Kunyima te che twakunyonga mumu lia yize twakutanga ha A-Hepreu 12:16. Versu yino yinambe ngwo, Esau ‘walelesele yuma yisandu’ chocho yalanjisa kuli Yakomba “chiyulo chenyi cha mwana mutangu, mumu lia chimwe kulia.” Kashika twanyongene ngwetu, muze Yakomba atambwile “chiyulo cha mwana mutangu” chino kachingile hanga apwe kalamba wa Mesaya.—Mateu 1:2, 16; Luka 3:23, 34.

Alioze muze twalilongesa kanawa sango jikwo ja Mbimbiliya, jasolola ngwo, mutu te katambile kupwa mwana mutangu mba apwe kalamba wa Mesaya. Tutalenu jimwe sango jacho:

Mwana mutangu wa Yakomba ni Liya te Rupene, nawa Yakomba ni Rakele mwano mutangu te Yosefwe. Muze Rupene alingile utanji, iye yatokesa chiyulo cha kupwa mwana mutangu, chocho chiyulo chacho yachihana kuli Yosefwe. (Uputukilo 29:31-35; 30:22-25; 35:22-26; 49:22-26; 1 Sango ja Mianangana 5:1, 2) Chipwe chocho, Mesaya kakejile mu chisemuko cha Rupene hanji cha Yosefwe. Iye kejile mu chisemuko cha Yunda mwana wamuchiwana wa Yakomba ni Liya.—Uputukilo 49:10.

Luka 3:32 unahanjika hali tulamba akwo atano a Masaya, nawa hita umwe wa kuli ayo kota kapwile mwana mutangu. Chakutalilaho, Mboaze te tato ya Opete, nawa Opete te tato ya Yese.—Rute 4:17, 20-22; 1 Sango ja Mianangana 2:10-12.

Ndawichi kakapwile mwana mutangu wa Yese. Kapwile kasulasongo hakachi ka ana nake. Alioze Mesaya kejile mu chisemuko cha Ndawichi. (1 Samuele 16:10, 11; 17:12; Mateu 1:5, 6) Chizechene nawa, kalamba wa Mesaya wasulileho te Solomone, chipwe chocho,  iye kakapwile mwana mutangu wa Ndawichi.—2 Samuele 3:2-5.

Chino kuchalumbunukine ngwo kupwa mwana mutangu te kuchishi ni ulemu. Mwana mutangu kapwile ni kutambula yiteli yize te ana akwo keshi kuyitambula. Kanji-kanji te kakupwa mutu wamuchiali mu usoko, nawa te kakutambula yihanda yiali ha chihinga.—Uputukilo 43:33; Shimbi Yamuchiali 21:17; Yoshua 17:1.

Alioze chiyulo chize te akwete mwana mutangu mahasa kuchihana kuli mwana wa lunga mweswawo. Muze Apalahama ahumine Ishemali, chiyulo chenyi cha mwana mutangu, yachihana kuli Izake. (Uputukilo 21:14-21; 22:2) Ngwe chize hitwamba kulu, chiyulo cha mwana mutangu chize apwile nacho Rupene kachihanyine kuli Yosefwe.

Mba yika postolo Paulu ambile kwamba ha A-Hepreu 12:16? Twakutangaho ngwo: “Kanyamenu niumwe kanda alinga utanji, hanji kulelesa yuma yisandu, ngwe Esau, yoze walanjishile chiyulo chenyi cha mwana mutangu hamukunda wa chimwe kulia.”

Hano, Paulu kakahanjikile hakutwala kuli tulamba twa Mesaya. Alioze, te kanahane utowezo kuli akwa-Kristu. Iye yaalweza ngwenyi: “Lingilenu molu jenu majila alulama . . . kuchina niumwe ahone vumbi lia Zambi.” Chaluyinda yino te muyilingiwa nyi ayo malinga utanji. (A-Hepreu 12:12-16) Hachino, ayo te mapwa ngwe Esau, yoze ‘walelesele yuma yisandu’ mumu kazangile kukuchisa usolo wenyi.

Kulita ni mianda ya ha mashimbu jacho, Esau katambile kuhana chitapo kuli Yehova. (Uputukilo 8:20, 21; 12:7, 8; Yombi 1:4, 5) Alioze Esau yalihulikila ha usolo wenyi mwene, chocho yalanjisa chiyulo chenyi cha mwana mutangu mumu lia chimwe kulia. Kota Esau kafupile kwehuka lamba lize Yehova ambile ngwenyi munyachi wa Apalahama te muumona. (Uputukilo 15:13) Iye kasolwele nawa ngwenyi te keshi kulemesa yuma yisandu muze ambachile mapwo waze te keshi kuwayila Yehova, chuma chize chanehene chinyengo hali yisemi jenyi. (Uputukilo 26:34, 35) Iye kalisele chinji ni Yakomba yoze wasele shindakenyo hanga ambate kavumbi ka Zambi wamwenemwene.—Uputukilo 28:6, 7; 29:10-12, 18.

Yika sango jino ja Mbimbiliya jinatulongesa hakutwala kuli tulamba twa Mesaya? Amwe kapwile ana atangu, akwo ka. Chino chapwile chikuma chize A-Yunda te anyingika kanawa nawa te kakuchitayiza. Kuchi tunachinyingika? Mumu kapwile ni kutayiza ngwo, Kristu te mejila mu munyachi wa Ndawichi kasulasongo wa Yese.—Mateu 22:42.