1, 2. (α) Σαρ νιωθίνενα μπουτ πφραλά ντα πφενιά σο ισί πνευματικά τζενέ; (β) Καλά σημαντικές ερωτήσεις κα ντικχάς ανταλέ μαθημάστε;

ΕΚ ΠΦΕΝ κατά Καναδάς βακερέλα ότι επειδή ισί πνευματική τζενί, τθερέλα πιο μπουτ χαρά ντα μπορίνελα τι αντιμετωπίνελ πο προβλήματα. Εκ πφραλ κατά Βραζιλία σο ισί παντριμέ 23 μπρεσά βακερέλα ότι επειδή βοβ ντα λέσκι ρομνί ισί πνευματικά τζενέ, τθερένα εκ ευτυχισμέ μπιαβ. Εκ πφραλ κατά Φιλιππίνες βακερέλα ότι επειδή ισί πνευματικός τζενό, τθερέλα ειρήνη πι γκοντιάτε ντα λατσσέ σχέσεις πφραλέντζαρ ντα πφενίντζαρ σο ισί διαφορετικοί λέσταρ.

² Ισί ξεκάθαρος ότι ευλογίντιβασα μπουτ όταν ισινάμ πνευματικά τζενέ. Σο μπορίνασα τι κεράς για τι αβάς πιο πνευματικά τζενέ ντα για τι απολαμβάνας οντουλά ευλογίες; Πρώτον, χρειαζίντιβελα τι αγαβάς σο βακερέλα η Αγία Γραφή ι πνευματικέ τζενένγκε, ή γιαβέρτουλους ι τζενένγκε σο οδηγίντιβενα κατά άγιος πνεύμας ι Ντεβλέσκο ντα σκεφτίνενα σαρ ο Ιεχωβά. Ανταλέ μαθημάστε, κα απαντίνας τρινέ σημαντικέ ερωτησιέντε: (1) Σο μανγκέλα τι βακερέλ τι αβέλ κάποιος πνευματικός τζενό; (2) Καλά παραδείγματα κα βοηθίνεν-αμέν τι αβάς πιο  πνευματικά τζενέ; (3) Σαρ κα βοηθίνεν-αμέν τι αβάς πνευματικά τζενέ ο προσπάθειες σο κεράσα τι τθεράς «ι γκοντί ι Χριστόσκι»;

3. Σαρ σικαβέλα η Γραφή ι διαφορά σο τθερέλα ο πνευματικός τζενό οντουλέσταρ σο τθερέλα πι γκοντιάτε ο σώμας;

³ Ο απόστολος Παύλος βοηθίνελα-αμέν τι αγαβάς σο διαφορά τθερέλα ο πνευματικός τζενό, ή γιαβέρτουλους «ο τζενό σο τθερέλα πι γκοντιάτε ο πνεύμας», οντουλέσταρ «σο τθερέλα πι γκοντιάτε ο σώμας». (Διαβάνεν 1 Κορινθίους 2:​14-16) Ο τζενό σο τθερέλα πι γκοντιάτε ο σώμας «να δεχτίνελα ο πράγματα σο αβένα κατά πνεύμας ι Ντεβλέσκο, επειδή ανταλά πράγματα ισί άχρηστα λέσκε· ντα ναστί σικλιόλα-λεν». Όμως, ο πνευματικός τζενό «ρόντελα σαρέ ο πράγματα» ντα τθερέλα «ι γκοντί ι Χριστόσκι», σο μανγκέλα τι βακερέλ ότι προσπαθίνελα μπουτ τι σκεφτίνελ σαρ ο Χριστός. Ο Παύλος βακερέλα αμένγκε τι αβάς πνευματικά τζενέ. Καλά γιαβερά διαφορές τθερένα ο πνευματικά τζενέ οντουλένταρ σο τθερένα πουμαρέ γκοντιάτε ο σώμας;

4, 5. Σαρ αγαντίντιβελα εκ τζενό σο τθερέλα πι γκοντιάτε ο σώμας;

