipixerya wunnuwiha “sawima sa Munepa.” (Galasya 5:22, 23) Wi ntharihe sikina vooloca sa yootaphulela ya okhala muchu oomunepani, muupuwele sa yoolikanyiha ela: Muchu osuwenle ompaka nakoso oniichaniwa muchu orino muupuwelo wa ompaka nakoso, nave muchu yoowo chiryene onakhapelela  omulapela wawe Muluku oniichaniwa muchu orino muupuwelo woomunepani.

7. Tiheeni Piipiliya onaloceiye sa achu oomunepani?

⁷ Yesu olonce wi achu oomunepani anakhala oohakalala. Ninnaalakhanya mu Mateu 5:3, Tradução do Novo Mundo: “Oohakalala taale anasuwela soothowa saya soomunepani, ntakhara ori wawaya Omwene wa wirimu.” Aroma 8:6, NN onnathariha wi okumi ahu ori mu wuupuwela hiiha ntoko Yehova onuupuweleiye. Eyo eni: “Yothokororya ya mwíli ti okhwa; nyenya yothokororya ya munepa ti okumi ni murechele.” Mwawiihiiha wakhala wi naachu oomunepani, ovinyerya hiihaano nnanwerya okhalano murecele ni Muluku, ni hiyo mukhatiihu nave nnanwerya okhalano ewehereryo ya ekumi yoohimala.

8. Ntakhara heeni onamukhala woovila okhala ni otitelela ntoko muchu oomunepani?

⁸ Nyenya, nnakhala mu elapo yawoopiha. Wanthowa nawi nnakhala variyari va achu yaawo ahirino muupuwelo wa Muluku, chiri ti woochuneya wiilipixerya okhapelela muupuwelo ahu. Wakhala wi hansarinhe muupuwelo ahu ni muupuwelo wa Yehova, elapo enahaala osareiha muupuwelo ahu ni muupuwelo aya woomwiilini. Tiheeni nnaphwanelaahu opaka wi nsepe yeeyo? Nni niwerye hai wunnuwa omunepani?

9. (1) Tiheeni eni enihusihe okhala achu oomunepani? (2) Sootakiherya taani saphaama nneeraahu nthokororye?

⁹ Hiiha ntoko mwaana onachuneiye ohuserya orweela wa asitiithi awe ni ochariha yootakiherya aya yaphaama, hiyaano nnachuna ohuserya ni waatakiherya yaale arino onthamwene ni Yehova. Ela enahaala onikhaviherya okhala achu oomunepani. Mmakupa makina, ninnahuserya echu nihinaphwanelaahu opaka moorweela wa owoona achu oomwiilini. (1 Korinto 3:1-4) Mpiipiliyani sinnaphwanyeyamo sootakiherya saphaama ni  soonanara. Hankooni nthokororye sootakiherya saphaama seiyo nnachunaahu ohuseryavo echu: Yakopo, Mariya ni Yesu.

10. Yakopo oonihenrye hai wi aari muchu oomunepani?

¹⁰ Moolikana ni ancipale a hiyo, Yakopo haarino ekumi yookhweya. Munneeni, Esawu, aachuna omwiipha. Ataata awe yaahititelela weererya onwoka. Nyenya nroromelo na Yakopo mu soororomeliha sa Yehova wa Aparahamu naari noolipa. Yakopo aahisuwela wi emusi awe yaahaala okhala makupa yaawo yaahaala okhwaaniheryeya yoororomeliha yeela yootikhiniha, mwawiihiiha owo aanakhapelela. (Maphatxuwelo 28:10-15) Yakopo heemerenrye wi muupuwelo woomwiilini wa achu yaamurukurenrye omweerihe ocuwala soororomeliha sa Yehova. Ntoko yootakiherya, Yakopo aahimpachaanyerya Yehova mu nivekelo wi amukhapelele vaavaa owo uupuwenleiye wi aari va yawoopiha nthowa na munneeni. Owo aahivekela: “Nyuwano mòkilèla, muriki: Itxhu sòthene ini inan’wetxela phàma! Kinamwakhaliha atxhu a nloko nà antxipalesa ntoko mihàva sa mphareya, sòhàlikhanyeya.” (Maphatxuwelo 32:6-12) Yakopo aahikhalano nroromelo noolipa mu soororomeliha sa Yehova nave aahooniherya moorweela wa okhala wawe.

