Ontaphulelani Okhala Mutthu Oomunepani?
Mukhalaneke mupuwelo mmosaru, yowo orinawe Yesu Kristu.—AFILIPI 2:5.
ISIPO: 25, 5
1, 2. (a) Anna anceene ni arokora anoonela sai okhala mutthu a omunepani? (b) Makoho xeeni ootthuneya ninrowa ahu othokorerya mwaha ola?
MUROKORA mmosa a oCanada ohimmye wira okhala mutthu oomuunepani womphwanyiha ohakalala ni woomukhaliherya ophuka mixankiho sa mookumini mwawe. Munna mmosa a oBrasil yoowo ovirinhe iyaakha 23 nuumala othela, ohimmye wira okhala mutthu oomunepani woomukhaliherya owo ni mwaarawe okhalana etthoko yoohakalala. Munna mukina a oFilipina ohimmye wira wuupuwelela itthu sa omunepani woomphwanyiha oomaaleleya ni woomukhaliherya okhala vamosa ni anna ni arokora a makhalelo oovirikana.
2 Tthiri okhalana muupuwelo wa omunepani onniniphwanyiha mireerelo mwa inamuna sinceene. Nipakeke exeeni wira nikhalane muupuwelo wa omunepani ni ophwanya mareeliho awo? Yoopacerya, nihaana wiiwexexa ele Biibiliya onihimya awe sa atthu oomunepani yaawo yeettihiwa ni Munepa wa Muluku ni yaarina miyuupuwelo sintoko sa Yehova. Mwaha ola, ninrowa waakhula makoho mararu ootthuneya. (1) Ontaphulelani okhala mutthu oomunepani wala okhalana muupuwelo wa omunepani? (2) Matakiheryo xeeni anrowa onikhaliherya wunnuuherya mukhalelo ahu wa omunepani? (3) Moota xeeni wiimananiha wahu okhalana “mupuwelo mmosaru, yowo orinawe Yesu Kristu” onnikhaliherya aya okhala atthu oomunepani?
ONTAPHULELANI OKHALA MUTTHU OOMUNEPANI?
3. Moovarihana ni Biibiliya, onivirikana sai mutthu oneettihiwa ni erutthu awe ni, mutthu oomunepani?
3 Murummwa Paulo onninikhaliherya wiiwexexa moota ‘mutthu ontthara makhalelo awe pahi’ onvirikana awe ni ‘mutthu orina eroho [munepa] wa Muluku’. (Mmusome 1 aKorinto 2:14-16.) Atthu aneettihiwa ni erutthu aya “khanwerya wakhela itthu sinkhuma w’Eroho ya Muluku, mana anona wira itthu iyo ti s’ololo. Awo hatá khanwerya osuwela seiyo”. Moovirikana ni atthu awo, mutthu oomunepani onnitokosa “itthu sothene” ni oonnikhalana “ankhili a Kristu” yaawo anitaphulela omananiha wuupuwela sintoko Kristu. Paulo oonitumererya okhala atthu oomunepani. Mwa enamuna xeeni mutthu oneettihiwa ni erutthu awe onvirikana awe ni mutthu oomunepani?
4, 5. Mikhalelo xeeni anooniherya aya atthu aneettihiwa ni erutthu aya?
4 Mutthu oneettihiwa ni erutthu awe onuupuwela sai? Owo onnitakiha olumwenku ola wa nrima. Murummwa Paulo aahihimya mweettelo owo okhala “munepa yowo oniwettiha vano ale ahinimwiwelela Muluku”. (aÉfeso 2:2) Munepa owo onniwiiriha atthu anceene otakiha mweettelo wa atthu akina. Awo anivara itthu seiyo sinaasivela, moohicalela malamulo a Muluku. Atthu aneettihiwa ni erutthu aya, anuupuwelela itthu sa werutthuni, ovuwa, musurukhu, ni annoona idireitu saya okhala sootepa otthuneya ovikana itthu sotheene.
5 Mutthu oneettihiwa ni erutthu awe omusivela opaka itthu Biibiliya onihimya awe okhala ‘makhalelo otakhala’. (aGalasia 5:19-21) Epaphelo yoopacerya ya murummwa Paulo aalepenle awe maKristau a oKorinto, aahiromola itthu sikina anipaka aya atthu yaale aneettihiwa ni erutthu aya. Awo anninyakulihana, okumiherya okawanyeya, waatumererya akhwaaya okhala anammwareya, oroihana omilattuni, khanttittimiha okhulupale, annithokorerya eyoolya ni eviinyu okhala etthu yootepa otthuneya mookumini mwaya. Awo khanikhootta okathi aneehereriwa aya opaka itthu soohiloka. (Miruku 7:21, 22) Yuda aahimmye wira atthu aneettihiwa ni erutthu aya anniyeleela munepa wa Yehova.—Yuda 18, 19.