⁴ Σαρ σκεφτίνελα εκ τζενό σο τθερέλα πι γκοντιάτε ο σώμας; Σκεφτίνελα σαρ ο τζενέ ανταλέ ντουνιάστε, σο ντένα μπουτ σημασία κο πράγματα σο μανγκέλα λένγκο νεαυτός. Ο Παύλος βακερέλα ότι ανταβά τρόπος σκέψης ισί “ο πνεύμας σο ακανά επηρεάνελα οντουλέν σο να ντένα καν”. (Εφεσίους 2:2) Ανταβά τρόπος σκέψης κερέλα ι πιο μπουτ τζενέν τι μοιάζεν κο γιαβερά. Βον απλά κερένα σο ντικχίντιβελα σωστός λένγκε γιακχίντε ντα να χάλα-λεν ανάγκη ο κανόνες ι Ντεβλέσκε. Ο τζενό σο τθερέλα πι γκοντιάτε ο σώμας σκεφτίνελα πιο μπουτ ο πράγματα σο να τθερένα τι κερέν ι Ντεβλέσαρ ντα νιωθίνελα ότι η θέση, ο λοβέ ντα λέσκε δικαιώματα ισί πιο σημαντικά σαρέ κατά γιαβερά πράγματα.

⁵ Σαρ βακερέλα η Γραφή, εκ ασακό τζενό κερέλα «ο πράγματα σο κερέλα ο σώμας». (Γαλάτες 5:​19-21) Κι πρώτη επιστολή κο Κορινθίους, ο Παύλος βακερέλα γιαβερά-ντα πράγματα σο κερένα ο τζενέ σο τθερένα πουμαρέ γκοντιάτε ο σώμας. Ανακατούντιβενα κο φασαρίες, προσπαθίνενα τι ανέν διχόνοια, κερένα ι γιαβερέν μα τι ντεν καν καεκχέστε, γκερένα ο εκ ι γιαβερές κο δικαστήρια, να σεβάνενα ι εξουσία ντα λένγκε ο χαμπέ ντα ο πιπέ ισί μπουτ σημαντικά. Ασακέ τζενέ να τζάνα κόντρα κο πειρασμός τι κερέν κάτι κακός. (Παροιμίες 7:​21, 22) Ο Ιούδας βακερντάς ότι ο τζενέ σο τθερένα πουμαρέ γκοντιάτε ο σώμας κα μπορίνενας ατζέ-ντα τι χασαρέν ο πνεύμας ι Ιεχωβάσκο.​—Ιούδα 18, 19.

6. Σαρ αγαντίντιβελα εκ πνευματικός τζενό;

⁶ Ο πνευματικός τζενό ισί μπουτ διαφορετικός κατά τζενό σο τθερέλα πι γκοντιάτε ο σώμας, οτθάρ μανγκέλα μπουτ τι τθερέλ λατσσί φιλία ι Ντεβλέσαρ. Μουκχέλα πο νεαυτός τι οδηγίντιβελ κατά άγιος πνεύμας ντα προσπαθίνελα μπουτ τι μοιάζελ κο Ιεχωβά. (Εφεσίους 5:1) Προσπαθίνελα τι σικλιόλ σαρ σκεφτίνελα ο Ιεχωβά ντα τι ντικχέλ ο πράγματα σαρ ντικχέλα-λεν βοβ. Ο Ντεβέλ ισί μπουτ πραγματικός λέσκε. Σεβάνελα ι Ιεχωβάσκε κανόνες σαρέ κο πράγματα πι ζωγιάτε, κάτι σο να κερέλα-λες ο τζενό σο τθερέλα πι γκοντιάτε ο σώμας. (Ψαλμός 119:​33· 143:​10) Να κερέλα «ο πράγματα σο κερέλα ο σώμας», αλλά προσπαθίνελα τι τθερέλ «ο καρπός του πνεύματος». (Γαλάτες 5:​22, 23) Για τι εξηγίνας πιο λατσσές σο μανγκέλα τι βακερέλ τι αβέλ κάποιος πνευματικός τζενό, σκεφτίνεν ακαβά: Άμα εκ τζενό ισί λατσσό έμπορος, βακεράσα ότι λέσκι γκοντί τσσινέλα κι  μπουτί, ντα άμα εκ τζενό ενδιαφερίντιβελα ι Ντεβλέσκε πραγματένγκε βακεράσα ότι τθερέλα πι γκοντιάτε ο πνεύμας.

