A so u be e denki fosi te u be luku san sikiifi a Hebrewsama 12:16. A tekisi taki, a di Esau ’á be abi lesipeki gi santa sani’, meke a gi Yakopu „a leti di a be abi enke fosi pikin, fu wan peeti nyanyan ede”. A sani ya be e meke u denki taki a di Yakopu fende a ’leti fu fosi pikin’, meke a fende a gaandi fu toon wan afo fu a Mesiyas.​—Mateyesi 1:2, 16; Lukasi 3:23, 34.

Ma baka di u ondoosuku taa pisi fu Beibel, u si taki a ná den fosi manpikin wawan be e toon wan afo fu a Mesiyas. Meke u luku wantu fu den toli ya:

A fosi manpikin fu Yakopu anga Lea, a Ruben. A fosi manpikin fu Yakopu anga Lakeli, a Yowsefu. Ma di Ruben á tyai enseefi bun, a lasi a leti di a be abi enke fosi manpikin. A Yowsefu fende a leti fu de fosi manpikin (Genesesi 29:31-35; 30:22-25; 35:22-26; 49:22-26; 1 Koloniki 5:1, 2). Ruben anga Yowsefu á toon afo fu a Mesiyas. A Yuda, du fu fo manpikin fu Yakopu anga Lea be toon wan afo fu a Mesiyas.​—Genesesi 49:10.

Lukasi 3:32 e taki fu feifi afo fu a Mesiyas. A gei ala den sama ya, a ná be fosi pikin fu den mma anga den dda. Bowas a be Obed dda. Obed a be Isai dda.​—Rut 4:17, 20-22; 1 Koloniki 2:10-12.

David a ná be a fosi pikin fi en dda Isai. Neen a be lasiti wan fu den aitin boi fi en dda. Ma toku David a be wan afo fu a Mesiyas (1 Samuweli 16:10, 11; 17:12; Mateyesi 1:5, 6). Salomo seefi a ná be fosi pikin  fu David, toku enseefi be toon afo fu a Mesiyas.​—2 Samuweli 3:2-5.

Dati á wani taki den fosi manpikin á be e fende nawan sani. Den be abi gaandi di den taa pikin á be abi. Na a fosi manpikin be e toon a edeman fu a famii. A be e fende gudu moo den taa pikin tu.​—Genesesi 43:33; Deitolonomi 21:17; Yowsuwa 17:1.

Ma wan taa manpikin be sa fende den leti fu a fosi manpikin tu. Di Abalaham sende Ismayeli gwe, a Isaki be fende den leti di wan fosi manpikin abi (Genesesi 21:14-21; 22:2). Enke fa u be si kaba, a Yowsefu be fende den leti di Ruben be abi.

Ma san Pawlesi be wani taki di a sikiifi Hebrewsama 12:16? Ape sikiifi taki: „U mu luku bun fu sama di e libi wan hululibi á de a wi ini. Wi á mu toon sama di ná abi lesipeki gi santa sani enke Esau. Bika a be seli a leti di a be abi enke fosi pikin, fu wan peeti nyanyan ede.”

A ná kai Pawlesi be e kai den nen fu den afo fu a Mesiyas na a pisi ya. A wasikoi a be e wasikoi den Kelesten fu a ten de. A taigi den taki den be mu ’tan seeka a pasi di den e waka’. A be taigi den tu fu ’luku bun fu den á du sani di o meke Gadu á soi bun-ati gi den moo’. Efu den be e libi wan hululibi Gadu á be o soi den bun-ati moo (Hebrewsama 12:12-16). Efu den be e libi wan hululibi, da den be de enke Esau. A á be „abi lesipeki gi santa sani”, fu di a be wani du san a fii.

Aini a ten de sama be gwenti tyai ofaandi gi Yehofa. Kande Esau be abi a gaandi ya tu (Genesesi 8:20, 21; 12:7, 8; Yopu 1:4, 5). Ma a fu di Esau be e pakisei enseefi namo, meke a seli a gaandi fi en fu wan peeti nyanyan. Esau be sabi taki den bakapikin fu Abalaham be o pina enke fa Yehofa be taki. Kande a fu a sani ya ede a á be wani den leti fu a fosi manpikin (Genesesi 15:13). Esau du ete wan sani di e soi taki a á be e lesipeki santa sani. A toow anga tu uman di á be e dini Yehofa. A sani ya meke tyali kisi en mma anga en dda (Genesesi 26:34, 35). Esau á be de enke en baala Yakopu, di toow anga wan uman di be e dini a tuu Gadu.​—Genesesi 28:6, 7; 29:10-12, 18.

San den tekisi ya e leli u fu den afo fu a Mesiyas? Son wan fu den a be fosi manpikin, ma son wan a ná be fosiwan. Den Dyu be sabi a sani ya. Den be e lesipeki a sani ya tu. Fa u du sabi? U sabi a sani ya fu di den be e biibi taki a Mesiyas be o de wan bakapikin fu David, a lasiti manpikin fu Isai.​—Mateyesi 22:42.