6. Ninrowa omusuwela sai mutthu oomunepani?
6 Moovirikana ni mutthu oneettihiwa ni erutthu awe, mutthu oomunepani onnivaha efaita waataana wawe ni Muluku. Mutthu oomunepani onneemya weettihiwa ni munepa wootteela wa Muluku ni onnimutakiha Yehova. (aÉfeso 5:1) Owo onnimananiha wiixutta muupuwelo ni moonelo wa Yehova. Owo onnimukupali Muluku vamosa ni malamulo awe. Moovirikana ni mutthu oneettihiwa ni erutthu awe, mutthu oomunepani onnittittimiha malamulo a Yehova ni onneettela mahiku otheene. (Esalimo 119:33; 143:10) Owo ‘khonettihiwa ni makhalelo otakhala’ ni onnimananiha opaka itthu eettihiwaka ni munepa wootteela. (aGalasia 5:22, 23) Wira nisuwele ele entaphulela aya okhalana muupuwelo wa omunepani, nrowe nuupuwele nlikanyiho nla: Mutthu oomusuwela nakoso oniiriwa mulipa-a-nakoso, nto moolikana, mutthu onivaha efaita omukokhorela wawe Muluku onnihimmwa okhala mutthu orina muupuwelo womunepani.
7. Exeeni Biibiliya onihimya awe sa mutthu orina muupuwelo wa omunepani?
7 Yesu aahimmye wira atthu arina muupuwelo womunepani toohakalala. Luka 11:28 onihimya so: “Òreriwa toko t’ale aniwa molumo a Muluku, enettela”. ARoma 8:6 onnitthokiherya wira ekumi ahu enlipa ni wuupuwelela miyuupuwelo sa Yehova. Yoolepa eyo enihimya so: “Ophavela sintthunaya makhalelo òtakhala, onniphwanyiha okhwa: vano ophavela sintthunaya Eroho, onniphwanyiha ekumi ni murettele”. Nto nakhalana muupuwelo wa omunepani, nnookhalana murettele ni Muluku vano, murima woomaaleleya, ni nnookhalana nlipelelo na ophwanya ekumi yoohimala.
8. Xeeni vanixankiha aya ovikaniha okhala mutthu omunepani?
8 Tthiri ninkhala olumwenku wootakhala. Mwaha wowaattamela atthu ahinttittimiha Nuulumo na Muluku, nintthuneya wiimananiha vanceene wira nikhapelele muupuwelo ahu. Naahisarihe muupuwelo ahu malakiheryo a Yehova, olumwenku ola onooniiriha omakelaka wuupuwelela mweettelo woohiloka ni miyuupuwelo soohiloka. Nipakeke exeeni wira eyo ehiraneye? Ninrowa wunnuwa sai omunepani?
WIIXUTTA NI MATAKIHERYO OOLOKA
9. (a) Ontaphulelani okhalana muupuwelo wa omunepani? (b) Matakiheryo xeeni ooloka ninrowa ahu othokorerya?
9 Okathi Yesu aari awe mwaana aahaana wiixuttihiwa ni anamuyari awe ni otakiha ntakiheryo naya nooloka. Nave hiyo nihaana wiixutta naatakihaka ale yaatanne ni Yehova. Eyo enoonikhaliherya oweha moota wookhalana muupuwelo wa omunepani. Tthiri hiyo ninniixutta okhootta waatakiha atthu aneettihiwa ni murima aya ni opaka itthu soohikhalela. (1 aKorinto 3:1-4) Biibiliya onniromola matakiheryo ooloka ni oohiloka aatthu. Nrowe nithokorerye matakiheryo makina ooloka nniixutta ahu ni Yakobe, Maria, ni Yesu.
Exeeni nniixutta ahu ni ntakiheryo na Yakobe? (Nwehe ittima 10)
10. Exeeni enooniherya wira Yakobe aari mutthu oomunepani?
10 Moolikanasa ni anamunceene a hiyo, makhalelo a Yakobe khiyaakhweya. Muulupale awe, yoowo aitthaniwa Esawu, aaphavela omwiiva. Atatawe yaahimoototha. Masi hata vari siiso Yakobe ahivikaniha waamini itthu Yehova aamuleihenrye awe Abrahamu. Yakobe aanisuwela wira emusi awe yaamwiirela mpantta wiiraneya wa yooleiherya eyo yoohakalaliha, nto owo aanivaha efaita eparakha eyo. (Maphattuwelo 28:10-15) Yakobe kheemerenrye wira mikhalelo soohiloka sa atthu a okathi awe, simwiirihe oliyala sooleiherya sa Yehova. Mwa ntakiheryo, Yakobe aahinvekela Yehova wira omukhaliherye ohiirihiwe etthu yootakhala ni muulupale awe. Owo aahilompa so: “Nyuwo mokihimerya wira: ‘Kinimorerihani, kinimwattiha osùlu anyu ntoko mihava sa mphareya’.” (Maphattuwelo 32:7-13) Yakobe aanaamini vanceene sooleiherya sa Yehova ni aanooniherya eyo ni mweettelo awe.