7. Σο βακερέλα η Γραφή ι πνευματικέ τζενένγκε;

⁷ Ο Ιησούς βακερντάς ότι ο πνευματικά τζενέ ισί χαρούμενα. Ο εδάφιος Ματθαίος 5:3 βακερέλα: «Ευτυχισμέ ισί οντουλά σο αγαβένα ότι τθερένα ανάγκη ο πνευματικά πράγματα, σόσκε η Βασιλεία σο ισί κο ουρανός ισί λένγκι». Ο εδάφιος Ρωμαίους 8:6 εξηγίνελα ότι άμα σκεφτίνασα σαρ ο Ιεχωβά, ανταβά επηρεάνελα αμαρί ζωή: «Άμα κάποιος τθερέλα συνέχεια πι γκοντιάτε ο σώμας, ο αποτέλεσμας κα αβέλ ο μεριπέ, αλλά άμα κάποιος τθερέλα συνέχεια πι γκοντιάτε ο πνεύμας, ο αποτέλεσμας κα αβέλ ζωή ντα ειρήνη». Άρα, άμα ισινάμ πνευματικά τζενέ μπορίνασα ακανά τι τθεράς ειρήνη ι Ντεβλέσαρ ντα αμαρέ νεαυτόσαρ ντα ι ελπίδα τι τζουβντιάς για πάντα.

8. Σόσκε μπορεί τι αβέλ δύσκολος τι αβάς ντα τι ατσσάς πνευματικά τζενέ;

⁸ Όμως, τζουβντιάσα εκχέ επικίνδυνε ντουνιάστε. Παντού υπαρχίντιβενα τζενέ σο να σκεφτίνενα σαρ ο Ντεβέλ, οτθάρ χρειαζίντιβελα μπαρί προσπάθεια για τι αρακχαβάς αμαρί γκοντί. Άμα να κα πφεράς αμαρί γκοντί με το τρόπος σκέψης ι Ιεχωβάσκο, ο τζενέ σο τθερένα πουμαρέ γκοντιάτε ο σώμας κα τσσουβέν αμαρέ γκοντιάτε πουμαρό τρόπος σκέψης. Σο μπορίνασα τι κεράς για μα τι επηρεάντιβας; Σαρ μπορίνασα τι αβάς πιο πνευματικά τζενέ;

9. (α) Σο κα βοηθίνελ-αμέν τι αβάς πνευματικά τζενέ; (β) Καλά λατσσέ παραδείγματα κα ντικχάς;

⁹ Σαρ εκ χουρντό χρειαζίντιβελα τι σικλιόλ πι νταντέσταρ ντα πι νταγιάταρ ντα τι ακολουθίνελ λένγκο παράδειγμας, αμέν-ντα χρειαζίντιβελα τι σικλιάς οντουλένταρ σο τθερένα λατσσί φιλία ι Ιεχωβάσαρ ντα τι ακολουθίνας λένγκο παράδειγμας. Αντικάς κα σικλιάς τι αβάς πνευματικά τζενέ. Οκιά μπάνταρ, όταν ντικχάσα ι τζενέν σο τθερένα πουμαρέ γκοντιάτε ο σώμας σικλιάσα σο μα τι κεράς. (1 Κορινθίους  3:​1-4) Κι Γραφή ισί εμ λατσσέ εμ γκεραλέ παραδείγματα. Για τι ντικχάς σο μπορίνασα τι σικλιάς μερικέ λατσσέ παραδειγματένταρ: κατά Ιακώβ, κατά Μαρία ντα κατά Ιησούς.

10. Σαρ σικαντάς ο Ιακώβ ότι ισινέ πνευματικός τζενό;