11. Nnasuwela hai wi Mariya aari muchu oomunepani?

¹¹ Vano muupuwele vooloca sa Mariya. Yehova aahimuthanla wi akhale mayi a Yesu nthowa nawi owo aari muchu oomunepani. Mwaalakhanye yeeyo Mariya aalonceiye vaavaa aaxekunryeiye amusi awe Sakariya ni Isapeli. (Mwaalakhanye Luka 1:46-55.) Nnanwerya woona wi Mariya aanasivela Masu a Muluku nave aahisuwela phaama Soorempwa sa Ehepiri. (Maphatxuwelo 30:13; 1 Samuwele 2:1-10; Malakiya 3:12) Nave naamwi Mariya ni Yosefe yaari mutheli, awo yaahiweherya ophiyerya oyariwa wa Yesu wi ekumanele. Murici aya vamiithoni va Muluku waari wookhweleya wa yaawo opwaha soochuna  saya. (Mateu 1:25) Navetho Mariya aanoona moomaaleleya soothene seereya vaavaa Yesu unnuweiye nave aanawiriyana ichu Yesu aahusiheiye. Owo ‘ànakhapelela sothene seiye mmurimani mwawe.’ (Luka 2:51) Ti yawooneya wi owo aateteiwa pahiru ni soororomeliha sa Muluku vooloca sa Mesiya. Apwanne nnanwerya omutakiherya Mariya nave mahiku oothene weererya opaka yeeyo Muluku onachuneiye wi nipake?

12. (1) Yesu aatakihenrye hai Atiithi awe? (2) Nni nimutakiherye hai Yesu? (Moone eruku yoopacerya.)

¹² Wa achu oothene yaakhanle khalai, Yesu yootakiherya yaphaama ya muchu oomunepani. Variyari va okumi awe ni muteko awe veelaponi yavathi, owo aahooniherya wi aanachuna omutakiherya Tiithi awe. Yesu uupuwela, aapaka ichu, nave ahooniherya moonelo moolikana ni wa Yehova. Owo aahipaka yookhwela ya Muluku nave aanacicimiha malakiheryo awe. (Yohani 8:29; 14:9; 15:10) Ntoko yootakiherya, mulikanyihe yeeyo Isaiya aalonceiye sa ikharari sa Yehova ni mukhalelo Marko otharinheiye vooloca sa miyoonelo sa Yesu. (Mwaalakhanye Isaiya 63:9; Marko 6:34.) Apwanne ninnamutakiherya Yesu moorweela wa mahiku oothene okhala ooreheryeya wooniherya ikharari wa yaale anachuna nikhaviheryo? Moolikana ni Yesu, apwanne ninnateteiwa mu olaleerya ni ohusiha michaka yaphaama? (Luka 4:43) Achu oomunepani taikharari nave anneererya waakhaviherya akina.

13, 14. (1) Tiheeni nnahuseryaahu orweela wa achu oomunepani a olelo? (2) Mvahe yootakiherya.

¹³ Olelo, aakhalawo anna ni arokora ancipale oomunepani yaawo aniilipixerya omutakiherya Kristu. Nyuwaano munanwerya woona mvai aya mmuteko woolaleerya, aikharari ni oowaakhela aleco. Naamwi eri oohiphaameya, awo anneererya wunnuwiha mikhalelo saphaama ni opaka yeeyo Yehova onachuneiye wi epake. Rakele, murokora o Prasili ooloca: “Kaanasiveliwa ochara ichu seelapo. Ntoko yookhumelela, nkaawara soowara soophwanelela. Nyenya ohuserya eparipari yookiceenyerya wiilipixerya wi kikhale muchu oomunepani. Opaka matorokelo hiwaari wookhweya, nyenya kaahikhala oohakalala ni ophwanya yoolakelela yoophwanelela mookumini.”