Exeeni nniixutta ahu ni ntakiheryo na Maria? (Nwehe ittima 11)
11. Ninsuwela sai wira Maria aahikhalana muupuwelo womunepani?
11 Vano nrowe nimuupuwele Maria. Yehova aahimuthanla yena wira okhale maama awe Yesu, mwaha woowi Maria aahikhalana muupuwelo womunepani. Nrowe nisome etthu Maria aalavunle awe okathi aaronwe awe omuxukurya Zakariya ni Elizabeti. (Mmusome Luka 1:46-55.) Ninniweha wira Maria aanisiveliwa ni Nuulumo na Muluku ni aanisuwela saana Soolempwa sa eHeeberi. (Maphattuwelo 30:13; 1 Samuweli 2:1-10; Malakhiya 3:12) Nto hata nuumala Maria otheliwa ni Yosefe, awosa yaahimulipelela Yesu oyariwa wira epaceryeke orupihana. Awo yaanivaha efaita yuulupale muritti yaarummwale aya ni Muluku ovikana soophavela saya. (Matheyo 1:25) Nave Maria aaniweha itthu samwiiraneela Yesu okathi annuwa awe ni aaniwiriyana itthu Yesu aixuttiha awe. Owo ‘antthokelela itthu iye sothene mmurimani mwawe’. (Luka 2:51) Vanooneya wira owo aanivaha efaita yooleiherya ya Muluku voohimya sa Mesiya. Niireke nnoowerya omutakiha Maria ni opaka itthu sinimusivela Muluku okathi wotheene?
12. (a) Moota xeeni Yesu aamutakinhe awe Tiithi awe? (b) Ninrowa omutakiha sai Yesu? (Nwehe elatarato yoopacerya.)
12 Eriyari ya atthu otheene atonko okhala, Yesu tori ntakiheryo nootepa oloka na mutthu orina muupuwelo womunepani. Okathi aavara awe muteko awe valaponi, owo aahooniherya wira aaniimananiha omutakiha Tiithi awe. Miyuupuwelo sawe ni miteko sawe saanimusivela Yehova. Owo aanipaka yootthuna ya Muluku ni aanittittimiha malakiheryo awe. (Yohani 8:29; 14:9; 15:10) Mwa ntakiheryo, mulikanyiherye enamuna Yesaya aatthokihenrye awe oreera murima wa Yehova ni enamuna Marko onitthokiherya awe miyuupuwelo sa Yesu. (Mmusome Yesaya 63:9; Marko 6:34.) Niireke ninnimutakiha Yesu okathi wotheene naareerelaka murima atthu yaale anitthuneya okhaliheriwa? Moolikanasa ni Yesu, niireke ninniluttuweliwa olaleerya ni wiixuttiha ihapari sooreera? (Luka 4:43) Mutthu orina muupuwelo wa omunepani onnoona othunku ni onnaakhaliherya akhwaawe.
13, 14. (a) Exeeni nniixutta ahu ni atthu arina muupuwelo womunepani olelo-va? (b) Nvahe ntakiheryo.
13 Olelo-va, aakhala anna anceene ni arokora arina muupuwelo womunepani aniimananiha omutakiha Kristu. Nto ninniweha wira anna awo anniluttuweliwa olaleerya, owaakhela aletto, ni annoona othunku. Hata awo ehikhanle oomalela, anniimananiha vanceene wunnuuherya mikhalelo sooloka ni opaka itthu Yehova onaavekela awe. Murokora mmosa a oBrasil oniitthaniwa Rachel ohimmye so: “Khalai waanikisivela owara ikuwo saakhumenle ninaano. Nto eyo yaahiiriha mawarelo aka ohikhala ooloka. Masi wiixutta ekeekhai wookiiriha wiimananiha vanceene okhala mutthu oomunepani. Opaka marukunuxo khahiyo vaari vookhweya, masi koophwanya ohakalala ni yoolipelela yekeekhai ya muhoolo”.