¹⁰ Η ζωή σο τθερένα μπουτ αμένταρ, μοιάζελα με τη ζωή του Ιακώβ σο να ισινέ εύκολη. Λέσκο πφραλ, ο Ησαύ, μανγκέλας τι μουνταρέλ-λες. Λέσκο σαστρό προσπαθιντάς παλάλ γιαβερέστε τι χουχαβέλ-λες. Όμως, ο Ιακώβ συνεχίνελας τι τθερέλ μπαρί πίστη κι υπόσχεση σο ντινάς ο Ιεχωβά κο Αβραάμ. Ο Ιακώβ αρακχαντάς λατσσές πι φαμιλί σόσκε τζανέλας ότι ο Ιεχωβά κα χρησιμοποιήνελας-λα για τι κερέλ τι αβέλ-πες μπαγιά οντιά σουκάρ υπόσχεση. (Γένεση 28:​10-15) Ο Ιακώβ να μουκχλάς ι τζενέν σο τθερένας πουμαρέ γκοντιάτε ο σώμας τι κερέν-λες τι μπιστρέλ ο υποσχέσεις ι Ιεχωβάσκε. Για παράδειγμας, ο Ιακώβ μολιντάς ι Ιεχωβάς τι σώνελ-λες κάνα νιωσάλο ότι κινδυνίνελας πι πφραλέσταρ. Βοβ προσευχισάλο: «Τούι βακερντάν: “Σίγουρα κα κεράβ τι τζαν λατσσές ο πράγματα τούκε ντα κα κεράβ τι προσαγγονίν τι αβέν [αζόμ μπουτ] σαρ ο κούμι ι ντεριαβάκο”». (Γένεση 32:​6-12) Ο Ιακώβ τθερέλας μπαρί πίστη κο υποσχέσεις κι Ιεχωβάσκε ντα σικαντάς-λες ανταβά με το τρόπος σο τζουβντιόλας.

11. Σαρ τζανάσα ότι η Μαρία ισινέ εκ πνευματική τζενί;

¹¹ Ακανά σκεφτίνεν ι Μαριά. Ο Ιεχωβά τραμπιντάς-λα τι αβέλ η ντάι ι Ιησούσκι επειδή ισινέ πνευματική τζενί. Διαβάνεν σο βακερντάς η Μαρία όταν γκιλί πι τζενέντε, κο Ζαχαρίας ντα κι Ελισάβετ. (Διαβάνεν Λουκάς 1:​46-55) Μπορίνασα τι ντικχάς ότι η Μαρία μανγκέλας ο Λάφι ι Ντεβλέσκο ντα τζανέλας λατσσές ο Εβραϊκές Γραφές. (Γένεση 30:​13· 1 Σαμουήλ 2:​1-10· Μαλαχίας 3:​12) Ατζέ-ντα κάνα η Μαρία ντα ο Ιωσήφ παντρισάλε, μπεσένας τι μπιάντιβελ ο Ιησούς για τι τθερέν σεξουαλικές σχέσεις. Λένγκε, ο διορισμός σο ντινάς-λεν ο Ντεβέλ ισινέ πιο  σημαντικός κατά επιθυμίες σο τθερένας. (Ματθαίος 1:​25) Επίσης, η Μαρία ντικχέλας προσεκτικά σο-ντα αβέλας-πες καζόμ μπαριόλας ο Ιησούς ντα ασουνέλας οντουλά σο σικλιαρέλας. Βόι «γκεραβέλας . . . σαρέ ανταλά λάφια αντρέ πι γκίστε». (Λουκάς 2:​51) Ισί ξεκάθαρος ότι ο υποσχέσεις σο ντινάας ο Ντεβέλ ι Μεσσιάσκε ισινέ μπουτ σημαντικές λάκε. Μπορίνασα τι μοιάζας κι Μαρία ντα τι προσπαθίνας τι κεράς πάντα ο θέλημας ι Ντεβλέσκο;

12. (α) Σαρ μοιάζελας ο Ιησούς πι Νταντέστε; (β) Σαρ μπορίνασα τι μοιάζας κο Ιησούς; (Ντικχ ι φωτογραφία σο ισί κι αρχή)

¹² Σαρέ κατά πνευματικά τζενέ σο τζουβντιλέ ποτές, ο Ιησούς ισί ο πιο λατσσό παράδειγμας. Καζόμ ισινέ κι πφουβ ντα κερέλας ο έργος, σικαντάς ότι μανγκέλας τι μοιάζελ πι Νταντέστε. Ο Ιησούς σκεφτίνελας, νιωθίνελας ντα κερέλας ο πράγματα σαρ ο Ιεχωβά. Κερέλας λέσκο θέλημας ντα ντέλας καν κο κανόνες λέσκε. (Ιωάννης 8:​29· 14:9· 15:​10) Για παράδειγμας, συγκρίνεν οντουλά σο βακερντάς ο προφήτης Ησαΐας για τη συμπόνια ι Ιεχωβάσκι οντουλέντζαρ σο βακερντάς ο Μάρκος για το αισθήματα ι Ιησούσκε. (Διαβάνεν Ησαΐας 63:9· Μάρκος 6:​34) Ισινάμ πάντα έτοιμοι, σαρ ο Ιησούς, τι σικαβάς συμπόνια οντουλένγκε σο χρειαζίντιβενα βοήθεια; Σαρ ο Ιησούς, κεράσα μπαρέ προσπάθειες για τι βακεράς ντα τι σικλιαράς ι γιαβερέν ο λατσσέ αμπέρια; (Λουκάς 4:​43) Ο πνευματικά τζενέ σικαβένα συμπόνια ντα προσπαθίνενα τι βοηθίνεν ι γιαβερέν.