¹⁴ Releni, murokora o Filipina, aahikhalano nikacamiho noohiyana. Naamwi aari mu eparipari, owo aatikitheryen’ye mu okhalano mahusiheryo a vasulu ni muteko waphaama. Mweelukuluku aya, soolakelela sawe soomunepani hisaari sookhweleya wa yene. Owo ooloca, “kaapacerya osuwela wi yookhala echu kaayeleelaaka mookumini mwaka, echu yookhweleyaxa opwaha muteko aka.” Releni aahitoroka mukhalelo awe wa wuupuwela nave eeriha wi muteko awe wa Yehova okhala echu yookhweleyaxa mookumini mwawe. Vano owo onnaweherya waakhwanela wa yoororomeliha ya Yehova mu Mateu 6:33, 34 nave ooloca, “koosuwela wi Yehova chiryene onahaala okikhapelela!” Akhweya mohaasuwela anna ni arokora mmulokoni mwanyu arino moonelo mmohamoha. Vaavaa nnoonaahu mukhalelo awo anamutakiheryaaya Kristu, ninnachuna ochariha yootakiherya aya yoororomeleya.​—1 Korinto 11:1; 2 Tesalónika 3:7.

15, 16. (1) Tiheeni nnaphwanelaahu opaka wi nikhale ntoko Kristu? (2) Nni niwerye hai weemererya wi “mupuwelo wa Kristu” onivolowele?

¹⁵ Nni niwerye hai omutakiherya Kristu? 1 Korinto 2:16 onnathariha wi ninnachuna okhalano “mupuwelo wa Kristu.” Aroma 15:5 onnanuupuserya wunnuwiha “merelo [ntoko] a Yesu Kristu.” Wi nikhale ntoko Kristu, nnaphwanela  ohuserya mukhalelo uupuweleiye, meerelo awe ni moonelo awe. Yesu aanakhapelela vancipale onthamwene awe ni Muluku opwaha echu ekina. Mwawiihiiha okhala ntoko Yesu onneeriha okhala oolikana ni Yehova. Ti nthowa nene oryaaya wookhweleya ohuserya wuupuwela hiiha ntoko Yesu.

¹⁶ Nni niwerye hai ohuserya wuupuwela ntoko Yesu? Oohuserya awe yaanamoona apakaka sootikhiniha, onwiriyana ahusihaka muloko mutokweene, omoona mukhalelo aakhaliheiye achu oothene, nave yaanamoona mukhalelo owo aahooleliweiye ni muupuwelo wa Yehova. Awo yaahiloca: “Hiyo nri anamona a itxhu sothene ereiye.” (Saweriwa T’arummwa 10:39) Olelo, hannawerya omoona Yesu. Nyenya nookhalano saweereya sa Michaka, seiyo sinanikhaviherya omusuwela phaama. Vaavaa nnaalakhanyaahu ni wuupuwelela mu aliivuru a Mateu, Marko, Luka, ni Yohani, ninnahuserya sincipale vooloca sa mukhalelo Yesu uupuweleiye. Ela ennanikhaviherya ‘otxhara mphiro awe’ wi ‘nikhaleno monelo mmoha yowo’ aareiyeno.​—1 Pedro 2:21; 4:1.

17. Wuupuwela ntoko Kristu onanikhaviherya hai?

¹⁷ Mphurelo taani nneeraahu nikhaleno wakhala wi nnuupuwela ntoko Kristu? Hiiha ntoko yoolya yaphaama yeeyo eneeriha mwiili ahu okhala woolipa, osareiha muupuwelo wa Kristu mmuupuweloni mwahu ennaneeriha okhala oolipa omunepani. Vakhaani vakhaani, ninnasuwela yeeyo owo aahaaleiye weera mmikhalelo soothene. Voocharela, nnanwerya opaka soolakelela sa miruku seiyo sinamuhakalaliha Muluku nave inanivaha oleela-wa-murima waphaama. Apwanne hamunoona wi ala mathowa aphaama a ‘wawara Apwiya Yesu Kristu’?​—Aroma 13:14.

18. Tiheeni muhusenryaanyu vooloca sa okhala muchu oomunepani?

¹⁸ Mwaha ola woonikhaviherya wiiwexexa yootaphulela ya okhala muchu oomunepani. Noohuserya orweela wa sootakiherya saphaama sa achu yaawo yaahooleliwa ni munepa waweela. Noohuseryatho wi okhalano “mupuwelo wa Kristu” ennanikhaviherya wuupuwela ntoko Yehova ni okhalano onthamwene ni yene. Nyenya sookhalavo sincipale nnaphwanelaahu ohuserya. Ntoko yootakiherya: Nni nsuwele hai waakhanle wi noolipa omunepani? Tiheeni nnaphwanelaahu opaka wi nikhale oolipa omunepani? Nave okhala muchu oomunepani onavolowela hai okumi ahu? Hankooni noone mmwaha onacharela.