14 Murokora mmosa oniitthaniwa Reylene, a oFilipina, aahikhalana muxankiho mukina. Hata nuumala wiixutta ekeekhai, owo aahikhalana yoolukama ya ophavela osoma Universidade ni ophwanya muteko oniliviwa musurukhu munceene. Nuuvira okathi, aahipacerya ohivaha efaita soolukama sa omunepani. Owo onihimya so: “Kaahipacerya oweha wira yookhala etthu yaahala mookumini mwaka, etthu eyo yaari yootepa otthuneya ovikana muteko aka”. Reylene aahirukunuxa muupuwelo awe ni aahipacerya othokorerya muteko wa Yehova okhala wootthuneya mookumi mwawe. Vano owo onniroromela yooleiherya ya Yehova eri Matheyo 6:33, 34, ni onihimya so: “Kookupalixa wira Yehova onookikhapelela!” Woonasa wene munnaasuwela anna ni arokora mmulokoni mwanyu arina moonelo mmosaru. Vaavo ninweha ahu moota awo animutakiha aya Yehova, nihaana otthara ntakiheryo naya.—1 aKorinto 11:1; 2 aTesalonika 3:7.
OKHALANA “ANKHILI A KRISTU”
15, 16. Exeeni nintthuneya ahu opaka wira nilikaneke ni Kristu? (b) Ninrowa weemya sai weettihiwa ni “ankhili a Kristu”?
15 Ninrowa omutakiha sai Kristu? AKorinto oopacerya 2:16 onihimya wira nookhalana “ankhili a Kristu”. AFilipi 15:5 onninuupuxerya wira nihaana okhalana “mupuwelo mmosaru, yowo orinawe Kristu”. Wira nilikaneke ni Kristu nihaana wiixutta moota owo onuupuwela awe, ni miteko sawe. Yesu aanithokorerya waataana wawe ni Muluku okhala wootthuneya ovikana itthu sotheene. Nto omutakiha Yesu khahiyo paahi onnikhaliherya omusiveliha Yehova. Ti maana aya vanitthuneya aya wuupuwelela itthu sintoko Yesu iira awe.
16 Ninrowa okhalana sai muupuwelo sintoko wa Yesu? Atthareli awe yaaninweha opakaka miiriirya, yaaninwiriyana iixuttihaka muttitthi wa atthu, yaaniweha moota aathokorerya awe atthu a makhalelo otheene, ni yaaniweha moota eettihiwa awe ni muupuwelo wa Yehova. Awo yaahimmye so: “Hiyo n’ànamona a sothene sìralyawe”. (Miteko 10:39) Ekeekhai wira olelo-va, hiyo khaninwerya onweha Yesu. Masi nookhalana soolempwa sa Evangelyo, seiyo sinnikhaliherya omusuwela saana. Okathi ninsoma ahu ni wuupuwelela iliivuru sa Matheyo, Marko, Luka, ni Yohani ninniixutta moota wootakiha muupuwelo wa Yesu. Eyo enninikhaliherya ‘otthara nvinr’awe’ wira nikhalane “muupuwelo mmosa-ru” owo aarina awe.—1 Pedru 2:21; 4:1, Waataana wa Naanaano.
17. Wuupuwela sintoko Kristu onnikhaliherya sai?
17 Ninrowa ophwanya mireerelo xeeni akhala wira nnimuupuwela sintoko Kristu? Sintoko olya oniiriha aya erutthu ahu okhala yoolipa, nave osarya muupuwelo ahu ni muupuwelo wa Kristu, onninikhaliherya okhala oolipa omunepani. Vakhaani-vakhaani nnoowerya osuwela etthu Yesu aakhanle awe oopaka ni khula muxankiho. Nuumala-vo nnookhala oolikaneene wira nipake soothanla sooloka seiyo sinrowa omuhakalaliha Muluku, ni oniphwanyiha yowuupuxerya ya murima yooloka. Niireke khamunikupali wira vannireerela otthara malakiheryo anihimya wira “munware Yesu akristu Pwiy’ahu”?—aRoma 13:14.
18. Exeeni mwiixuntte anyu voohimya sa okhala mutthu orina muupuwelo womunepani?
18 Mwaha ola woonikhaliherya wiiwexexa ele enitaphulela aya okhalana muupuwelo womunepani. Nihiixutta matakiheryo ooloka a atthu yeettihiwa ni munepa wootteela. Nave nihiixutta wira okhalana “ankhili a Kristu” onninikhaliherya wuupuwela sintoko Yehova onuupuwela awe ni waataana nuuwo. Masi sookhala itthu sikina nikhanle ahu oowiixutta. Mwa ntakiheryo: Exeeni enrowa onikhaliherya osuwela akhala wira naatthu oolipa omunepani? Nipakeke exeeni wira nilipihe omunepani wahu? Moota xeeni okhala mutthu oomunepani onnikhaliherya aya? Makoho ala animwaakhuliwa ni mwaha onittharelana.