13, 14. (α) Σο σικλιάσα πνευματικέ τζενένταρ αμαρέ ντιβεσέντε; (β) Βακερέν εκ παράδειγμας.

¹³ Αντιβές, υπαρχίντιβενα μπουτ πνευματικά πφραλά σο προσπαθίνενα μπουτ τι μοιάζεν κο Χριστός. Μπορεί τι ντικχάσα ότι κερένα ο έργος αντράλ πουμαρέ γκίσταρ, ότι ισί φιλόξενοι ντα ότι σικαβένα συμπόνια. Παρόλο σο νανέ τέλειοι, προσπαθίνενα μπουτ τι τθερέν λατσσέ ιδιότητες ντα τι κερέν οντουβά σο μανγκέλα λένταρ ο Ιεχωβά. Η Ρέιτσελ, εκ πφεν κατά Βραζιλία, βακερέλα: «Μπεϊντίναβας μπουτ ι μόδα. Οτθάρ, να ιριαβάβας-μαν μπουτ σεμνά. Αλλά όταν σικλιλόμ ι αλήθεια, μανγκάβας τι προσπαθίναβ τι αβάβ πνευματική τζενί. Παρόλο σο να ισινέ μάνγκε εύκολος τι αλλάναβ, ακανά ισινόμ πιο ευτυχισμέ ντα αρακχλόμ νόημας κι ζωή».

¹⁴ Η Ρεϊλίν κατά Φιλιππίνες τθερέλας εκ γιαβέρ πρόβλημας. Παρόλο σο ισινέ κι αλήθεια, μανγκέλας τι σπουδάνελ ντα τι αρακχέλ εκ λατσσί μπουτί. Καζόμ νακχέλας ο καιρός, ο πνευματικοί στόχοι να ισινέ λάκε αζόμ σημαντικοί. Βόι βακερέλα: «Αγαντόμ ότι κάτι λειπίνελας μι ζωγιάταρ, κάτι σο ισινέ μπουτ πιο σημαντικός μι μπουτιάταρ». Η Ρεϊλίν αλλαντάς ο τρόπος σο σκεφτίνελας ντα τσσουντάς ι υπηρεσία ι Ιεχωβάσκι πρώτα πι ζωγιάτε. Ακανά, τθερέλα εμπιστοσύνη κι υπόσχεση κι Ιεχωβάσκι σο ισί κο εδάφια Ματθαίος 6:​33, 34, ντα βακερέλα: «Ισινόμ σίγουρη ότι ο Ιεχωβά κα φροντίνελ-μαν!» Μπορεί τι τζανάσα πφραλέν αμαρέ εκκλησιάτε σο τθερένα ι ίδια σιγουριά. Όταν ντικχάσα σο κερένα για τι μοιάζεν κο Χριστός, μανγκάσα τι ακολουθίνας λένγκο λατσσό παράδειγμας.​—1 Κορινθίους 11:1· 2 Θεσσαλονικείς 3:7.

15, 16. (α) Σο χρειαζίντιβελα τι κεράς για τι αβάς σαρ ο Χριστός; (β) Σαρ μπορίνασα τι μουκχάς «ι γκοντί ι Χριστόσκι» τι επηρεάνελ-αμέν;

¹⁵ Σαρ μπορίνασα τι μοιάζας κο Χριστός; Ο εδάφιος 1 Κορινθίους 2:​16 βακερέλα ότι χρειαζίντιβελα τι τθεράς «ι γκοντί ι Χριστόσκι». Ο εδάφιος Ρωμαίους 15:5 βακερέλα αμένγκε τι τθεράς «ο ίδιος τρόπος σκέψης σο τθερέλας ο Χριστός Ιησούς». Για τι αβάς σαρ ο Χριστός χρειαζίντιβελα τι σικλιάς σαρ σκεφτίνελας, σαρ νιωθίνελας  ντα σαρ συμπεριφερίντιβελας. Ι Ιησούσκε, ο πιο σημαντικός πράγμας ισινέ λέσκι φιλία ι Ντεβλέσαρ. Άρα, άμα ισινάμ σαρ ο Ιησούς, μοιάζασα πιο μπουτ κο Ιεχωβά. Οτθάρ, ισί μπουτ σημαντικός τι σικλιάς τι σκεφτίνας σαρ ο Ιησούς.

¹⁶ Σαρ μπορίνασα τι σικλιάς τι σκεφτίνας σαρ ο Ιησούς; Λέσκε μαθητές ντικχένας-λες τι κερέλ θαύματα, ασουνένας-λες κάνα σικλιαρέλας μπουτέ τζενέν, παρατηρίνενας σαρ συμπεριφερίντιβελας σαβέ τι μανγκές τζενένγκε ντα σαρ οδηγίντιβελας κατά τρόπος σκέψης ι Ιεχωβάσκο. Βον βακερντέ: «Ισινάμ μάρτυρες σαρέ οντουλέ πραγματένγκε σο κερντάς». (Πράξεις 10:​39) Αντιβές, ναστί ντικχάσα ι Ιησούς. Αλλά τθεράσα ο Ευαγγέλια σο βοηθίνενα-αμέν τι γνωρίνας-λες μπουτ λατσσές. Κάνα διαβάνασα ντα σκεφτίνασα ο βιβλία Ματθαίος, Μάρκος, Λουκάς ντα Ιωάννης, σικλιάσα πιο λατσσές σαρ σκεφτίνελα ο Ιησούς. Ανταβά βοηθίνελα-αμέν τι “ακολουθίνας λέσκε βήματα πιστά” για τι τθεράς «ο ίδιος τρόπος σκέψης» σο τθερέλας βοβ.​—1 Πέτρου 2:​21· 4:1.

17. Σαρ βοηθίντιβασα άμα σκεφτίνασα σαρ ο Χριστός;

¹⁷ Καλά λατσσέ αποτελέσματα κα τθεράς άμα σκεφτίνασα σαρ ο Χριστός; Κάνα χάσα υγιεινός χαμπέ, αμαρό σώμας ζουράνιβελα. Αντικάς-ντα κάνα πφεράσα αμαρί γκοντί με το τρόπος σκέψης ι Χριστόσκο, αβάσα πνευματικά ζουρανέ. Σιγά σιγά, σικλιάσα σο κα κερέλας ο Χριστός κι κάθε περίπτωση. Αντικάς, μπορίνασα τι λας λατσσέ αποφάσεις σο κερένα ι Ντεβλές χαρούμενος ντα ντένα-αμέν πάκι συνείδηση. Νανέ ανταλά λατσσέ λόγοι για τι “ιριάς ι Κυριός, ι Ιησούς Χριστός”;​—Ρωμαίους 13:14.

18. Σαρ βοηθιντάς-τουμέν ανταβά μάθημας τι σικλιόν σαρ τι αβέν πνευματικά τζενέ;

¹⁸ Ανταβά μάθημας βοηθιντάς-αμέν τι αγαβάς σο μανγκέλα τι βακερέλ τι αβέλ κάποιος πνευματικός τζενό. Σικλιλάμ τζενένταρ σο ισινέ λατσσέ παραδείγματα ντα οδηγίντιβενας κατά άγιος πνεύμας. Επίσης, σικλιλάμ ότι άμα τθεράσα «ι γκοντί ι Χριστόσκι» βοηθίντιβασα τι σκεφτίνας σαρ ο Ιεχωβά ντα τι τθεράς λατσσί φιλία λέσαρ. Αλλά μπορίνασα τι σικλιάς γιαβερά-ντα πράγματα. Για παράδειγμας: Σαρ μπορίνασα τι τζανάς άμα ισινάμ πνευματικά ζουρανέ; Σο μπορίνασα τι κεράς για τι αβάς πιο ζουρανέ πνευματικά; Ντα σαρ επηρεάντιβελα αμαρί ζωή άμα ισινάμ πνευματικά τζενέ; Ο απαντήσεις κα ντικχάς-λεν κο γιαβέρ μάθημας.